Ideidawehn Elen Mour Me Keieu Mwahu!

“Eri, ni mour, de ni mehla, sapwellimen Kaun-o kitail.”​—ROM 14:8.

1. Dahme Sises ketin padahngki duwen mour me keieu mwahu?

 SIOHWA kupwurki kitail en ahneki mour me keieu mwahu. Aramas akan kin mourki soangsoangen mour ahpw ahl tehieu me keieu mwahu. Mour me keieu mwahu iei en mour pahrekiong Mahsen en Koht oh sukuhl sang sapwellime Ohl, Sises Krais. Sises ketin padahkihong sapwellime tohnpadahk ko en kaudokiong Koht ni mehlel oh mweidohng sapwellimen Koht manaman en kahluwa arail kaudok. E ketin kehkehlingkihong irail en katohnpadahk. (Mad. 28:19, 20; Sohn 4:24) Kitail kin kaperenda Koht oh ahneki Sapwellime kapai sang ni atail ahneki mour me kin pahrekiong en Sises padahk kan.

2. Ia duwen me tohto arail mwekidki rohng en Wehio ni mwehin wahnpoaron ko? Ia wehwehn ideidawehn “Ahl en Kaun-o”?

² Ni ahnsou me aramas aktikitik kan kin ale padahk mehlel, kekeirda oh papidaisla, kitail perenki ndaiong irail, “Se kasamwo kumwail en iang kiht ideidawehn elen mour me keieu mwahu!” Ni mwehin wahnpoaron ko, aramas kid kei me kohsang wehi teikan ale padahk mehlel oh kin kasalehiong meteikan arail poadidiong Koht sang ni arail papidaisla. (Wiewia 2:41) Irail tepin tohnpadahk kan kin ideidawehn “Ahl en Kaun-o.” (Wiewia 9:2; 19:23) Lepin lokaia wet me konehng pwehki irail kan me kin idawehn Krais kin tengediong elen mour me kin pidada arail pwoson Sises Krais oh alasang sapwellime mehn kahlemeng.​—1 Pit. 2:21.

3. Dahme kahrehda sapwellimen Siohwa aramas akan kin papidaisla? Aramas depe papidaisla erein sounpar eisek samwalahr ko?

³ Doadoahk en katohnpadahk kin mwadangala ni imwin rahn pwukat oh met kin wiawi nan sahpw daulih 230. Erein sounpar eisek samwalahro, daulih aramas rierar isilopw me wiahda arail pilipil en papah Siohwa oh kasalehda me re inoukihong Koht arail mour sang ni arail papidaisla. Met wehwehki me aramas limekid kin papidaisla nan wihk koaros! Arail wiahda pilipil en papidaisla kin poahsoankihda arail limpoakohng Koht, loalokongkihla iren Paipel kan, oh pwoson dahme irail sukuhlki. Papidais kin wia mwekid kesempwal ehu nan atail mour, pwehki e kin wia kilelepen tepin atail nanpwungmwahu rehn Siohwa. E pil kasalehda atail kin kamehlele me Koht pahn ketin sewese kitail en papah ih ni lelepek, duwehte e kin ketin sewese sapwellime kan en mahs ren kekeid nan sapwellime ahl.​—Ais. 30:21.

 Dahme Kahrehda Papidais Kesempwal?

4, 5. Ia ekei kapai kan oh kamwahu kan me kohsang papidais?

⁴ Mwein ke kin onopki duwen Koht, wiahda wekidekla kan nan omw mour, oh met ke wiahla sounkalohk men me saikinte papidais. Omw kekeirda kin warohng kaping. Ahpw ke inoukihongehr Koht omw mour nan kapakap oh ke kin kasikasik en papidaisla? Sang ni omw kin onop Paipel, met ke eseier me en kapinga Siohwa iei me keieu kesempwal nan omw mour, a kaidehn en kaperenda pein kowe de kepwehpwehla. (Wadek Melkahka 148:11-13; Luk 12:15) Eri, ia ekei kapai kan oh kamwahu kan me kohsang papidais?

⁵ Nin duwen Kristian me inoudahr, ke pahn ahneki kahrepe ehu me keieu katapan. Ke pahn peren pwehki ke kin wia kupwuren Koht. (Rom 12:1, 2) Sapwellimen Siohwa manaman pahn seweseiuk en kakairada irair kan me duwehte meleilei oh pwoson. (Kal. 5:22, 23) Koht pahn ketin sapeng omw kapakap kan oh kapaiada omw nannanti ken peikiong sapwellime Mahsen. Ke pahn perenki omw doadoahk en kalohk, oh omw kin mourki ahl me Koht kupwurki pahn kakehlaka omw koapworopwor en mour soutuk. Patehng met, en inoukihong Koht omw mour oh papidaisla pahn kasalehda me ke uhdahn men wiahla emen Sounkadehdehn Siohwa.​—Ais. 43:10-12.

6. Dahme atail papidais kin kasalehda?

⁶ Sang ni atail inoukihong Koht atail mour oh papidaisla, kitail kin kasalehiong meteikan me Siohwa sapwellimankin kitail. Wahnpoaron Pohl ntingihdi: “Sohte emen kitail kin momourkihte pein ih, oh pil sohte emen kitail kin mehkihla pein ih; pwe ni atail kin momour, eri, kitail kin momour pwehki Kaun-o; oh ni atail kin mehla, eri, kitail kin mehla pwehki Kaun-o. Eri, ni mour, de ni mehla, sapwellimen Kaun-o kitail.” (Rom 14:7, 8) Koht kin ketin kawauwih kitail ni eh ketikihong kitail saledek en wiahda pilipil. Ni atail koasoanehdi teng en rapahki mour wet pwehki kitail poakohng Koht, kitail kin kaperenda ih. (Lep. Pad. 27:11) Atail papidais kin wia kasalepen atail inou ong Koht oh pil kehsehki meteikan me Siohwa iei me kin ketin kaun kitailda. E kin kasalehda me kitail kin uhki sapwellime pwung en kaunda lahng oh sampah. (Wiewia 5:29, 32) Pwehki met, Siohwa ketin ieiang kitail. (Wadek Melkahka 118:6.) Papidais pil kin ritingadahng kitail ahl ehu pwehn ale kapai tohto teikan ahnsou wet oh pil ahnsou kohkohdo.

Irail kan me Papidaisla Kin Paiekihda Pirien Limpoak Ehu

7-9. (a) Dahme Sises ketin inoukihong irail kan me pwilikihdi soahng koaros oh idawehn ih? (b) Ia duwen sapwellimen Sises inou me kileldi nan Mark 10:29, 30 eh pweidahr?

⁷ Wahnpoaron Piter patohwanohng Sises: “Maing, iet kiht me keselahr at mehkoaros oh ideidawehn komwi; eri, dahme pahn pwaisat?” (Mad. 19:27) Piter men ese dahme pwaise oh pwais en sapwellimen Sises tohnpadahk teikan ni ahnsou kohkohdo. Pwehn kihong arail ahnsou laud ong doadoahk en kalohki Wehio, irail  tounmeteikilahr soahng kesempwal kan. (Mad. 4:18-22) Dahme Sises ketin inoukihong irail?

⁸ Duwehte nan pwuhken Mark, Sises ketin kasalehda me sapwellime tohnpadahk kan pahn wiahla kisehn pirien ehu. E mahsanih: “Mehmen me pahn mweidala imwe, de rie kan, de ine de seme de nah seri kan, de sapwe, pwehki ngehi oh pil rongamwahu, e pahn ale me laudsang nan mouren dih wet. E pahn ale pahn pak epwiki ni imwe, ni rie kan, ni ine, ni nah kan, nin sapwe​—pil ni kamakam akan. A nan mour me pahn kohdo, e pahn ale mour soutuk.” (Mark 10:29, 30) Nanpwungen Kristian en mahs akan, Lidia, Akwila, Persila, oh Kaius kin kihda ‘imwarail’ oh pil wiahla “rie kan, de ine” ong iengerail me pwoson kan, duwen me Sises ketin inoukidahr.​—Wiewia 16:14, 15; 18:2-4; 3 Sohn 1, 5-8.

⁹ Dahme Sises mahsanih kin uhdahn pweida nan atail ahnsou. ‘Sapwarail’ kan me sapwellime tohnpadahk kan kin pwilikihdi kin wehwehki doadoahk de pesines kan me irail tohto, duwehte misineri kan, irail kan me kin doadoahk nan Bethel, irail kan me kin kauwada wasahn kaudok kan nan sampah pwon oh pil meteikan, kin pwilikihdi pwehn kalaudehla arail doadoahk ong Wehio nan sahpw teikan. Pwehn dehr nohn kedirepwkihla arail irair en mour, tohto riatail kan kin keseu sang imwarail kan, oh kitail kin perenki rong ia duwen Siohwa eh kin ketin apwalih irail oh ia duwen arail papah ih kin kaperenda irail. (Wiewia 20:35) Patehng met, koaros sapwellimen Siohwa ladu kan me papidaisla kak paiekihda arail “rapahki mahs Wehin Koht oh dahme e kin ketin kupwurki” oh wia kisehn pirien en Kristian ehu nan sampah pwon.​—Mad. 6:33.

Poadoandoarla nan “Wasahn Ruk”

10, 11. Ia wehwehn “wasahn ruk rehn KAUN-O”? Ia duwen atail kak kousoanla wasaht?

¹⁰ Omw inoukihong Koht omw mour oh papidaisla kin kihong uhk pil ehu kapai kaselel, iei en paieki kousoan nan “wasahn ruk rehn KAUN-O.” (Wadek Melkahka 91:1.) Ia wehwehn met? Met kin wehwehki en rapahki de en pidelong nan wasa ehu me ni karasaras wia wasahn perepe ehu, de irair ehu, wasa me kin pere kitail sang mehkan me kak kauwehla atail nanpwungmwahu rehn Koht. Irail kan me sohte kin likih Koht sohte ese duwen wasaht. Ni atail kin mour pahrekiong atail  inou oh koapworopworki Siohwa, met kin duwehte atail kin patohwanohng ih: “Komwi me soundoarepei oh silepei. Komwi me ei Koht; me I kin likih.” (Mel. 91:2) Siohwa Koht kin ketin wiahla atail wasahn perepe mwahu. (Mel. 91:9) Sohte wasa ehu me mwahusang wasahn ruk wet.

¹¹ En kousoanla nan sapwellimen Siohwa “wasahn ruk” pil kin wehwehki me kitail ahneki pai kaselel ehu en kakairada nanpwungmwahu reh. Met tepida ni ahnsou me kitail inoukihong ih atail mour oh papidaisla. Mwurin mwo, kitail kin kakairada atail nanpwungmwahu rehn Koht oh karanihala ih sang ni atail onop Paipel, kapakap, oh kin peik. (Seims 4:8) Sises me keieu karanih Siohwa. Eh kin ketin koapworopworki Sounkapikadao sohte kin wekwekseli. (Sohn 8:29) Kahrehda, kitail en dehr peikasalki me Siohwa kin kupwurki oh pil kak ketin sewese kitail en kapwaiada atail inou ong ih. (Ekl. 5:4) Koasoandi koaros me Koht ketin wiahda ong sapwellime aramas akan kin kadehdehda ni sansal me e kin ketin poakohng kitail oh kupwurki kitail en pweida ni atail papah ih.

Kesempwalki Atail Irair en Minimin oh Popohl

12, 13. (a) Dahme atail inou ong Koht oh papidais kak ritingadahng kitail en wia? (b) Ia duwen atail kak sewese me kapw akan?

¹² Atail inoukihong Koht atail mour oh papidaisla pil ritingadahng kitail ahl ehu en iang kousoan nan irair tohrohr ehu en popohl oh minimin me irail me pwoson akan kin ahnekipene nanpwungarail oh rehn Siohwa Koht. (Mel. 29:11; Ais. 54:13) Sohte mehkot nan sampah me kak pahrekiong met. Met kin uhdahn sansalda nan kapokon kan, wasa me riatail kan sang wehi tohto, soangsoangen lokaia, oh keinek kan kin kohpene oh paiekihda irair en meleilei, minimin, oh limpoak mehlel.

¹³ Irair en minimin oh popohl wet me kitail kin paieki kin weksang douluhl irair suwed kan en sampah rahnwet. (Wadek Aiseia 65:13, 14.) Sang ni atail kin kalohki Wehio, kitail kin ahneki pwais kaselel en ehukihong meteikan luhk en iang mi nan irair kaselel wet. E pil kin wia kapai ehu en sewese irail me ahpwtehn iangala mwomwohdiso oh pahn paiekihda kasukuhl en wia doadoahk en kalohk. Sang kaweid en elder kan, kitail ele kin ahneki pwais kaselel en sewese me kapw akan, duwehte ahn Akwila oh Persila ara kin “kawehwehiong ni oaritik duwen pwungen Ahl en Koht” ong Apolos.​—Wiewia 18:24-26.

Kaukaule Ale Kasukuhl Sang Rehn Sises

14, 15. Dahme kahrehda kitail en kaukaule ale kasukuhl sang rehn Sises?

¹⁴ Kitail ahneki kahrepe mwahu kan en kaukaule ale kasukuhl sang rehn Sises. E sohte dehde ia uwen werei me Sises kin iang Semeo doadoahk mwohn e wia aramasala. (Lep. Pad. 8:22, 30) E mwahngih me mour me keieu mwahu kin pidada en papah Koht oh kadehde duwen padahk mehlel. (Sohn 18:37) E sansal ong Sises me ehu soangen mour tohrohr pahn wia mour ehu me roporop oh sohte kin medewe duwen ahnsou kohkohdo. E mwahngih me e pahn ketin lelohng kasongosong laud oh kamakamala. (Mad. 20:18, 19; Ipru 4:15) E kin ketin wia mehn kahlemeng ong kitail ni eh kin ketin padahkihong kitail ia duwen atail pahn kin lelepek.

¹⁵ Mwurinte Sises ketin papidaisla, Sehdan kasonge ih en kesehla mour me keieu mwahu ahpw e sohte pweida. (Mad. 4:1-11) Met kin padahkihong kitail me sohte lipilipil dahme Sehdan kin wia, kitail kak kolokol atail lelepek. E uhdahn men kasonge irail kan me pahn kereniong papidais oh irail kan me ahpwtehn papidaisla. (1 Pit. 5:8) Atail peneinei kan mwein kin uhwong kitail pwehki re rong mehkot me sohte mehlel duwen Sounkadehdehn Siohwa kan oh re medewe me re kin pere kitail. Ahpw soahng pwukat kin kihong kitail ahnsou mwahu en kasalehda irair mwahu  en Kristian, duwehte wahu oh kamantik ni atail kin sapeng peidek kan oh wia kadehde. (1 Pit. 3:15, 16) Met kak kamwakid irail kan me kin rong kitail ni ahl pwung.​—1 Tim. 4:16.

Tengediong Mour me Keieu Mwahu

16, 17. (a) Ia anahn siluh kan me kesempwal ong mour me dierek nan Deuderonomi 30:19, 20? (b) Ia duwen Sises, Sohn, oh Pohl arail kin utung dahme Moses ntingihdi?

¹⁶ Sounpar 1,500 samwa mwohn Sises ketiket nin sampah, Moses kangoange mehn Israel kan en pilada mour me keieu mwahu ahnsowo. E koasoia: “Eri, met sampah oh nanleng en wia ei sounkadehde me I kihongkumwailehr, kumwail en pilada nanpwungen mour oh mehla, nanpwungen sapwellimen Koht kupwuramwahu de sapwellimen Koht keria. Eri, pilada mour. Poakohng KAUN-O, amwail Koht, kapwaiada sapwellime mahsen oh loalopwoatohng, pwe ih me pahn kahrehiong kumwail oh kadaudokamwail kan mour werei nan sahpw me KAUN-O ketin inoukihong amwail pahpa kahlap ako, Eipraam, Aisek oh Seikop.” (Deud. 30:19, 20) Mehn Israel kan kin salelepek ong Koht, ahpw anahn siluh kan me kesempwal ong mour me Moses kilelehdi sohte kin wekila. Sises oh meteikan pil kin koasoia ire pwukat.

¹⁷ Keieu, ‘kitail pahn poakohng KAUN-O atail Koht.’ Kitail kin kasalehda me kitail poakohng Koht ni atail kekeidki sapwellime ahl pwung kan. (Mad. 22:37) Keriau, ‘kitail anahne kapwaiada sapwellime mahsen’ sang ni atail onopki Mahsen en Koht oh peikiong sapwellime kosonned. (1 Sohn 5:3) Met kin wehwehki me kitail anahne kaukaule iang towehda mihting en Kristian kan, wasa me kitail kin koasoiapene iren Paipel kan. (Ipru 10:23-25) Kesiluh, ‘kitail anahne loalopwoatohng’ ih. Sohte lipilipil dahme kitail pahn lelohng, ahnsou koaros kitail en pwoson Koht oh idawehn sapwellime Ohl.​—2 Kor. 4:16-18.

18. (a) Ia duwen Kahn Iroir eh kawehwehda duwen padahk mehlel nan pahr 1914? (b) Ia pahn duwen atail pepehm ong marain en padahk mehlel rahnwet?

¹⁸ Ia uwen eh wia kapai ehu en ahneki mour me pahrekiong padahk en Paipel! Nan pahr 1914, ire kesempwal wet pwarada nan Kahn Iroir: ‘Kaidehkin kitail wia aramas pai oh nsenamwahu kei? Atail Koht sou kin ketin lelepek? Ma mehmen ese duwen mehkot me mwahusang, a en ale. Ma emen rehmwail diar mehkot me mwahusang, se koapworopworki me ke pahn padahkihdo. Kitail ese me re sohte kak diar mehkot me mwahusang dahme mi nan Mahsen en Koht. . . . Sohte me kak kawehwehda duwen meleilei, peren, oh kapai me loalokong en Koht mehlel kin wiahiong atail mour oh mohngiongitail. Koasoiepen sapwellimen Koht Erpit, Pwung, Manaman oh Limpoak me kin pwarada sangete mahs kin kaitarala atail anahn en madamadau oh pepehm koaros. Kitail sohte kin rapahki ehu soahng tohrohr. Sohte mehkot kitail anahne ahpw ihte en inengieng kekeirda atail loalokongkihla atail Koht.’ (The Watch Tower, December 15, 1914, pali 377-378) Atail kalahnganki marain en padahk mehlel sohte kin wekila. Mehlel, met kitail ahneki kahrepe laud sang mahs en perenki “keid nan marain me KAUN-O kin ketikihong kitail!”​—Ais. 2:5; Mel. 43:3; Lep. Pad. 4:18.

19. Dahme kahrehda irail kan me kak papidais anahne mwadang papidaisla?

¹⁹ Ma ke men ‘keid nan marain me KAUN-O kin ketikihong iuk’ ahpw ke saikinte wiahla Kristian me inoudahr oh papidaisla, eri ke dehr pwapwand. Wia uwen omw kak en kapwaiada soahng kan me anahn pwe ken kak iang papidais, ih ahl me ken kasalehda omw kalahnganki dahme Koht oh Krais ketin wiahiong kitail. Ken kihong Siohwa dahme keieu kesempwal ong uhk, iei omw mour. Ken kasalehda me ke men wia kupwuren Koht sang ni omw idawehn sapwellime Ohl. (2 Kor. 5:14, 15) Mehlel, ih mour wet me keieu mwahu!

Ia Ahmw Pasapeng?

• Dahme atail papidais kin kasalehda?

• Kapai dah kan kin kohsang atail inoukihong Koht atail mour oh papidais?

• Dahme kahrehda e uhdahn kesempwal en ale kasukuhl sang rehn Sises?

• Dahme pahn sewese kitail en tengediong mour me keieu mwahu?

[Peidek en Onop]

[Kilel nan pali 29]

Omw papidais kin kasalehda me ke piladahr mour me keieu mwahu

[Kilel kan nan pali 30]

Ke kin poadoandoarla nan “wasahn ruk”?