Ia Mwomwen Nanleng?

EKEI aramas kin medewe me re sohte kak ese ia mwomwen nanleng pwehki sohte me kohsang wasao pwehn padahkihong kitail duwe. Ele re manokehla me Sises mahsanih: “I kohdihdo sang nanleng.” (Sohn 6:38) E pil mahsanihong ekei kaun en pelian lamalam kan: “Kumwail kohsang pah, a I kohdo sang powe.” (Sohn 8:23) Dahme Sises mahsanihki duwen nanleng?

Sises ketin kadehdehda me Siohwa kin ketiket nanleng. E ketin likweriki Koht “Semei me ketiket nanleng.” (Madiu 12:50) Mendahki aramas kin sukuhlki duwen audepen nanleng ni arail doadoahngki misihn kan me kak kilang wasa doh oh pil ni arail kin pihrla oh daulihla sampah, dahme Paipel kin mahsanih me mehlel: “Sohte me kin kilangki Koht mese.” (Sohn 1:18) Sises ketin kawehwehda kahrepen met ni eh mahsanih: “Ngehn ehu Koht.”​—Sohn 4:24.

Ngehn iei mour ehu me ileile sang en aramas. Ngehn emen sohte kin wiawihkihda uduk oh nta me aramas kak kilang oh doahke. Eri ni en Sises kin mahsanih me e kin patopato rehn Semeo “nanleng,” e ketin kasalehda me e kin sapwellimanki soangen mour ehu me ileile sang mouren aramas. (Sohn 17:5; Pilipai 3:20, 21) Wasa me Sises kin patopato ie rehn Semeo iei me Paipel kin kahdaneki “nanleng.” Ia mwomwen nanleng? Dahme kin wiawi wasao?

Wasa Ehu me Diren Doadoahk Kaperen

Paipel kasalehda me doadoahk tohto kin wiawi nanleng. E kasalehda me ngehn lelepek ngedehrie kin mi wasao. (Daniel 7:9, 10) Emenemen ngehn pwukat ahneki irair kan me wekpeseng. Ia duwen atail ese met? Nan kapikipikda kan koaros me kitail kak kilang, sohte soahng riau me kin duwehpene, kahrehda kitail kak ese me emenemen ngehn pwukat pil wekpeseng. Irail ngehn pwukat koaros kin doadoahkpene ni minimin. Met inenen weksang sampah rahnwet, pwehki aramas sohte kin kalapw miniminpene.

 Tehk duwen dahme Paipel kin mahsanihki duwen doadoahk kan me kin wiawi nanleng. “Kumwail kapinga KAUN-O, kumwail tohnleng kehlail oh manaman akan, me kin peikiong sapwellime kosonned akan, oh kin rongorong sapwellime mahsen kan! Kumwail kapinga KAUN-O, kumwail manaman koaros en nanleng, kumwail lidu kan me kin kapwaiada audepen nan kupwure!” (Melkahka 103:20, 21) Eri, doadoahk tohto kin wiawi nanleng. Kitail kak kamehlele me doadoahk pwukat inenen kaperen.

Tohnleng kan kin ahnsou koaros perenki wia arail doadoahk kan sangete mahs mwohn sampah wet eh kapikipikda. Paipel kasalehda me ni ahnsou me Siohwa ketin kapikada sampah, tohnleng kan “wiakihteieu kokoul” oh “ngisingiski ar peren.” (Sohp 38:4, 7) Emen sapwellimen Koht tohnleng ahneki pwais en iang Koht kapikada soahng koaros. (Kolose 1:15-17) Omw esehla duwen doadoahk kaperen kan me kin wiawi nanleng kak kahrehiong uhk en peidengki duwen nanleng oh aramas.

Aramas Wiawihda Pwehn Kohdahla Nanleng?

Pwehki tohnleng kan kin papah Koht nanleng mwohn sampah wet eh kapikipikda, tepin ohl oh lih sohte wiawihda pwehn mour nanleng. Ahpw Koht mahsanihong tepin pwopwoudo: “Kumwa kaparaparala pwe kadaudokamwa kan pahn kousoanla wasa koaros nin sampah.” (Senesis 1:28; Wiewia 17:26) Adam iei tepin mour me mi pohn sampah me kak ese duwen Koht oh papah ih ni lelepek. E pahn wiahla semen aramas koaros me pahn kousoan pohn sampah. “KAUN-O kelehpw me ketin sapwellimanki nanleng, a sampah e ketikihong aramas akan.”​—Melkahka 115:16.

Aramas sohte kin men mehla. Koht mahsanihong Adam me e pahn mehla ihte ma e sapeik. Ma Adam peik e sohte pahn mehla.​—Senesis 2:17; Rom 5:12.

Ihme kahrehda Koht sohte mahsanihong Adam duwen kohdahla nanleng. Eri sampah kaidehn wasahn kasongosong ehu ong aramas ma re pahn warohng kohdahla nanleng de soh. Aramas wiawihda pwehn mour nin sampah kohkohlahte oh kupwuren Koht wet pahn pweida. Paipel inoukihda me “me pwung kan pahn koukousoan nan sahpwo [“sampah,” NW] oh re pahn sapwenikihla kohkohlahte.” (Melkahka 37:29) Eri e sansal me aramas sohte wiawihda pwehn kohdahla nanleng. Ahpw dahme kahrehda Sises ketin inoukihong sapwellime wahnpoaron kan me re pahn mour nanleng? Ia duwe, Sises mahsanih me aramas mwahu koaros pahn kohdahla nanleng?