Ke Kin Uhdahn Ideidawehn Krais?

“Metet iei soangen mouro me kumwail momourkiher. . . . kumwail en pil woneweite kekeirda ni mour wet.”—1 DES. 4:1.

1, 2. (a) Soahng kaselel dah me aramas tohto kilang ni mwehin Sises? (b) Dahme kahrehda atail ahnsou pil kesempwal?

 MIE pak ke medewehla ia uwen kaselel ma ke mour ni ahnsou me Sises ketiket nin sampah? Ele ke kin kasik me Sises pahn ketin kamwahwihiukala oh ke solahr pahn ahneki kahpwal en soumwahu. De ke mwein medewe duwen peren en kilang oh rong Sises pwe ken sukuhl sang reh de kilang ih ni eh ketin wia ekei manaman akan. (Mark 4:1, 2; Luk 5:3-9; 9:11) Ia uwen kaselel en iang mi ahnsowo ni Sises eh ketin wia doadoahk pwukat koaros! (Luk 19:37) Mwurin mwo, sohte ehu dih kin kadehdehda soahng pwukat, oh dahme Sises ketin kapwaiada nan sampah sang ni “sapwellime meirong en pein ih” sohte pahn pwurehng wiawi.—Ipru 9:26; Sohn 14:19.

² Ahpw atail ahnsou pil kesempwal. Dahme kahrehda? Kitail kin mour nan ahnsou me Paipel kohpada nin duwen “imwilahn ahnsou” de “imwin rahn akan.” (Dan. 12:1-4, 9; 2 Tim. 3:1) Erein ahnsowo Sehdan piskensangehr nanleng. Kereniong e pahn selidi oh lekdekla “nan pwoahr loalo, me soh kapi.” (Kaud. 12:7-9, 12; 20:1-3) Pil erein ahnsowo kitail ahneki pwais kaselel en kalohki “rongamwahu en Wehin Koht” nan sampah pwon, padapadahkihong aramas akan koapworopwor duwen Paradais, doadoahk ehu me sohte pahn pwurehng wiawi.—Mad. 24:14.

3. Mwohnte eh ketidahla nanleng, dahme Sises mahsanihong sapwellime tohnpadahk ko en wia? Dahme met pahn pidada?

³ Mwohnte eh ketidahla nanleng, Sises ketin padahkihong sapwellime tohnpadahk ko:  “Kumwail ahpw pahn kadehde ie nan Serusalem, nan Sudia pwon, oh Sameria, oh lelohng ni irepen sampah.” (Wiewia 1:8) Doadoahk wet pahn pidada doadoahk en kasukuhl nan sampah pwon. Ia mehn akadei en doadoahk wet? Aramas akan en wiahla sapwellimen Krais tohnpadahk kan mwohn imwi pahn leledo. (Mad. 28:19, 20) Dahme kitail anahne wia ma kitail men pweida ni atail kapwaiada sapwellimen Krais kehkehlik wet?

4. (a) Anahn kesempwal dahieu me Piter kasalehda nan 2 Piter 3:11, 12? (b) Dahme kitail anahne kanahieng?

⁴ Tehk dahme wahnpoaron Piter koasoia: “Soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht, nindoken amwail kasikasik sapwellimen Koht Rahno, oh wia uwen me kumwail kak pwe en kamwadangahdo.” (2 Pit. 3:11, 12) Dahme Piter koasoia kasalehda kesempwalpen atail en mwasamwasahn erein imwin rahn pwukat pwe kitail en loalenohng atail kaudokiong Koht. Met pil kin pidada kalohki rongamwahu. Ihme kahrehda ia uwen kaperen kitail en kilang riatail kan nan sampah pwon kin ngoangki kapwaiada sapwellimen Krais kehkehlik en kalohk! Ahnsowohte kitail wehwehki me kitail anahne kanahieng pwe kitail en dehr mweidohng en Sehdan sampah oh atail ineng en uduk me kitail sohsohki en kaluwetala atail ngoangki kapwaiada doadoahk ong Koht. Eri, kitail pahn tehkpene ia duwen atail kak ese me kitail kin pousehlahte idawehn Krais.

Perenki Pwukoa kan me Koht Ketikihda

5, 6. (a) Dahme Pohl kapingahki ienge tohnkaudok kan nan Serusalem? Dahme e kalekehki irail? (b) Dahme kahrehda kitail en dehr mwamwahliki atail pwukoa kan me Koht ketikihong kitail?

⁵ Nan nah kisinlikou ong Kristian kan nan Serusalem, wahnpoaron Pohl kapingahki ienge tohnkaudok kan arail kin dadaur ni lelepek pahn kalokolok. E koasoia: “Kumwail tamanda duwen kumwail mahso. Ni ahnsowo, mwurin marain en Koht eh dakerkumwaildahr, apwal tohto lelohng kumwail, ahpw kumwail sohte lohdiong.” Ei, Siohwa ketin tamataman arail kin lelepek. (Ipru 6:10; 10:32-34) En Pohl kaping kin uhdahn kangoange Kristian en Ipru kan. Ahpw nan kisinlikouohte, Pohl kalekehkin irail duwen ahnepen aramas ieu. Ma re sohte powehdi met, e kak katikala arail ngoangki papah Koht. E koasoia me Kristian akan anahne kanaiehng en dehr “soikeweisang” idawehn sapwellimen Koht kehkehlik kan.—Ipru 12:25.

⁶ Peneu wet en dehr “soikeweisang” pwukoa kan me Koht ketikihda pil dokedoke Kristian akan rahnwet. Kitail wehwehki me kitail anahne koasoanehdi teng en dehr mwamwahliki atail pwukoahn Kristian de mweidohng atail ngoangki papah Koht en tikitikla. (Ipru 10:39) Ni mehlel, atail kin papah Koht kin pidada atail mour de mehla.—1 Tim. 4:16.

7, 8. (a) Dahme pahn sewese kitail en kolokol atail ngoangki papah Koht? (b) Ma kitail solahr ahneki ngoang duwehte mahs, dahme kitail anahne tamanda duwen Siohwa oh Sises?

⁷ Dahme pahn sewese kitail en dehr kihda kahrepe kan pwehn sohte kapwaiada atail pwukoa kan ong Koht? Ehu ahl en pelianda met iei en kaukaule doudouloale wehwehn atail inoukihong Siohwa atail mour. Kitail inoukihda me kitail pahn keieu kesempwalki wia kupwure nan atail mour oh en kolokolete inou wet. (Mad. 16:24) Kahrehda, ekei pak kitail anahne uhdi oh idek rehtail: ‘I kin tengedihongete kapwaiada ei inou ong Koht duwehte nin tapio ni ei papidaisla? De I solahr ahneki ngoang duwehte mahs?’

⁸ Ma kitail kasawih pein kitail ni mehlel oh diarada me kitail solahr ngoangki papah Siohwa, eri e pahn mwahu en tamanda dahme soukohp Sepanaia koasoia: “Ke dehr mweidohng pehmw kan en mwoatohtdi! KAUN-O, omw Koht, ketiket rehmw; sapwellime manaman kin kahrehiong en powehdi. KAUN-O pahn ketin kupwurperenkin uhk.” (Sep. 3:16, 17) Koasoi pwukat kin keieu kowohng mehn Israel  en mahs me pwurodohng Serusalem sang arail selidi nan Papilon. E pil kin kowohng sapwellimen Koht aramas akan rahnwet. Pwehki kitail kin wia sapwellimen Siohwa doadoahk, kitail anahne tamataman me Siohwa oh sapwellime Ohl kin utung oh kakehle kitail pwehn uhdahn kapwaiada pwukoa kan me Koht ketikihong kitail. (Mad. 28:20; 2 Kor. 4:7) Ma kitail kin nantihong ngoangki wia sapwellimen Koht doadoahk, e pahn ketin kapaiada kitail oh sewese kitail en kekeirda.

Ngoangki “Rapahki Mahs Wehin Koht”

9, 10. Ia ire kesempwal nan sapwellimen Sises karasaras en kamadipw? Dahme kitail sukuhlki sang met?

⁹ Ni eh wie konokonot nan imwen kaunen Parisi men, Sises ketin wia karasaras en kamadipw ehu. Nan karasaraso, e ketin kawehwe duwen ahnsou mwahu me kohwong emenemen irail pwe ren iang towehda Wehin nanleng. E pil ketin karasahda ia duwen ekei ar kin kihda kahrepe kan en sohte iang towehda luhk wet. (Wadek Luk 14:16-21.) Irail akan nan karasaraso me ale luhko kin kihda kahrepe kan me irail sohte kak iang kamadipwo. Emen nda me e anahne kohlahng kilang sapweo me e ahpwtehn pwainda. A emen nda me e pahn kohlahng tehk nah kou ko me e pwainda. A pil emen nda: ‘I sohte kak iang kohwei, pwe I ahpwtehn pwopwoudida.’ Kahrepe pwukat sohte mwahu. Aramas kin kalapw tehk mahs mwohn e pwainda sapwe de nah mahn akan, eri e sohte anahne karuwaru pwehn tehk mwurin e pwainda. Oh ia kahrepe mwahu ong emen me ahpwtehn pwopwoudida en katihasang luhk kesempwal wet? Ihme kahrehda kaun en kamadipwo lingeringerkihda.

¹⁰ Sapwellimen Koht aramas akan koaros kak sukuhlki mehkot sang sapwellimen Sises karasaraso. Dahme re kak sukuhlki? Kitail en dehr mweidohng soahng kan me pein kitail kin nsenohki me duwehte dahme Sises ketin karasahda, en kin wiahla mehkot me kesempwal sang atail papah Koht. Ma Kristian men sohte kin kanaiehng duwen dahme e kin keieu kesempwalki, eh ngoang en wia doadoahk en kalohk pahn ekis ekis tikitikla. (Wadek Luk 8:14.) Pwe atail ngoang en dehr tikitikla, kitail en kin kapwaiada sapwellimen Sises kaweid me mahsanih: “Kumwail rapahki mahs Wehin Koht oh dahme e kin ketin kupwurki.” (Mad. 6:33) Ia uwen eh kin kangoange kitail en kilang sapwellimen Koht sounpapah kan, me pwulopwul oh me mah, arail kin kapwaiada kaweid wet! Ni mehlel, me tohto kin kihsang soahng kan nan arail mour me kin kedirepwe irail pwe ren kak kalaudehla arail ahnsou ong kalohk. Re kin diarada me arail kin rapahki mahs Wehin Koht kin kihong irail nsenamwahu mehlel oh pepehm me re wiewia mehkot me inenen katapan.

11. Ia duwen Paipel eh kasalehda kesempwalpen ngoangki papah Koht ni mohngiong unsek?

¹¹ Pwehn karasahda kesempwalpen atail en ngoangki papah Koht, tehk dahme wiawiong Sehoas, nanmwarkien Israel. Pwehki e pwunodki me Siria pahn kakete kalowehdi Israel, Sehoas kohla oh sengisengiong Elisa. Eri, soukohpo padahkihong ih en kadarala arep ehu sang nan wenihmwtok me inen lahng Siria pwehn kasalehda me arail kalowehdi wehio kohsang sapwellimen Siohwa sawas. Met uhdahn anahne kakehlaka nanmwarkio. Mwurin mwo, Elisa padahkihong Sehoas en ale arep ko oh poakihki nanpwelo. Sehoas poakihki arep ko nanpwelo pakete siluh. Elisa lingeringerkihda pwe ma nanmwarkio poakih nanpwelo pak limau de weneu, met pahn kasalehda me e “uhdahn pahn kalowehdi douluhl mehn Siria kan.” Pwehki Sehoas sohte kasalehda ngoang, e kalowehdi Siria pakete siluh. (2 Nan. 13:14-19) Dahme kitail kak sukuhlki sang met? Siohwa pahn uhdahn kapaiada kitail ma kitail kin ngoangki wia sapwellime doadoahk ni mohngiong unsek.

12. (a) Dahme pahn sewese kitail en kolokol atail ngoang en papah Koht nindoken atail kin apwalih kahpwal kan nan atail mour? (b) Menlau kasalehda ia duwen omw kin paiekihda sang ni omw kin pwerisekiong doadoahk en kalohk.

¹² Kahpwal kan nan atail mour kin kasonge  atail ngoang oh loalenohng atail papah Koht. Riatail Kristian tohto kin apwalih arail kahpwal en mwohni. Meteikan kin pwunod pwehki arail soumwahu kin katikala dahme re kak wia pwehn papah Siohwa. Ahpw emenemen kitail kak wia kahk kan pwehn kolokol atail ngoang oh uhdahn pousehlahte ideidawehn Krais. Menlau tehk ekei kaweid oh iren Paipel kan me kileldi nan koakon “Dahme Pahn Seweseiuk en Ideidawehn Krais?” Medewehla ia duwen omw kak doadoahngki kaweid pwukat ni uwen omw kak. Ma ke kapwaiada, ke pahn uhdahn paiekihda. Atail pwerisekiong wia doadoahk en kalohk kak kakehlaka kitail, kamwahwihala atail mour oh kihong kitail nsenamwahu oh popohl mehlel. (1 Kor. 15:58) Laudsang met, atail kin papah Koht ni kapehd unsek oh kehl unsek kak sewese kitail en ‘kasikasik sapwellimen Koht Rahno, oh wia uwen me kitail kak pwe en kamwadangahdo.’—2 Pit. 3:12.

Kasawih Mwahu Omw Irair kan

13. Ia duwen emenemen kitail eh kak ese wehwehn papah Koht ni kapehd unsek oh kehl unsek?

¹³ E mwahu en tamataman me en papah Koht ni kapehd unsek oh kehl unsek sohte kin pidadahte ia uwen ahnsou kitail kihong nan kalohk. Irair en emenemen kin wekpeseng. Emen me kin kalohk ihte awa ehu de riau nan ehuehu sounpwong ele kin kaperenda Siohwa ma mehlel ih uwen me eh roson kakohng wia. (Pil kilang Mark 12:41-44.) Kahrehda, pwe emenemen kitail en ese ia wehwehn papah Koht ni kapehd unsek oh kehl unsek, kitail anahne kasawih mwahu atail koahiek oh irair kan. Ni atail kin idawehn Krais, kitail pil men atail madamadau en pahrekiong sapwellime madamadau. (Wadek 1 Korint 2:16.) Dahme Sises kin keieu ketin mwohneki nan eh mour? E mahsanihong pokon ko sang Kapernaum: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:43; Sohn 18:37) Ni omw medewe duwen ngoang me Sises ketin kasalehda nan sapwellime doadoahk, ken kasawih duwen omw irair kan pwe ken kilang ma ke kak kalaudehla omw doadoahk en kalohk.—1 Kor. 11:1.

14. Ia duwen atail kak kalaudehla atail doadoahk en kalohk?

¹⁴ En medemedewe kanaiehng atail irair akan ele kak kahrehiong kitail en diarada me kitail kak kalaudehla atail ahnsou ong  doadoahk en kalohk. (Mad. 9:37, 38) Karasepe, mie riatail me pwulopwul kid kei me ahpwtehn kesepwil sang sukuhl me kalaudehla arail doadoahk en kalohk oh met re ahneki peren me kohsang ar kin ngoangki papah nin duwen pioneer kan. Ke pil men ahneki soangen peren wet? Ekei riatail kan kin kasawih arail irair kan oh pilada me re kak keseula wasa teikan nan sapwarail, de pil sahpw teikan, me anahn en sounkalohk kan en Wehio kin laud. Meteikan pil sukuhlki ehu lokaia tohrohr pwehn sewese irail akan me kin doadoahngki soangen lokaiao. E kak apwal en kalaudehla atail doadoahk en kalohk, ahpw e kin wahdo kapai tohto, oh kitail ele kin sewese me tohto teikan en “marainkihla me mehlel.”—1 Tim. 2:3, 4; 2 Kor. 9:6.

Idawehn Mehn Kahlemeng kan nan Paipel

15, 16. Ihs me kitail kak kahlemengih pwehn ngoangki idawehn Krais?

¹⁵ Ia duwen ekei me wiahla wahnpoaron kan ar mwekidki ahnsou me Krais ketin malipe irail en idawehn ih? Me pid duwen Madiu, Paipel mahsanih me e “uhdahte kesehla mehkoaros me e ahneki oh iangala Sises.” (Luk 5:27, 28) Kitail pil wadek duwen Piter oh Andru: “Ni ahnsowohte ira pwilikihdi ara uhk ko oh iangala Sises.” Mwuri, Sises pil mahsanihada Seims oh Sohn, me iang ara pahpao wie onohne arail uhk kei. Ia duwen ara mwekidki sapwellimen Sises luhko? “Ni ahnsowohte ira mehndahkihla samarao oh wararail pwohto, ira ahpw iangala Sises.”—Mad. 4:18-22.

¹⁶ Pil ehu mehn kahlemeng mwahu iei Sohl, me wiahla wahnpoaron Pohl. Mahs e kin uhdahn kaloke irail kan me kin idawehn Krais, ahpw e wekidala eh elen mour oh uhd wiahla emen me Krais ketin “piladahr” pwehn kadehde duwen mware. “[Pohl] ahpw kin inenwong sinakoke kan en mehn Suhs kan oh tapihada padahk duwen Sises. E ahpw kin ndaiong irail me Sises iei Sapwellimen Koht Iehros.” (Wiewia 9:3-22) Oh mendahki e kin lelohng kahpwal oh kalokolok tohto, Pohl kin woneweite kasalehda ngoang.—2 Kor. 11:23-29; 12:15.

17. (a) Dahme ke men wia pwe ken ideidawehn Krais? (b) Soangen kapai dah kan me kitail ahneki pwehki atail kin wia kupwuren Siohwa ni mohngiong oh kehl unsek?

¹⁷ Kitail uhdahn men kahlemengih irail tohnpadahk ko oh mwadang mwekidki luhk wet en idawehn Krais. (Ipru 6:11, 12) Soangen kapai dah kan kitail kin ahneki ni atail kin woneweite idawehn Krais ni ngoang oh mehlel? Kitail kin diar nsenamwahu ni atail wia kupwuren Koht oh pil ahneki peren me kohsang ahnsou mwahu en wia doadoahk en papah Siohwa oh pil pwukoa kan nan mwomwohdiso. (Mel. 40:8; wadek 1 Deselonika 4:1.) Ei, ni atail wia uwen atail kak pwehn ideidawehn Krais, kitail kin ahneki kapai tohto me duwehte sapwellimen Koht kupwuramwahu, meleilei en loalatail, nsenamwahu, oh koapworopwor en mour soutuk ahnsou kohkohdo.—1 Tim. 4:10.

Ke Tamataman?

• Doadoahk kesempwal dahieu me kohwong kitail? Ia duwen atail en kilangwohng met?

• Soangen ahnepen aramas dahieu me kitail en kaleke oh dahme kahrehda?

• Ia duwen atail pahn kasawih kitail ni mehlel?

• Dahme pahn sewese kitail en pousehlahte ideidawehn Krais?

[Peidek en Onop]

[Koakon/​Kilel nan pali 31]

Dahme Pahn Seweseiuk en Pousehlahte Ideidawehn Krais?

▪ Wadek Mahsen en Koht rahn koaros oh doudouloale dahme ke wadek.​—Sos. 1:8; Mel. 1:1-3.

▪ Kalapw kapakapki sawas oh kaweid en sapwellimen Koht manaman.​—Sek. 4:6; Luk 11:9, 13.

▪ Miniminiong irail akan me kin kasalehda ngoang mehlel ong doadoahk en kalohk.​—Lep. Pad. 13:20; Ipru 10:24, 25.

▪ Pohnese me atail ahnsou mwotomwotalahr.​—Ep. 5:15, 16.

▪ Medemedewe imwila suwed en kihda kahrepe kan en sohte iang ideidawehn Krais.​—Luk 9:59-62.

▪ Kaukaule doudouloale duwen omw inou ong Koht oh pil kapai kan me kohsang omw kin papah Siohwa oh ideidawehn Krais ni mohngiong unsek.​—Mel. 116:12-14; 133:3; Lep. Pad. 10:22.