Paipel Uhdahn Kohsang Rehn Koht

IA UHDAHN wehwehn dahme Pohl koasoia ni eh nda me audepen Paipel “pwilisang rehn Koht”? (2 Timoty 3:16) Pohl doadoahngki lepin lokaiahn Krihk me wehwehki “Koht ketin esingengki.” Pohl kin koasoia me Koht ketin doadoahngki sapwellime manaman pwehn kahluwa sounnting en Paipel kan pwe ren ntingihdi soahng kante me e kupwurki.

Wahnpoaron Piter koasoia me sapwellimen Koht manaman me “kin ti pohn” sounnting en Paipel pwukat  “ni ar kin lohkihda mahsen en Koht.” (2 Piter 1:21) Kahrehda wahnpoaron Pohl pil kak kawehwe me pwuhk kan en Paipel iei “Pwuhk Sarawi, me kak kasalehiong uhk erpit me kak kahluweiukalahng nan mour soutuk sang ni omw pwoson Krais Sises.”—2 Timoty 3:15.

Aramas tohto kin sapwungki me Paipel kohsang rehn Koht. Sir Charles Marston koasoia me irail kan me kin kauwe Paipel kin “mwamwahliki audepen Paipel” oh re kin kauwe mehlelpen Paipel. Ekei kin nda me Paipel kin audaudkihte “soai en mahs kan me sohte mehlel.”

Tehk Mehn Kadehde kan

Eri, kitail kak kamehlele Paipel? E kesempwal ken wiahda pilipil pwung ong ire wet. Dahme kahrehda? Pwehki ma Paipel audaudki mahsen kan sang rehn Koht, eri e sohte pahn wia elen loalokong oh e pahn keper en pohnsehsehla duwen met. Ma ke pahn kilangwohng Paipel nin duwen mahsen en aramas ahpw kaidehn sang rehn Koht, eri ke sohte pahn mweidohng audepe kan en kaweid omw wiewia oh dahme ke kin kamehlele.—1 Deselonika 2:13.

Ia duwen omw pahn pilada ma ke kak kamehlele Paipel? Eri, ia duwen omw kin ese ma ke kak likih aramas men me ke tuhwong? Iet ehu ire mehlel. E apwal en likih emen me ke sohte nohk ese duwe. Ihte ni omw kin esehla aramaso erein ahnsou ehu me ke pahn kak esehki ma e wia aramas mehlel oh likilik men. Ke pil kak esehla Paipel ni ahlohte. Ke dehr mwadang kamehlele koasoi kan me kin kauwe Paipel. Kihong ahnsou oh tehk duwen mehn kadehde kan me kin kasalehda me Paipel “pwilisang rehn Koht.”

Uhwong kan Sang Irail me Mwomwen Utung Paipel

Ke dehr sohla nsenohki ma ke kak kamehlele Paipel pwehki ekei me kin mwomwen  utung Paipel arail kin kauwe mehlelpen Paipel. Ehu dikseneri koasoia me rahnwet, pali laud en sounpadahk kan en Paipel kin nda me irail Kristian kei ahpw re kin “nda me Paipel kohsang rehn aramas.”—New Dictionary of Theology.

Tohto irail kan me kin sukuhlki duwen pelien lamalam kin peikasalki ihs me uhdahn ntingihdi Paipel. Karasepe, ekei nda me soukohp Aiseia sohte ntingihdi pwuhken Aiseia. Irail nda me pwuhk wet ntingdi mwurihdo sang mwehin Aiseia. Lowther Clarke koasoia me “aramas tohto iang ntingihdi pwuhk wet erein dih tohto.” (Concise Bible Commentary) Soangen koasoi pwukat kin pohnsehsehla duwen en Sises Krais oh sapwellime tohnpadahk kan arail kin pwurepwurehng kasalehda me Aiseia me ntingihdi pwuhk wet.—Madiu 3:3; 15:7; Luk 4:17; Sohn 12:38-41; Rom 9:27, 29.

Suwedsang met, irail kan me kin kauwe Paipel duwehte sounpadahk J. R. Dummelow nda me kokohp kan me mi nan pwuhken Daniel kaidehn uhdahn kokohp kei ahpw “poadopoad kei me wiawiher oh sounntingo uhd ntingihdi duwehte kokohp kei.” Ni arail nda met, irail pil pohnsehsehla mahsen kan en Sises Krais. Nan Madiu 24:15, Sises mahsanih: “Kumwail pahn kilang duwen ‘Sansal Kansensuwed Likemisiko,’ me soukohp Daniel kohpadahr.” E pwung Kristian emen en kamehlele me Sises Krais kin iang pitih aramas akan oh e kin utung poadopoad kan me aramas kin wekidala pwehn duwehte kokohp kei? Uhdahn soh.

Met Uhdahn Kesempwal?

Mwein ke pahn idek, “E uhdahn kesempwal ihs me ntingihdi pwuhk kan en Paipel?” Ei, met uhdahn kesempwal. Ke pahn kamehlele kisinlikou en sohso ehu me dene kompoakepahmw men me ntingihdi ahpw mwuhr ke diarada me kaidehn ih me ntingihdi? Ia duwen ma irail semen kan padahkihong uhk me kaidehn kompoakepahmwo me ntingihdi ahpw ienge kan me ntingihda dahme re kamehlele me iei koasoandi en kompoakepahmwo. Met sou pahn kahrehiong uhk en sohla kamehlele kisinlikouo? Ke pahn kak uhdahn kamehlele me kisinlikouo uhdahn kasalehda koasoandi en kompoakepahmwo?

Pil duwehte Paipel. E sohte kapwuriamwei me aramas tohto iangahki irail kan me dene irail Kristian kei sohte kin perki soikala dahme Paipel kin mahsanih duwen en mehlel, tiahk en pwopwoud oh ire teikan. Pak depe ke kin rong aramas akan kin nda, “E kohsang nan Kadehde Mering!” Mwomwen me e sohte kesempwal. Re kin nda met mendahki Pohl kasalehda me Kadehde Mering iei “Pwuhk Sarawi” me “pwilisang rehn Koht.”

Ahpw mwein ke pahn nda: “Ke sohte kak pohnsehsehla mehn kadehde kan me irail semen kan koaros kin kasalehda.” Met mehlel. Karasepe, kitail kin kalahnganki doadoahk laud en irail semen kan me sewese kitail en esehda duwen dahme tepin ntingdi nan Paipel. Mehlel, kisin sapwung kan wiawi nan Paipel ni en aramas akan arail pwurepwurehng ntingih erein sounpar epwiki kei. Ahpw tamataman met: Mie wekpeseng  laud en pohnese kisin sapwung kan me wiawi nan Paipel oh en kilangwohng Paipel pwon nin duwen pwuhk ehu me kohsang rehn aramas.

Kolokol Omw Kamehlele “Pwuhk Sarawi”

Mwohnte Pohl koasoia me Paipel pwilisang rehn Koht, e padahkihong Timoty dahme kahrehda Pwuhk Sarawi kesempwal. E koasoia me, “ni imwin rahn akan, . . . aramas suwed oh me likamw akan pahn nantihweite sang ni me suwed ong ni me suwedsang; re pahn pitipithete meteikan, oh pein irail pahn pitida.” (2 Timoty 3:1, 13) Sangete ni en Pohl ahnsou, ‘me loalokong kan oh me sukuhl kan’ kin doadoahngki akupwung kan me mwomwen pwung pwehn pitihdi aramas akan oh kaluwetehla arail pwoson Sises Krais. (1 Korint 1:18, 19; Kolose 2:4, 8) Pwehn pere Timoty sang irail, wahnpoaron Pohl kangoange ih en ‘nantihong ni me mehlelo me e padahngkiher sang ni eh kisin seri’ nan Pwuhk Sarawi me kohsang rehn Koht.​—2 Timoty 3:14, 15.

E pil kesempwal ken wia met ni “imwin rahn akan.” Ke dehr mwamwahliki keper en rong akupwung kan me mwomwen pwung me aramas loalokong kan kin wia. Pwehn duwehte tepin Kristian akan, pere iuk ni omw pahn kin likih ni unsek dahme ke sukuhlki sang nan Paipel me uhdahn pwilisang rehn Koht.

Sounkadehdehn Siohwa kan pahn perenki sewese iuk en kakairada omw pwoson Paipel. Karasepe, irail kak kasalehda ia duwen kaweid kan en Paipel eh kin uhdahn doadoahk erein ahnsou reirei; ia duwen Paipel eh kin pwungiong palien sains; ia duwen audepe kan eh kin pwungpene sangete nin tapio lel ni imwi; ia duwen kokohp kan eh kin pweida, oh pil soahng tohto teikan. Ma ke pwungki, a ke ntinglahng irail kan me wiahda makasihn wet pwehn ale sawas me kin sewese aramas rar kei me ahneki mohngiong mehlel en kilang me Paipel uhdahn Mahsen en Koht.

[Blurb nan pali 5]

Ia duwen omw kak ese ma ke kak likih aramas me ke kin tuhwong?

[Blurb nan pali 6]

Kitail kin kalahnganki doadoahk laud en irail semen kan me sewese kitail en esehla duwen dahme tepin ntingdi nan Paipel