Dahme Koht Ketin Wiewia?

“Maing KAUN [“Siohwa,” NW] dahme komw ketin dohkiweisang kiht? Dahme komw ketin karirihkilahr pein komwi ni at milahr nan apwal?”—MELKAHKA 10:1.

NI OMW pahn kin medewe duwen dahme kin wiawi, e kin kasalehda me kitail kin wie momour nan ahnsou “apwal.” Oh ni atail kin lelohng kahpwal en mwersuwed, aksident de mehlahn emen kompoakepatail, kitail ele kin medewe ma Koht kin mwahngih mepwukat? De ma e kin ketin nsenohkin kitail? De ma uhdahn mie Koht?

Ahpw mie pak me ke kin medewe ma atail madamadau duwen Koht sou sapwung? Pwehn karasahda met, medewe duwen kisin seri men me nsensuwedla pwehki eh pahpao kohla doadoahk. Serio poakepoakedahr eh pahpao oh men en pwurodohr. Serio medewe me eh pahpao kohkohlahsang ih. Rahno pwon e ndinda, “Ia pahpa?”

Kitail kak mwadang kilang dahme sapwung nan en serio madamadau. Pwehki ni ahnsowo, eh pahpao wie doadoahk pwehn kak apwalih eh peneinei. Ia duwe, atail madamadau pil kakete sapwung ni atail kin idek, “Ia ih Koht”?

Karasepe, ele ekei kin men Koht en kin mwadang kaloke irail kan me kin wiahda sapwung. Ekei kin medewe me Koht duwehte Santa Claus me kin kihda kisakis me duwehte doadoahk, en emen eh pwoud, de kana nan mwadong en pingko ape.

Madamadau riau pwukat kin nda me ma Koht sohte ketin mwadang kapwungala sapwung kan de ma e sohte ketikihong kitail dahme kitail peki, eri met wehwehki me e sohte kin ketin nsenohki atail kahpwal kan oh anahn akan. Madamadau pwukat uhdahn sapwung! Ni mehlel, Siohwa Koht kin ketin doadoahk ahnsou wet pwehn apwalihala aramas koaros ahpw kaidehn ni ahl ehu me aramas tohto kin kasik.

Eri dahme Koht kin ketin wiewia? Pwehn sapengla peidek wet, kitail anahne tamanda dahme wiawi nin tepin poadopoad en aramas ni eh ohla arail nanpwungmwahu rehn Koht, ahpw met kak pwurehng mwahula.

Kahpwal kan me Kohsang Dihp

Medewehla duwen ihmw ehu me ohlahr erein sounpar tohto. Oahs en ihmwo ohlahr, wenihmw ko pwupwsangehr, oh aramas kauwelahr mas likio. Mahs ihmwo mwahu ahpw met e ohlahr. Pwehki ihmwo ohla laud e sohte kak kamwahula nan rahn ehute.

Nna medewehla duwen ohla me wiawiong aramas akan mpen sounpar 6,000 samwalahro ni ahnsou me ngehn emen me adaneki Sehdan eh kahrehiong Adam oh Ihp en uhwongada Koht. Nin tapio, tepin pwopwoudo ahneki roson  en paliwar me unsek oh koapworopwor en mour kohkohlahte iangahki kadaudokara kan. (Senesis 1:28) Ahpw ni ara wiahda dihp, met duwehte ara kauwehla mouren aramas koaros me pahn miehla.

Ke dehr mwamwahliki soahng suwed kan me imwikihla ara uhwong. Paipel mahsanih: “Dihp tepidohng sampah sang rehn aramas tehmen [Adam], ahpw tialahng mehla.” (Rom 5:12) Likin mehla, dihp kauwehla nanpwungen kitail oh Sounkapikpatail oh e pil kauwehla paliwaratail, atail madamadau oh atail pepehm. Pwehki met, atail mour kin duwehte ihmw ehu me ohla. Ohl lelepek me adaneki Sohp, kawehwehda me atail mour “me mwotomwot oh diren apwal.”—Sohp 14:1.

Ahpw ia duwe, Koht likidmeliehla aramas akan mwurin Adam oh Ihp dipada? Soh! Ni mehlel, sangete ahnsowo leledo met, Samatail nanleng kin ketin wie doadoahk pwehn sewese aramas akan. Pwehn wehwehki dahme e kin ketin wiahiong kitail, medewe duwen soahng siluh me anahn pwehn kak onehda ihmw ehu. Oh ia duwen ehuehu ire pwukat kin pid dahme Koht ketin wiahdahr pwehn kamwahwihala mouren aramas akan.

1 Mwurin emen eh kin kasawih ohlahn ihmw ehu, aramas me imwaniki ihmwo anahne pilada ma e pahn onehda de e pahn kauwehla.

Mwurinte uhwong me wiawi nan Ihden, Siohwa Koht ketin kasalehda kupwure me e pahn ketin kamwahwihala mouren aramas akan. E mahsanihong ngehn me tapiada uhwongo: “I pahn kahrehiong kowe oh liho en imwintihtipene oh nanpwungen kadaudokomw oh kadaudok en liho pahn imwintihtipene. E pahn sok pohn moangomwen pwe en kamwutepene oh ke pahn ke keimwen neh.”—Senesis 3:15, NW.

Mahsen pwukat kin kasalehda me Siohwa ketin inoukihda me e pahn ketin kasorehla me tapiada uhwong me wiawi nan Ihden. (Rom 16:20; Kaudiahl 12:9) Patehng met, Siohwa ketin kohpada me ni ahnsou kohkohdo ‘kadaudok’ men pahn komourala aramas sang dihp. * (1 Sohn 3:8) Inou pwukat kin kasalehda ire mehlel wet: Koht pahn ketin kamwahwihala dahme e ketin kapikada ahpw kaidehn kauwehla. Ahpw ahnsou pahn anahn pwehn kamwahwihala soahng kan.

2 Emen me kin wiahda pilahn en ihmw ehu kin kasalehda soahng dah kan me anahne onohnda.

Siohwa Koht ketikihong mehn Israel kan kosonned kan oh ketin wiahda tehnpas ehu pwe irail en kaudokiong ih loale. Paipel mahsanih: “Soahng pwukat koaros mwetehn soahng me pahn pwarodo.” (Kolose 2:17) Duwehte pilahn en ihmw kan, mepwukat kin kasalehda mehkot laud me pahn wiawi.

Karasepe, mehn Israel kan kin meirongkihla mahn kan pwehn ale mahkpen diparail kan. (Lipai 17:11) Met kin kasalehda me mie  meirong ehu me laudsang met me pahn wiawi sounpar epwiki kei mwuhr. Meirong wet pahn wia tomw ehu ong aramas koaros. * Wiawihdahn impwalo oh tehnpas sarawio me mehn Israel kan kin kaudok loale kin kasalehda dahme Mesaiao pahn wia ni ahnsou kohkohdo, sang ni ahnsou me e pahn pwoula lel eh pahn ketidahla nanleng.—Kilang  pali 7.

3 Soun kauwada ihmw men kin pilipilda pwehn idawehn pilahn kan oh onehda ihmwo.

Sises iei Mesaia me pilipildahr pwehn kapwaiada soahng kan me meirong en mehn Israel ko kin mwete oh e pahn ketikihda sapwellime mour pwehn komourla aramas akan. Ihme kahrehda Sohn Sounpapidais kahdaneki Sises “Sihmpwul en Kohto me kin ketikihsang dipen sampah koaros.” (Sohn 1:29) Sises kupwurki en kapwaiada pwukoa wet. E mahsanih: “I kohdihdo sang nanleng pwe I en kapwaiada kupwur en ih me ketin kadariehdo, a kaidehn pwe I en wia nsenei.”​—Sohn 6:38.

Kupwuren Koht ong Sises kin pid eh pahn ketin “tounmeteikihla moure, pwe me ngeder en maiauda” oh pil ni eh pahn ketin wiahda inou en Wehi ehu rehn sapwellime tohnpadahk ko. (Madiu 20:28; Luk 22:29, 30) Koht pahn ketin doadoahngki sapwellime Wehio pwe kupwure en pweida ong aramas koaros. Rongen Wehin Koht kin adaneki “rongamwahu” pwehki e kin kasalehda me Koht ketin kauwadahr koperment ehu nanleng me pahn kamwahwihala sampah wet!​—Madiu 24:14; Daniel 2:44. *

Doadoahk en Onohnsapahl Kin Wiawihte

Mwohn Sises ketidahla nanleng, e ketin kehkehlikihong sapwellime tohnpadahk kan: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi [“sapwellimen Koht manaman,” NW]. . . . Eri, kumwail en ese pwe I pahn ieiang kumwail ahnsou koaros lel ni imwin kawa [“kaimwiseklahn koasoandi en mehkan,” NW].”​—Madiu 28:19, 20.

Eri onohnsapahl en mouren aramas sohte pahn uhdi ni pwoulahn Sises. E pahn pouslahte wiawi lao “kaimwiseklahn koasoandi en mehkan” iei ahnsou me Wehin Koht pahn tepida kakaun sampah. Ahnsowo leledohr. Kitail ese met pwehki kilel me Sises ketin kohpada duwen “kaimwiseklahn koasoandi en mehkan” kin wiawi ahnsouwet. *​—Madiu 24:3-14; Luk 21:7-11; 2 Timoty 3:1-5.

Rahnwet nan sahpw 236, Sounkadehdehn Siohwa kan kin kapwaiada sapwellimen Sises kehkehlik en kalohki rongamwahu en Wehin Koht. Makasihn me ke wadewadeken kin wiawihda pwehn sewese iuk en kalaudehla omw wehwehki duwen Wehio oh dahme e pahn wia. Pali 2 en ehuehu makasihn en Kahn Iroir kin koasoia: “Makasihn wet . . . kin kamweitala aramas kan ki rongamwahu me Wehin Koht, me iei uhdahn koperment ehu me mih nanleng, pahn kereniong kasohrehla soahng suwed koaros oh pahn kawiliakapwala sampah ong ehu paradais. E kin kangoange aramas en pwoson Sises Krais, me pwoulahr pwe kitail en kak alehdi mour soutuk oh met e ketin kakaun nin duwen nanmwarki men en Wehin Koht.”

Rahnwet ke kin rong duwen wiewiahn mwersuwed kan de rerrer en sahpw ape de pil pein kowe kin lelohng kahpwal. Ahpw ni omw pahn onopki Paipel, e pahn kak kamehlelehiong uhk me Koht sohte likidmeliehla aramas. Ni mehlel, “Koht sohte dohsang emenemen kitail.” (Wiewia 17:27) Oh sapwellime inou en kapwurehdo dahme tepin atail pahpa oh nohno kasalongehla pahn pweida.​—Aiseia 55:11.

[Nting tikitik me mi pahs]

 [Kakon/​Kilel nan pali 7]

(Pwehn kilang nting kan ni soandi mwahu, kilang pwuhk wet)

 “Mwomwen Me Uhdahno”​—Dahme Impwalo Kin Karasahiong

PEI SARAWIO

Ni en Koht eh ketin kupwurki ale meirong en Sises.​—IPRU 13:10-12.

SAMWORO LAPALAPO

Sises.​—IPRU 9:11.

1 Ni Rahnen Tomwo, samworo lapalapo kin wiahda meirong ong dipen aramas akan.​—LIPAI 16:15, 29-31.

1 Ni Nisan 14, pahr 33, Sises ketin meirongkihla sapwellime mour ong kitail.​—IPRU 10:5-10; 1 SOHN 2:1, 2.

WASA SARAWIO

Irair en Sises ni eh wia sapwellimen Koht seri sang ni manaman en Koht.​—MADIU 3:16, 17; ROM 8:14-17; IPRU 5:4-6.

KAHDENGO

Kahlepen Sises me katohrepeseng sapwellime mour nin sampah sang nanleng.​—1 KORINT 15:44, 50; IPRU 6:19, 20; 10:19, 20.

2 Samworo lapalapo kin pidelong nan Wasa Sarawiheo me kahdengo kin katohrehsang Wasa Sarawio.

2 Mwurin e iasada, Sises ketin pidelong mas loalen kahdengo ni eh ketidahla nanleng pwehn uh “mwohn silangin Koht pwehn sewesei kitail.”​—IPRU 9:24-28.

WASA SARAWIHEO

Nanleng.​—IPRU 9:24.

3 Nan Wasa Sarawiheo, samworo lapalapo kin usupihki ntahn meirongo mwohn kohpwahn inowo.​—LIPAI 16:12-14.

3 Ni eh ketikihda kesempwalpen sapwellime nta, Sises ketikihda tomw ehu ong dipatail kan.​—IPRU 9:12, 24; 1 PITER 3:21, 22.