Diar Kangoang oh Nsenamwahu nan Atail Kaudok ong Koht

“Kumwail ale oh kapaikada ei mehn wisiket, oh . . . kumwail ahpw pahn diar kommoalpen [“mouramwail,” NW] kan.”​—MAD. 11:29.

1. Dahme Koht ketin koasoanehdi ni Nahna Sainai? Dahme kahrehda?

 NI AHNSOU me Kosonnedo tapiada wiawi ni Nahna Sainai, koasoandi en Sapad pil tapiada. Siohwa ketin doadoahngki sapwellime sounkair Moses pwehn kehkehlingkihong wehin Israel: “Ke pahn doadoahk erein rahn weneu nan wihk ehu, a ni keisuhwen rahn ke pahn kommoal, pwe omw lidu kan oh mehn liki kan me kin doadoahk ong uhk oh pil noumw mahn akan en pil kak kommoal.” (Eks. 23:12) Ei, pwehki eh ketin nsenohki sapwellime aramas akan me mi pahn Kosonnedo, Siohwa ketin koasoanehdi rahn ehu pwe ren kak “kommoal.”

2. Ia duwen mehn Israel kan ar kin paiekihda ni arail kapwaiada rahnen Sapad?

² Rahnen Sapad ihte rahn en kommoal? Soh, e kesempwal pwe e wia kisehn kaudok  en Siohwa me mehn Israel kan kin wia. En kapwaiada rahnen Sapad kin kihong tapwin peneinei kan ahnsou pwe ren padahkihong arail peneinei en ‘peikiong sapwellime kosonned akan ni ar pahn kin wia dahme mwahu.’ (Sen. 18:19) E pil kihong ahnsou mwahu ong peneinei oh kompoakparail kan en kohpene pwehn doudouloale sapwellimen Siohwa wiewia kan oh ahneki ahnsoun peren. (Ais. 58:13, 14) Oh kesempwal sang met, rahnen Sapad kin kasalehda ahnsou ehu me peren oh nsenamwahu mehlel pahn pweida ni erein Kaundahn Krais Pahr Kid. (Rom 8:21) Ahpw ia duwen atail ahnsou? Ia wasa oh ia duwen Kristian mehlel kan me kin nsenohki wia kupwuren Siohwa ar kak diar soangen peren oh nsenamwahu wet?

Diar Kangoang oh Kakehl Sang Werekiong Kristian akan

3. Ia duwen tepin Kristian akan arail kin sawaspene? Ia imwilahn met?

³ Wahnpoaron Pohl kawehwehda me mwomwohdiso en Kristian “me wia uhr oh poahsoanpen me mehlelo.” (1 Tim. 3:15) Tepin Kristian akan kin ale sawas sang ni arail kin kangoange oh kakehlaka emenemen ni limpoak. (Ep. 4:11, 12, 16) Ni ahnsou me Pohl mihmi Episos, tohnmwomwohdiso en Korint kan mwemweitla oh kangoange ih. Tehk dahme wiawi: “I perenkihda mehlel en Stepanus, Portunatus oh Akaikus ar pwarodo; mehlel irail me wiliankumwaildi reht, kumwail kan me sohte mi met, ni ar kansenamwahwihielahr.” (1 Kor. 16:17, 18) Pil duwehte, mwurin Taitus mwemweitla Korint pwe en papah rie Kristian ako wasao, Pohl kak ntingwohng mwomwohdisowo duwen ‘peren me Taitus diar rehrail ni irail koaros arail kansenamwahwihala!’ (2 Kor. 7:13) Rahnwet Sounkadehdehn Siohwa kan pil kin diar kangoang sang ni arail werekiong iengerail Kristian kan.

4. Ia duwen atail kin diar peren oh kamweit sang mihting en mwomwohdiso?

⁴ Ke eseier me mihting en mwomwohdiso iei wasa me ke kin diar peren mehlel. Ih wasa me kitail kin diar ‘sawaspene, arail pwoson en sewese kitail, oh atail pwoson en sewesei irail.’ (Rom 1:12) Riatail Kristian kan kaidehn aramas kei me kitail kin tuhwong oh koasoiong ekeite pak. Irail kompoakepatail mehlel kan, aramas me kitail kin poakohng oh wauneki. Kitail kin diar peren oh kamweit sang ni atail kin kaukaule pokonpene nan atail mihting kan.​—Pail. 7.

5. Ia duwen atail kin kangoange emenemen ni ahnsoun kapokon kan?

⁵ Pil ehu, kitail kin diar peren oh kangoang sang atail kapokon kan me kin wiawi ehuehu sounpar. Kapokon pwukat kin kihda pilen komour en padahk mehlel me kohsang Mahsen en Koht Paipel, oh pil kihong kitail ahnsou mwahu en ‘langahda douluhl mohngiongitail kan’ ni atail werekiong meteikan. (2 Kor. 6:12, 13) Ahpw ia duwen ma kitail kin namenek oh kin apwalki tuhwong aramas akan? Ehu ahl en esehla riatail Kristian akan iei en kihda atail sawas ni ahnsoun kapokon. Emen sister wia met. Mwurin mwo, e koasoia: “I sohte ese me tohto wasao likin ei peneinei oh kompoakepahi kan. Ahpw ni ei iang sawas kamwakel, I tuhwong brother oh sister tohto! E uhdahn kaperen!”

6. Ia ehu ahl me kitail kak diar peren oh kangoang ahnsoun kommoal?

⁶ Mehn Israel kan kin ahnla seiloakla Serusalem pwe ren kaudok pak siluh ehuehu sounpar. (Eks. 34:23) Re kin kalapw pwilikihdi arail mwetuwel oh sidohwa kan oh alialuhki rahn kei nan ahl pwelpar kan. Ahpw ni arail lella tehnpaso oh kilang irail ko me “kin kapikapinga KAUN-O,” re kin direkihla “peren lapalap.” (2 Kron. 30:21) Tohto sapwellimen Siohwa ladu kan rahnwet pil diar peren laud ni ar iang arail peneinei mwemweitla Pedel, ohpis en Sounkadehdehn Siohwa kan me karanih arail wasa. Ehu rahn ke kak koasoanehdi omw peneinei en mwemweitla soangen wasa pwukat ni omw ahnsoun kommoal?

7. (a) Ia duwen kohpene eh kin wia kamwahupatail? (b) Dahme kak sewese ahnsoun kohpene en kaperen oh kakehlaka kitail?

⁷ Peneinei oh kompoakpatail kan en kohpene pil kak kihong kitail kangoang. Nanmwarki Solomon koasoia: “Me keieu mwahu ong aramas  emen en wia iei en mwenge oh nim oh pereperenki wahn eh doadoahk.” (Ekl. 2:24) En kohpene kin kaperen oh pil kin kakehlaka atail limpoakpene ni atail kin esehla iengetail Kristian akan. E mwahu ma aramas malaulaute en kohpene oh e konehng en tetehk mwahu soahng koaros, ahpw mehlel ma mie sakau en wai. Met kin wia ahnsou kaperen oh kakehlaka kitail.

Kalohk Kin Kangoang oh Kamweit

8, 9. (a) Ia duwen sapwellimen Sises mahsen eh weksang en sounkawehwehn kosonned oh Parisi kan? (b) Ia duwen atail kin paiekihda ni atail kin ehukihong meteikan padahk mehlel en Paipel?

⁸ Sises kin ketin ngoangki doadoahk en kalohk oh ketin kangoange sapwellime tohnpadahk kan en pil kin wia duwehte. Met sansal nan sapwellime mahsen: “Mehlel pwe rahket me inenen laud, a tohndoadoahk kan me malaulau. Kumwail eri kapakap oh peki rehn Kaunen rahket pwe en ketin kadarodo tohndoadoahk tohto pwe re en iang doadoahk.” (Mad. 9:37, 38) Mahsen me Sises kin ketin padahngki uhdahn kin wahdo kamweit pwehki e kin wia “Rongamwahu.” (Mad. 4:23; 24:14) Met kin uhdahn weksang kosonned katoutou kan me Parisi kan kin kihong aramas akan.​—Wadek Madiu 23:4, 23, 24.

⁹ Ni atail kin ehukihong meteikan rohng en Wehio, kitail kin kihong irail kamweit oh pil ni ahnsowohte, kitail kin kalaudehla atail wehwehki oh kalahnganki kesempwalpen padahk mehlel en Paipel. Sounmelkahkao koasoia: “Kapinga KAUN-O! Meid mwahu koulki melkahka en kaping ong atail Koht; meid kansenamwahu.” (Mel. 147:1) Ia duwe, ke kak kalaudehla omw peren ni omw kin kapinga Siohwa ong mehn mpomw kan?

10. Atail pweida nan doadoahk en kalohk kin poahsoanda sang en aramas akan mwekidki rongamwahu en Wehio? Menlau kawehwehda.

¹⁰ Mehlel me aramas akan kin mwekidki rongamwahu en wehio nan ekei wasahn kalohk, a ekei wasa re sohte kin. (Wadek Wiewia 18:1, 5-8.) Ma ke kin kousoan nan wasa ehu me aramas malaulaute kin mwekidki rongamwahu  en Wehio, song en medemedewehte kamwahu me kin kohsang omw kapwaiada doadoahk en kalohk. Tamataman me omw nantihong kalokalohki mwaren Siohwa kaidehn doadoahk mwahl ehu. (1 Kor. 15:58) Patehng met, omw pweida sohte kin poahsoanda sang en aramas akan arail mwekidki rongamwahwo. Kitail kak kamehlele me Siohwa pahn ketin kahrehiong aramas mohngiong mwahu kan en ahneki ahnsou mwahu en mwekidki rongamwahu en Wehio.​—Sohn 6:44.

Diar Peren nan Kaudok en Peneinei

11. Pwukoa dahieu me Siohwa ketikihong pahpa oh nohno kan? Ia duwen arail kak kapwaiada pwukoa wet?

¹¹ Pahpa oh nohno kan me kin lemmwiki Koht kin ahneki pwukoa en padahki neirail seri kan duwen Siohwa oh sapwellime ahl akan. (Deud. 11:18, 19) Ma kowe emen pahpa de nohno, ke kin koasoanehdi ahnsou en padahki noumw seri kan duwen samatail nanleng me limpoak? Pwehn sewese iuk en kapwaiada pwukoa kesempwal wet oh apwalih anahn kan en omw peneinei, Siohwa ketikihda kaweid oh padahk tohto kan me mi nan pwuhk kan, makasihn kan, video kan, oh pil CD de cassette kan me kin kakehlaka kumwail.

12, 13. (a) Ia duwen peneinei kan arail kak paiekihda Kaudok en Peneinei ni soutik? (b) Ia duwen pahpa oh nohno kan arail kak wiahiong arail kaudok en peneinei en kaperen oh wia mehn kakehlaka irail?

¹² Patehng met, pwihn en ladu lelepek oh loalokong wiahda koasoandi en Kaudok en Peneinei ni soutik. Koasoandi wet wiawihda pwe peneinei kan en wia arail onop en Paipel ehuehu wihk. Me tohto kin diarada me koasoandi wet kin kaminiminpene tohnpeneinei kan oh sewese irail en limpoakpene oh e pil kakehlailih arail nanpwungmwahu rehn Siohwa. Ahpw ia duwen pahpa oh nohno kan arail kak wiahiong arail kaudok en peneinei en kin kaperen oh wia mehn kakehlaka irail?

¹³ Kaudok en Peneinei ni soutik en dehr wia ahnsou ehu me kasangat oh kapwang. Kitail kin kaudokiong “Koht en peren” men oh e kupwurki kitail en perenki atail kaudok. (1 Tim. 1:11, NW; Pil. 4:4) En ahneki ehu ni soutik tohrohr pwehn koasoiapene padahk kesempwal kan en Paipel kin wia kapai laud ehu. Pahpa oh nohno kan kak en materekiong arail wiepen padahk kan ni arail kin doadoahngki arail madamadau en wiahda mehkot kaperen. Karasepe, ehu peneinei mweidohng neirail pwutak me adaneki Brandon, me sounpar eisek en wiahda ripoht me koasoia, “Dahme Kahrehda Sehdan Adaneki Serpent nan Paipel?” Pwehki sineik eh kin pidada Sehdan, met kapwunode oh kansensuwedihala Brandon pwehki e kin poakepoake sineik kan. Ekei pak peneinei kan kin wia sipai en poadopoad en Paipel kan ni en emenemen tohnpeneinei kin wadek sang nan iren Paipel kan de mwomwehda wia emen tohn Paipel. Wiepen padahk pwukat kin kaperen oh seri kan kin iang pidada oh kaweid en Paipel kan kak sair arail mohngiong. *

Soikala Mehkan me Kak Katoutouwihala Iuk

14, 15. (a) Ia duwen pwunod oh pepehm en sohte epwel mwahu ar kin lalaudla ni imwin rahn pwukat? (b) Soangen kahpwal tohrohr dahieu me kitail kin lelohng?

¹⁴ Pwunod oh pepehm en sohte epwel mwahu kin lalaudla ni imwin rahn akan en koasoandi suwed wet. Sohte ahneki doadoahk oh pil kahpwal en mwohni teikan kin lelohng aramas rar kei. Pil irail akan me mie arail doadoahk kin kalapw pehm me mwohni me re koadoahkihada kin sohte itarohng arail peneinei. (Pil kilang Akkai 1:4-6.) Palien politik oh kaun teikan mwomwen sohla kak kihsang tiahk lemei oh wiewia suwed teikan. Aramas tohto kin mworuskihla pein arail sapwung kan.​—Mel. 38:4.

¹⁵ Kristian mehlel akan kin lelohng kahpwal oh kasongosong kan me en Sehdan koasoandi kin kahrehda. (1 Sohn 5:19) Ekei pak, sapwellimen Krais tohnpadahk kan ele kin lelohng  kahpwal tohrohr ni arail nantihong en kolokol arail lelepek ong Siohwa. Sises mahsanih: “Ma irail kalokeieier, re pil pahn kalokei kumwail.” (Sohn 15:20) Ahpw ni atail kin lelohng kalokolok, kitail “sohte mwahn kin kelehpwla.” (2 Kor. 4:9) Dahme kahrehda?

16. Dahme kak sewese kitail en kolokol atail peren?

¹⁶ Sises mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.” (Mad. 11:28) Sang ni atail pwoson mehlel tomw en Krais, kitail kin ni karasaras kihong kitail nin limen Siohwa. Ni ahl wet, kitail kin ale “manaman lapalap.” (2 Kor. 4:7) Paipel kin karasahiong sapwellimen Koht manaman duwehte sounsawas men. E kin sewese oh kakehlailih atail pwoson pwe kitail en kak dadaurete oh kolokol atail peren pahn kalokolok oh kahpwal kan me kitail kin lelohng.​—Sohn 14:26; Seims 1:2-4.

17, 18. (a) Soangen madamadau dah me kitail en perehsang kitail? (b) Dahme kak imwikihla atail en kesempwalikihla peren en sampah kan?

¹⁷ Kristian mehlel kan rahnwet anahne perehsang irail ineng en sampah me kin kahrehiong aramas akan en rapahki soangsoangen peren kan. (Wadek Episos 2:2-5.) Ma soh, kitail ele kak lohdi pahn lidip en “dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda.” (1 Sohn 2:16) De kitail kak ni sapwung kamehlele me atail kapwaiada ineng en uduk pahn wahdo peren. (Rom 8:6) Karasepe, ekei aramas uhd tapiada doadoahngki wini en kasahliel oh sakau, kilang kilel suwed kan, wia mwadong keper kan, de wiewia kan me uhwong kosonned pwehn nantihong kaperenda nsenarail. En Sehdan eh “widing suwed kan” kin wiawihda pwehn pitih aramas ni eh kin kihong ih madamadau sapwung duwen peren.​—Ep. 6:11.

¹⁸ Mehlel, e sohte sapwung en mwenge, nim, oh perenki soangen mehn kamweit kan ma kitail wia mepwukat ni ahl me konehng. Ahpw kitail sohte kin mweidohng soahng pwukat en wia mehkan me keieu kesempwal nan atail mour. En toupahrek oh en kaunda atail ineng kan kin kesempwal, ahpw mehlel ni atail medewehla soangen ahnsou dah me kitail mi loale. En nsenohkihte dahme kitail men wia kak katoutouwihala kitail ni ahl ehu me kitail solahr wia de solahr pweida nan atail loalokongkihla atail Kaun Sises Krais.​—2 Pit. 1:8.

19, 20. Ia duwen atail kak diar nsenamwahu mehlel?

¹⁹ Ni ahnsou me atail madamadau kin pahrekiong sapwellimen Siohwa kosonned kan, kitail kin pohnese me sohte lipilipil soangen peren dah me sampah kihda e kin ongete ahnsou kis. Moses ese duwen met, oh pil kitail. (Ipru 11:25) Kamweit mehlel, soahng me kin wahdo peren oh nsenamwahu poatopoat, kin kohsang atail wia kupwuren Samatail nanleng.​—Mad. 5:6.

²⁰ Kitail en pousehlahte diarada kamweit, kangoang, peren oh nsenamwahu nan atail kaudok ong Koht. Ni atail wia met, kitail kin “kesehla mouren seupwoson Koht oh ineng suwed en sampah, . . . ni atail pahn awiawih Rahnen kapaio me kitail kin kasikasik, ni ahnsou me lingan en atail Koht lapalap oh Sounkomour Sises Krais pahn pwarada.” (Taitus 2:12, 13) Eri, kitail koasoanehdi teng en kapaikada sapwellimen Sises mehn wisik ni atail uhpah sapwellime manaman en kaunda oh kaweid. Ni atail wia met, kitail pahn diar peren oh nsenamwahu mehlel!

[Nting tikitik me mi pah]

Ia Duwen Omw Pahn Sapeng?

• Ia duwen sapwellimen Siohwa aramas akan arail diar peren oh nsenamwahu rahnwet?

• Ia duwen doadoahk en kalohk eh kin kamweit oh kangoange kitail oh irail kan me kitail koasoiong?

• Dahme tapwin peneinei kak wiahiong arail kaudok en peneinei pwehn kaperen oh kakehlaka irail?

• Dahme kak katoutouwihala kitail pwe kitail en sohla nsenohki wia kupwuren Koht?

[Peidek en Onop]

[Kawehwehpen kilel kan nan ehu ehu pali 28]

En kapaikada sapwellimen Sises mehn wisik pahn wahdo nsenamwahu tohto