Pousehlahte Kakehlakahda Mwomwohdiso

“Kumwail kakehlakahda emenemen kumwail, oh sawaspene.”—1 DES. 5:11.

1. Ia kapai kan me kohsang omw wia tohnmwomwohdiso en Kristian? Ahpw kahpwal dah kei kakete mie?

 EN WIA emen tohnmwomwohdiso en Kristian iei kapai laud ehu. Ke kin ahneki nanpwungmwahu rehn Siohwa. Omw kin likih sapwellime Mahsen kin pere iuk sang imwila suwed nan mouren irail me kaidehn Kristian kan. Ke kin ahneki kompoakepahmw mehlel tohto me men ken wia mwahu. Ei, mie kapai tohto. Ahpw, pali laud en Kristian akan kin nantihong powehdi soangsoangen kahpwal kan. Ele ekei irail anahne sawas en wehwehki ire loal kan nan Mahsen en Koht. Meteikan kin soumwahu de pahtou, de re mwein lokolongki kahpwal kan me kohsang arail pilipil sapwung kan. Oh kitail koaros kin anahne mour nan sampah ehu me kin dohsang rehn Koht.

2. Ia duwen atail anahne mwekidki ni ahnsou me riatail kan ahneki kahpwal kan? Dahme kahrehda?

² Kitail sohte mwahuki kilang iengetail Kristian akan en lokolok. Wahnpoaron Pohl karasahiong mwomwohdiso duwehte paliwar ehu oh nda me “ma kakon en war ehu kin medekla, kakon koaros kin iang medekla.”  (1 Kor. 12:12, 26) Nan soangen irair wet, kitail kin nantihong sewese riatail kan. Iren Paipel tohto kasalehda duwen tohnmwomwohdiso ar kin sewese meteikan en powehdi arail kahpwal kan. Ni atail tehkpene ire pwukat, medewehla ia duwen atail ele kak kihda sawas ni ahl me duwehte me ntingdi nan Paipel. Ia duwen omw kak sewese riomw kan en kaukaule papah Siohwa oh kakehlakahda mwomwohdiso?

“Ira Ahpw Kahrelahng nan Imwara”

3, 4. Ia duwen Akwila oh Persila ara sewese Apolos?

³ Ni ahnsou me Apolos kohla kousoanla nan Episos, e kin ngoangki kalohk. Pwuhken Wiewia mahsanih: “E kin pwerisek koasoia oh padahkihwei pwungen mour en Sises ni peren. Ahpw e wehwehkihte papidais en Sohn.” Mwein e ale padahk wet sang rehn emen tohnpadahk en Sohn de sapwellimen Sises tohnpadahk kan mwohn Pendekos pahr 33, kahrehda Apolos sehse duwen papidais ni “ni mwaren Sahm oh Sapwellime oh [“sapwellimen Koht manaman,” NW].” Mendahki Apolos eh kin ngoang, mie ekei ire kesempwal kan me e sohte wehwehki. Ia duwen eh werekiong ienge me pwoson kan sewese ih?—Wiewia 1:4, 5; 18:25; Mad. 28:19.

⁴ Akwila oh Persila, Kristian pwopwoud ehu, rong Apolos koasoi ni eimah nan sinakokeo, ira eri kahrelahng nan imwara oh padahkih ih. (Wadek Wiewia 18:24-26.) Met wiewia mwahu ehu. Mehlel, Akwila oh Persila ele kohla rehn Apolos oh koasoiong ih ni kamantik oh ira sohte kahrehiong ih en pehm me e sapwung. Met pwehki eh sehse duwen dahme wiawi ni tepin mwomwohdiso en Kristian eh miehla. Oh Apolos uhdahn kalahnganki ara ehukihong ih ire kesempwal kan. Ni eh esehla ire pwukat, Apolos wia “sawas laud ehu” ong rie kan nan Akaia oh kihda kadehde kehlail.—Wiewia 18:27, 28.

5. Soangen sawas mwahu dah me sounkalohk tohto en Wehio kin kihda? Ia imwilahn met?

⁵ Rahnwet, tohto nan mwomwohdiso kin kalahnganki irail kan me sewese irail en wehwehki Paipel. Kompoakepah mwahu tohto kin wiawihda nanpwungen tohnsukuhl oh arail sounpadahk kan. Pali laud en ahnsou, en sewese aramas akan en wehwehki padahk mehlel kin anahne koasoanehdi ahnsou ehu en kaukaule onop Paipel rehrail erein sounpwong kei. Ahpw sounkalohk en Wehio kan perenki wia tounmetei wet pwehki re kin wehwehki me e pidada mouren aramas. (Sohn 17:3) Oh ia uwen kaperen en kilang aramas akan arail wehwehkihla padahk mehlel, mourki met oh doadoahngki arail mour pwehn wia kupwuren Siohwa!

E Keniken Rehn me Pwoson akan

6, 7. (a) Dahme kahrehda Pohl pilada Timoty en iang ih seiloak? (b) Ia duwen Timoty eh kekeirda?

⁶ Ni ahnsou me wahnpoaron Pohl oh Sailas wia ara keriaun seiloak en misineri kohla Listra, re diarada mwahnakapw men me adaneki Timoty, me ele sounpar  19 de 20 samwa ahnsowo. “Timoty pil keniken rehn me pwoson akan koaros en nan Listra oh Aikoniomw.” Eh nohno Iunis oh nohno kahlap Lois wia Kristian inoudahr kei, ahpw eh papaho sohte iang padahk mehlel. (2 Tim. 1:5) Mwein Pohl tuhwong peneinei wet ni ahnsou me e tepin kohla wasao mpen sounpar riau mwoweo. Ahpw met wahnpoarono kin nsenohki en esehla Timoty pwehki eh irair mwahu kan. Eri, pwihn en elder kan wasao pwungkihda me Timoty en wiahla sounsawas emen ong Pohl nan eh doadoahk en misineri.—Wadek Wiewia 16:1-3.

⁷ Timoty sukuhlki soahng tohto sang ienge me maho. E inenen kekeirda, kahrehda Pohl kak koapworopworki oh kadarala ih ong mwomwohdiso kan nin duwen wiliepe. Erein mpen sounpar 15 me Timoty kin ieiang Pohl, mwahnakapw soakoahiek oh namenek menet kekeirda oh wiahla sounapwalih inenen mwahu men.—Pil. 2:19-22; 1 Tim. 1:3.

8, 9. Dahme tohnmwomwohdiso kak wia pwe ren kangoange me pwulopwul kan? Menlau kihda ehu karasaras.

⁸ Rahnwet, mwahnakapw oh peinakapw tohto nan mwomwohdiso en Kristian pahn kak wia soangsoangen doadoahk kan. Ma irail akan me kin wia mehn kahlemeng mwahu nan arail kin papah Siohwa kin apwalih oh kangoange irail, me pwulopwul pwukat kak nantihong oh ale pwais kaselel kan nan sapwellimen Siohwa pwihn. Kilangseli nan omw mwomwohdiso! Mie me pwulopwul kan me kak tounmeteiki arail ahnsou duwehte Timoty? Ma ke kin sewese oh kangoange irail, irail kak wiahla pioneer kan, tohn doadoahk kan en Pedel (Bethel), misineri kan de sounapwalih me kin seiloak kan. Eri, dahme ke kak wia pwehn sewese irail en alehdi mehn akadei pwukat?

⁹ Martin me kin doadoahk nan Pedel erein sounpar 20 kin tamanda eh kin kalahnganki sounapwalih me kin seiloak eh nsenohki ih ni ahnsou me ira kohla kalohk sounpar 30 samwalahro. Sounapwalio kin perenki koasoia duwen eh doadoahk nan Pedel ni ahnsou me e pwulopwul. E kangoange Martin en medewe ma e kak pil tounmeteiki eh mour ni ahlohte ong sapwellimen Siohwa pwihn. Martin pehm me ara koasoipene kin kamwakid ih mwuhr en wiahda eh pilipil. Mwein ke kak sewese me pwulopwul kan ni omw kin koasoiong irail duwen mehn akadei kan en papah Siohwa.

“Kumwail Kakehlaka Irail kan me nan Kapehd Tikitik”

10. Ia pepehm en Epaprodaitus? Dahme kahrehda?

¹⁰ Epaprodaitus wia seiloak reirei oh kapwang  ieu sang Pilipai kohla Rom pwehn tuhwong wahnpoaron Pohl me selikihdi eh pwoson. Sounseiloak menet wia wiliepen mehn Pilipai kan. E sohte wahlahte arail kisakis kan ong wahnpoarono ahpw e pil koasoanehdi en mihmi rehn Pohl oh sewese ih nan eh ahnsoun apwal. Ahpw ni ahnsou me e mihmihte Rom, Epaprodaitus soumwahuda oh “kereniong mehla.” Pwehki e pehm me e sohte pweida, Epaprodaitus eri pahtoula.—Pil. 2:25-27.

11. (a) Dahme kahrehda kitail en dehr pwuriamweiki ma ekei nan mwomwohdiso kin pahtoula? (b) Dahme Pohl koasoia me pid duwen Epaprodaitus?

¹¹ Rahnwet, soangsoangen kapwunod kan kin kahrehiong aramas en pahtoula. Ripoht sang ehu pwihn en palien roson mwahu koasoia me aramas tohto nan sampah kin kakete pahtoula nan eh mour (World Health Organization). Sapwellimen Siohwa aramas akan pil kin pahtoula. Kahpwal en apwalih peneinei, soumwahu, mworusala pwehki sohte pweida, de soahng teikan ele kin kahrehda emen en toutoukihla. Dahme mehn Pilipai kan kak wia pwehn sewese Epaprodaitus? Pohl ntingihedi: “Kumwail kasamwo ih ni peren nin duwen riamwail emen rehn Kaun-o. Kumwail en pil wauneki aramas koaros me duwehte ih, pwehki eh tounmeteikihla eh mour oh kereniong mehla pwehki doadoahk en Krais, pwe en wiahiong ie sawaso me pein kumwail sohte kak wia.”—Pil. 2:29, 30.

12. Ia duwen atail kak kamweitala me pahtou kan?

¹² Kitail pil anahne kangoange riatail Kristian kan me kin mworusala de pahtoula. Uhdahn pahn mie soahng mwahu kan me kitail kak koasoiahki arail kin papah Siohwa. Mwein irail wiahda wekidekla laud kan nan arail mour pwehn wiahla Kristian kan de doadoahngki pali laud en arail ahnsou ong doadoahk ong Siohwa. Kitail kin pohnese kesempwalpen arail nannanti oh kitail kak kamehlelehiong irail me Siohwa pil kin ketin kesempwalkin irail. Mehnda ma mahla de soumwahu me kin irehdi ekei me lelepek kan en sohla kak wia duwehte mahs, irail kin warohng ale wahu pwehki arail papah erein sounpar kei. Sohte lipilipil soangen irair dah me re ahneki, sapwellimen Siohwa kaweid ong koaros me lelepek kan iei: “Kumwail kakehlaka irail kan me nan kapehd tikitik, kumwail sewese me luwet akan, oh kanengamahiong aramas koaros.”—1 Des. 5:14.

“Mahkohng oh Sewesehda”

13, 14. (a) Dahme mwomwohdisohn Korint anahne wia? Dahme kahrehda? (b) Ia kamwahupen koasoandi en piskensang emen nan mwomwohdiso?

¹³ Tepin Kristian kan nan mwomwohdisohn Korint lelohng irair ehu me ohl emen kin wia tiahk en nenek oh sohte kin koluhla. Eh wiewia kin keper ong mwakelekel en mwomwohdiso oh pil kapwuriamwei ong irail kan me kaidehn kisehn mwomwohdiso. Eri, e konehng Pohl en kaweidkin irail en kihsang ohl menet nan arail mwomwohdiso.—1 Kor. 5:1, 7, 11-13.

¹⁴ Kaweid wet kin imwila mwahu. E perehla mwomwohdisowo sang irair samino oh kahrehiong me dipano en pohnese eh sapwungo oh koluhla mehlel. Pwehki ohlo kasalehda me e koluhla mehlel, Pohl ntingihedi nan nah kisinlikou keriau ong mwomwohdisowo me ohlo en pwurodo. Ahpw kaidehn ihte met me anahn. Pohl pil kaweidkin mwomwohdisowo en “mahkohng oh sewesehda [me dipan oh koluhlahro], pwe eh nsensuwed dehr lalaudla.”—Wadek 2 Korint 2:5-8.

15. Ia duwen atail en kin kilangwohng me dipan akan me koluhla oh pwurodo nan mwomwohdiso?

¹⁵ Dahme kitail sukuhlki sang met? E kin kansensuwedihala kitail ni ahnsou me emen anahne piskenla. Arail wiewia kakete kauwehla mwaren Koht oh kahdsuwedihala mwomwohdiso. Re ele pil wiahda dihp ong kitail. Ahpw, ni ahnsou me elder kan me idihdida pwehn kasawih irairo nin duwen me  pahrekiong kaweid en Siohwa kin koasoanehdi me dipan men me koluhla en pwurodo nan mwomwohdiso, met kin kasalehda me Siohwa ketin mahkohng ih. (Mad. 18:17-20) E sou mwahu kitail en kahlemengih Ih? Ei mehlel, ma kitail kin soh kadek oh soh mahk, e kakete wehwehki me kitail kin uhwong Siohwa. Pwehn sewese meleilei oh miniminpenehn sapwellimen Koht mwomwohdiso oh ale kupwuramwahu en Siohwa, e sou mwahu kitail en ‘kasalehiong atail limpoak’ ong me dipan akan me koluhla mehlel oh pwurodo?—Mad. 6:14, 15; Luk 15:7.

“E Kak Sewese Ie”

16. Dahme kahrehda Pohl nsensuwedla rehn Mark?

¹⁶ Paipel pil kasalehda me kitail en dehr kolokol atail nsensuwed rehn irail kan me kansensuwedihala kitail. Karasepe ehu, Mark uhdahn kansensuwedihala wahnpoaron Pohl. Ia duwen? Ni ahnsou me Pohl oh Parnapas tapiada keieun ara seiloak en misineri, Mark pil iang ira pwehn sewese ira. Ahpw, erein arail seiloako oh ni kahrepe ehu me sohte sansalda, Sohn Mark kohkohsang ira oh pwurala imweo. Pohl uhdahn nsensuwedkihla en Mark eh pilipilo kahrehda ni ara koasoakoasoane keriaun ara seiloak, ih oh Parnapas akamaikihda ma Mark pahn iang ira de soh. Pwehki dahme wiawi nan keieun arail seiloak, Pohl sohte men Mark en iang ira.—Wadek Wiewia 13:1-5, 13; 15:37, 38.

17, 18. Ia duwen atail ese me kahpwalo nanpwungen Pohl oh Mark eh kapwungpwungla? Dahme kitail kak sukuhlki sang met?

¹⁷ Ahpw e sansal me Mark sohte mweidohng pein ih en mworuskihla en Pohl soikala ih, pwehki e iang Parnapas pousehlahte eh doadoahk en misineri nan wasa teikan. (Wiewia 15:39) E kadehdehda me e kin lelepek oh wia aramas likilik men, oh met sansalda nan dahme Pohl ntingihedi duwen ih sounpar kei mwuri. Pohl, me met sensel nan Rom, ntinglahng Timoty en kohla reh. Nan kisinlikouohte, Pohl nda: “Mark en iang uhk kohdo, pwe e kak sewese ie nan ei doadoahket.” (2 Tim. 4:11) Ei, Pohl kamehlelehier me Mark kin wie kekeirda mwahu.

¹⁸ Mie iren kasukuhl ehu sang met. Mark kakairada irair kan en misineri mwahu men. E sohte dipekelekelkihda en Pohl soikala ih. Ara nanpwungmwahu rehn Siohwa kin kehlail oh solahr nsensuwed mi nanpwungara. Pohl kin mwuhr pohnese me Mark kin wia sounsawas katapan men. Eri, ni ahnsou me riatail Kristian kan kin powehdi kahpwal kan oh kahpwal ko sohla mie, e konehng ren doulahte oh sewese meteikan en kekeirda nan padahk mehlel. En pohnese irair mwahu en meteikan kin kakehlaka mwomwohdiso.

Mwomwohdiso oh Kowe

19. Soangen sawas dah me tohnmwomwohdiso en Kristian koaros kak kihong emenemen?

¹⁹ Nan “ahnsou apwal” pwukat, ke anahne sawas sang riomw kan nan mwomwohdiso oh re pil anahne omw sawas. (2 Tim. 3:1) Emenemen Kristian ele sohte kin ahnsou koaros ese ia ahl me ren apwalih mwahu irair kan me re lelohng, ahpw Siohwa kin mwahngih. E kin ketin doadoahngki emenemen tohnmwomwohdiso, iangahki kowe, pwehn sewese meteikan en idawehn ahl pwung. (Ais. 30:20, 21; 32:1, 2) Eri, nantihong kapwaiada kaweid en wahnpoaron Pohl! Pousehlahte “kakehlakahda emenemen kumwail, oh sawaspene, duwen me kumwail wiewia ahnsou wet.”—1 Des. 5:11.

Ia Duwen Omw Pahn Sapeng?

• Dahme kahrehda kitail anahne kakehlaka meteikan nan mwomwohdiso en Kristian?

• Soangen kahpwal dah kan me ke kak sewese meteikan en powehdi?

• Dahme kahrehda kitail anahne sawas sang meteikan nan mwomwohdiso?

[Peidek en Onop]

[Kilel nan pali 13]

Kitail kak sewese emen iengetail Kristian me mi nan kahpwal

[Kilel nan pali 14]

Me pwulopwul tohto nan mwomwohdiso pahn kak wia soangen doadoahk tohto