Dahme Mehlel Duwen Dihp

ARAMAS soumwahu men kak kadehde me e sohte karakar ma e uhdahte kauwehla mehn sohng karakaro? Sansal me soh! Pil duwehte met, pwehki me tohto kin soikala sapwellimen Koht madamadau duwen dihp, e sohte wehwehki me sohte dihp. Sapwellime Mahsen, Paipel, kin kawehwe laud duwen ire wet. Dahme e kin uhdahn padahngki duwen dihp?

Koaros Soh Unsekla

Mpen sounpar 2,000 samwalahro, wahnpoaron Pohl kasalehda eh pwunodki ‘eh sohte kin wiahda me mwahu me e kin inengieng wia; ahpw e kin wiahda me suwed me e sohte men wia.’ (Rom 7:19) Ma kitail mehlel ong pein kitail, kitail pahn pwungki me kitail pil ahneki soangen irairohte. Mwein kitail kin men kapwaiada Kosonned Eiseko de kapwaiada soangen koasoandi teikan duwen tiahk ahpw mehnda ma kitail mwahuki de soh, kitail koaros kin sapwungala. Kitail sohte kin wia met pwehki kitail men, ahpw pwehki kitail luwet. Dahme kahrehda? Pohl kihda pasapeng wet: “Ma I kin wia mehkan me I sohte inengieng I en wia, met wehwehki me kaidehn ngehi me wiahda soahng wet, ahpw dihp me kin momour loalei.”​—Rom 7:20.

Duwehte Pohl, aramas koaros kin ipwikihdi luwet ehu me kin kasalehda me kitail sohsohki dihp oh soh unsek. Wahnpoaron Pohl koasoia: “Aramas koaros wiadahr dihp, oh irail koaros dohsangehr sapwellimen Koht lingan.” Dahme kahrehda soangen irair wet? Pohl doula oh koasoia: “Dihp tepidohng sampah sang rehn aramas tehmen [Adam], ahpw tialahng mehla. Eri, mehla lelohngehr aramas koaros, pwe aramas koaros dipadahr.”​—Rom 3:23; 5:12.

Me tohto kin uhwong padahk me nda me dihp me tepin atail pahpa oh nohno wiahda me kahrehiong kitail en dohlahsang Koht oh kihsang atail irair en unsek. Ahpw ih met me Paipel kin padahngki. Ni en Sises eh ketin mahsanih duwen irelaud keieu en pwuhken Senesis, e kin ketin kasalehda me e ketin kamehlele koasoiepen Adam oh Ihp.​—Senesis 1:27; 2:24; 5:2; Madiu 19:1-5.

Ehu padahk kesempwal en nan Paipel iei me Sises ketidihdo nin sampah pwehn kapitala irail me pwosonla ih sang dihp. (Sohn 3:16) Atail mour ong ahnsou kohkohdo kin pid atail kin pwungki sapwellimen Siohwa elen kapitala aramas akan sang kahpwal wet me kitail sohte kak kamwahwihala. Ahpw ma kitail sohte uhdahn wehwehki ia sapwellimen Koht madamadau duwen dihp, kitail sohte kak wehwehki oh kalahnganki dahme e ketin wiadahr pwehn komourala kitail sang dihp.

Kesempwalpen Sapwellimen Sises Meirong

Siohwa ketikihong tepin aramaso koapworopwor en mour kohkohlahte. Ihte ma Adam uhwong Koht me pahn kahrehiong ih en solahr ahneki koapworopwor wet. Adam uhwongada Koht oh ni ahnsou me e wia met, e wiahla aramas dipan emen. (Senesis 2:15-17; 3:6) En Adam wiewia sohte pahrekiong kupwuren Koht. Met kahrehda e solahr unsek oh e kauwehla nanpwungen ih oh Koht. Ni eh wiahda dihp sang eh kauwehla kosonned en Koht, e tepida mahla oh mehla. E kansensuwed pwe koaros kadaudoken Adam kan iangahki kitail, ipwidi nan dihp oh kitail pahn pil mehla pwehki met. Dahme kahrehda?

Kahrepeo sansal. Pahpa oh nohno soh unsek men sohte kak wiahda seri unsek kan. Koaros nein Adam seri kan ipwidi nin duwen aramas dipan kei, oh duwehte me wahnpoaron Pohl kasalehda me “pweinen dihp, iei mehla.” (Rom 6:23) Ahpw imwin iretikitik wet kihda koapworopwor ong kitail. E mahsanih: “Ahpw sapwellimen Koht kisakis sapan, iei mour soutuk rehn Krais Sises atail Kaun.” Met kin wehwehki me sang ni meirong en Sises, aramas me kalahnganki oh peikiong  ih kak mwakelekel sang dihp me Adam wiadahr. * (Madiu 20:28; 1 Piter 1:18, 19) Ia duwen met eh kin kamwakid omw pepehm?

Limpoak en Krais me “Kamwakamwakid” Kitail

Koht ketin kamwakid wahnpoaron Pohl en sapeng peidek wet? E ntingihdi: “Pwe limpoak en Krais me kamwakamwakid kiht, pwehki at dehdehkier padahk wet: aramastehmen pwoukihla aramas koaros; . . . E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla oh ketin iasada pwe en ketikihong irail mour.” (2 Korint 5:14, 15) Ma aramas emen wehwehki me meirong en Sises kak kapitala ih sang dihp oh e men kasalehda eh kalahnganki mwekid wet, e anahne nantihong kapwaiada kupwuren Koht. E pil anahne wehwehkihla dahme Koht kupwurki en wia, kaiahnehda kadeikpen loale en pahrekiong Paipel, oh eri kapwaiada mepwukat nan eh mour.​—Sohn 17:3, 17.

Wiewia sapwung kan kin kauwehla atail nanpwungmwahu rehn Siohwa Koht. Ni ahnsou me Nanmwarki Depit esehda uwen laud en dihp me e wiahda rehn Padsipa oh ni eh kemehla en Padsipa eh pwoudo, e uhdahn namenengkihla laud dahme e wiahdao. Ahpw dahme e keieu pwunodki iei me dipe kan kansensuwedihala Koht. E koluhkihla dipe kan oh wehkohng Siohwa: “I dipadahr mwohmwihte​—mwohmwihte kelehpw—​oh wiadahr sapwung mwohn silangomwi.” (Melkahka 51:4) Pil ni ahnsou me kasongosong kohwong Sosep en wiahda dipen kamwahl, kadeikpen loale kahrehiong ih en nda: “Ia duwen ei pahn wiahda soangen sapwung laud wet, oh dipikihda mwohn Koht?”​—Senesis 39:9.

Eri dihp kaidehnte pepehm ehu en nsensuwedla pwehki ke adsuwedla rehn meteikan. E pil sohte wehwehkihte me ke sohte wia dahme aramas teikan kin kasik ken wia. Kauwehla sapwellimen Koht kosonned duwen wia nsenen pwopwoud, mehlel, wahu, kaudok, oh soahng teikan kin kauwehla atail nanpwungmwahu reh. Ma kitail kin nsenki wiahda dihp, kitail kin wiahkihla pein kitail imwintihti en Koht. Met ire mehlel  ehu me kitail anahne medemedewe.​—1 Sohn 3:4, 8.

Eri dahme wiawihong me mehlel duwen dihp? Sohte mehkot wekila. Aramas me wekidala arail madamadau duwen dihp pwe en dehr wia mehkot me laud. Tohto kin pohnsehsehla de mweidohng kadeikpen loalarail en luwetala. Koaros me kin men Koht en kupwurkin irail anahne pelianda soangen wiewia wet. Duwehte me kitail sukuhlkier, pweinen dihp sohte kin wiahte ohlahn en emen pepehm de irair kanamenek ehu ahpw e kahrehiong kitail en mehla. E kin pid atail mour.

Ahpw mahkpen dipatail sang ni meirong en Sises kak kohwohng kitail ma kitail uhdahn koluhkihla oh kesehla dipatail kan. Pohl ntingihdi: “Meid pai irail kan me aleier mahkpen ar sapwung kan rehn Koht, oh lapwapen diparail kan! Meid pai irail me Kaun-o sohte pahn ketin kapwukoahnekin irail diparail kan!”​—Rom 4:7, 8.

[Nting tikitik me mi pah]

[Koakon/​Kilel nan pali 10]

Wekideklahn Padahk kan

Pali laud en irail kan me kin sarawi Kadolik sohte kin nohn wehwehki padahk en Limbo. Nan pahr kan me kerendo, padahk wet duwen Limbo ekisekis wie sosohrala oh met e solahr wia kisehn arail padahk kan. Nan pahr 2007, sarawi en Kadolik kamanala nan doaropwe ehu me padahk wet solahr pahn wiawi. Doaropweo kasalehda me irail “kasik me seri pwelel kan me mehla ahpw sohte papidaisla kakete komourala oh ale mour nsenamwahu kohkohlahte.”—International Theological Commission.

Dahme kahrehda wekidekla wet wiawi? Met wiawi pwehn kasaledekihala sarawio sang soahng kan me duwehte dahme sounnting en France me adaneki Henri Tincq ntingihdi. E nda, “E duwehte katoutou ehu me re sohsohki, me sarawi kin padahngki sang mpen pahr 350 lel sounpar kan me kerendo pwehn iding pahpa oh nohno kan en mwadang papidaisiala neirail seri kan.” Ahpw wekideklahn padahk wet kahrehda pil ekei ire kan en pwarada.

Padahk Wet Kohsang Aramas de Paipel? Padahk en Limbo tepisang akamai kan me wiawi duwen pwurkadorio mpen pahr 900 samwalahro. Sarawi en Kadolik kin padahngki me ngenen aramas kin kohsang nan paliweren aramas mwurin re mehla, kahrehda padahk wet anahne kawehwe dahme pahn wiawihong ngenen seri kan me sohte kak kohdahla nanleng pwehki irail sohte papidaisla ahpw ni ahnsowohte irail pil sohte warohng kohla nan ehl. Ih met me tapihada padahk en Limbo.

Ahpw Paipel sohte kin padahngki me mie mehkot me kin momour mwurin paliwar eh mehla. E kin padahngki me me melahr akan sohte ese mehkot duwehte arail kin wie memeir. (Eklesiasdes 9:5, 10; Sohn 11:11-14) Eri pwehki sohte mehkot kin momour mwurin paliwar mehla, padahk en Limbo sohte mehlel.

Paipel kin kasalehda me ong Koht, nein pahpa oh nohno Kristian kan neirail seri kan me sarawi. (1 Korint 7:14) Mahsen pwukat pahn sohte katepe ma seri pwelel kan pahn anahne papidaisla pwehn ale komourparail.

Padahk en Limbo kin kansensuwedihala Koht oh kahrehiong en wia mwomwen Koht lemei men a kaidehn Sahm limpoak oh pwung men. (Deuderonomi 32:4; Madiu 5:45; 1 Sohn 4:8) Ihme kahrehda padahk wet me sohte kohsang nan Paipel kin sohte wehwe ong aramas mehlel kan!

[Kilel kan nan pali 9]

Momourki Mahsen en Koht pahn kahrehda nanpwungmwahu reh oh pil aramas