Iang Doadoahk en Rikpene Aramas me Ahneki Mohngiong Mehlel

“Kumwail . . . loalenohng amwail doadoahk ong Kaun-o.”​—1 KOR. 15:58.

1. Luhk dahieu me Sises ketikihong sapwellime tohnpadahk kan?

 NI EH ketin seiseiloak nan wehin Sameria ni imwin pahr 30, Sises ketin kommoal ni pwarer ehu me karanih kahnimw en Saikar. Ih wasa me e mahsanihong sapwellime tohnpadahk ko: “Kumwail sarada oh kilengwohng mwetuwel kan, wahrail kan mahier oh mwahuwongehr en dondol.” (Sohn 4:35) Sises sohte kin mahsanih duwen dondol wahn tuhke kan, ahpw e mahsanih duwen rikirikpene en aramas akan me ahneki mohngiong mehlel pwe re pahn idawehnla ih. Ni mehlel, e ketin luke sapwellime tohnpadahk ko en iang doadoahk en rahk wet. Mie doadoahk tohto anahne wiawi ahpw ahnsou mwotomwotte me mie pwe en kanekehla!

2, 3. (a) Dahme kin kasalehda me kitail kin mour ni ahnsoun rahk? (b) Dahme kitail pahn tehkpene nan iren onop wet?

² Sapwellimen Sises mahsen duwen rahk wet ahneki wehwe tohrohr ong atail ahnsou. Kitail kin mour ahnsou ehu me aramas akan en sampah kin rasehng mwaht ehu me “mwahuwongehr en dondol.” Pahr koaros aramas rar kei kin ale luhk en sukuhlki padahk mehlel en komour, oh tohnpadahk kapw kid kid kei kin papidaisla. Kitail ahneki pwais kaselel en iang doadoahk en rahk me keieu kesempwal pahnangin kaweid en Kaunen rahket, Siohwa Koht. Ke kin “loalenohng” doadoahk en rahk wet?​—1 Kor. 15:58.

³ Erein sounpar siluh elep en sapwellime doadoahk en kalohk, Sises ketin kaunopada sapwellime tohnpadahk ko pwe ren wia arail pwukoa nin duwen tohndoadoahk en rahko. Nan iren onop wet, kitail pahn tehkpene ire siluh sang mehn kasukuhl kesempwal tohto me Sises ketin padahkihong sapwellime tohnpadahk ko. Ehuehu mehn kasukuhl kin kasalehda irair kesempwal ehu ong kitail, ni atail nantihong wia uwen atail kak nan atail ahnsou en rikpene sapwellimen Sises tohnpadahk kan. Kitail pahn tehkpene irair pwukat.

Aktikitik Kin Kesempwal

4. Ia duwen Sises eh ketin karasahda kesempwalpen aktikitik?

⁴ Medewehla met: Tohnpadahk kan ahpwtehn akamaikihda ihs me keieu lapalap nanpwungarail. Pohn masarail kan kin kasalehda arail pepehm en soh likilik oh lingeringer nanpwungarail. Eri, Sises ketin malipe kisin seri men en kesihnenda nanpwungarail. Ih eri mahsanih: “Me kin aktikitik oh rasehngala kisin seri menet, ih me keieu lapalap nan Wehin Koht.” (Wadek Madiu 18:1-4.) En aramas en sampah ar kin kilangwohng emen kin poahsoankihda uwen eh ahneki manaman, mwohni oh ndand, ahpw tohnpadahk kan anahne wehwehki me arail lapalap kin poahsoankihda arail “kin aktikitik” mwohn aramas teikan. Siohwa pahn ketin kapaiada oh doadoahngki irail, ihte ma re kasalehda aktikitik mehlel.

5, 6. Dahme kahrehda ke anahne aktikitik pwe ken kak iang wia uwen me ke kak ong doadoahk en rahket? Menlau kihda ehu karasepe.

⁵ Leledo rahnwet, me tohto nan sampah kin poaden rapahki manaman, mwohni oh en ndandla nan arail mour. Pwehki met, re sohte ahneki ahnsou en sukuhlki duwen Koht oh papah ih. (Mad. 13:22) Weksang met, sapwellimen Siohwa aramas akan kin perenki kasalehda aktikitik mwohn meteikan pwehn ale kapai oh  kupwuramwahu en Kaunen rahket.​—Mad. 6:24; 2 Kor. 11:7; Pil. 3:8.

⁶ Medewehla mehn kahlemeng en Francisco me kin papah nin duwen elder men nan sahpw en Palieir en Amerika. Ni eh wia mwahnakapw men, e uhdi sang sukuhl laud pwehn wiahla pioneer men. E tamanda: “Ni ahnsou me I pahn pwopwoud, I kak diarada doadoahk ehu me pahn wahdohng ie oh ei pwoud epwel mwahu en mwohni. Ahpw se pilada en itarki dahme se ahneki oh se pousehlahte iang doadoahk en pioneer. Mwuhr, se nainekihda seri kan oh met kahrehda en apwal sang mahs. Ahpw Siohwa ketin sewesei kiht en kolokolte at pilipilo.” Francisco kaimwisengkihla eh koasoi: “I kin papah nin duwen elder men oh pil ahneki pwais tohto teikan dauliher sounpar 30. Sohte pak ehu I koluhkihla ei pilada mour wet.”

7. Ia duwen omw kin song en kapwaiada kaweid en Rom 12:16 oh Episos 4:2?

⁷ Ma ke sohte ahneki “aklapalap” en sampah wet oh kin kasalehda omw “mpahi,” ke pil kak kasik en ahneki kapai tohto oh pwais kan nan doadoahk en rahket.​—Rom 12:16; Ep. 4:2; Mad. 4:19, 20; Luk 18:28-30.

Pwerisek Kin Wahdo Kapai kan

8, 9. (a) Oaralapihada sapwellimen Sises karasaras en papah silimen ko. (b) Ihs me pahn keieu ale kangoang sang karasaras wet?

⁸ En pwerisek kin anahn pwe kitail en kak iang doadoahk en rahk ni uwen me kitail kak. Sises ketin kasalehda duwen met nan karasaras en papah silimen ko. * Karasaras wet koasoia duwen ohl emen me nehkohng eh dipwisou rehn nah papah silimen mwohn e pahn seiloak. Papah keieu oh keriemen ko alehdi talent 5 oh 2, oh me kesilimeno ale talent 1. Mwurin arail soumaso samwalahr, papah keieu oh keriemen ko kin pwerisek oh mwadangete “koadoakihada” pil ekei talent sang me re alehdi. Ahpw, papah kesilimeno kin “pohnkahke.” E sarepedi nah talento nan pwehl. Ni en ohlo pwurodo sang seiloak, e kapaiada papah riemen ko ni eh idihada ira en ale ‘mehkot laud pwe ira en kin apwahpwalih.’ Ahpw e kihsang papah kesilimeno talento oh kausasang ih nan imweo.​—Mad. 25:14-30.

⁹ Mwein ke uhdahn men alasang ladu pwerisek ko nan karasaras me Sises ketikihda oh men wia uwen omw kak nan doadoahk en katohnpadahk. Ahpw ia duwen ma omw irair kan irehiukedi sang dahme ke kak wia? Ele kahpwal en mwohni kin kahrehiong uhk en doadoahk awa tohto pwehn apwalih omw peneinei. De ele ke mahla oh solahr ahneki kehl oh roson mwahu. Ma ih duwen met, karasaras en papah silimen ko pahn kangoange iuk.

10. Ia duwen soumaso nan karasaras en papah silimen ko kasalehda madamadau toupahrek? Dahme kahrehda met kin kangoange iuk?

 ¹⁰ Tehk me soumas nan karasaraso kin pohnese duwen wekpeseng en nah papah silimen ko arail koahiek. E kasalehda met ni eh kihong talent rehn “emenemente nin duwen eh koahiek.” (Mad. 25:15) Ihme kahrehda e sansal me ladu keieuo wiahda laudsang ladu keriemeno. Ahpw, soumaso pohnese me ira koaros kin pwerisek en doadoahk oh e wiahkin ira “papah lelepek oh mehlel,” ih eri kihong ira keting me duwepenehte. (Mad. 25:21, 23) Ni ahlohte, Siohwa Koht, Kaunen rahket, mwahngih me omw irair kin pidada dahme ke kak wia ni omw kin papah ih. E sohte pahn ketin pohnsehsehla omw nannanti sang mohngiong unsek oh pahn ketin katingih uhk.​—Mark 14:3-9; wadek Luk 21:1-4.

11. Karasahda ia duwen pwerisek mendahki kahpwal kan eh kak wahdo kapai laud?

¹¹ Mehn kahlemeng en Selmira, Kristian men nan Brazil kin kasalehda me en pwerisekiong papah Koht sohte kin pidada ahneki irair mwahu kan nan mour. Sounpar 20 samwalahro, mie pirap wiawi oh en Selmira pwoudo kesikdi oh mehla, kahrehda e anahne kelehpw apwalihada neira seri silimen ko. Eh doadoahk nin duwen meid men kin kahrehiong ih en doadoahk awa tohto oh pil iang mehn peidaid me diren aramas, met kin kahrehiong ih en pwangada. Mendahki kahpwal pwukat, e kin wiahda eh koasoandi mwahu pwe e kak iang wia doadoahk en pioneer. Mwuhr, nah seri riemen iangala ih wia doadoahk en pioneer. E koasoia: “Erein sounpar ko, I kin onop Paipel rehn aramas daulih riehk oh re wiahla kisehn ei ‘peneinei.’ Leledo rahnwet, I kin paiekihda arail limpoak oh nanpwungmwahu rehrail. Mwohni sohte kak pwainda soangen kapai wet.” Kaunen rahket uhdahn kapaiada en Selmira eh kin pwerisek!

12. Ia duwen atail kak pwerisek nan doadoahk en kalohk?

¹² Ke kak kalaudehla omw iang doadoahk en rahk ni omw pahn kamwahwihala wiepen omw kalohk pwe en kin pweida mwahu, mendahki omw irair nan mour kin katikala omw ahnsou en kalohk. Ni omw kin doadoahngki kaweid mwahu kan me kin kohda nan Mihting en Kalohk, ke pahn kakairada omw koahiek oh pahn song wiepen kalohk kapw kan. (2 Tim. 2:15) Oh pil ke kak wekidala omw koasoandi kan de uhdihsang wiewia kan me sohte kesempwal pwe ken kak kaukaule utung koasoandi en kalohk nan mwomwohdiso.​—Kol. 4:5.

13. Dahme keieu kesempwal ni atail kin kakairada oh kolokol atail pwerisek?

¹³ Tamataman me pwerisek kin kohsang atail limpoak oh kalahngan ong Koht. (Mel. 40:8) Papah kesilimeno nan sapwellimen Sises karasaraso kin masak eh soumaso oh wiahki ih aramas limeidihd oh seumahk. Kahrehda, e sarepedi talento ahpw sohte kadoahkihada pwehn mie kalaudpen talento ong eh soumaso. Pwehn liksang madamadau en soukautih wet, kitail anahne kakairada oh kolokol atail nanpwungmwahu rehn Kaunen rahket, Siohwa. Koasoanehdi ahnsou en onop oh doudouloale sapwellimen Koht irair kaselel kan me duwehte limpoak, kanengamah oh mahk. Ni omw pahn wia met, ke pahn mwekidki en wia uwen omw kak koaros en papah Koht.​—Luk 6:45; Pil. 1:9-11.

“Kumwail Uhdahn Pahn Sarawihla”

14. Soangen kaweid kesempwal dah me irail kan me men wiahla tohn doadoahk en rahket anahne kapwaiada?

¹⁴ Ni eh doadoahngki ire kan sang Palien Pwuhk Sarawi ni Lokaiahn Ipru, wahnpoaron Piter koasoia kupwuren Koht ong sapwellime ladu kan nin sampah oh nda: “Kumwail en sarawihla ni mehkoaros me kumwail kin wia, duwen Koht me ketin malipeikumwaildo, eh ketin sarawi. Pwe Pwuhk Sarawi mahsanih, ‘Kumwail uhdahn pahn sarawihla, pwe ngehi, I me sarawi.’” (1 Pit. 1:15, 16; Lip. 19:2; Deud. 18:13) Koasoi wet kin kasalehda me tohn doadoahk en rahket anahne mwakelekel ni arail tiahk mwohn silangin Koht. Kitail kak kapwaiada kaweid kesempwal wet sang ni atail kamwakelehda kitail. Ia duwen atail kak wia met? Mahsen mehlel en Koht pahn kin sewese kitail.

15. Dahme padahk mehlel en sapwellimen Koht mahsen kin wiahiong kitail?

¹⁵ Sapwellimen Koht mahsen kin rasehng pihl  me kin kamwakelehda mehkan. Karasepe, wahnpoaron Pohl ntingihedi me mwomwohdisohn Kristian keidi kan kin mwakelekel mwohn silangin Koht duwehte lih kamwohdo en Krais me kin mwakelekelkihda “pihl” me iei mahsen en Koht “pwe en . . . mwakelekel, min, sohte kisin mwahi.” (Ep. 5:25-27) Mwowe, Sises pil mahsanihki duwen sapwellimen Koht mahsen, me e kin ketin padahngki, eh kin ahneki kehl en kamwakel. Sises mahsanihong sapwellime tohnpadahk ko: “Kumwail mwakelekelkidahr mahsen kan me I padahkihongkumwailehr.” (Sohn 15:3) Eri, padahk mehlel en sapwellimen Koht mahsen kin ahneki kehl en kamwakelehda aramas mwohn silangin Koht. Koht pahn kupwurki atail kaudok, ihte ma kitail mweidohng sapwellime padahk mehlel en kamwakele kitail ni ahl wet.

16. Ia duwen atail kak kolokol atail mwakelekel mwohn silangin Koht?

¹⁶ En wiahla emen tohndoadoahk en sapwellimen Koht rahk, kitail en keieu kihsang nan atail mour wiewia koaros me kin samin mwohn silangin Koht. Pwehn kak doulahte wia pwais kaselel wet, kitail anahne wia mehn kahlemeng mwahu ni atail kolokolte sapwellimen Siohwa koasoandi kan. (Wadek 1 Piter 1:14-16.) Duwehte atail kin nsenohki paliwaratail en mwakelekel, kitail pil men kaukaule peikiong mahsen mehlel en Koht me kin kahrehiong kitail en mwakelekel. Met pidada atail kin wadek Paipel oh iang towehda mihting kan en Kristian. E pil kin wehwehki me kitail en nantihong doadoahngki sapwellimen Koht mehn kataman kan nan atail mour. En wia met kak sewese kitail en pelianda atail ineng suwed kan oh liksang madamadau en sampah me kakete kasaminehla kitail. (Mel. 119:9; Seims 1:21-25) Ei, ia uwen kansenamwahu en ese me pwehki sawas sang sapwellimen Koht mahsen mehlel, kitail kak “mwakelekelsangehr dihp” mehnda ma laud!​—1 Kor. 6:9-11.

17. Pwehn kolokol atail mwakelekel, mehnia kaweid en Paipel me kitail en kapwaiada?

¹⁷ Ke kin men mahsen mehlel en Koht en kahrehiong omw mour en mwakelekel? Karasepe, dahme ke kin wia ahnsou me ke ale kaweid kan duwen keperpen mehn kamweit suwed kan en sampah? (Mel. 101:3) Ke kin soikala patehng iengomw tohnsukuhl kan de tohndoadoahk kan me sohte kamehlele dahme ke kin kamehlele ni ahnsou kan me sohte anahnepen ken iang irail? (1 Kor. 15:33) Ke kin mehlel ni omw nantihong powehdi omw luwet akan me kak kahrehiong uhk en samin mwohn silangin Koht? (Kol. 3:5) Ke kin katohrehwei sang uhk akamai kan me pidada politik oh pil madamadau en uhki wehi me kin wiawi nan siai en mwadong kan?​—Seims 4:4.

18. Ia duwen atail mwakelekel mwohn silangin Koht eh pahn sewese kitail en pweida nan doadoahk en rahket?

¹⁸ Omw kasalehda peik ni lelepek ni soangen irair pwukat pahn wahdo imwila mwahu. Ni en Sises ketin karasahiong rahn wain sapwellime tohnpadahk kan, e mahsanih: “Rah koaros me wosasang ie ahpw sohte wa, Semeio kin ketikihsang. E kin koahkoa rah koaros me kin kapwarehda wa, pwe re en pil wa tohtohla.” (Sohn 15:2) Ni omw mweidohng padahk mehlel en Paipel me rasehng pihl mwakelekel en kamwakeleiukada, ke pahn kapwarehda wa tohto.

Kapai kan Met oh Pil Ahnsou Kohkohdo

19. Ia duwen sapwellimen Sises tohnpadahk kan arail paiekihda arail nantihong wia tohndoadoahk en rahket?

¹⁹ Irail tohnpadahk lelepek kan me doadoahngki dahme re sukuhlki sang Sises alehdi manaman sang rehn Siohwa nan Pendekos pahr 33 pwe ren wia sounkadehde kan me pahn “lelohng ni irepen sampah.” (Wiewia 1:8) Irail kin papah nin duwen pwihn me kin apwalih  mwomwohdiso kan, nin duwen misineri kan oh elder kan me kin seiloak. Re pil iang pidada pwukoa kesempwal en kalohki rongamwahwo ong “aramas akan koaros nin sampah.” (Kol. 1:23) Ia uwen tohtohn kapai me re alehdi oh ia uwen peren me re kin wahdohng meteikan!

20. (a) Soangen kapai dah kan me ke alehdi sang omw kalaudehla doadoahk en rikpene aramas me ahneki mohngiong mehlel kan? (b) Dahme ke koasoanehdi teng en wia?

²⁰ Ei, ni atail kin kasalehda aktikitik, pwerisek oh kolokol koasoandi kan en Mahsen en Koht, kitail pahn pousehlahte kalaudehla atail ahnsou oh pahn pweida mwahu nan doadoahk en rikpene aramas akan me ahneki mohngiong mehlel me kin wiewiawi nan ahnsou wet. Kitail kin ahneki peren oh nsenamwahu mehlel mendahki me tohto kin lokolongki medek oh pwunod me kin kohsang mour en men kepwehpwehla oh men rapahki peren mwahl en sampah wet. (Mel. 126:6) Keieu kesempwal sang koaros, atail “papah Kaun-o kaidehk doadoahk mwahl ehu.” (1 Kor. 15:58) Kaunen rahket, Siohwa Koht, pahn katingih kitail kohkohlahte pwehki ‘atail wiewia kan de atail limpoak’ me kitail kin kasalehda ong mwareo.​—Ipru 6:10-12.

[Nting tikitik me mi pah]

Ke Tamataman?

Ni omw kin nantihong iang pidada doadoahk en rahket . . .

• dahme kahrehda e kesempwal ken kasalehda aktikitik?

• ia duwen omw kak kakairada oh kolokol omw pwerisek?

• dahme kahrehda e kesempwal en kolokol omw mwakelekel mwohn silangin Koht?

[Peidek en Onop]

[Kilel nan pali 21]

Aktikitik kak sewese kitail en itarki dahme kitail ahneki ni atail papah Koht oh utung sapwellime Wehio