Kitail Solahr Ese Dahkot Dihp?

MAHS, aramas kin kalapw rong arail sounpadahk kan ar kin ngihl laud padahngki me dihp kan me duwehte ineng kehlail en wendi rehn emen, mwenge daulihala, noahrok kepwe, dangahnga, lingeringer, luwak oh aklapalap iei dihp laud kei. Sounpadahk ko kin kalapw kasalehda duwen imwila suwed en dihp oh kangoange irail sounrongorong kan en koluhla. Emen sounnting nda: “Met, pali laud en sounpadahk kan kin pilada en dehr koasoia soahng kan me pahn kansensuwedihala sounrongorong kan. Ahpw re kin uhd koasoia soahng kan me kin kansenamwahwih irail sounrongorong kan.”

Sounnting en doaropwehn rohng kan kin kilang soahngohte. Iet ekei soahng kan me pwarada nan doaropwehn rohng pwukat.

▪ “Padahk duwen dihp, koluhla oh tomw solahr kin wiawi, ahpw padahk me pid ia duwen omw kak ahneki pepehm me mie katepomw oh kesempwalki pein kowe me kin uhd wiawi.”—Star Beacon, Ashtabula, Ohio.

▪ “Aramas solahr kin nohn katapanki ma re dipan.”—Newsweek.

▪ “Kitail solahr kin idek, ‘Dahme Koht kupwurki kitail en wia,’ ahpw kitail kin uhd idek, ‘Dahme Koht kak ketin wiahiong ie?’”—Chicago Sun-Times.

Pwehki rahnwet soangsoangen aramas kin mihpene, irail solahr kin men kadeik meteikan. Aramas kin medewe me e sohte konehng en kadeik tiahk en meteikan. E mwomwen me dihp me keieu laud iei ni emen eh kin kadeik wiewiahn emen aramas. Kahrehda aramas kin ahneki madamadau wet: ‘Dahme ke kamehlele mwein kin mwahu ong uhk ahpw ke dehr idingki meteikan en pwungki omw madamadau. Rahnwet aramas kin ahneki soangsoangen madamadau oh koasoanehdi dahme re pahn wiahki arail mour. Kaidehn kowehte me ese dahme pwung. Koasoandi en meteikan kin pwung duwehte omw koasoandi eh pil pwung.’

Soangen madamadau wet kin kahrehiong wekideklahn madamadau en aramas akan. Aramas solahr kin kilangwohng riemen me sohte inou sarawi ahpw mihpene, kamwahl oh ohl mwahuki ohl oh lih mwahuki lih nin duwen dihp laud.

E sansal me madamadau en aramas duwen dahme mwahu oh dahkot dihp wekila. Ahpw dahme kahrehda en aramas madamadau eh wekila? Dahme aramas kin medewehiong duwen dihp? E kesempwal omw madamadau duwen ire wet?