Sewese Noumw Seri kan en Powehdi Arail Kahpwal Tohto kan

NEITAIL me pwulopwul kan kin lelohng kasongosong laud. Irail kin kilang madamadau en ahn Sehdan sampah suwed wet oh irail anahne powehdi “ineng en mwahnakapw akan.” (2 Tim. 2:22; 1 Sohn 5:19) Oh pwehki irail kin nantihong pwehn ‘tamanda Sounwieperail,’ irail kin lelohng kapailok oh lider sang irail kan me kin uhwong dahme re kamehlele. (Ekl. 12:1) Vincent tamanda ahnsou me e wie kekeirda oh nda: “Mie me kin kalapw lidere ie, e kin kamasepwehkih ie, de song en peiong ie pwehki ei wia emen Sounkadehdehn Siohwa. Pak tohto e kin nohn daulihala, kahrehda I sohte men kohla sukuhl.” *

Patehng kasongosong kan sang rehn meteikan, neitail seri kan pil kin anahne powehdi pein arail ineng en men duwehla iengerail kan. Emen sister me adaneki Cathleen me sounpar 16 nda: “E sohte mengei en weksang meteikan.” Emen brother pwulopwul me adaneki Alan wehkada, “Iengei tohnsukuhl kan kin kalapw luke ie ien iang irail mwemweit ni imwin wihk kan oh I kin men iang irail.” Patehng met, ineng en me pwulopwul kan en iang mwadong kin kak kehlail oh kahrehiong irail en werek suwed. Sister pwulopwul men me adaneki Tanya nda: “I kin perenki mwadong. Sounpadahk kan nan sukuhl kin ahnsou koaros kangoange ie ien iang pwihn en mwadong. E apwal en nda soh.”

Ia duwen omw kak sewese noumw seri kan en powehdi arail kahpwal tohto kan? Siohwa ketin kehkehlikihong pahpa oh nohno kan en kihong kaweid ong seri kan. (Lep. Pad. 22:6; Ep. 6:4) Mehn akadei en pahpa oh nohno kan me kin lemmwiki Koht iei en kakairada neirail seri  kan en inengieng peikiong Siohwa. (Lep. Pad. 6:20-23) Ma re wia met, seri kan pahn nantihong en pelianda kasongosong kan en sampah wet mehnda ma pahpa oh nohno sohte kin kilang irail.

Ong pahpa oh nohno kan, e apwal en wiahda mwohni, apwalih peneinei oh wia pwukoa kan en nan mwomwohdiso. Ekei kin anahne wia met mendahki sohte arail pwoud de arail pwoud kin uhwong irail. Mendahki met, Siohwa kupwurki pahpa oh nohno kan en wiahda ahnsou pwehn padahkih oh sewese neirail seri kan. Eri, dahme ke kak wia pwehn sewese noumw seri kan en pere irail sang irail me kin lidere irail, kasongosong kan sang rehn iengerail kan oh kasongosong teikan?

Ahneki Nanpwungmwahu Rehn Siohwa

Keieu, neitail me pwulopwul kan anahne ese me re kak kompoakepahnki Siohwa. Irail anahne sawas pwehn kak “kilang Koht me soh sansal.” (Ipru 11:27) Vincent me koasoiepe mi mwomweo, tamanda duwen eh pahpa oh nohno ara kin sewese ih en kakairada eh nanpwungmwahu rehn Siohwa. E nda: “Ira kin padahkihong ie kesempwalpen kapakap. I kak taman me sangete ni ei tikitik I kin kapakapohng Siohwa pwohng koaros mwohn I meirla. Siohwa wia emen me mehlel ong ie.” Ke kin iang noumw seri kan kapakap? Ke sou kin rong dahme re kin kapakapkiong Siohwa? Irail kin pwurepwurehng ndahte dahme re wadlikihlahr? De re kin kasalehda arail pepehm ong Siohwa nan arail kapakap akan? Ni omw pahn rong arail kapakap kan, ke kak ese ma irail kin uhdahn kekeirda nan arail nanpwungmwahu rehn Siohwa.

Pein wadek Mahsen en Koht iei pil ehu ahl kesempwal ong me pwulopwul kan pwehn karanihala Siohwa. Cathleen me kitail koasoiapene mwoweo, nda: “Wadekala Paipel pwon sewese ie laud ni ei pwulopwul. E kamehlelehiong ie me mehnda me aramas akan pahn uhwong ie, Siohwa pahn ketin sewese ie.” Ia  duwe, mie en noumw seri kan arail koasoandi en wadek Paipel?​—Mel. 1:1-3; 77:12.

Mehlel me en seri kan arail kin mwekidki kaweid en pahpa oh nohno kin wekpeseng. Pil sounpar en seri kan kin kahrehiong arail kekeirda nan arail nanpwungmwahu rehn Siohwa en pil wekpeseng. Ahpw ma sohte kaweid, e pahn apwal ong me pwulopwul kan en esehla Siohwa nin duwen kompoakparail. Pahpa oh nohno anahne pwurepwurehng padahkihong neira seri kan duwen Mahsen en Koht pwe irail en kak esehla sapwellimen Siohwa madamadau sohte lipilipil ia wasa re mi ie. (Deud. 6:6-9) Noumw seri kan anahne kamehlele me Siohwa kin ketin nsenohki emenemen irail.

Ia Duwen Atail Kak Kapehse Mwahu?

Kapehse iei pil ehu ahl me kak sewese noumw seri kan. Kapehse mwahu kin laudsang ihte koasoiong noumw seri kan. E kin pid doadoahngki peidek kan oh rong arail pasapeng kan ni kanengamah mehnda ma arail pasapeng kan sohte duwehte dahme ke kasik en rong. Anne me naineki pwutak riemen nda: “I kin idek peidek kan lao I wehwehkihda dahme ira kin medemedewe oh dahme ira kin lelohng.” Ia duwe, noumw seri kan kin pehm me ke kin uhdahn rong irail ni arail kin koasoi? Tanya, me koasoiepe mi mwomwe nda: “Ei pahpa oh nohno kin uhdahn rong ie oh tamataman dahme se kin koasoiapene. Ira ese eden iengei tohnsukuhl kan. Ira kin idek duwen irail oh soahng kan me se kin koasoiapene mahs.” En rongorong oh tamataman wia mehkot kesempwal pwe kapehse en pweida mwahu.

Peneinei tohto kin diarada me ahnsoun mwenge kin wia ahnsou mwahu en koasoipene. Vincent nda: “Mwengepene wia mehkot kesempwal nan at peneinei. Se anahne mwenge rehn at peneinei ahnsou koaros me se kak. Se sohte kak kilang kasdo, rong keseng de wadawad ni ahnsoun mwenge. Pwehki pali laud en ahnsou at koasoi kan sohte kin pid kahpwal kan, e kin wia ahnsou meleilei ehu rahn koaros oh met sewese ie ien powehdi kahpwal kan oh kasongosong kan me I kin lelohng nan sukuhl.” E pil nda: “Ei ahnla koasoiong ei pahpa oh nohno ni ahnsoun mwenge pil sewese ie ien kak koasoiong ira ni ahnsou me I anahne ara sawas ong kahpwal kan.”

Idek rehmw, ‘Pak depe nan wihk ehu me ei peneinei kin mwengepene?’ Ke anahne kamwahwihala wasa kan pwehn kak kapehse mwahu rehn noumw seri kan?

Kesempwalpen Kaudok en Peneinei ni Soutik

Kaudok en Peneinei ni soutik nan ehuehu wihk pil kak sewese koaros nan peneinei en kapehsepene oh sewese me pwulopwul kan en powehdi arail kahpwal kan. Alan me koasoiepe mi mwowe nda: “Ei pahpa oh nohno kin doadoahngki ahnsoun at kaudok pwehn diarada dahme kin wiawi nan at mour. Ira kin doadoahngki oaralap kan me kin pid dahme se kin lelohng.” En Alan eh nohno nda: “Se kin doadoahngki at ahnsoun onop pwehn wia kamwomwada kan. Met kin sewese nait seri kan en esehla ia duwen arail pahn kak kawehwe dahme irail kin kamehlele oh kasalehda me dahme re kin kamehlele me pwung. Met kakehlailih irail en kak apwalihala kahpwal kan me re kin lelohng.”

E sansal me ni seri kan arail kin lelohng kasongosong kan sang iengerail kan, irail anahne wia laudsang ihte nda soh oh kohkohla. Irail anahne kawehwehda kahrepe kan. Irail pil anahne ese dahme re pahn wia ni arail kin ale kapailok pwehki arail pwoson. Ma re sohte kak kawehwe duwen dahme irail kin kamehlele, e pahn apwal ong irail en kesihnenda teng nan kaudok mehlel. Kamwomwada kan kak sewese irail en wia met.

Kakon nan  pali 30 kasalehda ekei soahng kan me kin wiawi me kumwail kak kamwomwada ni ahnsoun Kaudok en Peneinei ni soutik. Wia kamwomwada kan duwehte eh kin uhdahn wiawi ni omw pahn mwomwen uhwong pasapeng  kan me noumw seri kan kihda. Patehng met, tehk ekei mehn kasukuhl kan sang ire kan nan Paipel. Soangen kasukuhl wet me kin wiawi nan ihmw pahn sewese seri kan en powehdi kahpwal kan nan sukuhl oh wasa teikan.

Imwamwail Kin Wia Wasa Nsenamwahu Ehu?

Ia duwe, noumw seri kan kin kasikasik en pwurala ni imwamwail mwurin sukuhl en ehuehu rahn? Ma ih duwen, e pahn sewese noumw seri kan en powehdi arail kahpwal kan en ehuehu rahn. Emen sister me met wiahlahr kisehn peneinei en Pedel nda: “Ni ahnsou me I wie kekeirda, mehkot me keieu sewese ie laud iei me imwat kin wia wasa ehu me I kin nsenamwahu ie. Sohte lipilipil ia uwen suwed kahpwal me kin wiawi nan sukuhl, I ese me ni ei pahn lel ni imwato, soahng koaros pahn mwahula.” Ia irair en nan imwamwail? E kin wia wasahn “lingeringer, oh akamai, [oh] saminimin” de e wia wasahn “limpoak, peren, [oh] popohl”? (Kal. 5:19-23) Ma popohl sohte kin mie, ke kin nantihong rapahki wekidekla dah kan me ke anahne wia pwe imwamwailo en kak wia wasahn nsenamwahu ehu ong noumw seri kan?

Pil ehu elen sewese noumw seri kan pwe ren powehdi kahpwal kan iei omw pahn sewese irail en ahneki werek mwahu. Karasepe, ke sou kak luke brother kan oh sister kan me ahneki nanpwungmwahu rehn Siohwa nan mwomwohdiso en iang omw peneinei mwadong? De ke sou kak wiahda kisin mwenge nan imwamwail oh luke sounapwalih me kin seiloak de meteikan kan me kin doadoahngki pali laud en arail ahnsou pwehn papah Siohwa? Ke ese misineri kan de tohn Pedel kan me noumw seri kan kak kompoakepahnki oh re kak nting kisinlikou, e-mail, de ekei pak delepwonlahng rehrail? Ma omw peneinei kak werekiong irail, ke kin kangoange noumw seri kan en iang koasoi? Soangen nanpwungmwahu wet kak sewese noumwail seri kan en koasoanehdi pwehn wiahda mehn akadei mwahu kan ong papah Siohwa. Medewehla kamwahu me wahnpoaron Pohl wiahiong Timoty ni eh pwulopwul. (2 Tim. 1:13; 3:10) En Pohl eh kin kalapw werekiong Timoty kin sewese ih en medemedewehte eh mehn akadei kan en pahpa Siohwa.​—1 Kor. 4:17.

Kapinga Noumw Seri kan

Siohwa kin kupwurperenki ni me pwulopwul kan arail kin tengedihong dahme pwung mendahki kasongosong kan sang en Sehdan sampah wet. (Mel. 147:11; Lep. Pad. 27:11) Ni mehlel, ke pil kin peren ni omw kilang neitail me pwulopwul kan arail kin pilada elen mour mwahu. (Lep. Pad. 10:1) Kasalehiong noumw seri kan duwen omw pepehm oh kapinga irail ahnsou koaros. Siohwa ketikihda mehn kahlemeng mwahu ong pahpa oh nohno kan. Ni ahnsou me Sises ketin papidaisla, Siohwa mahsanih: “Kowe, me iei nei pwutak kompoake, me I kin kupwurperenki.” (Mark 1:11) Ia uwen mahsen pwukat eh kakehlaka Sises en ketin powehdi kahpwal tohto kan me e pahn ketin lelohng! Duwehte met, kasalehiong noumw seri kan me ke poakohng irail oh kapinga dahme irail kin wiewia.

Ni mehlel, ke sohte kak perehla douluhl noumw seri kan sang kasongosong kan oh lider oh kapailok sang meteikan. Ahpw mie soahng tohto me ke kak wia pwehn sewese irail. Ia duwen omw kak wia met? Sewese irail en kakairada arail nanpwungmwahu rehn Siohwa. Nantihong pwe en mie kapehse mwahu nanpwungamwail. Wiahki ahnsoun Kaudok en Peneinei ni soutik en wia ahnsoun sawas oh wiahda nan imwamwail en wia wasa ehu me nsenamwahu. Wia mepwukat pahn uhdahn sewese noumw seri kan en powehdi kahpwal tohto me re kin lelohng.

[Nting tikitik me mi pah]

[Koakon nan pali 30]

 KAMWOMWADA KAN KAK SAWAS

Iet ekei soahng kan me neitail me pwulopwul kan kin lelohng. Ke sou kamwomwada ekei ire pwukat ni ahnsoun amwail Kaudok en Peneinei ni soutik kan?

▸ Sounpadahk men idek rehn noumw serepein ma e pahn iang pwihn en mwadong nan sukuhl.

▸ Mie me kihong noumw pwutak pwuh ni eh pwurasang sukuhl.

▸ Ekei pwutak kan nan sukuhl kapailoke noumw pwutak pwehki sohte eh serepein.

▸ Noumw serepeino tuhwong ienge tohnsukuhl men ni eh kalokalohk.

▸ Sounpadahk idek rehn noumw serepeino mwohn ienge tohnsukuhl koaros dahme kahrehda e sohte kin kawauwih pilaik.

▸ Pwutak men kin kalapw kapailoke noumw pwutak pwehki ih emen Sounkadehdehn Siohwa.

[Kilel nan pali 29]

Mie en noumw seri kan arail koasoandi en wadek Paipel?