“Soangen Mour Dah me Konehng Kumwail en Weweidki?”

“Eri, ma mepwukat pahn ohla nin duwe met, a ia duwen kumwail, soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht.”​—2 PIT. 3:11.

1. Dahme kahrehda kitail kak nda me nein Piter keriaun kisinlikou kihong tepin Kristian kan kangoang ni ahnsou pwung?

 NI AHNSOU me wahnpoaron Piter ntingihedi nah keriaun kisinlikou, mwomwohdisohn Kristian kin dadaurete nan kalokolok, ahpw met sohte kahrehiong arail ngoang en luwetala de arail kekeirda en wawaila. Tepil eri doadoahngki wiepe tohrohr ehu, me kin pweida pak tohto mahs. Nin duwen Piter kasalehda, Sehdan kin song en kasaminehla sapwellimen Koht aramas akan sang ni eh kin doadoahngki sounpadahk likamw akan me “pwoaren masarail kan me diren kamwahl” oh “noahrok, iei me mohngiongirail kin ahn mehlel.” (2 Pit. 2:1-3, 14; Sud 4) Ihme kahrehda nein Piter keriaun kisinlikouo kin kangoange irail en kin lelepek ong Koht.

2. Dahme irelaud 3 en 2 Piter kin koasoia? Peidek dah kan me kitail anahne idek rehtail?

² Piter ntingihedi: “I kin lemeleme me mehkot pwung ehu rehi ei pahn kin pangenkin kumwail oh katamankin kumwail mepwukat, erein ei pahn momour. Pwe I ese me I pahn mwadang kamwurala paliwereiet, . . . Eri, I pahn wia uwen ei kak, pwe I en kihong kumwail mehn kataman ehu me kumwail pahn kin tamatamanki mepwukat ahnsou koaros mwurin ei pahn mehla.” (2 Pit. 1:13-15) Ei, Piter ese me e pahn kereniong mehla, ahpw e men irail en tamataman eh mehn kataman kan. Oh ni mehlel, mehn kataman pwukat wiahla kisehn Paipel oh kitail koaros kak wadek rahnwet. Kitail en nsenohki irelaud 3 en nein Piter keriaun kisinlikou pwe e kin koasoia “imwin ahnsou” en koasoandi wet oh kasohrlahn lahng oh sampah ni karasaras. (2 Pit. 3:3,  7, 10) Kaweid dahieu me Piter kihong kitail? Ia duwen atail kapwaiada eh kaweid eh pahn sewese kitail en ale kupwuramwahu en Siohwa?

3, 4. (a) Soangen koasoi dah me Piter wia? Peneu dahieu me e kihda? (b) Ire siluh dah kan me kitail pahn tehkpene?

³ Mwurin eh koasoia kasohrlahn en Sehdan sampah, Piter koasoia: “Amwail mour uhdahn pahn konehng en kin mwakelekel oh kasarawihong Koht.” (2 Pit. 3:11, 12) E sansal me Piter doadoahngki lokaia kan me kamwakid irail. Piter ese me irail kante me wia kupwuren Siohwa oh kasalehda irair kan me kaperenda Ih pahn poadoandoarla ni rahnen dupuk me pahn kohdo. (Ais. 61:2) Ihme kahrehda wahnpoarono pil nda: “Eri, kompoakepahi ko, ni amwail eseier mepwukat, kumwail kaleke pwe kumwail dehr iangala padahk likamw en aramas suwed [sounpadahk likamw] pwukat oh pwupwuweisang nan mour teng en amwail pwoson.”​—2 Pit. 3:17.

⁴ Piter me wia emen nanpwungen irail me “eseier mepwukat,” wehwehki me ni imwin rahn akan, Kristian akan pahn anahne pere pein irail pwe ren kolokol arail lelepek. Mwuhr, wahnpoaron Sohn kawehwehda ni sansal ia kahrepe. E kamehlele me Sehdan pahn lekdekla sang nanleng oh e “lingeringer kowahlap” pahn irail me “kin kapwaiada kosonned en Koht kan, oh me loalopwoatohng padahk me Sises ketin kadehdehier.” (Kaud. 12:9, 12, 17) Sapwellimen Koht me keidi lelepek kan oh iengerail “sihpw teikan” me kin lelepek pahn kana. (Sohn 10:16, NW) Ahpw ia duwen emenemen kitail? Kitail pahn kolokol atail lelepek? Kitail pahn kak wia met ma kitail nantihong (1) kakairada sapwellimen Koht irair kan, (2) kolokol tiahk mwakelekel oh kaudok min, oh (3) ahneki madamadau pwung ong kahpwal kan. Kitail pahn tehkpene ire pwukat.

Kakairada Sapwellimen Koht Irair kan

5, 6. Soangen irair dah kan me kitail anahne kakairada? Dahme kahrehda kitail anahne ‘nantihkihong en wia uwen me kitail kak’?

⁵ Piter ntingihedi ni tepin nah keriaun kisinlikou: “Kumwail pahn nantihkihong en wia uwen me kumwail kak, pwe kumwail en kapatahiong amwail pwoson, wiewia mwahu; oh ong amwail wiewia mwahu, kumwail en kapatahiong dehdehki Koht; oh ong dehdehki Koht, ese kaunda paliwaramwail, oh ong ese kaunda paliwaramwail, kumwail en kapatahiong kanengamah ni ahnsou apwal, oh ong kanengamah ni ahnsou apwal, kumwail kapatahiong lelepek; oh ong amwail lelepek, limpoak ong riamwail . . . kan; oh ong amwail limpoak ong riamwail . . . kan, kumwail kapatahiong amwail limpoak ong aramas koaros. Pwe ma wiewia mwahu pwukat pahn wiahla amwail oh kekeirda nanpwungamwail, kumwail pahn loalokongkihla atail Kaun Sises Krais, pwe loalokong wet pahn kahrehda amwail mour eh pahn wah mwahu oh pweida.”​—2 Pit. 1:5-8.

⁶ Mehlel, kitail en ‘nantihkihong en wia uwen me kitail kak’ en iang wiewia kan me kin sewese kitail en kakairada irair kan me kin kaperenda Koht. Karasepe, kitail anahne nannanti en iang towehda mihting koaros en Kristian kan, wadek Paipel ehuehu rahn, oh ahneki koasoandi mwahu ong pein atail onop. Oh kitail anahne doadoahk laud oh koasoanehdi mwahu pwe Kaudok en Peneinei ni soutik en kin kaukaule wiawi, kaperen, oh pil katapan ong peneinei. E pahn mengei ong kitail en wia tiahk mwahu pwukat ma kitail ahnla wia, ahpw mehlel ma kitail songehr kamwahupe kan.

7, 8. (a) Dahme ekei kin koasoiahki duwen Kaudok en Peneinei ni soutik? (b) Ia duwen omw kin paiekihda omw Kaudok en Peneinei?

⁷ Me pid koasoandi en Kaudok en Peneinei, emen sister koasoia: “Koasoandi wet kin mweidohng ie en sukuhlki ire tohto.” Emen pil nda: “Ni mehlel, I sohte men onop en pwuhk en uhdi. Iei mihtingo me I kin keieu perenki. Ahpw met ni at kin wia Kaudok en Peneinei, I diarada me Siohwa mwahngih dahme kitail anahne oh iahd me kitail anahne.” Emen kaunen peneinei koasoia: “Kaudok en Peneinei inenen sewese kiht. En ahneki mihting ehu me wiawihda ong at anahn nin duwen pwopwoud ehu kin uhdahn mwahu! Kiht koaros pehm me se kin kamwahwihala at kin kasalehda wahn sapwellimen Koht manaman, oh se kin perenkihla at doadoahk en kalohk.” Pil emen kaunen peneinei nda: “Nait seri kan kin pein wia arail roporop oh re sukuhlki soahng tohto oh re pil perenki wia met.  Koasoandi wet kin kahrehiong kiht en kalaudehla at koapworopworki me Siohwa mwahngih dahme se kin nsenohki oh kin ketin sapengla at kapakap kan.” Ia duwe, ke pwungki dahme re koasoiahki koasoandi wet me Koht ketikihda?

⁸ Dehr mweidohng mehkot en kerempwa omw Kaudok en Peneinei. Ehu pwopwoud koasoia: “Ni soutik en Niepeng koaros, nan wihk pahieu irekla, mehkot kin wiawi nan at peneinei me kin kereniong kauhdi at pahn wia at onop, ahpw se sohte mweidohng en kauhdi at onop.” Mie pak me mwein ke anahne wekidala omw koasoandi en onop. Ahpw, koasoanehdi teng en dehr kauhdi, ma pil wihk ehu, omw Kaudok en Peneinei ni soutik!

9. Ia duwen Siohwa eh kin ketin sewese Seremaia? Dahme kitail kak sukuhlki sang eh mehn kahlemeng?

⁹ Soukohp Seremaia kin wia mehn kahlemeng mwahu ong kitail. E kin anahne padahk oh kaweid kan sang rehn Siohwa oh e kin uhdahn kalahnganki met. Met kin sewese ih en dadaurete kalohk ong aramas akan me sohte men mwekidki dahme re rong. E kin patohwanohng Siohwa: “Sapwellimomwi mahsen kin rasehng kisiniei me lullul nan kapehdi, oh kin ngkengken nan tih kat en paliwereiet.” (Ser. 20:8, 9) E pil kin sewese ih en dadaurete ni ahnsou apwal akan me kin wie lalaudla lao lel kamwomwalahn Serusalem. Rahnwet, kitail naineki Mahsen en Koht ni unsek. Ni atail kin pwerisekiong onopki Paipel oh ahneki madamadau me pahrekiong sapwellimen Koht, eri duwehte Seremaia, kitail pahn kak dadaurete oh perenki atail doadoahk en kalohk, kolokol atail lelepek ni ahnsoun apwal kan, oh pil kolokol atail tiahk mwakelekel oh kaudok min.​—Seims 5:10.

“Kumwail en Kin Mwakelekel oh Pwung”

10, 11. Dahme kahrehda kitail anahne wia uwen atail kak en kolokol “mwakelekel oh pwung”? Ia duwen atail kak wia met?

¹⁰ Nin duwen Kristian akan, kitail ese me kitail kin momour ni imwin rahn akan. Ihme kahrehda, kitail sohte kin pwuriamweikihla me sampah wet kin direkihla noahrok, nenek, oh tiahk lemei, soahng kan me Siohwa kin ketin kalahdeki. Nin duwen Kaudiahl 2:13, 14, kitail kak koasoiahki en Sehdan koasoandi ni ahl wet: ‘Ma e sohte kak kamasepwehkihada sapwellimen Koht ladu kan, mwein e kak kasaminehla irail.’ Eri, kitail anahne tamataman kaweid en Piter wet: “Kumwail wia uwen me kumwail kak pwe kumwail en kin mwakelekel oh pwung mwohn silangin Koht ni kapehd popohl.”​—2 Pit. 3:14.

¹¹ Lepin lokaia pwukat “wia uwen me kumwail kak” kin duwehte en Piter kaweid en mwoweo me koasoia “nantihkihong en wia uwen me kumwail kak.” E sansal me Siohwa, me ketin kamwakid Piter en ntingihedi koasoi pwukat, kin mwahngih me kitail anahne nantihong en kolokol atail “mwakelekel oh pwung,” oh en dehr saminkihla en Sehdan sampah. Atail kin nantihong kin pidada atail kin pere mohngiongitail sang ineng suwed kan. (Wadek Lepin Padahk 4:23 *; Seims 1:14, 15.) E pil pidada atail en kehlail pelianda irail akan me sohte kin wehwehki atail mouren Kristian oh kin “lahlahwei [kitail].”​—1 Pit. 4:4.

12. Dahme Luk 11:13 kin kamehlelehiong kitail?

¹² Pwehki kitail sohte unsek, kitail kin apwalki wia me pwung. (Rom 7:21-25) Kitail kak pweida ihte ma kitail kin sohpeiong Siohwa me kin  ketikihong irail akan me kin ni mohngiong unsek peki ih sapwellime manaman. (Luk 11:13) Manamano kin sewese kitail en kakairada irair akan me Koht kupwurki oh powehdi kasongosong kan oh kahpwal kan me pahn wie lalaudla ni sapwellimen Siohwa rahn eh kerekerendo.

Mweidohng Kahpwal kan en Kakehlaka Iuk

13. Ni ahnsou me kitail kin lelohng kahpwal akan, dahme pahn sewese kitail en dadaur?

¹³ Pwehki kitail kin momour nan koasoandi mering wet, kitail pahn ahnsou koaros lelohng soangsoangen kahpwal kan. Kitail en dehr mworusala, ahpw en kin kilangwohng kahpwal kan me iei ahnsou mwahu en kasalehda atail limpoak ong Koht oh en kakehlaka atail pwoson ih oh sapwellime mahsen. Tohnpadahk Seims ntingihedi: “Kumwail perenkihda ma soangen apwal koaros kin lelohng kumwail, pwe kumwail ese me ni amwail pwoson eh kin powehdi apwal pwukat, e kin kalaudehla amwail kanengamah ni ahnsou apwal.” (Seims 1:2-4) Pil tamataman me “Kaun-o ketin mwahngih kapitasang me poadidi kan nan ar apwal akan.”​—2 Pit. 2:9.

14. Ia duwen mehn kahlemeng en Sosep eh kin kangoange iuk?

¹⁴ Medewehla mehn kahlemeng en Sosep, nein Seikop pwutak me rie pwutangko netikihla ih en wiahla lidu men. (Sen. 37:23-28; 42:21) Ia duwe, Sosep sohla ahneki pwoson pwehki e lelohng tiahk lemei wet? E mwehlda pwe Koht ketin mweidohng suwed wet en lelohng ih? Mahsen en Koht sapengki ni sansal me soh! Patehng met, e lelohng kahpwal teikan. Mwuhr, mie emen me karaun likamwih me dene e song en angkehlailiong ih kahrehda e selidi nan imweteng. Met pil sohte kauwehla eh kin lelepek ong Koht. (Sen. 39:9-21) Ahpw, e kin mweidohng kahpwal pwukat en kakehlakahla ih oh pwehki met, e alehdi keting laud.

15. Dahme kitail kak sukuhlki sang mehn kahlemeng en Naomi?

¹⁵ Mehlel, kahpwal kan kak kapahtou de kansensuwedihala kitail. Mwein mie pak Sosep pehm duwehte met, oh pil sapwellimen Koht ladu lelepek teikan. Medewehla Naomi, me eh pwoudo oh nah pwutak riemen koaros mehla. E nda: “Kumwail dehr ekerkin ie Naomi, ahpw kumwail ekerkin ie Mara [wehwehki “Pahtou”], pwehki Koht Wasa Lapalap, ketikihong ie apwal laud.” (Rud 1:20, 21, ftn.) Kitail kak wehwehki dahme Naomi koasoia. Ahpw duwehte Sosep, Naomi sohte kin mweidohng eh pwoson oh eh nanpwungmwahu rehn Koht en luwetala ahpw kin dadaurete eh mour lelepek. Siohwa eri ketin kapaiada lih kesempwal menet. (Rud 4:13-17, 22) Laudsang met, nan paradais nin sampah, Siohwa pahn ketikihsang kahpwal koaros me Sehdan oh eh sampah suwedo kin kahrehda. “Mehkoaros me pweidahr nan ahnsou samwalahr ako pahn manokonokla douluhl.”​—Ais. 65:17.

16. Ia mwomwen atail madamadau ong kapakap? Dahme kahrehda?

 ¹⁶ Atail ese me Koht ketin poakohng kitail ahnsou koaros pahn sewese kitail en dadaur, sohte lipilipil soangen kahpwal dah kan me kitail lelohng. (Wadek Rom 8:35-39.) Mendahki Sehdan sohte pahn uhdi en kaluwetehla kitail, e sohte pahn pweida ma kitail kin kolokol madamadau pwung oh ‘mwasamwasahn pwe kitail en kak kapakap.’ (1 Pit. 4:7) Sises mahsanih: “Kumwail eri mwasamwasahn, oh kapakap [“pekipek karakarahk,” NW] ahnsou koaros pwe kumwail en kehlail oh itarohng pitsang mepwukat koaros me pahn wiawi, oh pil warohng uh mwohn silangin Nein-Aramas.” (Luk 21:36) Tehk me Sises eh ketin doadoahngki lepin mahsen “pekipek karakarahk” kin wehwehki en kapakap ni mehlel. Ni eh ketin kehkehlingkihong kitail en wia pekipek karakarahk, Sises kin ketin kasalehda kesempwalpen atail en kesihnenda teng ahnsou wet mwohn silangin Semeo oh ih. Ihte irail kan me ahneki kupwuramwahu en Siohwa pahn kasikasik en pitsang sapwellime rahno.

Kedirepwki Sapwellimen Siohwa Doadoahk

17. Ma amwail wasahn kalohk kin apwal en kalohk, ia duwen amwail kin paiekihda mehn kahlemeng en soukohp kan en mahs?

¹⁷ En iang wiewia kan me kin pidada atail kaudok kin kansenamwahwih kitail. Met katamankin kitail en Piter lokaia kan: “Soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht.” (2 Pit. 3:11) Nanpwungen atail wiewia kan, kalohki rongamwahwo me keieu kesempwal. (Mad. 24:14) Mehlel, doadoahk en kalohk ele kin apwal nan ekei wasahn kalohk pwehki aramas akan sohte kin perenki rong de re kin uhwong, de kedirepwki arail mouren ehuehu rahn. Sapwellimen Siohwa ladu kan mahs pil kin lelohng soahng wet. Re sohte kin pweiek ahpw re kin pwurepwurehng pwurala kalohki sapwellimen Koht mahsen. (Wadek 2 Kronikel 36:15, 16; Ser. 7:24-26) Dahme kin sewese irail en dadaur? Arail madamadau ong arail pwukoa kin pahrekiong kupwuren Siohwa, a kaidehn madamadau en sampah. Re pil medewe me e wia pwais me keieu kaselel en kadehdehda mwaren Koht.​—Ais. 25:1.

18. Ia uwen laud doadoahk en kalohki Wehio pahn kadehdehda mwaren Koht ni ahnsou kohkohdo?

¹⁸ Kitail pil ahneki pwais kaselel en kalohki mwaren Siohwa oh kupwure kan. Medewehla duwen met: Pwehki atail kin kalohk, sapwellimen Koht imwintihti kan sohte pahn kak nda me re sohte kin rong duwen Ih oh kupwure kan ni ahnsou me e pahn ketin kadeikada irail. Duwehte Parao en mahs, re pahn ese me Siohwa me kin mahweniong irail. (Eks. 8:1, 20; 14:25) Ni ahnsowohte, Siohwa pahn ketin kawauwih sapwellime ladu lelepek kan ni eh pahn uhdahn kasalehda me irail iei wiliepe kan.​—Wadek Esekiel 2:5; 33:33.

19. Ia duwen atail kak kasalehda me kitail kin inengieng doadoahngki mwahu ahnsou me Siohwa ketin kanengamahiong kitail?

¹⁹ Ni imwin nein Piter keriaun kisinlikou, e ntingwohng ienge me pwoson akan: “Kumwail tehk mwahu sapwellimen Kaun-o kanengamah ong kumwail ni eh ketikihong kumwail ahnsou mwahu en ale komour.” (2 Pit. 3:15) Ei, kitail en pousehlahte doadoahngki mwahu ahnsou me Siohwa ketin kanengamahiong kitail. Ia duwen? Sang ni atail (1) kakairada irair kan me kin kaperenda ih, (2) kolokol atail “mwakelekel oh pwung,” oh (3) ahneki madamadau pwung ong kahpwal kan. Patehng met, kitail anahne pwerisekiong doadoahk en Wehio. Ni atail kin wia mepwukat, kitail kin kasikasik kapai kan me poatopoat me kin pidada “lahng kapw oh sampah kapw.”​—2 Pit. 3:13.

[Nting tikitik me mi pah]

Ke Tamataman?

• Ia duwen atail kak kakairada irair kan me kin kaperenda Koht?

• Ia duwen atail kak kolokol “mwakelekel oh pwung”?

• Dahme kitail kak sukuhlki sang rehn Sosep oh Naomi?

• Dahme kahrehda atail kin iang doadoahk en kalohk kin wia pwais kaselel ehu?

[Peidek en Onop]

[Kilel nan pali 17]

Dahme pahn sewese ohl pwopwoud kan oh arail peneinei en kakairada irair akan me kin kaperenda Koht?

[Kilel kan nan pali 18]

Dahme kitail kak sukuhlki sang rehn Sosep duwen eh powehdi kahpwal kan?