Ia Duwen Tomwo Eh Kapitkitailla

“Mehmen me kin pwosonla Sapwellime Iehros, iei ih me kin ahneki mour soutuk. A mehmen me sohte kin peikiong Sapwellime Iehros, e sohte pahn kilang mour, ahpw engieng en Koht pahn mihmi reh kohkohlahte.”—SOHN 3:36.

1, 2. Ia ehu kahrepe me Zion’s Watch Tower tepida wiawihda?

 “MA EMEN kin kanahieng eh onop Paipel, e uhdahn pahn ese kesempwalpen pwoulahn Krais.” Met iei koasoiepen kapahieu en makasihn wet nan October en pahr 1879. Iren onop wet kaimwisekihla madamadau kesempwal wet: “Kitail anahne soikala soahng koaros me koasoia pwoulahn Krais kaidehn meirong ehu ong dihp.”—Wadek 1 Sohn 2:1, 2.

² Ehu kahrepen Zion’s Watch Tower tepin wiawihda nan July en pahr 1879 iei en utungada padahk en Paipel me pid tomw. Dahme ntingdi nan makasihno kin kihda “kisin mwenge ahnsou me konehng.” Pwehki ni imwilahn pahr 1800 samwa, e tohtohlahr irail kan me dene irail Kristian me kin tapiada peikasalki duwen pwoulahn Sises eh kak wia tomw ong dipatail kan. (Mad. 24:45) Ahnsowo, me tohto tapiada kamehlele madamadau me dene aramas kin kohsang mwengki. Madamadau wet kin uhwong ire mehlel me aramas pwupwsangehr irair en unsek. Irail kan me kamehlele madamadau wet kin padahngki me aramas kin pein kekeirda oh mwamwahula oh sohte anahne tomw. Eri, kaweid en wahnpoaron Pohl ong Timoty inenen konehng: “Kanakanahieng dahme kohieng uhk ni likilik pwe ke en apwahpwalih. Kalekeiukasang koasoi kan me kin uhwong Koht, oh akamai mwahl akan me ekei aramas kin kahdaneki ‘Loalokong.’  Pwe ekei kin koasoia me irail pil ahneki ‘Loalokong’ wet, oh ni imwilah re kin salongasang elen pwoson.”—1 Tim. 6:20, 21.

3. Peidek dah kan me kitail pahn tehkpene?

³ Ke uhdahn sohte men “salongasang elen pwoson.” E pahn mwahu en tehk peidek pwukat pwe ken kolokol omw pwoson kehlail: Dahme kahrehda I anahne tomw? Ia uwen laud en tounmetei oh lokolok ong Siohwa oh Sises pwe ira kak ketikihda tomwo? Ia duwen ei kak paiekihda koasoandi kesempwal wet me kak doareiesang engieng en Koht?

Pitsang Engieng en Koht

4, 5. Dahme kadehdehda me engieng en Koht kin mi pohn koasoandi suwed wet?

⁴ Paipel oh poadopoad en aramas kin kasalehda me sangete ni Adam eh wiahda dihp, engieng en Koht kin “mihmi” pohn tohnsampah. (Sohn 3:36) Met kin kadehdehda ire mehlel me aramas koaros pahn mehla. Kaundahn Sehdan sohte kak douluhl pere aramas akan sang kahpwal kan me kin wiewiawi, oh sohte ehu koperment en aramas kak kapwaiada anahn akan en tohn arail wehi kan. (1 Sohn 5:19) Kahrehda, tohn sampah kan kin pousehlahte lokolongki mahwen, mwersuwed oh pil semwehmwe.

⁵ Eri, e sansal me Siohwa sohte kin ketin kapaiada koasoandi suwed wet. Pohl koasoia me “engieng en Koht kin sansalda sang nanleng pwehki soangen dihp oh pil soangen suwed koaros.” (Rom 1:18-20) Ihme kahrehda irail kan me sohte kin namenengki arail elen mour me kin kansensuwedihala Koht sohte pahn pitsang imwilahn arail wiewia kan. Rahn wet engieng en Koht kin sansalda nan mahsen en kadeik me kin wudekidi pohn en Sehdan sampah duwehte kalokolok, oh ire pwukat kin pwarada nan neitail sawaspen Paipel tohto me kin wiawihda.—Kaud. 16:1.

6, 7. Doadoahk dahieu me Kristian keidi kan kin tiengla mwowe oh wia? Ahnsou mwahu dahieu mie ong emenemen aramas me kin wia kisehn en Sehdan sampah?

⁶ Ia duwe, met wehwehki me e pwandalahr ong emenemen aramas en saledek sang kaundahn Sehdan oh ale kupwuramwahu en Koht? Soh, pwe miehte ahnsou mwahu en kompoakepahnkihla Koht. Kristian keidi kan me kin wia “meninkeder en Krais kei” kin tiengla mwowe nan doadoahk ehu me aramas tohto paiekihda. Sang ni doadoahk wet re kin peki rehn aramas akan en wehi koaros: “Kumwail en wekila sang ni imwintihti ong ni kompoakepahn Koht.”—2 Kor. 5:20, 21.

⁷ Wahnpoaron Pohl koasoia me Sises ketin “kapitkitailla sang engieng en Koht me pahn pwarodo.” (1 Des. 1:10) Kaimwiseklahn kasalepen engieng en Siohwa pahn imwikihla kasohrala soutuk en me dipan akan me sohte kin koluhla. (2 Des. 1:6-9) Ihs me pahn pitsang? Paipel mahsanih: “Mehmen me kin pwosonla Sapwellime Iehros, iei ih me kin ahneki mour soutuk. A mehmen me sohte kin peikiong Sapwellime Iehros, e sohte pahn kilang mour, ahpw engieng en Koht pahn mihmi reh kohkohlahte.” (Sohn 3:36) Ei, ni koasoandi wet eh pahn imwisekla, koaros me momour oh me kin pwoson Sises oh sapwellime tomw sohte pahn kasohrala nan rahn en engieng en Koht.

Ia Duwen Tomwo Eh Kin Doadoahk

8. (a) Koapworopwor kaselel dahieu me mi mwohn Adam oh Ihp? (b) Ia duwen Siohwa eh ketin kadehdehda me ih Koht men me kin ketin kasalehda kopwung ni unsek?

⁸ Adam oh Ihp koaros kapikipikda ni unsek. Ma ira peikiongete Koht, sampah ahnsouwet pahn direkihla kadaudokara kan me pahn iang ira momour nan Paradais. Ahpw tepin atail pahpa oh nohno sapeikiong sapwellimen Koht kehkehlik. Imwilahn met, ira ale kalokepen mehla soutuk oh eri lekdekla sang nan Paradaiso. Ni Adam oh Ihp ara nainekihda seri kan, dihp kasaminelahr aramas akan oh tepin ohl oh lih kedekedeo mahla oh mehla. Met kadehdehda mehlelpen sapwellimen Siohwa mahsen. Laudsang met, ih Koht men me kin ketin kasalehda kopwung ni unsek. Siohwa ketin padahkihong Adam ma e pahn kang wahn tuhke me E ketin keinepwihsang, met pahn imwikihla mehla. Met uhdahn pweida.

9, 10. (a) Dahme kahrehda kadaudok en Adam kan kin mehla? (b) Ia duwen atail kak pitsang mehla soutuk?

⁹ Nin duwen kadaudok en Adam, kitail sohsohki  paliwar ehu me soh unsek me kin ahn wia dihp oh imwikihla mehla. Ni ahnsou me Adam dipada, kitail pil wiahla aramas dipan kei mendahki kitail saikinte ipwidi ahpw pwehki kitail wia kadaudoke kan. Eri, kitail pil iang ale kalokepen mehla. Mahsen en Siohwa sohte pahn mehlel ma e ketikihsang kalokepen mahla oh mehla ni eh sohte ketikihda pweinen tomwo. Ihme kahrehda Pohl ndahki duwen kitail koaros: “Ngehi aramas emen me pahn mehla, me netlahr pwe en wiahla lidun dihp. Uhdahn aramas paisuwed men ngehi! Ihs me pahn kapitiehla sang nan paliwar wet me kin kahluwalahng ie mehla?”—Rom 7:14, 24.

¹⁰ Siohwa kelehpw me kak ketikihda koasoandi ehu me e pahn ketin doadoahngki pwe en ni pwung mahkohng dipatail kan oh kamaiau kitail sang kalokepen mehla soutuk. E ketin wia met ni eh poaronehdo sapwellime Ohl kompoake sang nanleng pwe en ipwidi nin duwen aramas unsek men, me kak patohwanda eh mour nin duwen tomw ehu ong kitail. Sises ketin wiahte aramas unsek men, sohte duwehte Adam. Ni mehlel, “sohte sapwung ehu mie rehn Krais.” (1 Pit. 2:22) Sises kak ketin wiahla pahpa men oh nainekihda kadaudok en aramas unsek kan. Ahpw soh, pwe e ketin mweidohng sapwellimen Koht imwintihti kan en kemehla ih pwe en kak pwekada kadaudok en Adam soh unsek kan oh kahrehda irail kan me kin pwoson ih en ale mour soutuk. Paipel kawehwehda: “Koht mehtehmen mie, oh emen pil mie me kin kadokepene Koht oh aramas akan, iei ih aramaso, Krais Sises, me ketin meirongkilahr pein ih ong Koht pwe en ketin doarehla aramas akan koaros.”—1 Tim. 2:5, 6.

11. (a) Ia duwen atail kak karasahda kamwahu kan en tomwo? (b) Ia uwen laud en kamwahu kan en tomwo?

¹¹ Doadoahk me tomwo kin wia kin duwehte karasaras en aramas emen me kihong nah mwohni rehn emen tohrohr pwe en nekidala, ahpw e pitihdi oh kihsang mwohni ko. Ih eri mihla nan pweipwand. Me kihsang mwohnio eri selidi sounpar tohto nan imweteng. Ahpw dahme wiawiong me uhdahn naineki mwohnio? E semwehmwehla oh sohte mehkot kak kamwahwihala eh irairo, ihte ma ohl kepwehpwe men pahn kohdo pwe en sewese oh kapwurehiong nah mwohni ko koaros, oh irisala eh pweipwand kan. Pil duwehte, Siohwa Koht oh sapwellime Ohl kompoake ketin pwainkihda kadaudok en Adam kan oh iriskihsang arail pweipwand en dihp ntahn Sises pwe kapwurehiong aramas akan en ahneki mour unsek. Ihme kahrehda Sohn Sounpapidais kak ndahki Sises: “Kilang! Ien Sihmpwul en Kohto me kin ketikihsang dipen sampah koaros.” (Sohn 1:29) Kasohrlahn dihp wiawihong tohn sampah koaros iangahki me melahr kan.

Uwen Laud en Tounmetei me Tomwo Kahrehda

12, 13. Dahme kitail kak sukuhlki sang pepehm en Eipraam ni eh kaunopada pwe en meirongkihla Aisek?

¹² Kitail sohte kak uhdahn wehwehki ia uwen laud en tounmetei me Samatail nanleng oh sapwellime Ohlo ketin wiahda ong tomwo. Ahpw Paipel kin kasalehda ire kan me kak sewese kitail en doudouloale duwen met. Karasepe, medewehla pepehm en Eipraam ahnsou me e aluhki rahn siluh kohlahng Moria pwe en kapwaiada sapwellimen Koht kehkehlik wet: “Ale Aisek, noumw pwutak iehrosen, me ke kin kesempwalki, oh kohla nan wehin Moria. Kowe kohla meirongkihong ie nin duwen meirong isihs ehu  pohn nahna me I pahn kasalehiong uhk.”—Sen. 22:2-4.

¹³ Eipraam eri lella wasao. Medewehla ia uwen eh kansensuwed ong Eipraam en pirehdi pehn oh nehn Aisek ko oh kawenehdi ih pohn pei me e wiahda. Ia uwen kamedek ong ih en kauwada naipo pwe en kemehkihla nah pwutako. Medewehla pepehm en Aisek ni eh wonohn pohn peio, awiawih iahd me naipo pahn doakoahdi oh kemehla ih. Ahpw sapwellimen Siohwa tohnleng men kauhdi Eipraam. Dahme Eipraam oh Aisek wiahda ahnsowo kin sewese kitail en wehwehki ia uwen laud en tounmetei me Siohwa ketin wiahda ni eh mweidohng nein Sehdan pwihn kan en kemehla Sapwellime Ohlo. Aisek eh peikiong Eipraam kin karasahda Sises eh kupwurki lelohng lokolok oh pwoula pwehki kitail.—Ipru 11:17-19.

14. Dahme wiawihong Seikop me kak sewese kitail en wehwehki uwen laud en tounmetei me tomwo kahrehda?

¹⁴ Uwen laud en tounmetei me tomwo kahrehda pil kak karasahiong dahme wiawihong Seikop. Nanpwungen nah pwutak kan koaros, Seikop keieu poakepoake Sosep. Ahpw rien Sosep pwutak kan kin peiriniong oh kailongki ih. Ahnsou me eh pahpao kadarala ih pwe en tehk iren rie pwutak ko, Sosep perenki kapwaiada met. Ni ahnsowo, irail wie apwahpwalih nein Seikop sihpw kan wasa ehu mwail 60 paliepeng sang imwarailo nan Epron. Nna medewehla pepehm en Seikop ahnsou me e alehdi en Sosep likouo me ohkihla nta. E sengiseng oh nda: “En nei pwutako eh likowo met! Mahn lawalo me kemehla; mahn kommwad me kangala.” Mepwukat kahrehiong Seikop pahtou laud oh e mwahieiki Sosep rahn tohtohie. (Sen. 37:30-34) Siohwa sohte kin ketin mwekid duwehte aramas soh unsek kan nan soangen irairo. Ahpw sang ni atail kin doudouloale dahme wiawihong Seikop ele kin sewese kitail en wehwehki ia sapwellimen Koht pepehm ni ahnsou me sapwellime Ohl kompoake lelohng lokolok oh kamakamla ni elen lemei nin sampah.

Ia Duwen Atail Paiekihda Tomwo

15, 16. (a) Ia duwen Siohwa eh ketin kasalehda me e kupwurki tomw en Sises? (b) Ia duwen omw paiekihda tomwo?

¹⁵ Siohwa ketin kaiasada sapwellime Ohl lelepek  ong ngehn men. (1 Pit. 3:18) Erein rahn 40, Sises me kaiasadahro, ketin pwarowohng sapwellime tohnpadahk kan pwe en kakehlaka arail pwoson oh kaunopada irail ong doadoahk en kalohk me re pahn wia. Ih eri ketidahla nanleng, wasa me e patohwanohng Koht pweinen eh nta, me e pahn ketin doadoahngkihong irail akan me kin uhdahn idawehn oh kin pwoson ih oh eh meirong en tomwo. Siohwa Koht ketin kasalehda me e kupwurki tomw en Krais ni eh ketikihong Sises pwukoa en kamwerehdi sapwellime manaman pohn tohnpadahk kan me pokonpene nan Serusalem ni rahnen Pendekos pahr 33.—Wiewia 2:33.

¹⁶ Sapwellimen Krais me keidi pwukat eri mwadangete tapiada kangoangehki meteikan en papidaisla ni mwaren Sises Krais pwe ren ale mahkpen diparail kan oh pitsang engieng en Koht. (Wadek Wiewia 2:38-40.) Sangete rahno leledo rahnwet, aramas rar kei sang wehi koaros kak ahneki nanpwungmwahu rehn Koht pwehki arail pwoson sapwellimen Sises meirong en tomw. (Sohn 6:44) Nin duwen atail koasoiapenehr nan iren onop wet, kitail anahne medewe peidek riau pwukat: Mie emen rehtail me alehdi koapworopwor en mour soutuk pwehki eh doadoahk mwahu? Ni atail ahnekier koapworopwor kaselel wet, ia duwe, kitail kakete kesehla?

17. Ia duwen atail anahne kilangwohng kapai kaselel en wia kompoakepahn Koht?

¹⁷ Udahno sohte me kin warohng paiekihda tomw en Sises. Ahpw ni arail kin pwoson tomw wet, me rar kei kompoakepahnkihla Koht oh re ahneki koapworopwor en mour soutuk nan paradais nin sampah. Atail kin wia kompoakepahn Siohwa men sohte kin kamehlelehiong kitail me ahnsou koaros kitail pahn kak kolokol nanpwungmwahu reh. Kitail anahne pousehlahte kasalehda me kitail kin kalahnganki tomw me Krais Sises ketin pwainla.—Rom 3:24; wadek Pilipai 2:12.

Pousehlahte Pwoson Tomwo

18. Dahme kin pidada pwoson tomwo?

¹⁸ Sohn 3:36 me mi ni tepin iren onop wet kasalehda me en kin pwoson Sises Krais kin pidada peikiong ih. Atail kalahnganki tomwo anahne kamwakid kitail en mourki mour me pahrekiong sapwellimen Sises padahk kan, iangahki dahme e padahngki duwen tiahk kan. (Mark 7:21-23) “Engieng en Koht” pahn lelohng irail koaros me sohte kin namenengki arail tiahk suwed kan me duwehte nenek, lokaia de kamwan suwed de “soangen samin teikan” koaros me iangahki sohte uhdihsang kilikilang kilel de kasdo suwed.—Ep. 5:3-6.

19. Ia duwen atail kak kasalehda me kitail kin pwoson tomwo?

¹⁹ Atail kin kalahnganki tomwo anahne kahrehiong kitail en pwerisekiong wiewia kan me kasalehda atail poadidi ong Koht. (2 Pit. 3:11) Eri kitail en koasoanehdi ahnsou ong kaukaule kapakap, wia atail onop Paipel, towehda mihting kan, wia kaudok en peneinei oh ngoangki iang doadoahk en kalohk. Oh kitail en ‘dehr manokehla wiewia mwahu kan oh atail sawaspene, pwe ih soangen meirong pwukat me Koht kin ketin kupwurperenki.’—Ipru 13:15, 16.

20. Kapai dah kan en ahnsou kohkohdo me irail me kin pousehlahte pwoson tomwo kak kasik?

²⁰ Ni ahnsou me sapwellimen Siohwa engieng pahn lelohng koasoandi suwed wet, ia uwen atail pahn peren pwehki atail kin pwoson tomwo oh kin doulahte kasalehda me kitail kin kalahnganki! Oh nan sampah kapw me Koht ketin inoukidahr, kitail pahn kalahnganki koasoandi kaselel wet me kapitkitailsang sapwellimen Koht engieng kohkohlahte.—Wadek Sohn 3:16; Kaudiahl 7:9, 10, 13, 14.

Ia Duwen Omw Pahn Sapeng?

• Dahme kahrehda kitail anahne tomwo?

• Ia uwen laud Siohwa oh Sises ara ketin tounmeteikihla ong tomwo?

• Ia duwen atail kak paiekihda tomwo?

• Ia duwen atail en kin pwoson sapwellimen Sises meirong en tomw?

[Peidek en Onop]

[Kilel nan pali 15]

Miehte ahnsou en kompoakepahnkihla Siohwa

[Kilel kan nan pali 16]

Medewe dahme wiawihong Eipraam, Aisek oh Seikop kak sewese kitail en wehwehki uwen laud en tounmetei me wiawi ong tomwo