“Amwail Kaun Metehmen, Iei Mesaia”

“Kumwail dehr . . . ngoangki aramas akan en wiahkin kumwail arail ‘Kaun,’ pwe amwail kaun metehmen, iei Mesaia.”—MAD. 23:10.

1. Ihs me Sounkadehdehn Siohwa kan kin pohnese me iei arail kaun, oh dahme kahrehda?

 PELIEN lamalam kan me dene irail Kristian ahneki kaun akan duwehte pahpa sarawi en Kadolik en Rom oh kaun akan en pelien lamalam teikan. Sounkadehdehn Siohwa kan kin wehwehki me arail kaun kaidehn aramas men. Re sohte kin wia nein aramas tohnpadahk de sohte kin idawehn emen. Met kin pahrekiong dahme Siohwa ketin kohpadahr duwen sapwellime Ohl: “I wiahkihla ih sounkaweid oh kaunen wehi kan, I kasalehda ei manaman ong wehi kan pwehki ih.” (Ais. 55:4) Mwomwohdiso en Kristian keidi kan oh iengerail “sihpw teikan” nan sampah pwon sohte men ahneki kaun emen likin me Siohwa ketikihong irail. (Sohn 10:16, NW) Re kin kamehlele dahme Sises mahsanih: “Amwail kaun metehmen, iei Mesaia.”—Mad. 23:10.

Tohnleng Soupeidi en Israel

2, 3. Pwukoa dah me sapwellimen Koht Ohl ketin wia nan Israel?

² Sounpar epwiki kei mwohn tepidahn mwomwohdiso en Kristian, Siohwa ketin doadoahngki tohnleng men en kahluwa sapwellime aramas akan me iei mehn Israel kan. Mwurin eh ketin kapitirailla sang Isip, Siohwa mahsanihong irail: “I pahn kadar mwohmwail tohnleng men pwe en apwahpwalih kumwail nan amwail seiloak oh en kahluwaikumwaillahng wasa I onopadahr. Rong eh mahsen oh peikiong. Kumwail dehr kahngohdiong, pwe ngehi me kadar oh e sohte pahn mahkohng amwail kahngohdi kan.” (Eks. 23:20, 21) E sansal me tohnleng menet me wia wiliepen Siohwa me kin doadoahk ni mware iei sapwellimen Koht Iehros.

³ Mwohn eh ipwidi nin duwen aramas emen, sapwellimen Koht Ohlo mwarenki Maikel. Nan pwuhken Daniel, Maikel kin mwarenki “tohnleng silepe en Israel.” (Dan. 10:20, 21) Tohnpadahk Sud kasalehda me Maikel kin pidada dahme wiawihong mehn Israel kan ahnsou reirei mwohn mwehin Daniel. Mwurin Moses eh mehla, Sehdan men doadoahngki paliweren Moses en kapwaiada eh ineng en kasonge mehn Israel kan en iang kaudokiong dikedik en eni. Maikel ketin mwekid pwe en irehdi met. Sud koasoia: “Tohnleng lapalap Maikel . . . ni eh akamaiong Tepilo, ihs rehra me pahn ahneki pwung ong paliwar en Moses; Maikel sohte lahlahwe Tepilo, pwe ihte me e mahsanihong, ‘Kaun-o en ketin kapwungohng uhk!’” (Sud 9) Mwurin ahnsou kis oh mwohn mehn Israel kan kapilpene Seriko, e sansal me Maikel me “kaunen sounpeien KAUN-O” me ketin pwarowohng Sosua pwe en kamehlelehiong ih me e ahneki sapwellimen Koht sawas. (Wadek Sosua 5:13-15.) Ni ahnsou me ngehn saut kehlail men song en kauhdi tohnleng men me pahn wahla rohng kesempwal ong Daniel, tohnleng lapalap Maikel ketila pwe en sewese tohnlengo.—Dan. 10:5-7, 12-14.

Kaun me Kokohpdahro Ketidohr

4. Dahme Paipel kohpadahr duwen ketidohn Mesaia?

⁴ Mwohn met wiawi, Siohwa ketin poaronehdo sapwellime tohnleng Kapriel rehn soukohp Daniel pwe en kasalehiong ih kokohp me “kaun me Koht ketin piladahro” pahn ketido. (Dan. 9:21-25) * Sises ketin papidaislahr rehn Sohn nan pahr 29, nin duwen me kokohpdahr en wiawi. Sapwellimen Koht manaman ti pohn Sises, kahrehiong ih en wiahla me Keidio, me wehwehki  Krais, Mesaia. (Mad. 3:13-17; Sohn 1:29-34; Kal. 4:4) Nin duwen Mesaia, e wiahla Kaun men me sohte emen pahrekiong.

5. Dahme Sises ketin wia nin duwen Kaun men erein sapwellime doadoahk en kalohk?

⁵ Sang ni tepin sapwellime doadoahk en kalohk, Sises ketin kadehdehda me ih me “kaun me Koht ketin piladahro.” Erein rahn kei, e ketin tapihada pilada sapwellime tohnpadahk kan oh e ketin wiahda keieun manaman. (Sohn 1:35–2:11) Sapwellime tohnpadahk kan kin idawehn ih ni eh ketin kakahnseli nan sahpwo pwon, kalokalohki rongamwahu en Wehio. (Luk 8:1) E kin ketin kasukuhlih irail duwen kalohk oh tiengla mwowe nan kalohk oh padahk, ni ahl wet, e ketin wia mehn kahlemeng mwahu. (Luk 9:1-6) Elder kan rahnwet anahne alasang ih.

6. Ia duwen Sises eh ketin kadehdehda me ih me Sounsilepe oh Kaun men?

⁶ Sises ketin kasalehda ehu ire me pid eh wia kaun men sang ni eh karasahiong ih sounsilepen sihpw. Sounsilepen sihpw kan kin kahre neirail pelin sihpw kan. Nan ehu pwuhk, W. M. Thomson ntingihedi: “Sounsilepen sihpw men kin tiengla mwohn sihpwo, kaidehn ihte en kasalehda ia wasa re anahne kohla ie, ahpw en tehk mwahu me wasao sohte keper oh sihpw kan kak kohla ie. . . . E kin kaweidki nah sokon oh kahre pelin sihpw ko ong arail mohs oh pere irail sang arail imwintihti kan.” (The Land and the Book) Pwe en kasalehda me e wia Sounsilepen sihpw oh Kaun mehlel men, Sises mahsanih: “Ngehi me silepen sihpw mwahu. Silepen sihpw mwahu kin tounmeteikihla eh mour pwehki nah sihpw kan. Nei sihpw akan kin rong ngilei; oh I ese irail, oh re kin idawehn ie.” (Sohn 10:11, 27) En Sises mahsen kin mehlel ni eh pwoula oh tounmeteikihla moure ong nah sihpw, ahpw Siohwa ketin kaiasada ih pwe en wia “Kaun oh Sounkomour.”—Wiewia 5:31; Ipru 13:20.

Sounapwalih en Mwomwohdiso

7. Dahme Sises ketin doadoahngki pwe en apwalih mwomwohdisohn Kristian?

⁷ Mwohnte eh ketidahla nanleng, Sises me kaiasadahr ketin padahkihong sapwellime tohnpadahk kan: “Manaman koaros en nanleng oh sampah mweimweiongieier.” (Mad. 28:18) Siohwa ketikihong Sises sapwellime manaman pwe en kakehlaka tohnpadahk kan nan padahk mehlel. (Sohn 15:26) Sises ketin kamwerehdi manamano pohn tepin Kristian akan ni Pendekos nan pahr 33. (Wiewia 2:33) Mweredi en manamano pohrail kin wia kilelepen tepidahn mwomwohdisohn Kristian. Siohwa ketikihong sapwellime Ohlo manaman en kaunda sang nanleng mwomwohdiso koaros nin sampah. (Wadek Episos 1:22; Kolose 1:13, 18.) Sises ketin doadoahngki sapwellimen Koht manaman oh pil tohnleng kan me kin uhpah ih pwe en kaweid mwomwohdisohn Kristian.—1 Pit. 3:22.

8. Ihs me Krais ketin doadoahngki pwe en kaweid sapwellime tohnpadahk kan nin sampah ni mwehin wahnpoaron ko? Ihs me e ketin doadoahngki rahn pwukat?

⁸ Krais pil ketin doadoahngki manamano pwe en ketikihda “sapwellime kisakis kan,” ekei me wia, “silepe oh sounpadahk” kan nan mwomwohdiso. (Ep. 4:8, 11)  Wahnpoaron Pohl kin kangoange sounapwalih kan: “Kumwail mwasamwasahn pein kumwail oh pil sihpw akan koaros me [“sapwellimen Koht manaman,” NW] ketikihong kumwail en apwahpwalih. Kumwail en wia silepen mwomwohdisohn Koht.” (Wiewia 20:28) Ni ahnsou me mwomwohdisohn Kristian tepida, sounapwalih kan koaros wia keidi kan. Wahnpoaron kan oh elder kan nan mwomwohdisohn Serusalem wia pwihn me kin apwalih mwomwohdiso kan koaros. Krais ketin doadoahngki pwihn wet pwe en kaweid “rie” kan koaros me keidi nin sampah. (Ipru 2:11; Wiewia 16:4, 5) Ni imwin rahn akan, Krais ketikihong ni likilik, “sapwellime dipwisou kan koaros,” me wehwehki soahng koaros me pid duwen Wehio, rehn “ladu lelepek oh loalokong” oh wiliepe me iei Pwihn me kin apwalih mwomwohdiso nan sampah pwon me wiawihkihda Kristian keidi ohl kan. (Luk 12:42-44) Irail me keidi kan oh iengerail sihpw teikan kin pohnese me arail kin ideidawehn kaweid en Pwihn wet kin wehwehki me irail kin ideidawehn Krais, arail Kaun.

Krais Ketin Tapihada Doadoahk en Kalohk

9, 10. Ia duwen Krais eh ketin koasoanehdi doadoahk me pid kalohki rongamwahu en Wehio?

⁹ Sangete nin tapio, Sises ketin kaweid doadoahk en kalohk oh padahk nan sampah pwon. E ketin wiahda koasoandi duwen rongamwahu en Wehio en lohkseli wasa koaros nin sampah. Erein sapwellime doadoahk en kalohk, e ketin padahkihong sapwellime wahnpoaron ko: “Kumwail dehr kohwei nan sapwen mehn liki kan de nan kahnimw en mehn Sameria kan. Kumwail kohwei mahs rehn sihpw kan me salongalahr me kisehn keinek kan en Israel. Kumwail kohwei oh kapahrengkihong irail me Wehin Koht kerendohr!” (Mad. 10:5-7) Re kin ngoangki kapwaiada pahngok wet rehn mehn Suhs akan oh pil irail akan me wekiong lamalam en mehn Suhs mwurin Pendekos nan pahr 33.—Wiewia 2:4, 5, 10, 11; 5:42; 6:7.

¹⁰ Mwuhr, ni Sises eh ketin doadoahngki sapwellimen Koht manaman, e ketin kalaudehla doadoahk en kalohki Wehio en lella rehn mehn Sameria kan oh mwuri rehn meteikan me kaidehn mehn Suhs. (Wiewia 8:5, 6, 14-17; 10:19-22, 44, 45) Sises ni eh ketin nsenohki rongamwahu en lohkseli ong mehn liki kan, E ketin kamwakid Sohl sang Tarsus en wiahla Kristian men. Sises ketin padahkihong sapwellime tohnpadahk Ananaias: “Onopada pwe ke en kowohng nan ahl me adaneki Ahl Inen oh rapahki nan imwen Sudas ohl emen sang Tarsus me ede Sohl. . . . Kohwei pwe I piladahr ohlo pwe en papah ie oh kasalehiong mehn liki kan oh nanmwarki kan oh pil mehn Israel kan mwarei.” (Wiewia 9:3-6, 10, 11, 15) “Ohlo” wiahla wahnpoaron Pohl.—1 Tim. 2:7.

11. Ia duwen Krais eh ketin doadoahngki sapwellimen Koht manaman pwe en kalaudehla doadoahk en kalohk?

¹¹ Pwehki Krais kupwurki irail me kaidehn mehn Suhs en rong rongamwahu en Wehio, Sises ni eh ketin doadoahngki sapwellimen Koht manaman, kaweidkin Pohl en seiloakla nan Eisia Tikitik oh pil Iurop. Luk ntingihedi: “Ni arail [Kristian soukohp kan oh sounpadahk kan nan mwomwohdisohn Andiok nan Siria] kin papah Kaun-o oh kaisihsol, [“sapwellimen Koht manaman,”  NW] ahpw mahsanihong irail, ‘Kumwail katohrehla Parnapas oh Sohl, pwe ira en wia doadoahk me I kilelehiong ira.’ Irail eri kaisihsol oh kapakap oh pwil pehrail kan pohra oh kadarirahla.” (Wiewia 13:2, 3) Sises malipe Sohl en Tarsus en wia ohl me e ketin “piladahr” pwe en kalohki mware ong mehn liki kan. Eri, mwekid kapw wet me kangoange doadoahk en kalohk kin kohsang rehn Krais, Kaun en mwomwohdiso. Sises eh ketin doadoahngki sapwellimen Koht manaman pwe en kaweid doadoahk wet kin sansalda erein keriaun seiloak en misineri me Pohl wia. Paipel kin kasalehda me Sises ketin doadoahngki manamano pwe en kin kaweid Pohl oh ienge tohn seiloak ko nan arail koasoandi kan ong ia wasa oh iahd me re pahn seiloak, oh kaudiahl ehu kasalehiong irail me ren kohla Iurop.—Wadek Wiewia 16:6-10.

Sises Ketin Kahluwa Sapwellime Mwomwohdiso

12, 13. Ia duwen pwuhken Kaudiahl eh kasalehda me Krais kin ketin tetehk kanahieng dahme kin wiawi nan ehuehu mwomwohdiso?

¹² Sises kin ketin tetehk kanahieng dahme kin wiawi nan mwomwohdiso kan en sapwellime tohnpadahk keidi kan ni mwehin wahnpoaron ko. E uhdahn mwahngih duwen irair en ehuehu mwomwohdiso pwukat. Met kin sansalda ni atail kin wadek Kaudiahl irelaud 2 oh 3. E ketin kasalehda eden mwomwohdiso isuh ko me mihmi nan Eisia Tikitik. (Kaud. 1:11) Ihme kahrehda kitail uhdahn kamehlele me e ketin dehdehki mwahu duwen irair en mwomwohdiso teikan en sapwellime tohnpadahk kan nin sampah ahnsowo.—Wadek Kaudiahl 2:23.

¹³ Sises ketin kapinga ekei mwomwohdiso ko pwehki arail kin lelepek, dadaurete pahn kahpwal, loalopwoat ong sapwellime mahsen oh kin soikala irail kan me kin lahlahwe padahk mehlel. (Kaud. 2:2, 9, 13, 19; 3:8) Ahpw, e ketikihda kaweid kehlail ong ekei mwomwohdiso kan pwehki arail limpoak ong ih tikitiklahr, re kin mweidada tiahk en pwongih dikedik en eni kan oh nenek oh pil saminimin nanpwungarail. (Kaud. 2:4, 14, 15, 20; 3:15, 16) Sises kin ketin wia sounapwalih limpoak men. Ong irail kan me e ketin panawih ni kehlail, e mahsanih: “I kin lipwoare oh keme irail koaros me I kin poakepoake. Eri, ngoangda oh sohpeisang dipomw kan.” (Kaud. 3:19) Mendahki e ketiket nanleng, Sises kin ketin doadoahngki sapwellimen Koht manaman pwe en kahluwa mwomwohdiso kan en sapwellime tohnpadahk kan nin sampah. Ni kaimwiseklahn kisinlikou ong mwomwohdiso pwukat, e mahsanih: “Mehmen me mie salenge mehn rong wasa, a en rong dahme [“sapwellimen Koht manaman,” NW] mahmahsanihong mwomwohdiso kan!”—Kaud. 3:22.

14-16. (a) Ia duwen Sises eh ketin kadehdehda me ih Kaun eimah men ong sapwellimen Siohwa aramas akan nin sampah? (b) Ia imwilahn Sises eh kin ketin “ieiang” sapwellime tohnpadahk kan “ahnsou koaros lel ni imwin kawa”? (c) Dahme kitail pahn tehkpene nan iren onop en mwuhr?

¹⁴ Kitail eseier me tohnleng lapalap Maikel (Sises) kin ketin kadehdehda me ih Kaun kommwad men en Israel. Mwuhr, Sises kin ketin wia Kaun eimah oh Sounsilepe limpoak men ong sapwellime tohnpadahk kan ni mwehin wahnpoaron ko. Erein eh ketiket nin sampah, e kin ketin tiengla mwowe nan doadoahk en kalohk. Oh mwurin eh iasada, e kin ketin apwalih mwahu kekeirdahn doadoahk en lohkiseli rongamwahu en Wehio.

¹⁵ Sises pahn ketin doadoahngki sapwellimen Koht manaman pwe en kalaudehla doadoahk en kalohk lao lella ni irepen sampah. Mwohn eh ketidahla nanleng, Sises mahsanihong sapwellime tohnpadahk kan: “Kumwail pahn audaudkihda manaman ni ahnsou me [“sapwellimen Koht  manaman,” NW] pahn ketidohng kumwail, oh kumwail ahpw pahn kadehde ie nan Serusalem, nan Sudia pwon, oh Sameria, oh lelohng ni irepen sampah.” (Wiewia 1:8; wadek 1 Piter 1:12.) Pahnangin kaweid en Krais, doadoahk en kalohk inenen laud ehu wiawi ni mwehin wahnpoaron ko.—Kol. 1:23.

¹⁶ Ahpw Sises mahsanih me doadoahk wet pahn pousehlahte wiawi lao lel ni imwin ahnsou. Mwurin eh ketin kehkehlikihong sapwellime tohnpadahk kan en kalohk oh katohnpadahk nan wehi kan koaros, e ketin inoukihong irail: “I pahn ieiang kumwail ahnsou koaros lel ni imwin kawa.” (Mad. 28:19, 20) Sang ni eh ketin wiahla nanmwarki men nan pahr 1914, Krais kin ketin “ieiang” laudsang mahs sapwellime tohnpadahk kan oh kin wia doadoahk nin duwen arail Kaun. Kitail pahn tehkpene duwen sapwellime doadoahk laud wet me wiawi sang pahr 1914 nan iren onop en mwuhr.

[Nting tikitik me mi pah]

Kousapahl

• Ia duwen sapwellimen Koht Ohl eh ketin kadehdehda me ih Kaun en Israel?

• Dahme Krais ketin doadoahngki pwe en kahluwa sapwellime mwomwohdiso nin sampah?

• Ia duwen Krais eh ketin kaweid doadoahk en lohkiseli rongamwahu?

• Dahme kasalehda me Krais kin ketin tetehk kanahieng duwen irair en ehuehu mwomwohdiso?

[Peidek en Onop]

[Kawehwehpen kilel kan nan ehu ehu pali 25]

“I pahn kadar mwohmwail tohnleng men”

[Kawehwehpen kilel kan nan ehu ehu pali 26]

Duwehte mahs, Krais kin ketin doadoahngki “sapwellime kisakis kan” pwe en apwalih sapwellime sihpw kan