Atail Kaun me Kin Wie Doadoahk Rahnwet
Atail Kaun me Kin Wie Doadoahk Rahnwet
“E ahpw mwesel kohkohla, kolahng kalowehdi eh imwintihti kan.”—KAUD. 6:2.
1, 2. (a) Ia duwen Paipel eh kin karasahda sapwellimen Krais wiewia nin duwen nanmwarki men sang pahr 1914? (b) Dahme Krais ketin wia mwurin eh wiahla nanmwarki men?
KRAIS ketin wiahla nanmwarki en sapwellimen Siohwa Wehin Mesaia nan pahr 1914. Ia duwen atail kin kilangwohng ih met? Kitail kin kilangwohng ih nin duwen nanmwarki men me kin wie mwomwohd oh madamadau nan mwoale oh ekei pak kilengdohng sampah pwe en ese ia iren sapwellime mwomwohdiso? Ma ih duwen atail kin kilangwohng ih, kitail anahne wekidala atail madamadau. Pwuhken Melkahka oh Kaudiahl kin karasahiong ih nin duwen nanmwarki angiangin men me kin dake oahs kohkohla, “kolahng kalowehdi eh imwintihti kan,” oh pousehlahte lao e pahn “powehdi” douluhl.—Kaud. 6:2; Mel. 2:6-9; 45:1-4.
2 Dahme Krais ketin wia mwurin eh wiahla nanmwarki iei en mahweniong “drakono oh ienge kan” oh kana. Nin duwen tohnleng lapalap Maikel oh kaunen karis en tohnleng kan, Krais ketin kesepwekehsang Sehdan oh nah ngehn saut kan nanleng oh irehdi irail nin sampah. (Kaud. 12:7-9) Mwuhr, nin duwen sapwellimen Siohwa “meninkeder” en inowo, Sises oh Semeo ketido pwe ira en ketin dawih koasoandi ong kaudok min me kin karasahiong tehnpas sarawi. (Mal. 3:1) Sises ketin kadeikada pelien lamalam en Kristian likamw kan, kisehn “Papilon, . . . lapalapo” me keieu suwed, ni eh ketin diar reh dipen kakerehdi nta oh pil diar me e kasaminehla pein ih ni eh kin ehuong pali en politik en sampah wet.—Kaud. 18:2, 3, 24.
Krais Ketin Kamwakelehda Sapwellime Ladu nin Sampah
3, 4. (a) Doadoahk dahieu me Krais ketin kapwaiada nin duwen sapwellimen Siohwa “meninkeder”? (b) Dahme dou en tehnpas sarawio kin kasalehda? Nin duwen Tapwin mwomwohdiso, idihdida dahieu me Sises ketin wia?
3 Dou me Siohwa oh sapwellime “meninkeder” ketin wia pil kasalehda me mie pwihn en Kristian mehlel kan nan kelen masloalen tehnpas sarawio. Irail kaidehn kisehn pelien lamalam en Kristian likamw kan. Ahpw, irail Kristian keidi pwukat, de “samworo kan,” pil anahne kamwakelada. Nin duwen soukohp Malakai kohpadahr: “E [Siohwa] pahn ketidohn wia kopwung, rasehng me kin inim oh kamwakelehda silper. Sapwellimen KAUN-O meninkeder pahn ketin kamwakelehda samworo kan, duwehte souninim mete eh kin kamwakelehda silper oh kohl. Eri, re ahpw pahn wadohng KAUN-O soangen meirong me konehng.” (Mal. 3:3) Siohwa ketin doadoahngki Krais Sises me iei sapwellime “meninkeder” en inowo, pwe en kamwakelehda irail me wia Israel en Koht.
4 Ahpw, Krais ketin diarada me Kristian keidi lelepek pwukat kin wia uwen arail kak en kihong kisehrail kan me pwoson padahk mehlel en Paipel me duwehte mwenge ni ahnsou me konehng. Sang pahr 1879 lel met, sohte lipilipil ahnsou mwahu de soh, re kin wiahda makasihn wet me kin kasalehda padahk mehlel en Paipel me pid duwen Wehin Koht. Sises ketin kohpadahr me “ni eh pahn pwurodohng” dawih sapwellime ladu kan erein “kaimwiseklahn koasoandi en mehkan,” e pahn ketin diar ladu meno me kin nehkohng irail “arail kisin tungoal ni ahnsou me konehng.” E pahn mahsanih laduwo me meid pai oh pahn ketin kasapwilada ih “pwe en kaunda sapwellime dipwisou kan koaros” nin sampah. (Mad. 24:3, NW; Luk 12:42-44) Nin duwen Tapwin mwomwohdisohn Kristian, Krais ketin doadoahngki “ladu lelepek oh loalokong” pwe en apwalih soahng koaros me pid Wehio nin sampah. E ketikihong “ladu kan” me keidi oh iengerail “sihpw teikan” kaweid kan sang ni eh ketin doadoahngki Pwihn me kin apwalih mwomwohdiso nan sampah pwon.—Sohn 10:16, NW.
Ahnsoun Dolung nin Sampah
5. Dahme Sohn kilangada nan kaudiahlo me Nanmwarkien Mesaiao pahn ketin wia?
5 Wahnpoaron Sohn kilangada kaudiahl ehu me Nanmwarkien Mesaia pahn pil wia ni “rahnen Kaun-o,” mwurin Eh wiahla nanmwarki nan pahr 1914. Sohn ntingihedi: “I ahpw kilangada pelien depwek pwetepwet pali, oh powe likamw aramas emen me mwomwohd ie, me nihnkihda nihn kohl ehu oh naipokos keng pwoat mi nin lime.” (Kaud. 1:10; 14:14) Sohn rongada sapwellimen Siohwa tohnlengo padahkihong Soundolung rahko en doadoahngki sapwellime naipokoso “pwe rahno leledohr; . . . ahnsou mwahu en dolung wahnsahpw nin sampah!”—Kaud. 14:15, 16.
6. Dahme pahn wiawi nan mwahto lao lel mwohn ahnsoun rahk?
6 “Ahnsou mwahu en dolung wahnsahpw nin sampah” wet kin katamankin kitail sapwellimen Sises karasaras duwen kisin tuhke mwahu oh dihpw suwed kan. Sises kin ketin wiahkin ih duwehte ohl emen me kin kamwerehdi nan eh mwahto war mwahu oh kin kasikasik en dolung wah mwahu tohto. Wah mwahu pwukat kin karasahiong “aramas akan me towedahr Wehin Koht,” me iei Kristian keidi mehlel kan me pahn iang ih nan sapwellime Wehi. Ahpw nipwongo, imwintihti men, “Tepil,” kamwerehdi nanpwungen war mwahu ko weren dihpw suwed kan, me iei “aramas akan me iengen Sehdan.” Sounkamwarako padahkihong nah tohndoadoahk kan en mweidohng kisin tuhke mwahu ko en iangete dihpw suwed ko kekeirda lao lel ahnsoun rahk, ni kaimwiseklahn koasoandi en mehkan. Ni ahnsowo, e pahn poaronehdo sapwellime tohnleng kan pwe ren katohrepeseng kisin tuhke mwahu ko sang dihpw suwed ko.—Mad. 13:24-30, 36-41.
7. Ia duwen Krais eh ketin apwalih doadoahk en “ahnsou mwahu en dolung wahnsahpw nin sampah”?
7 Nin duwen pweidahn kaudiahl me Sohn kilangada, Sises ketin apwahpwalih doadoahk en rahket nin sampah pwon. “Ahnsou mwahu en dolung wahnsahpw nin sampah” tepikihda rikirikpene en luhwen meh 144,000 kan, “aramas akan me towedahr Wehin Koht,” irail “kisin tuhke mwahu ko” nan sapwellimen Sises karasaras. Wekpeseng en irail Kristian mehlel kan oh Kristian likamw kan kin uhdahn sansalda mwurin Mahwen Keieun Sampah. Met kahrehda keriaun “ahnsou mwahu en dolung wahnsahpw nin sampah,” me wehwehki rikirikpene en sihpw teikan, en wiawi. Irail pwukat kaidehn “aramas akan me towedahr Wehin Koht,” ahpw irail iei pokon kalaimwun me kin perenki mi pahn kaundahn Wehio. Irail kohsang “wehi koaros, ni kadaudok koaros, nan sahpw koaros, oh lokaia koaros.” Irail kin uhpah Wehin Mesaia, me wiawihkihda Sises Krais oh 144,000, “aramas akan” me pahn iang ih kakaun koperment en nanleng.—Kaud. 7:9, 10; Dan. 7:13, 14, 18.
Kakaun Mwomwohdiso kan
8, 9. (a) Dahme kin kasalehda me Krais kin ketin tetehk kaidehn ihte wiewiahn ehuehu mwomwohdiso, ahpw pil emenemen tohnmwomwohdiso oh arail mour? (b) Nin duwen me kawehwehda nan pali 29, “soahng rir kan en Sehdan” dah kan me kitail anahne liksang?
8 Kitail sukuhlkier nan iren onop en mwoweo duwen Krais eh ketin tetehk mwahu irair en ehuehu mwomwohdiso ni mwehin wahnpoaron ko. Nan atail ahnsou, nin duwen Nanmwarki men me mweimweiongehr “manaman koaros en nanleng oh sampah,” Krais atail Kaun kin ketin kakaun mwomwohdiso kan nan sampah pwon oh pil sounapwalih en mwomwohdiso kan. (Mad. 28:18; Kol. 1:18) Siohwa ketin kasapwilada ih “en wiahla Kaunen mehkoaros oh tapwin mwomwohdiso” en keidi kan. (Ep. 1:22) Nin duwen tapwin mwomwohdiso, e kin ketin mwahngih soahng koaros me kin wiawi nan ehuehu mwomwohdiso en Sounkadehdehn Siohwa kan me daulih lopw (100,000).
9 Sises mahsanihong mwomwohdisohn Daiadaira: “Iet mahsen sang rehn Sapwellimen Kohto, me silangi rasehng mpwulen kisiniei . . . I ese omw wiewia kan.” (Kaud. 2:18, 19) E ketin panawihekin tohnmwomwohdiso kan arail tiahk suwed oh arail mour saledek ong nsenarail ni eh mahsanih: “Ngehi ih me kin iroirong nan kapehd en aramas akan oh ar lamalam akan, oh me kin katingih emenemen kumwail nin duwen eh wiewia kan.” (Kaud. 2:23) Mahsen pwukat kin kasalehda me Krais kin ketin tetehk kaidehn ihte wiewia kan en ehuehu mwomwohdiso ahpw pil emenemen towe kan oh arail mour. Sises kin ketin kapinga Kristian akan nan Daiadaira me “sohte iang padahngki me re kin kahdaneki ‘soahng rir kan en Sehdan.’” (Kaud. 2:24) Rahnwet, e kin pil kupwurkin irail akan, me pwulopwul oh mah, me sohte men ese duwen “soahng rir kan en Sehdan” sang nan Internet de video game me kin kasalehda tiahk lemei de pil sohte men ahneki madamadau en aramas akan me kin saledek ong soahng koaros. Ia uwen eh ketin kupwurperenki kilang Kristian tohto me kin nantihong oh pil wiahda tounmetei kan pwe ren wia uwen arail kak en idawehn sapwellime kaweid ni soahng koaros nan arail mour!
10. Ia duwen sapwellimen Krais kaweid ong elder kan en mwomwohdiso eh kin karasahda? Ahpw dahme irail anahne pohnese?
10 Krais kin ketin apwalih mwahu sapwellime mwomwohdiso kan nin sampah ni eh ketin doadoahngki elder idihdida kan. (Ep. 4:8, 11, 12) Ni mwehin wahnpoaron ko, sounapwalih kan koaros keidi kei. Pwuhken Kaudiahl kin kawehwe duwen irail nin duwen usu kan nin limen Krais palimaun. (Kaud. 1:16, 20) Rahnwet, pali laud en elder kan nan mwomwohdiso wia sihpw teikan. Re kin idihdida mwurin kapakap oh sapwellimen Koht manaman me kin kaweid idihdida wet, eri kitail kak nda me irail pil mi pahn kaweid en Krais. (Wiewia 20:28) Irail kin pohnese me Krais kin ketin doadoahngki kisin pwihn en Kristian keidi kan me wia Pwihn me kin apwalih mwomwohdiso nan sampah pwon pwe en kaweid sapwellime tohnpadahk kan nin sampah.—Wadek Wiewia 15:6, 28-30.
“Kaun Sises, Komw Ketidohla!”
11. Dahme kahrehda kitail kin men kilang atail Kaun en mwadang ketido?
11 Nan kaudiahl me wahnpoaron Sohn kilangada, ekei pak Sises kin mahsanih me e pahn mwadang ketido. (Kaud. 2:16; 3:11; 22:7, 20) Ni mehlel, eh mahsen kin dokedoke eh pahn ketido pwe en kadeikada Papilon Lapalap oh koasoandi suwed koaros en Sehdan. (2 Des. 1:7, 8) Pwehki e men kilang pweidahn mwekid kaselel pwukat koaros me kokohpdahr, Sohn me mahlahr nda: “Eri, en pweida. Kaun Sises, komw ketidohla!” Kitail me kin momour nan imwin koasoandi suwed wet pil kin men kilang atail Kaun oh Nanmwarki en Wehio ketido pwe en kasarawihala mwaren Semeo oh pil kadehdehda sapwellimen Siohwa pwuhng en kaunda mehkoaros.
12. Doadoahk dahieu me Krais pahn ketin kanekehla mwohn tohnleng pahmeno pahn kadarala ahng pahieu ko?
12 Mwohn Sises eh pahn ketin kasohrala en Sehdan pwihn sansal, kileldi en me keieu ikmwuri en towe kan en 144,000 en Israel en Koht pahn wiawi. Paipel kasalehda ni sansal me tohnleng pahmeno sohte pahn kadarala ahng pahieu ko me pahn kasorehla koasoandi en Sehdan lao kileldi en irail 144,000 kan koaros pahn imwisekla.—Kaud. 7:1-4.
13. Ia duwen Krais eh pahn ketin kasansalehda me e ketier erein tepidahn “kahn kamakam kowahlap”?
13 Pali laud en tohnsampah sohte kin tetehk me Krais ketier sang pahr 1914. (2 Pit. 3:3, 4) Ahpw kereniong Sises pahn ketin kasansalehda me e ketier sang ni eh pahn kapwaiada sapwellimen Siohwa kadeik ong soangsoangen pali kan en ahn Sehdan koasoandi. Kasohrlahn “Aramas Suwedo,” me iei pelien lamalam kan en Kristian likamw kan, pahn wia kasalepe sansal me e ketier. (Wadek 2 Deselonika 2:3, 8.) Met pahn uhdahn kadehdehda me Krais patohwan wiewia eh pwukoahn Sounkopwung me Siohwa ketikihong ih. (Wadek 2 Timoty 4:1.) Kamwomwomwlahn pelien lamalam en Kristian likamw akan me keieu suwed en Papilon Lapalap, pahn wiawi mwohn kasohrala douluhl en pelien lamalam likamw koaros en sampah. Siohwa pahn ketin audehkihda nan mohngiong en kaun en politik kan ren kasorehla lih en netiki paliwere menet. (Kaud. 17:15-18) Iei met me pahn tepin wiawi nan “kahn kamakam kowahlap.”—Mad. 24:21, NW.
14. (a) Dahme kahrehda rahn akan en kahn kamakam kowahlapo ar pahn kamalaulaula? (b) Ia wehwehn “kilel en Nein-Aramas” ong sapwellimen Siohwa aramas akan?
14 Sises mahsanih me rahn akan en kahn kamakam kowahlapo pahn kamalaulaula “pwehki sapwellime me pilipil kan,” me iei irail luhwen Kristian keidi kan me mihmihte sampah. (Mad. 24:22) Siohwa sohte pahn ketin mweidohng kamwomwalahn pelien lamalam likamw kan en kasohrala Kristian keidi kan oh iengerail sihpw teikan. Sises pil mahsanih me mwurin rahn akan en kahn kamakam kowahlapo, e pahn mie kilel kan ni ketipin, maram, oh usu kan, oh “kilel en Nein-Aramas pahn pwarada pahnlahng.” Met pahn kahrehiong wehi kan en sampah ar pahn “sengiseng.” Ahpw met sohte pahn wiawi rehn me keidi kan, me kin ahneki koapworopwor en nanleng, oh pil iengerail kan me kin ahneki koapworopwor en mour nin sampah. Re pahn ‘uhda oh sarada, pwe komourparail kerendohr.’—Mad. 24:29, 30; Luk 21:25-28.
15. Dahme Sises pahn ketin wia ni ahnsou me e pahn ketido?
15 Mwohn eh pahn ketin kalowehdi eh imwintihti kan, Nein-Aramas pahn pil ketido ni ehu ahl tohrohr. E ketin kohpada: “Nein-Aramas lao pahn ketido duwen nanmwarki men, iangahki sapwellime tohnleng kan koaruhsie, e pahn ket nan sapwellime mwoalen kadeik lingan; oh tohn sampah koaruhsie pahn pokonpene mwowe. E ahpw pahn ketin irepeseng irail ni pwihn riau, duwehte silepen sihpw men me kin katohrepeseng nah sihpw kan sang kuht kan: e pahn kihla aramas pwung kan ni palimauni, a meteikan ni palimeingi.” (Mad. 25:31-33) Met kin dokedoke ketido en Krais nin duwen Sounkopwung men pwe en ketin katohrepeseng “tohn sampah koaruhsie” ni pwihn riau: “sihpw kan,” irail kan me kasalehda arail kin utung rie kan (Kristian keidi kan nin sampah) oh “kuht kan,” irail kan me “sohte kin peikiong Rongamwahu en Kaun Sises.” (2 Des. 1:7, 8) Sihpw kan, me iei “aramas pwung kan,” pahn ale “mour soutuk” nin sampah, ahpw kuht kan pahn kolahng kasohrala soutuk.—Mad. 25:34, 40, 41, 45, 46.
Sises Ketin Kalowehdi Eh Imwintihti kan
16. Ia duwen Krais atail Kaun eh ketin kalowehdi eh imwintihti kan?
16 Mwurin koaros ienge nanmwarki-samworo kan pahn kileldi oh sihpw teikan ar pahn sansalda oh mihla ni palimauni pwe en komourla, Krais kakehr kohkohla, kolahng “kalowehdi eh imwintihti kan.” (Kaud. 5:9, 10; 6:2) Nin duwen kaunen karis en tohnleng manaman kan oh pil rie me kaiasadahr kan, e pahn ketin kasohrehla en Sehdan koasoandi koaros en pelien politik, sounpei kan, oh pil pesines nin sampah. (Kaud. 2:26, 27; 19:11-21) Krais eh ketin kalowehdi eh imwintihti kan pahn imwisekla ahnsou me e pahn ketin kasohrehla koasoandi suwed en Sehdan. Mwuhr, e pahn ketin salihedi Sehdan oh nah ngehn saut kan nan pwoahr loal me soh kapi erein sounpar kid.—Kaud. 20:1-3.
17. Erein Kaundahn Pahr Kido, Krais pahn ketin kahluwalahng sapwellime sihpw teikan ong dah? Dahme kitail anahne koasoanehdi teng en wia?
17 Ni eh koasoia duwen pokon kalaimwun en sihpw teikan me pahn pitsang kahn kamakam kowahlapo, wahnpoaron Sohn kohpada me “Sihmpwulo, me mi nanwerengen mwoalo, pahn wialahr sileparail, oh ih me pahn kin kahluwairaillahng ni pilen komour.” (Kaud. 7:9, 17) Ei, erein Kaundahn Pahr Kido, Krais pahn pousehlahte ketin kaweid sihpw teikan, me kin rong ngileo, oh pahn kahluwairaillahng mour soutuk. (Wadek Sohn 10:16, 26-28.) Kitail anahne koasoanehdi teng en lelepek idawehn atail Kaun nanmwarki ahnsou wet oh lella nan sapwellimen Siohwa sampah kapw me e ketin inoukihda!
Kousapahl
• Dahme Krais ketin wia mwurin eh nanmwarkihla?
• Ihs me Krais ketin doadoahngki nin sampah pwe en kaweid mwomwohdiso kan?
• Ni ahl tohrohr dah kan me Krais atail Kaun eh pil pahn ketido?
• Ia duwen Krais eh pahn pousehlahte ketin kahluwa kitail nan sampah kapw?
[Peidek en Onop]
[Kilel nan pali 31]
Kasohrlahn koasoandi suwed en Sehdan pahn kasansalehda ketier en Krais