Sewese Me Pwulopwul kan en Wehwehkihla Sapwellimen Siohwa Pwihn

SERI kan kin men ese soahng kan. Medewehla peidek kan me seri en Israel kan nan Isip mwein kin men idek pwohng me tepin Pahsohpa wiawi: ‘Dahme kahrehda sihmpwulo anahne kamakamala?’ Dahme kahrehda pahpa iriski nta ni uhr en wenihmwo?’ ‘Kitail pahn kohla ia?’ Dahme Siohwa ketin kehkehlikihong pahpa kan en Israel kin kasalehda me e kupwurki soangen peidek pwukat. Siohwa ketin padahkihong irail met duwen Pahsohpa kan en ahnsou kohkohdo: “Ni noumwail seri kan ar pahn idek rehmwail, ‘Ia wehwehn tiahk wet?’ Kumwail pahn sapeng, nda, ‘Met atail meirong en Pahsohpa ong KAUN-O, pwehki eh ketin douluhlsang imwen mehn Israel kan nan Isip ahnsou me e ketin kalokehki mehla mehn Isip ko, e ahpw ketin kupwureikitailla.’” (Eks. 12:24-27) Mwuri, Siohwa ketin katamankihong pahpa oh nohno kan en Israel kesempwalpen sapengla peidek kan en neirail seri kan duwen “kosonned” kan me Siohwa ketikihong irail.—Deud. 6:20-25.

E sansal me Siohwa kupwurki seri kan en  alehdi pasapengpen arail peidek kan duwen kaudok mehlel me pahn kamwakid irail en poakohng Siohwa nin duwen arail Koht oh Sounkomour. Rahnwet Siohwa pil kin kupwurki soahngohte ong neitail me pwulopwul kan. Iet ehu ahl me pahpa oh nohno kan kak sewese neirail seri kan en kakairada arail limpoak ong Koht oh sapwellime aramas akan sang nan arail mohngiong. Irail en sewese seri kan en esehla sapwellimen Siohwa pwihn oh wehwehki ia duwen arail pahn paiekihda dahme pwihn wet kin wiahiong kitail. Eri kitail tehkpene ekei ahl me kitail kak seweseki neitail me pwulopwul kan en esehla oaritik kan duwen pwihn wet.

Amwail Mwomwohdiso

Me pwulopwul kan anahne esehla mwomwohdiso me amwail peneinei kin iang. Pwehn kak wia met, kumwail anahne wahla noumwail seri kan ni mihting kan en Kristian koaros. Ni ahl wet, kumwail kin idawehn koasoandi me Siohwa ketikihong mehn Israel kan ni eh mahsanih: “Kapokonepene aramas akan koaros, ohl, lih, seri, . . . pwe re en rong oh esehla duwen ar pahn lemmwiki KAUN-O, amwail Koht, oh loalopwoatohng kapwaiada sapwellime padahk kan.”—Deud. 31:12, 13.

Sangete ni en seri kan ar pwelel re kak tepida esehla duwen Mahsen en Siohwa. Iet me wahnpoaron Pohl koasoia duwen Timoty: “Sang ni omw kisin seri [“seri pwelel,” NW] ke pil kin ese Pwuhk Sarawi.” (2 Tim. 3:15) Nan mihting kan ni Wasahn Kaudok, pil kisin seri kan kin tepidahr wehwehkihla ire kan me kin pwarada oh esehla koul kan. Wasao, irail kin esehla doadoahngki oh wauneki Paipel oh sawaspen Paipel kan. Irail pahn pil kilang irair ehu me kin kasalehda duwen sapwellimen Sises tohnpadahk mehlel kan me iei limpoak mehlel. Sises mahsanih: “I pahn kihong kumwail kosonned kapw  ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Limpoak oh nsenamwahu mehlel me kin sansalda nan Wasahn Kaudok pahn kamwakid seri kan oh sewese irail en wiahkihla mihting kan kisehn arail mour.

Ni omw pahn wiahkihla tiahk ehu en mwadang lella ni Wasahn Kaudok oh mihmi ekis mwurin mihting kan, noumw seri kan pahn kak kompoakepahnkihla meteikan. Ke sou kahrehdo irail en tuhwong riatail kan sohte lipilipil ia arail sounpar ah kaidehn ren ieiangete seri teikan? Ma irail esehla me mah kan, re pahn diarada me irail me mah kan ese soahng tohto oh re me erpit. Sekaraia wia “sounkaweid” men me kin lemmwiki Koht mehlel oh sewese laud Usaia me wia nanmwarki pwulopwul en Suda. Pil rahnwet irail me kin papah Siohwa ni lelepek erein ahnsou reirei kin kamwakid me pwulopwul kan. (2 Kron. 26:1, 4, 5) Nan Wasahn Kaudok, ke pil kak kawehwehiong seri kan duwen library, wasa me pakair kan kin kohda ie oh pil soahng teikan.

 Sapwellimen Siohwa Pwihn nan Sampah Pwon

Seri kan anahne wehwehki me amwail mwomwohdiso iei kisehn pwihn ehu nan sampah pwon me wiawihkihda mwomwohdiso tohtohsang 100,000. Kawehwehiong irail soahng kan me pid duwen pwihn wet, ia duwen eh kin doadoahk oh dahme seri kan kak wia pwehn utung eh doadoahk. Padahkihong irail dahme kahrehda ke kin kasikasik ahnsoun mihting tohrohr kan oh ni en sounapwalih me kin seiloak eh kin mwemweitdo rehmwail.—Kilang kakon “Iren Onop kan ni Ahnsoun Kaudok en Peneinei,” pali 31.

Ma kak, luke sounapwalih me kin seiloak, misineri kan, tohn Pedel kan oh irail me kin doadoahngki pali laud en arail ahnsou en papah Siohwa en iang kumwail mwenge. Dehr medewe me sohte arail ahnsou ong me pwulopwul kan. Irail kin nantihong en kahlemengih Sises, me kin ahnsou koaros kasamwohdo seri kan oh koasoiong irail. (Mark 10:13-16) En rong ia duwen irail pwukat ar kin papah Siohwa oh kilang arail peren nan arail doadoahk pahn kak sewese noumw seri kan en akadeiong doadoahngki pali laud en arail ahnsou en papah Siohwa.

Pil dah me ke kak wia nin duwen peneinei ehu pwehn sewese noumwail seri kan en esehla duwen sapwellimen Siohwa pwihn? Iet ekei soahng kan: Wiahda kisin koasoandi kan ong peneinei pwehn wadek duwen riatail kan me kin papah Siohwa nan sawaspen Paipel kan. Kasalehda duwen ladu en Siohwa pwukat ar kin kasalehda ar poadidi, aktikitik oh lelepek. Kasalehda ia duwen Siohwa eh kin ketin doadoahngki irail pwehn kalohkiseli rongamwahwo nin sampah pwon. Doadoahngki video kan me sapwellimen Siohwa pwihn kin wiahda pwehn kasalehda ire kesempwal kan sang mahs oh pil ni ahnsouwet. Ma kak, mwemweitla ni ohpis kan en pwihn wet oh ni Pedel me mi amwail wasa de pil nan sahpw teikan. Soangen mwemweit pwukat pahn sewese noumwail seri kan en kilang ia duwen sapwellimen Siohwa pwihn nin sampah me mi pahn kaweid en ladu lelepek oh loalokong eh kin soandi mwahu. Re kak kilang eh kin kihda padahk mehlel en Paipel oh kaweid kan ong riatail kan nin sampah pwon duwehte eh kin wia ni mwehin tepin Kristian akan.—Mad. 24:45-47; Wiewia 15:22-31.

Padahkih Serio ni Uwe me Konehng

Ni omw pahn kasukuhlih noumw seri kan, taman mwomwen en Sises eh kin ketin padahkih wahnpoaron ako. E ketin padahkihong irail ehu ahnsowo: “Mie me tohto me I men ndaiong kumwail, ahpw met me inenen apwal ong kumwail en wehwehki.” (Sohn 16:12) Sises sohte ketin wiahkinteieu padahkihong sapwellime tohnpadahk kan soahng tohto. Ekisekis, e ketin padahkihong irail padahk mehlel kan pwe ren kak wehwehki ni pwung. Duwehte met, dehr wiahkinteieu padahkihong noumw seri kan soahng tohto. Ni omw pahn kaukaule ekisekis padahkihong irail duwen sapwellimen Siohwa pwihn, re pahn perenkihte suksukuhlki soahng kan me pid duwen mwomwohdisohn Kristian. Eri, ni arail wie kekeirda, ke kak kalaudehla dahme re sukuhlkiher.

Mwomwohdisohn Kristian wia mehkot kesempwal pwe atail nanpwungmwahu rehn Siohwa en kehlail. Irail me pwulopwul kan me kin ngoangki iang wia koasoandi kan en mwomwohdiso kin kak pweida mwahu ni arail kin soikala mehkan en ahn Sehdan sampah wet. (Rom 12:2) Se kamehlele me ke pahn diar peren ni omw sewese noumw seri kan en esehla duwen sapwellimen Siohwa pwihn. Se koapworopworki me re pahn lelepek ong pwihn wet oh ong Koht limpoak me kitail kin papah pwehki sapwellime kapai kan.

[Koakon/​Kilel nan pali 31]

Iren Onop kan ni Ahnsoun Kaudok en Peneinei

Iet ekei ire kan me pid duwen sapwellimen Siohwa pwihn me ke kak onopki ni ahnsoun Kaudok en Peneinei ni soutuk.

▪ Koasoia duwen poadopoad en amwail mwomwohdiso. Iahd oh ia duwen eh tepida? Wasahn Kaudok depe me amwail mwomwohdiso doadoahngki? Ke sou luke emen tohnmwomwohdiso me iang mwomwohdiso ahnsou reirei pwehn sapengla peidek kan en noumw seri kan?

▪ Kawehwehda kahrepen soangsoangen mihting kan en mwomwohdiso iangahki mihting tohrohr kan oh ia duwen seri kan ar kak paiekihda.

▪ Koasoia duwen kahrepen soangsoangen sukuhl kan me sapwellimen Siohwa pwihn kin wiahda. Kasalehda soahng mwahu kan me kin pweida sang rehn irail kan me kesepwil sang sukuhl pwukat.

▪ Sewese me pwulopwul kan en kilang kesempwalpen wiahla sounkalohk kaukaule men en rongamwahwo. Kasalehiong irail ia duwen arail kak iang sawas ong ripoht en sampah pwon me kin pwarada nan neitail Pwuhken Pahr (Yearbook of Jehovah’s Witnesses).

▪ Koasoia duwen elen papah kan me mie ong me pwulopwul kan pwehn doadoahngki pali laud en ar ahnsou en papah Siohwa. Atail Doadoahk en Wehio nan March 2007, pali 4 lel 6, kin kihda ire mwahu kei.

▪ Sewese me pwulopwul kan en wehwehki dahme kahrehda mie ekei koasoandi kan me mwomwohdiso anahne idawehn. Kawehwehda dahme kahrehda ren dehr uhtohrda sang pwihn en Siohwa mehnda ma ni soahng tikitik kan. Kasalehiong irail ia duwen ar kak sawas ong soandi mwahu en mwomwohdiso ni ar kin idawehn kaweid en elder kan.

[Kilel nan pali 30]

Duwehte mehn Israel en mahs, pahpa oh nohno kan rahnwet kin nantihong sapengla peidek kan duwen sapwellimen Siohwa pwihn

[Kilel kan nan pali 31]

Seri kan pahn paiekihda ar werekiong irail me kin papah Siohwa erein ahnsou reirei