Kitail en Kekeidki Atail Lelepek!
Kitail en Kekeidki Atail Lelepek!
“A duwen ngehi, I kin wia dahme pwung.”—MEL. 26:11.
1, 2. Dahme Sohp koasoia duwen eh lelepek? Dahme Sohp irelaud 31 kasalehda duwen ih?
MAHSIE, aramas akan kin tenekih dipwisou de soahng teikan pohn mehn tenek. Mehn tenek kin wiawihkihda lepin tuhke pwoat, de mete, me kin pangapangpeseng pohn ehu mete me kin kolada nan werengeo. Dahl riau kin langalang ni imwi riau en tuhkeo. Dipwisou me re tenekih pahn mi nan ehu dahl, ah paun ko pahn mi nan ehu dahl. Sapwellimen Koht aramas akan anahne doadoahngki mehn tenek pwung.—Lep. Pad. 11:1.
2 Ni ahnsou me ohl mwahu Sohp, me kin kapwaiada sapwellimen Koht kosonned kan, lelohng lokolok pahn Sehdan, e nda: “[Siohwa] en ketin tenekih ie ni sapwellime mehn tenek en pwuhng, e ahpw pahn ketin mwahngih uwen ei mwakelekel [“lelepek,” NW].” (Sohp 31:6) Sohp koasoiahda soangen irair kei me kak kasonge irail kan me kin kolokol arail lelepek. Ahpw Sohp powehdi kasongosong kan, nin duwen me sansal nan eh koasoi kan nan pwuhken Sohp irelaud 31. Eh mehn kahlemeng mwahu ele kak kamwakid kitail en pil wia duwehte oh nda ni mehlel, duwehte me sounmelkahkao Depit koasoia: “A duwen ngehi, I kin wia dahme pwung.”—Mel. 26:11.
3. Dahme kahrehda e kesempwal en loalopwoatohng Koht ni mehkan me laud oh tikitik?
3 Mendahki Sohp lelohng lokolok laud, e kin kolokolte eh lelepek ong Koht. Ekei ele kin nda me eh lelohng songosong laud oh pil eh lelepek mehlel kin wia mehn kahlemeng inenen kaselel ehu. Kitail sohte kin lokolok duwehte Sohp. Ahpw kitail anahne loalopwoatohng Koht ni mehkan me laud oh tikitik ma kitail men kakehlaka atail kin kolokol lelepek oh kin utung sapwellime kaunda.—Wadek Luk 16:10.
Kesempwalpen Lelepek nan Atail Tiahk
4, 5. Nin duwen emen me kin kolokol eh lelepek, soangen tiahk dah me Sohp kin soikala?
4 Pwe en kolokol atail lelepek ong Siohwa, kitail anahne tengediong sapwellime koasoandi kan duwen dahme pwung oh sapwung, duwehte me Sohp kin wia. E koasoia: “I wiadahr inou lapalap ehu: I en dehr kin kangkakil serepein men ni ineng suwed. . . . Ma poakepen en mehn mpei eh pwoud kaloweiedier, oh ma I rukula, awih pahn wenihmwen imwe, eri, ei pwoud en kin kaunopada mwenge ong emen ohl tohrohr, oh pil wendi mpe.”—Sohp 31:1, 9, 10.
5 Sohp kin tengediong kolokol eh lelepek ong Koht oh soikala kangkakil lih emen pwe en inangihada liho. Nin duwen ohl pwopwoud men, e sohte kin pwangih lih emen me sohte pwopwoud de rapahki en mwahukihda en emen ohl eh pwoud. Nan sapwellime Kapahrek en Pohn Dohl, Sises ketikihda kaweid kehlail ehu me pid duwen nanpwungen ohl oh lih, kaweid ehu me irail me kin kolokol arail lelepek kan anahne tamataman.—Wadek Madiu 5:27, 28.
Dehr Doadoahngki Elen Widing
6, 7. (a) Dahme Koht ketin doadoahngki pwe en mahsanih ma kitail kin kolokol atail lelepek, duwehte e ketin wiahiong Sohp? (b) Dahme kahrehda kitail en dehr wia aramas widing de pitiniau?
6 Ma kitail men wia emen me kin kolokol eh lelepek, kitail sohte kak doadoahngki elen widing kan. (Wadek Melkahka kan 5:6.) Sohp koasoia: “I kak kahukihla me soh mwahn sapwung laud ehu I wiahda, I soh mwahn song en pitihedi meteikan. Koht en ketin tenekih ie ni sapwellime mehn tenek en pwuhng, e ahpw pahn ketin mwahngih uwen ei mwakelekel [“lelepek,” NW].” (Sohp 31:5, 6) Siohwa pahn ketin tenekih aramas koaros ni sapwellime “mehn tenek en pwuhng.” Duwehte dahme wiawiong Sohp, Koht ketin doadoahngki sapwellime irair unsek en pwung pahrek pwe en mahsanih ma kitail kin kolokol atail lelepek.
7 Ma kitail wiahla aramas widing de pitiniau men, kitail solahr pahn kolokol atail lelepek ong Koht. Irail kan me kolokol arail lelepek kin ‘soikeweisang rehrail soangen tiahk rir oh kanamenek koaros’ oh sohte kin “widinge aramas akan.” (2 Kor. 4:1, 2) Ahpw ia duwen ma atail koasoi de wiewia kan kin widing oh kahrehiong emen iengetail nan pwoson en peki sawas sang rehn Koht? Met pahn imwila suwed ong kitail. Sounmelkahkao koulki: “Ni ei mihla nan apwal, I ahpw patohwan likweriong KAUN-O, e ahpw ketin sapeng ie. Maing KAUN, komw ketin doareiesang aramas likamw oh widing kan.” (Mel. 120:1, 2) E mwahu en tamataman me Koht kak ketin kasawih loalen aramas akan, e ‘kin ketin wia kadeikpen ar tungoal lamalam akan oh ar tungoal ineng kan.’—Mel. 7:8, 9.
Wia Kahlemeng Mwahu ni Omw Ehuong Meteikan
8. Ia mwomwen en Sohp wiewia ong meteikan?
8 Pwe en kin kolokol atail lelepek, kitail anahne duwehte Sohp me kin aktikitik oh nsenohki meteikan. E koasoia: “Ahnsou me emen ei ladu kan kin kaulime ie, I pahn kin rong oh wie me mwahu ong. Pwe ma soh, ia duwen ei pahn uh mwohn silangin Koht? Dahme I pahn kak sapengki Koht ni eh pahn ketidohn kadeikiehda? Pwe pein Kohtohte me ketin wiaiehda, iei ih me pil ketin wiahda ei ladu kan.”—Sohp 31:13-15.
9. Soangen irair dah kan me Sohp kin kasalehda rehn nah ladu kan? Ia mwomwen atail wiewia me pid duwen met?
9 E sansal me ni mwehin Sohp, repenpwung sohte kin wia mehkot apwal. Repenpwung kin wiawi ni soandi mwahu, oh ladu kan pil kin kak wia arail repenpwung. Sohp kin pwung pahrek oh mahkohng nah ladu kan. Ma kitail kin kekeid ni lelepek, kitail anahne kasalehda soangen irair pwukat, mehlel ma kitail kin wia elder kan nan mwomwohdisohn Kristian.
Kadeksapan oh Sohte Noahrok
10, 11. (a) Ia duwen atail ese me Sohp kin sapan oh sewese meteikan? (b) Mehnia kaweid en Paipel me Sohp 31:16-25 ele kin katamankin kitail?
10 Sohp kin sapan oh sewese meteikan. E sohte kin roporop oh noahrok. E nda: “I sohte mwahn kauwehla koapworopwor en liohdi men, oh sohte sepwoupwou men me duhpekla nindokon ei reken mwenge. . . . Ni ei kin diar emen nan eh anahn laud pwehki eh nohn semwehmwe oh sohte kak pwainda eh likou, I kin kihong likou . . . Ma I pitihedi me sepwoupwou men, pwehki ei ese me ngehi me adamwahu ni mwoalen kopwung, eri, pehi kat en rihsekpeseng, pwopweiet en dapengeksang nan dewe.” Sohp sohte pahn kin kolokol eh lelepek ma e pahn “kin koapworopworki dipwisou kan.”—Sohp 31:16-25.
11 Lepin koasoi kaselel pwukat ele kin katamankin kitail dahme tohnpadahk Seims koasoia: “Eri, iet duwen poadidi ong papah Koht me uhdahn pwung oh unsek mehlelen, me Samatail Koht kin ketin kupwurki: apwalih me sepwoupwou kan oh liohdi kan nan ar apwal akan, oh dehr saminkihla tiahk suwed kan en sampah wet.” (Seims 1:27) Ele kitail pil pahn tamanda sapwellimen Sises kehkehlik: “Kumwail kalekeikumwailsang noahrok suwed koaros, pwe mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.” Sises eri ketikihda karasaras en ohl kepwehpwe me noahrok ahpw ni eh mehla e “semwehmwe mwohn silangin Koht.” (Luk 12:15-21) Pwe en kin kolokol atail lelepek, kitail en dehr lohdiong nan dipen noahrok. Noahrok iei kaudokiong dikedik en eni, pwehki mehkan me aramas noahrok men kin inengieng ahneki kin kahrehiong ih en kesempwalki soahng pwukat laudsang papah Siohwa. (Kol. 3:5) Lelepek oh noahrok sohte kin ehupene!
Kolokol Teng Kaudok Mehlel
12, 13. Sohp kihda mehn kahlemeng dahieu en soikala kaudokiong dikedik en eni?
12 Irail akan me kin kolokol arail lelepek sohte kin wetsang kaudok min. Sohp pil sohte kin sapwungala pwe e nda: “I sohte mwahn kin pwongih ketipin ni eh kin daker wasa, de maram me kin dak lingaling. I sohte kin sapwungala oh pwongih ira ni ei pahn metik pehiet ni tiahk en waunekin ira. Kalokepen soangen dihp pwukat, iei kamakamala, pwe e kin kasohwe Koht, Wasa Lapalap.”—Sohp 31:26-28.
13 Sohp sohte kin kaudokiong mehkan me sohte ahneki mour. Ma e ale kasongosong nan kapehde en kilang soahng kan me mi pahnlahng duwehte maram oh ma e pahn ‘metik peh ni tiahk en waunekin’ mepwukat ni mwomwen eh pwongih, e pahn wiahla sounkaudok en dikedik en eni oh kin kasohwe Koht. (Deud. 4:15, 19) Pwe en kin kolokol atail lelepek ong Koht, kitail en soikeweisang kaudokiong soangen dikedik en eni koaros.—Wadek 1 Korint 10:14.
Dehr Men Dupuk De Mwalaun
14. Dahme kahrehda kitail kak nda me Sohp sohte kin mwersuwed?
14 Sohp sohte kin mwersuwed de pil lemei. E ese me soangen irair pwukat pahn kasalehda me e sohte kin kolokol eh lelepek, pwe e nda: “I sohte mwahn kin perenkihda paisuwedlahn ei imwintihti kan, de nsenamwahukihla ar kin mihla nan apwal laud; I sohte mwahn dipikihda ei kin kapakapkin irail pwe re en mehla.”—Sohp 31:29, 30.
15. Dahme kahrehda e sapwung en perenkihda ni en emen me kailongkin kitail lelohng nan apwal?
15 Sohp sohte kin perenkihda ni en emen me kin kailongki ih pahn lelohng nan apwal. Lepin Padahk 24:17, 18 kin kihda kaweid wet: “Dehr perenki ma omw imwintihti kin lelohng apwal. KAUN-O pahn ketin mwahngih ma ke wia met, oh e sohte pahn kaloke omw imwintihtio.” Pwehki Siohwa eh kak mwahngih mohngiong en aramas, e kin mwahngih ma nan kapehdatail kin perenkihda en emen eh kahpwal oh e uhdahn sohte kin kupwurki soangen madamadau wet. (Lep. Pad. 17:5) Ele Koht pahn ketin apwalihala dahme konehng kitail, pwe Paipel mahsanih: “KAUN-O pahn ketin ikih oh kaloke irail.”—Deud. 32:35.
16. Mehnda ma kitail sohte kepwehpwe, ia duwen atail kak kasamwo meteikan?
16 Sohp kin kadek oh kalapw kasamwo aramas akan. (Sohp 31:31, 32) Mendahki kitail sohte kepwehpwe, kitail kak “kasamwo mehn keiru kan.” (Rom 12:13) Kitail kak ehukihong meteikan mehkot tikitik, oh tamataman me “tungoale tehntuhke rehn aramas me ke poakepoake mwahusang tungoale uduk iou wasa me kailok mie.” (Lep. Pad. 15:17) Atail iang kang kisin mwenge rehn riatail kan kak wia ahnsou kaperen oh kakehlaka emenemen.
17. Dahme kahrehda kitail en dehr song en ekihla dihp laud?
17 Aramas ahneki ahnsou nsenamwahu rehn Sohp ni eh kin kasamwo irail, pwe e sohte kin mwalaun. E sohte kin duwehte aramas suwed kan me kin wailong nan mwomwohdiso ni mwehin wahnpoaron ko oh re kin “natih meteikan pwe re en alehki me konehng irail.” (Sud 3, 4, 16) E pil sohte kin ‘ekihla dipe kan’ pwe e masak meteikan de ese met oh mwamwahliki ih. E kin men Koht en ketin kasawih ih, pwe Koht me e pahn kin anahne wehkada soahng koaros. (Sohp 31:33-37) Ma kitail wiahda dihp laud, kitail en dehr song en ekihla soangen sapwung pwukat pwe kitail en pere adatail. Ia duwen atail kak kasalehda me kitail kin nantihong kolokol atail lelepek? Sang ni atail pohnese atail sapwung kan, koluhla, rapahki sawas sang elder kan, oh wia soahng koaros me kitail kak pwe en kapwungala dahme kitail wiahda.—Lep. Pad. 28:13; Seims 5:13-15.
Sohp Men Ale Kopwung Pwe en Kadehdehda Eh Lelepek
18, 19. (a) Dahme kahrehda kitail kak nda me Sohp sohte kin isaneki aramas emen? (b) Dahme Sohp kin pwungki wia ma ih me sapwung?
18 Sohp kin mehlel oh pwung pahrek. Ihme kahrehda e kak nda: “Ma I pirapahda sahpw me I kin wie sapwasapw loale, oh adihasang me uhdahn sapwe sahpwo—ma I tungoalehla wahnsahpwo, a sounsapwasapw akan me koadoahkihadahr ahpw duhpekla—eri, sahpwo en kakairada dihpw tekatek oh dihpw suwed, en dehr kihda wahn pilawa oh parli.” (Sohp 31:38-40) Sohp sohte kin adihasang sapwen meteikan, oh e sohte kin isaneki nah tohndoadoahk ko. Duwehte ih, kitail anahne kolokol atail lelepek ong Siohwa ni mehkan me laud oh tikitik.
19 Sohp koasoia duwen eh elen mour mwohn kompoakepah silimen ko oh mwahnakapw Elihu. Sohp kin luke aramas sohte lipilipil en kihong ih nan kopwung oh ntingihedi dipe kan duwen eh mour. Ma e kadehdehda Sohp me sapwung, e pahn pwungki dadaur kalokolok. En kihda eh repen pwung oh awih kadeik sang rehn Koht. Eri, met iei “imwilahn en Sohp eh koasoi.”—Sohp 31:35, 40.
Ke Kak Kolokol Omw Lelepek
20, 21. (a) Dahme kahrehda Sohp kak kolokol eh lelepek? (b) Ia duwen atail kak kakairada limpoak ong Koht?
20 Sohp kak kolokol eh lelepek pwehki eh kin poakohng Koht oh Siohwa kin ketin poakohng oh sewese ih. Sohp nda: “Komwi [Siohwa] ketikihongieier mour oh limpoak poatopoat, oh sapwellimomwi epwel me kolokol ie.” (Sohp 10:12) Sohp pil kin kasalehda eh limpoak ong meteikan, pwe e pohnese me aramas me sohte kin kasalehda limpoak poatopoat ong meteikan pahn kin solahr lemmwiki Koht, Wasa Lapalahpie. (1 Sohn 3:17) Irail kan me kin kolokol arail lelepek kin poakohng Koht oh mehn mparail.—Mad. 22:37-40.
21 Kitail kak kakairada limpoak ong Koht sang ni atail kin wadek sapwellime Mahsen oh doudouloale dahme e kin kasalehda duwen ih. Ni atail kin kapakap ong Siohwa sang mohngiongitail, kitail kak kapinga ih oh kalahnganki sapwellime kupwuramwahu ong kitail. (Pil. 4:6, 7) Kitail kak kouliong Siohwa oh paiekihda atail kin werekiong sapwellime aramas akan. (Ipru 10:23-25) Eri, atail limpoak ong Koht pil pahn lalaudla ni atail kin iang doadoahk en kalohk oh lohkiseli “rongamwahun sapwellime komour.” (Mel. 96:1-3) Ni soangen ahl pwukat, kitail kak kolokol atail lelepek, duwehte sounmelkahka men me koulki: “Ia uwen kesempwal en ei karanih Koht, pwe I en diar silepei rehn KAUN-O Koht, Wasa Lapalahpie.”—Mel. 73:28.
22, 23. Nin duwen aramas kan me kin utungada sapwellimen Siohwa kaunda, ia duwen atail wiewia kan ar kin pahrekiong irail kan me kin kolokol arail lelepek mahs?
22 Erein sounpar kid kei douwehr powe, Siohwa ketikihong sapwellime aramas akan me kin kolokol arail lelepek soangsoangen pwukoa kan. Noha kauwada warihmw oh kin “lohkiseli duwen mour pwung pahn kupwur en Koht.” (2 Pit. 2:5) Sosua kahrelahng mehn Israel kan nan Sapwen Inowo, oh e pweida pwehki eh kin wadek “kosonnedo pwon . . . nin rahn oh nipwong” oh kin kapwaiada. (Sos. 1:7, 8) Kristian akan ni mwehin wahnpoaron ko kin wia doadoahk en katohnpadahk oh kaukaule tuhpene pwe ren kin onop iren Paipel kan.—Mad. 28:19, 20.
23 Kitail kin utungada sapwellimen Siohwa kaunda oh kolokol atail lelepek sang ni atail kin kalohki dahme pwung, wia doadoahk en katohnpadahk, kapwaiada kaweid en Paipel, oh pokonpene ni mihting kan oh kapokon kan. Soangen wiewia pwukat kin sewese kitail en kin eimah, ahneki nanpwungmwahu rehn Koht oh kin pweida nan atail wia kupwuren Koht. Wia kupwuren Koht oh kolokol atail lelepek sohte apwal ong kitail pwehki Samatail nanleng oh sapwellime Ohl ara kin ketin sewese kitail. (Deud. 30:11-14; 1 Nan. 8:57) Patehng met, ‘riatail kan’ nan sampah pwon me pil kin kekeid ni lelepek oh wauneki Siohwa nin duwen arail Kaun Wasa Lapalahpie kin sewese kitail.—1 Pit. 2:17.
Ia Ahmw Pasapeng?
• Ia duwen atail anahne kilangwohng sapwellimen Siohwa koasoandi en dahme pwung oh sapwung?
• Mehnia irair kan me Sohp ahneki me ke uhdahn perenki?
• Nin duwen Sohp 31:29-37 kasalehda, ia mwomwen en Sohp eh wiewia?
• Dahme kahrehda kitail kak kolokol atail lelepek ong Koht?
[Peidek kan ong Onop]
[Kilel nan pali 29]
Sohp kin kolokol eh lelepek ong Siohwa. Kitail pil kak!
[Kilel nan pali 32]
Kitail kak kolokol atail lelepek!