“Iet Ahnsoun Ale Sapwellimen Koht Kupwurkalahngan”
“Iet Ahnsoun Ale Sapwellimen Koht Kupwurkalahngan”
“Eri rong! Iet ahnsoun ale sapwellimen Koht kupwurkalahngan; rahnwet, ih rahnen komourla.”—2 KOR. 6:2.
1. Dahme kahrehda kitail anahne wehwehki dahme keieu kesempwal kitail en wia?
“MIE ahnsou ong soahng koaros nin sampah wet.” (Ekl. 3:1, NW) Solomon ntingihedi kesempwalpen wehwehki ahnsou me keieu mwahu en wia mehkot me duwehte wia mwetuwel, seiloak, pesines, de kapehse rehn meteikan. Ahpw, kitail pil anahne wehwehki doadoahk me keieu kesempwal nan atail mour.
2. Ni eh ketiket nin sampah, ia duwen Sises eh kin kasalehda me e uhdahn mwahngih duwen ahnsou me e ketiket loale?
2 Ni eh ketiket nin sampah, Sises mwahngih soangen ahnsou dah me e ketiket loale oh dahme e anahne ketin wia. Ni eh wehwehki dahme keieu kesempwal nan sapwellime mour, e mwahngih me e anahne kapwaiada kokohp tohto me pid Mesaia. (1 Pit. 1:11; Wiewia 10:43) Mie doadoahk me e pahn ketin wia pwe aramas akan en ese ih me Mesaia me inoupe mie. E anahne ketin kadehdehda duwen mehlel me pid Wehio oh kihpene irail kan me pahn iang ih. Oh e anahne koasoanehdi poahsoanpen mwomwohdiso en Kristian me pahn kapwaiada doadoahk en kalohk oh katohnpadahk lao lel irepen sampah.—Mark 1:15.
3. Ia duwen Sises eh mwahngih duwen ahnsou eh kin kamwakid dahme e kin ketin wia?
3 Wehwehn ahnsowo kin uhdahn kamwakid Sises en ketin ngoangki kapwaiada kupwuren Semeo. E mahsanihong sapwellime tohnpadahk ko: “Rahket me inenen laud, a tohndoadoahk kan me malaulau; kumwail eri kapakap oh peki rehn kaunen rahket pwe en ketin kadarodohng tohndoadoahk tohto nan sapwellime rahk.” (Luk 10:2; Mal. 4:5, 6) Sises ketin pilada mahs meh ehk riemen, a mwuri, me tohtohsang nanpwungen sapwellime tohnpadahk kan oh ketikihong irail kaweid kan oh poaroneirailpeseng pwe ren kalohki mahsen wet: “Wehin Koht kerendohr!” Kitail wadek duwen Sises: “Ni Sises eh ketin kaimwisekala sapwellime kehkehlik kan ong me ehk riemeno, e ahpw ketiketla sang wasao pwe en wia sapwellime padahk oh kapahrek nan ar kahnimw kan.”—Mad. 10:5-7; 11:1; Luk 10:1, NW.
4. Ni ahl dahieu me Pohl kin kahlemengih Sises Krais?
4 Sises kin ketin wia mehn kahlemeng unsek ong sapwellime tohnpadahk kan koaros me pid ngoang oh poadidi ong Koht. Ih met me wahnpoaron Pohl kasalehda ni eh kangoange ienge me pwoson kan: “Kumwail kahlemengih ie, duwehte ei kin kahlemengi Krais.” (1 Kor. 11:1) Ni ahl dahieu me Pohl kin kahlemengih Sises? Sang ni eh kin wia uwen me e kak en kalohki rongamwahwo. Nan nein Pohl kisinlikou me e ntingihedi ong mwomwohdiso kan, kitail kin diar soangen lokaia kan me duwehte “dehr pohnkahke,” “poadidiong papah Kaun-o,” “loalenohng amwail doadoahk ong Kaun-o ahnsou koaros,” oh “sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Kaun-o.” (Rom 12:11; 1 Kor. 15:58; Kol. 3:23) Pohl sohte kin manokehla dahme wiawi ni eh kohla Damaskus oh sapwellimen Sises mahsen kan me tohnpadahk Ananaias anahne padahkihong ih: “I piladahr ohlo pwe en papah ie oh kasalehiong mehn liki kan oh nanmwarki kan oh pil mehn Israel kan mwarei.”—Wiewia 9:15; Rom 1:1, 5; Kal. 1:16.
“Ahnsoun Ale Sapwellimen Koht Kupwurkalahngan”
5. Dahme kin kamwakid Pohl en ngoangki kapwaiada eh doadoahk en kalohk?
5 Ni atail kin wadek pwuhken Wiewia kan, e kin sansal ong kitail duwen eimah oh ngoang me Pohl kin kasalehda ni eh kapwaiada eh doadoahk en kalohk. (Wiewia 13:9, 10; 17:16, 17; 18:5) Pohl kin pohnese kesempwalpen ahnsou me e kin mihmi loale. E koasoia: “Eri rong! Iet ahnsoun ale sapwellimen Koht kupwurkalahngan; rahnwet, ih rahnen komourla.” (2 Kor. 6:2) Nan pahr 537 mwohn Krais, e wia ahnsou mwahu ong irail kan me kalipilipala Papilon en pwurodohng sapwarailo. (Ais. 49:8, 9) Ahpw, dahme Pohl kin koasoakoasoia wasaht? Iren Paipel kan kin sewese kitail en ese dahme Pohl kin medemedewe.
6, 7. Pwais kaselel dahieu me Koht ketikihong Kristian keidi kan nan ahnsou wet? Ihs me kin iang me keidi kan wia doadoahk ahnsou wet?
6 Ekiste mwowe nan nah kisinlikouo, Pohl koasoia duwen pwais kaselel me Koht ketikihong ih oh ienge Kristian keidi kan. (Wadek 2 Korint 5:18-20.) E kawehwehda me Koht malipe irail ong pwukoa tohrohr ehu oh ketikihong irail “kohwa doadoahk pwe aramas teikan en pil wiahla kompoakepah,” oh ren peki rehn aramas akan en “wekila sang ni imwintihti ong ni kompoakepahn Koht.”
7 Pwehki uhwong me pwarada nan Ihden, aramas koaros kin dohsang Koht. (Rom 3:10, 23) En dohsang Koht kin kahrehiong aramas akan en sehse ihs ih oh kupwure kan oh met kin kahluwairaillahng lokolok oh mehla. Pohl ntingihedi: “Kitail eseier me audepen lahng oh sampah koaros kin weiweirek, rasehng medek en neitik, lao lel ahnsou wet.” (Rom 8:22) Ahpw Koht ketin tiengla mwowe pwe en ketin kangoange, de “peki,” rehn aramas akan en pwurodo, de en wekila sang ni imwintihti ong ni kompoakepah. Ih duwen doadoahk me Koht ketikihong Pohl oh ienge Kristian keidi kan ahnsowo. “Ahnsoun ale sapwellimen Koht kupwurkalahngan” kakete wia “rahnen komourla” ong irail kan me kin pwoson Sises. Kristian keidi kan koaros oh iengerail “sihpw teikan” kin doadoahkpene oh pousehlahte luke aramas akan en paiekihda “ahnsoun ale sapwellimen Koht kupwurkalahngan.”—Sohn 10:16, NW.
8. Dahme kahrehda luhk en kompoakepahnki Koht kin inenen kaselel?
8 Luhk wet kin inenen kaselel pwehki mendahki aramas me pwukoahki ohlahn nanpwungmwahu rehn Koht sang ni uhwong me wiawi nan Ihden, pein Koht me ketin tiengla mwowe pwe en ketin kamwahwihala met. (1 Sohn 4:10, 19) Dahme e ketin wia? Pohl sapeng: “Duwen Koht eh ketin kupwukupwure pwe ni mwaren Krais [“ni eh ketin doadoahngki Krais,” NW] aramas koaros en wiahla kompoakepah. Oh duwen eh sohte men ketin kapwukoanehkin irail diparail kan, oh eh ketikihong irail mahseno me padahkihong irail duwen eh kin ketin wiahkinirailla kompoakepah.”—2 Kor. 5:19; Ais. 55:6.
9. Dahme Pohl wia pwe en kasalehda eh kalahnganki sapwellimen Koht mahk kalahngan?
9 Sang ni eh ketikihda meirong en tomwo, Siohwa ketin kahrehiong irail kan me pwoson tomwo en kak ale mahkpen diparail oh pil kamwahwihala arail nanpwungmwahu de ahneki popohl reh. E pil poaronepeseng wiliepe kan pwe ren kangoange aramas akan wasa koaros ren ahneki popohl reh erein eh miehte ahnsou. (Wadek 1 Timoty 2:3-6.) Pohl kin wehwehki kupwuren Koht oh pohnese soangen ahnsou me e mi loale, kahrehda e kin pwerisekiong eh ‘kohwa doadoahk pwe aramas teikan en pil wiahla kompoakepahn’ Koht. Kupwuren Siohwa sohte kin ketin wekila. E kin kupwukupwurehte aramas akan me dohsang ih en kamwahwihala arail nanpwungmwahu reh. En Pohl koasoi duwen “iet ahnsoun ale sapwellimen Koht kupwurkalahngan” oh “rahnen komourla” kin wiewiawihte. Ia uwen Siohwa Koht eh mahk kalahngan oh kadek!—Eks. 34:6, 7.
Dehr “Kin Mwamwahliki”
10. Ia wehwehn “rahnen komourla” ong Kristian keidi kan mahs oh pil rahnwet?
10 Irail kan me tepin paiekihda ahnsou mwahu en kompoakepahnki Koht iei irail me “wiahla sapwellimen Krais.” (2 Kor. 5:17, 18) Ong irail, “rahnen komourla” tepida wiawi nan Pendekos pahr 33. Sang ahnsowo kohdo, irail pwukat alehdi doadoahk en pakairki “mahseno me padahkihong irail duwen eh kin ketin wiahkinirailla kompoakepah.” Rahnwet, irail luhwen me keidi kan kin wiewiahte “kohwa doadoahk” wet. Re pohnese me tohnleng pahmeno me wahnpoaron Sohn kilangada nan kaudiahlo kin “kolokol ahng pahieun sampah pwe re dehr ipidohng pohn sampah.” Kahrehda, ahnsouwet kin wiahte “rahnen komourla” oh “ahnsoun ale sapwellimen Koht kupwurkalahngan.” (Kaud. 7:1-3) Pwehki kahrepe wet, sang tepin pahr 1900 kohdo, irail luhwen me keidi kan kin ngoangkihte kapwaiada “kohwa doadoahk” wet pwe en lella ni irepen sampah.
11, 12. Mpen sounpar 100 samwalahro, ia duwen Kristian keidi kan ar kin kasalehda arail pohnese duwen ahnsou me re mi loale? (Kilang kilel en pali 17.)
11 Karasepe, nin duwen me kileldi nan pwuhk en Sounkadehdehn Siohwa kan—Sounkalohk kan en Wehin Koht (Jehovah’s Witnesses—Proclaimers of God’s Kingdom), mpen sounpar 100 samwalahro, “C. T. Russell oh ienge kan kin uhdahn kamehlele me re miher nan ahnsoun rahk oh aramas akan anahne rong duwen padahk mehlel me pahn kasaledekihirailla.” Dahme re wia? Ni arail pohnese me irail miher nan ahnsoun rahk, de “ahnsoun ale sapwellimen Koht kupwurkalahngan,” ohl pwukat sohte kin itarkihte ren lukehdo aramas akan en kohdo iang sarawi. Irail kaunen pelien lamalam likamw akan me kin wia met erein ahnsou reirei. Ahpw, Kristian keidi pwukat tapiada rapahki ahl mwahu teikan en lohkiseli rongamwahwo. Met iangahki arail kin doadoahngki soangen dipwisou oh misihn kapw kan en sewese arail doadoahko en pweida.
12 Pwe en lohkiseli rongamwahu en Wehio, pwihn tikitik wet me wia sounkalohk ngoang kei, tapiada doadoahngki kisin doaropwe kan, makasihn kan, oh pwuhk kan. Re pil ntingihedi padahk kan oh iren onop kan ong doaropwe en nuhs kid kei pwe en pekederpeseng. Re wiahda prokram kan me poahsoankihda iren Paipel kan ong redio kan en arail wehi oh pil ong wehi teikan. Re kin wiahda oh doadoahngki kasdo kan me mie ngile. Re wiahda met mwohn wasahn wiahda kasdo kan doadoahngki wiepe wet. Ia imwilahn doadoahk ngoang pwukat? Rahnwet, mie aramas isirar samwa me mwekidki oh pil iang kalohki rohng wet: “Kumwail en wekila sang ni imwintihti ong ni kompoakepahn Koht.” Mehlel, sapwellimen Siohwa ladu kan mahs kin wia mehn kahlemeng mwahu duwen ngoang mendahki irail malaulau oh sohte nohk koahiek en wia doadoahk pwukat.
13. Ia duwen atail anahne mwekidki dahme Koht kin kupwurki?
13 En Pohl koasoia “iet ahnsoun ale sapwellimen Koht kupwurkalahngan” kin mehlel leledo met. Kitail me aleier sapwellimen Siohwa kupwurkalahngan kin kalahnganki atail ahneki ahnsou mwahu en rong oh mwekidki luhk wet. Kitail sohte kin itarkihte rong duwen luhk wet, ahpw kitail kin mwekidki duwen dahme Pohl koasoia: “Se peki ni ngidingid rehmwail pwe kumwail en dehr kin mwamwahliki sapwellime kalahngan me kumwail aleier.” (2 Kor. 6:1) Koht kin kupwurki kasalehda sapwellime kalahngan pwe “aramas koaros en wiahla kompoakepah” pwehki Krais.—2 Kor. 5:19.
14. Soangen kekeirda mwahu dah me wiawi nan sahpw tohto?
14 Pali moron en aramas akan me Sehdan karotongehla kin dohsang Koht oh sehse dahme kahrehda e kupwurki kasalehda sapwellime kalahngan. (2 Kor. 4:3, 4; 1 Sohn 5:19) Ahpw, suwedlahn irair en sampah kin kahrehiong me tohto en mwekidki ni arail kin esehda me ar dohsang Koht iei me kin kahrehda lokolok oh kahpwal akan. Pil nan sahpw akan me pali moron en aramas akan sohte men rong padahk mehlel, met me tohto kin uhd perenki rong oh mwekidki en wiahla kompoakepahn Koht. Ia duwe, kitail wehwehki me met iei ahnsou me kitail en kalaudehla atail ngoang en kalohki pekipek wet: “Kumwail en wekila sang ni imwintihti ong ni kompoakepahn Koht”?
15. Pwehki atail sohte kin kalohk pwe en ihte kansenamwahwih aramas akan, dahme kitail kin men aramas koaros en ese?
15 Kitail sohte kin padahkihongete aramas akan ma irail pahn sohpeiong Koht, e pahn ketin apwalihala arail kahpwal kan oh re pahn nsenamwahula. Ihme me tohto kin raparapahki ni arail kin kohla sarawi, oh pelien lamalam kan kin songosong en kapwaiada ineng wet. (2 Tim. 4:3, 4) Ahpw met kaidehn atail mehn akadei en kalohk. Kitail kin kalohki rongamwahu me Siohwa kin kupwurki mahkohng dipen aramas akan pwehki sapwellime limpoak oh sang ni eh ketin doadoahngki Krais. Kahrehda, emenemen aramas kak karanihala oh kompoakepahnkihla Koht. (Rom 5:10; 8:32) Ahpw, “ahnsoun ale sapwellimen Koht kupwurkalahngan” pahn kereniong imwisekla.
“Direkihla Ngoang Pwehki Sapwellimen Koht Manaman”
16. Dahme kin sewese Pohl en kasalehda eimah oh ngoang?
16 Eri, ia duwen atail kak kakairada oh kolokol atail ngoangki kaudok mehlel? Ekei ele kin namenek oh kin nennen oh pil apwalki ehuong meteikan. Ahpw, e mwahu en tamataman me ngoang kaidehn ihte en kasalehda pepehm de peren oh e pil sohte poahsoankihda mwomwen aramas emen. Pohl kasalehda ahl me keieu mwahu ni eh kangoange ienge Kristian akan: “Kumwail direkihla ngoang pwehki sapwellimen Koht manaman.” (Rom 12:11, NW) Manamano kin uhdahn sewese Pohl en eimah oh dadaur nan doadoahk en kalohk. Erein sounpar daulih 30, sang ni ahnsou me Sises malipe ih lao lel ahnsou me e selidi oh mehla nan Rom, en Pohl ngoang sohte kin luwetala. Ahnsou koaros Pohl kin sohpeiong Koht, me kin kakehlakahki ih sapwellime manaman. E koasoia: “Se rasehng sah pwehl kan me kopwukopw oh kehohla; eri met pwe en kadehdehda duwen manaman lapalap eh uhdahn sapwellimen Koht, a kaidehk aht.” (2 Kor. 4:7) Kitail kak uhdahn paiekihda ma kitail alasang Pohl!
17. Ia duwen atail kak “direkihla ngoang pwehki sapwellimen Koht manaman”?
17 Lepin lokaiahn Krihk me kawehwehda “direkihla ngoang” kin wehwehki “pwopwoail.” (Kingdom Interlinear) Pwe pilen ainpwoat ehu en kak wie pwopwoail, e kin anahne kisinieio en wie lullul. Duwehte met, en kin “direkihla ngoang pwehki sapwellimen Koht manaman,” kitail anahne mweidohng manamano en kin kaweid kitail. Kitail kak wia met ni atail pahn doadoahngki koasoandi koaros me Siohwa ketikihda en kakehlaka kitail. Met wehwehki me kitail kin kapwaiada atail kaudok en peneinei oh pil mwomwohdiso, kaukaule pein onopki Paipel de nin duwen peneinei ehu, kapakap, oh pil towehda mihting kan rehn iengetail Kristian kan. Met pahn sewese kitail en kolokol “kisiniei” me pahn kahrehda kitail en wie “pwopwoail” de “direkihla ngoang pwehki sapwellimen Koht manaman.”—Wadek Wiewia 4:20; 18:5.
18. Nin duwen Kristian akan, dahme kitail pahn akadeiong en kapwaiada?
18 Emen me papidaisla kin kilangwohngete en kapwaiada eh mehn akadei oh sohte kin mwadang en pweieksang. Nin duwen Kristian akan, atail mehn akadei iei en wia soahng koaros me Siohwa kupwurki kitail en wia, duwehte Sises. (Ipru 10:7) Rahnpwukat, Siohwa kin kupwurki aramas tohto ni uwen me kak en kompoakepahnkihla ih. Eri, ni atail alasang Sises oh Pohl, kitail en nantihong kapwaiada doadoahk wet me keieu kesempwal oh karuwaru, oh pil kanekehla.
Ke Tamataman?
• “Kohwa doadoahk” dahieu me kowohng Pohl oh keidi teikan?
• Ia duwen luhwen me keidi kan ar kin doadoahngki mwahu “ahnsoun ale sapwellimen Koht kupwurkalahngan”?
• Ia duwen Kristian akan ar kak “direkihla ngoang pwehki sapwellimen Koht manaman”?
[Peidek en Onop]
[Kilel nan pali 14]
Pohl sohte kin manokehla dahme wiawi ni eh kohla Damasukus