Ke Kak Uhdahn Nsenamwahu?

“Itarki kin kahrehda me semwehmwe en kepwehpwe; sohte itarki kin kahrehda me kepwehpwe en semwehmwe.”​—Benjamin Franklin.

LEPIN padahk wet me mehlel. Me tohto eselahr me en nsenamwahu sohte kak pweipweida duwehte dipwisoun netila ieu. Ihme kahrehda en itarki de ahneki pepehm en nsenamwahu nan loalatail mwomwen apwal en alehdi nan sampah ehu me kin kahrehda ineng en men ahneki soahng tohto, men pweida, de iang soangen mour me meteikan ahneki! Mie ekei soahng me kilikilel pah kan kin wiawiong uhk?

• Kasalepen dipwisou kan kin kahrehda ken medewe me en nsenamwahu kin kohsang omw kin pwainda dipwisou tohto.

• Wasahn doadoahk oh sukuhl kin kahrehiong kitail en kapahrek kitail ong meteikan. Met kin kahrehda ken medewe me ke kesempwal ihte ma ke kin wia soahng koaros me meteikan kin wia.

• Aramas sohte kin kalahnganki dahme ke wiahiong irail.

• Kompoakepahmw kan kin kahrehiong uhk en peirinki dahme re ahneki.

• Omw peidek kan me ke keieu kesempwal me pid duwen mour sohte kin pasapengla.

Ke kak uhdahn diar nsenamwahu ni omw kin lelohng kahpwal pwukat? Wahnpoaron Pohl koasoia ia duwen omw kak diar “nsenamwahu” wet. Ekei pak e kin ahneki me depasang eh anahn akan, oh ekei pak e pil kin sohte itar. Kompoakepah kan kin kapinga ih ahpw meteikan kin kapailoke. Ahpw e nda: “I padahngkiher met: I pahn kak nsenamwahu wasa koaros oh ahnsou koaros.”​—Pilipai 4:11, 12.

Irail me sohte kin wia ewen kahk kan me anahn sohte kin ese nsenamwahu wet, ahpw nin duwen me Pohl koasoia, kitail kak esehla met. Se luke iuk en tehk ewen kahk limau ong nsenamwahu me dierek nan Mahsen en Koht, Paipel.