Ewen Kahk Keieu

Poakohng Aramas, Kaidehn Mwohni oh Dipwisou

DAHME PAIPEL PADAHNGKI? “Limpoak ong mwohni, iei tepin soangen suwed koaros.”​—1 Timoty 6:10.

IA KAHPWAL EN? Soun kasal dipwisou kan kin song en kahrehiong kitail en dehr itarki dahme kitail ahneki. Irail kin men kitail en doadoahk ahnsou koaros pwehn alehdi mwohni pwe kitail en kak pwainkihda dipwisou kapw, mwahu oh pil laud. Mwohni kin pitih aramas, oh e mengei en poakohngala. Ahpw, Paipel kin kaweidki me aramas me poakohng dipwisou sohte pahn diar nsenamwahu. Nanmwarki Solomon ntingihdi: “Ma ke pahn poakohng mwohni, ke sohte mwahn pahn itarki; ma ke inengieng kepwehpwehla, ke sohte kak alehdi mehkoaros me ke anahne.”—Eklesiasdes 5:10.

DAHME KE KAK WIA? Kahlemengih Sises oh sukuhlki en poakohng aramas laudsang dipwisou kan. Sises kupwurki tounmeteikihla mehkoaros me e sapwellimanki iangahki eh mour pwehki eh poakohng aramas. (Sohn 15:13) E mahsanih: “Kihwei kaperen sang ale.” (Wiewia 20:35) Ma kitail kin kaukaule kihong meteikan atail ahnsou oh atail dipwisou kan, aramas pahn pil wiahiong kitail soahngohte. Sises mahsanih: “Kumwail kihwei, pwe kumwail en ale dupukpe.” (Luk 6:38) Irail me kin nannanti en alehdi mwohni oh dipwisou kan kin kahrehiong pein irail medek oh lokolok. (1 Timoty 6:9, 10) Ni pali teio, nsenamwahu mehlel kin kohsang atail kin poakohng meteikan oh arail kin poakohng kitail.

Ke sou kasawih ma ke kak katikala elen omw mour? Ke kak katikala uwen dipwisou me ke ahneki de dipwisou kan me ke men pwainda? Ma ke wia met, ke pahn diar me mie omw ahnsou oh kehl en wia soahng kan me kesempwal nan mour me wehwehki sewese aramas oh papah Koht me ketikihong uhk mehkoaros me ke ahneki.​—Madiu 6:24; Wiewia 17:28.

[Kilel nan pali 4]

“Kumwail kihwei, pwe kumwail en ale dupukpe”