Manaman en Koht Kin Kakehlaka Kitail en Powehdi Kahpwal Koaros

“Kumwail kehlailkihda amwail miniminiong Kaun-o oh manaman en sapwellime roson.”—EP. 6:10.

1. Dahme kahrehda sapwellimen Siohwa aramas akan kin lelohng kahpwal tohto?

SAPWELLIMEN SIOHWA aramas akan kin lelohng soangsoangen kahpwal kan. Ekei kahpwal kan kin kohsang atail soh unsek de dahme kin wiawi nan koasoandi wet me kitail kin mi loale. Kahpwal teikan kin kohsang uhpene nanpwungen irail kan me kin papah Koht oh irail kan me sohte kin. (Sen. 3:15) Sangete mahs, Koht kin ketin sewese sapwellime ladu lelepek kan en dadaur pahn kalokolok pwehki dahme re kin kamehlele, pelianda kasongosong en iengerail kan, oh powehdi soangsoangen kahpwal kan koaros. Sapwellimen Koht manaman kak kakehlaka kitail en wia duwehte.

Kalokolok Pwehki Dahme Kitail Kin Kamehlele

2. Ia kahrepen aramas akan ar kin kaloke kitail? Ia mwomwen kalokolok kan ar kin wiawi?

² Ahnsou me aramas kin kaloke kitail pwehki dahme kitail kin kamehlele, kahrepe iei irail men kasohrehla atail padahk kan, kauhdi padahk pwukat pwe en dehr kohpeseng, de kauwehla atail lelepek. Kalokolok kan kak wiawi ni sansal a ekei sohte sansal. Paipel kin karasahiong en Sehdan uhwong kan ar duwehte ahn laion men de ahn sineik pwoisin men ah kin pei.​—Wadek Melkahka 91:13.

3. Ia mwomwen kalokolok kan ar kin rasehng tiahk en laion men oh sineik pwoisin men?

³ Rasehng laion lawalo lemei men, Sehdan kin wia kalokolok sansal kan sang ni eh doadoahngki tiahk lemei, kosonned me kin kauhdi atail doadoahk de salihkitaildi. (Mel. 94:20) Neitail Pwuhken Pahr (lokaiahn wai) me koasoia duwen wiewia en Sounkadehdehn Siohwa kan nan atail ahnsou kin kasalehda soangen kalokolok tohto pwukat. Kaunen palien lamalam oh politik kan kin kamwakid pwihn mwersuwed kan pwe ren kaloke sapwellimen Koht aramas  akan nan sahpw tohto. Uhwong pwukat kin kahrehiong ekei en sohla papah Siohwa. Rasehng sineik pwoisin men, Tepil pil kin peiong aramas akan ni soh sansal pwe en kauwehla arail lamalam akan oh pitih irail en wia dahme e men irail en wia. Soangen uhwong wet kin wiawi pwe en kaluwetala de kauwehla atail pwoson. Sang sapwellimen Koht manaman, kitail kak pelianda soangen kalokolok pwukat koaros.

4, 5. Ia ahl me keieu mwahu en kaunopadahng kalokolok kan? Dahme kahrehda? Menlau kihda ehu karasepe.

⁴ Atail kin medewehda oh pwunodki soangsoangen kalokolok kan me kakete wiawi ahnsou kohkohdo sohte pahn sewese kitail en kaunopada mwahu. Ni mehlel, kitail sohte kak ese soangen kalokolok dah kan me kitail pahn lelohng, kahrehda e sohte pahn sawas en pwunodki soahng kan me ele sohte pahn wiawi. Ahpw mie mehkot me kitail kak wia. Pali laud en irail me dadaurete pahn kalokolok kan kin pweida sang ni arail kin medemedewe mehn kahlemeng mwahu en sapwellimen Siohwa ladu kan me kileldi nan Paipel, oh pil sapwellimen Sises padahk oh mehn kahlemeng kan. Met kin sewese irail en kalaudehla arail limpoak ong Siohwa. Limpoak wet kin uhd sewese irail en pelianda soangsoangen kahpwal kan me re kakete lelohng.

⁵ Medewehla mehn kahlemeng en riatail lih riemen nan Malawi. Ni pwihn lemei ehu eh song en idingkihong ira en pwainda neirail doaropwe me uhki arail palien politik, re kin keme ira, kihsang ara likou oh nda me re pahn angkehlailiong ira. Pwihno pil pitih ira me irail kan me kin doadoahk nan Pedel alehdahr doaropwe pwukat. Dahme sister pwukat wia? Ira nda: “Se kin kaudokiong Siohwa Koht kelehpw. Eri e sohte katepe ma re alehdahr doaropwe pwukat. Se sohte pahn dukiong kumwail mehnda ma kumwail kemeikitala!” Mwurin ara sapengki met, re kasaledekirahlla.

6, 7. Ia duwen Siohwa eh kin ketin kakehlaka sapwellime ladu kan ong kalokolok kan?

⁶ Wahnpoaron Pohl ese me Kristian akan nan Deselonika alehki padahk mehlel “lokolok laud,” ahpw re kin peren pwehki sapwellimen Koht manaman. (1 Des. 1:6) Ni mehlel, Kristian tohto sangete mahs leledo met me kin lelohng oh powehdi kahpwal kan kin nda me ni arail kalokolok kan kin inenen apwalla, re kin ahneki popohl, me iei ehu irair kan en sapwellimen Koht manaman. (Kal. 5:22) Popohl wet kin uhd sewese irail en perehla mohngiongirail oh arail madamadau. Ei, Siohwa kin ketin doadoahngki sapwellime manaman en kakehlaka sapwellime ladu kan pwe ren wia dahme pwung oh powehdi kahpwal kan me kin wiawi. *

⁷ Aramas akan me kin tetehk kitail kin pwuriamweikihla atail kolokol teng atail lelepek, mehnda ma kitail kin lelohng kalokolok me inenen lemei. Re kin medewe me Sounkadehde kan kin direkihla manaman kehlail. Ni mehlel, Sounkadehde kan kin direkihla manaman wet. Wahnpoaron Piter kamehlelehiong kitail: “Meid pai kumwail ma aramas akan lahlahwei kumwail pwehki mwaren Krais; pwe met wehwehki me [“manaman,” NW] lingalingo, [“sapwellimen Koht manaman,” NW], ketidiongehr rehmwail.” (1 Pit. 4:14) Atail lelohng kalokolok kan pwehki atail kin utung dahme pwung kin kasalehda me Koht kin kupwurperenkin kitail. (Mad. 5:10-12; Sohn 15:20) Ia uwen peren laud me kadehdehpen sapwellimen Siohwa kupwuramwahu kin wahdo!

Kasongosong Sang Iengetail kan

8. (a) Dahme kahrehda Sosua oh Kalep kak pelianda kasongosong sang iangara ko? (b) Dahme kitail kak sukuhlki sang ara mehn kahlemeng?

⁸ Ehu uhwong me sohte kin sansal me Kristian kan anahne dadaur iei kasongosong sang iengerail kan. Ahpw pwehki sapwellimen Siohwa manaman me uhdahn kehlail sang madamadau en sampah me kin kamwakid aramas, kitail kak pelianda aramas akan me kin kapailoke kitail, lohkiseli lokaia likamw duwen kitail, de kin song en idingkihong kitail en wia arail koasoandi kan. Karasepe, dahme kin kahrehiong Sosua oh Kalep en sapwungki lipoahrok ehk teiko me pekederla nan sapwen Kenan?  Sapwellimen Koht manaman kin kamwakid ira en ahneki madamadau tohrohr.​—Wadek Nempe 13:30; 14:6-10, 24.

9. Dahme kahrehda Kristian kan kin anahne men weksang aramas tohto?

⁹ Pil duwehte, sapwellimen Koht manaman kin kakehlaka sapwellimen Sises wahnpoaron kan en peikiong Koht a kaidehn irail kan me aramas tohto kin wauneki nin duwen sounpadahk kei en pelien lamalam pwung. (Wiewia 4:21, 31; 5:29, 32) Pali laud en aramas akan kin mwahuki wia dahme meteikan koaros kin wia pwe re sohte men akamai. Ahpw Kristian mehlel kan kin kalapw anahne kasalehda ni sansal dahme irail ese me pwung. Mendahki met, re kin kehlailkihda sapwellimen Koht manaman oh sohte kin masak arail pahn kin weksang meteikan. (2 Tim. 1:7) Kitail en tehk ehu wasa me kitail en dehr dukula pahn kasongosong sang iengetail kan.

10. Soangen pilipil apwal dahieu me ekei Kristian kin ahneki?

¹⁰ Ekei me pwulopwul kan ele kin apwalki wiahda pilipil ma re esehda me kompoakparail men kin wiewia tiahk ehu me uhwong Paipel. Ele re pehm me likilik me mi nanpwungarail pahn ohla ma re peki rehn elder kan ren sewese kompoakparailo. Kahrehda re sohte men koasoia ireo mendahki ma met sohte pahn wia kamwahu ong koaros me pidada. Me wiahda sapwungo ele kin ngidingidki kompoakepah ko en ekihla dipeo. Ei mehlel, kahpwal wet sohte wia mehkot kapwuriamwei ong me pwulopwul kan. Ekei aramas laud kan pil kin diarada me e apwal en tuhwong elder kan nan mwomwohdiso oh koasoia sapwung ehu me kompoakparail men de kisehrail nan peneinei kin wiahda. Ahpw ia duwen Kristian mehlel men eh kin mwekidki kasongosong pwukat?

11, 12. Dahme keieu mwahu ken wia ma emen tohnmwomwohdiso peki rehmw en dehr ndahda eh wiewia sapwung? Dahme kahrehda?

¹¹ Medewehla met. Ia duwen ma Alex, brother pwulopwul men, esehda me Steve, kompoakepah men nan mwomwohdiso, kin ahnla kilikilang kilel suwed? Alex ndaiong Steve me e uhdahn pwunodki dahme e wiewia. Ahpw Steve sohte nsenohki. Ni Alex eh kangoange kompoakepaho en koasoiong elder kan duwen met, Steve ndaiong Alex me ma e wia kompoakepah men, e sohte pahn ndahda. Ia duwe, Alex pahn suwedki eh pahn sohla kompoakepahnki Steve? Ele e kin medewe ihs me elder kan pahn kamehlele ma Steve pahn kahmahmki soahng koaros. Ahpw irairo sohte pahn mwahula ma Alex pahn nennenlahte. E kak imwikihla Steve eh sohla pahn ahneki nanpwungmwahu rehn Siohwa. E pahn mwahu ong Alex en tamanda me e “me keper pwunodki dahme aramas teikan lemeleme duwen kowe, ahpw ma ke pahn likih KAUN-O, ke pahn saledek sang apwal.” (Lep. Pad. 29:25) Dahme Alex pil kak wia? Mwein ni elen limpoak ahpw inen, e anahne pwurehng koasoiong Steve duwen eh kahpwalo. Met pahn anahne eimah, ahpw mwein ih ahnsou me Steve pahn mwahuki koasoia eh kahpwalo. Alex anahne pwurehng kangoange Steve en koasoiong elder kan oh ndaiong ih me ma Steve sohte wia met erein ahnsou ehu me konehng, eri Alex pahn padahkihong elder kan duwen ireo.​—Lip. 5:1.

 ¹² Ma ke lelohng soahng wet, ele nin tapio kompoakepahmwo sohte pahn kalahnganki omw nantihong sewese ih. Ahpw mwein e pahn pohnese ehu rahn me ke kin wiewia dahme keieu mwahu ong ih. Ma me wiahda sapwungo pwungki ale sawas, eri ele e pahn ahnsou koaros kalahngankihong uhk omw eimah oh lelepek. Ni pali teio, ma e lingeringerte pahmw pwehki omw peki rehn elder ko ren sewese ih, ia duwe, e kin wia soangen kompoakepah me ke men ahneki? E kin ahnsou koaros pwung en kaperenda Kompoakepatail me keieu lapalap, Siohwa. Ni atail kin mwohneki mahs ih, meteikan me kin poakohng ih pahn wauneki kitail pwehki atail lelepek oh re kin wiahla kompoakepatail mehlel. Kitail en dehr kihong Tepil eh ahnsou mwahu nan mwomwohdiso en Kristian. Ma kitail pahn wia met, kitail pahn uhdahn kansensuwedihada sapwellimen Siohwa manaman. Ahpw kitail kin peikiong kaweid en manamano sang ni atail nantihong pwe mwomwohdiso en Kristian en mwakelekel.​—Ep. 4:27, 30.

Soangsoangen Kahpwal Koaros

13. Soangen kahpwal dah kan me sapwellimen Siohwa aramas akan kin lelohng? Dahme kahrehda soangen kahpwal pwukat kin kalapw wiawi?

¹³ Kahpwal kan kakete wiawi pwehki apwal en mwohni, sohla doadoahk, melimel laud ape, mehlahn kompoakepatail, soumwahu oh pil soahng teikan. Pwehki atail kin mi nan “ahnsou apwal,” kitail kin kasik me kitail koaros pahn anahne dadaur pahn ekei kahpwal kan. (2 Tim. 3:1) Ni met eh pahn pwarada, e kesempwal kitail en dehr pwunodada. Sapwellimen Koht manaman kak kakehlaka kitail en dadaur kahpwal sohte lipilipil.

14. Dahme kin kakehlaka Sohp en dadaur eh kahpwal kan?

¹⁴ Sohp kin wie lokolongki ehu kahpwal a ehu pil pwarada. Nah pelin mahn kan oh seri kan mehla, solahr kompoakepah kan oh e soumwahuda. Oh eh pwoudo solahr koapworopworki Siohwa. (Sohp 1:13-19; 2:7-9) Ahpw Sohp diar kamweit mehlel rehn Elihu. En Elihu koasoi oh ire kesempwal me Siohwa kupwurki mahsanihong Sohp iei: “Nennenla ekis ahnsou, . . . medemedewe soahng mwahu kan me Koht ketin wiadahr.” (Sohp 37:14) Dahme kin sewese Sohp en dadaur eh kahpwal kan? Oh dahme kak sewese kitail en dadaur atail kahpwal kan? Iei en tamataman oh doudouloale duwen sapwellimen Siohwa manaman eh kin sansalda ni soangsoangen wiewia kan. (Sohp 38:1-41; 42:1, 2) Mwein kitail tamanda ahnsou kan nan atail mour me kin kadehdehda me Koht ketin nsenohki emenemen kitail. E kin ketin nsenohkihte kitail.

15. Dahme kin kakehlaka wahnpoaron Pohl pwe en dadaur kahpwal kan?

¹⁵ Wahnpoaron Pohl kin dadaur soangen kahpwal tohto me e kakete mehkihla pwehki eh pwoson. (2 Kor. 11:23-28) Ia duwen eh kin kolokol eh toupahrek oh meleilei pahn apwal pwukat? Sang ni eh kin kapakap oh likih Siohwa. Erein ahnsou apwal kan me kakete imwikihla eh pahn kamakamala, Pohl ntingihedi: “Kaun-o ketiket rehi, oh ketin kakehlaka ie; ihme kahrehda ei kak kalohkiseli mahseno unsek ong mehn liki kan koaros pwe re en rong; oh I pil pitsangehr mehla.” (2 Tim. 4:17) Kahrehda, sang ni dahme e lelohng, Pohl kak kamehlelehiong ienge me pwoson kan me re sohte anahne “pwunodki mehkot.”​—Wadek Pilipai 4:6, 7; Episos 6:10.

16, 17. Menlau kihda karasepe me pid ia duwen Siohwa eh kin ketin kakehlaka sapwellime aramas akan pwe ren powehdi kahpwal kan rahnwet.

 ¹⁶ Emen me kin kilang ia duwen Siohwa eh kin ketin apwalih sapwellime kan iei pioneer men me adaneki Roxana. Ni eh peki rehn eh kaunen doadoahk ma e kak kommoal rahn kei pwe en iang towehda kapokon ehu, ohlo lingeringer nda me ma e wia met, e solahr pahn doadoahk. Roxana towehda kapokono oh e ngidingid kapakapki me e pahn kak kolokolete eh doadoahko. Mwurin mwo, e meleileidi. Niehd mwurin kapokono, eh kauno wia dahme e ndaiong ih. Roxana pwunodikihda met. E anahne doadoahko, mehnda ma pwei tikitik, pwe en apwalih eh peneinei. E pwurehng kapakap, oh e medemedewe me Koht kin ketin sewesehki ih eh anahn en nanpwungmwahu reh ni ahnsoun kapokon, eri e pil kak ketin sewese ih en apwalih eh anahn en paliwar. Ni eh kohkohla ni imweo, Roxana kilangada ni wasa ehu nting me nda re anahne tohndoadoahk koahiek en doadoahngki misihn en deidei nan wasahn wiahda likou. Ih eri audehda doaropwe en doadoahko. Kaunen wasao pohnese me Roxana sohte ahneki koahiek wet ahpw e mweidohng ih en doadoahk oh pweineo kereniong pak riau laud sang doadoahk teio. Roxana pehm me eh kapakap kan pasapengla. Ahpw kapai me keieu laud iei me e kak ehukihong ekei ienge tohndoadoahk kan duwen rongamwahwo. Limmen rehrail iangahki kaunen doadoahko ale padahk mehlel oh papidaisla.

¹⁷ Ekei pak, e mwomwen me atail kapakap kan kin sohte pasapengla mwadang de ni ahl me kitail kasik. Ma ei, mie kahrepe. Siohwa mwahngih met, ahpw ele e pahn ihte sansal ong kitail ni ahnsou kohkohdo. Dahme kitail kak kamehlele iei me Koht sohte kin ketin likidmeliehla sapwellime aramas lelepek kan.—Ipru 6:10.

Kahpwal oh Kasongosong kan

18, 19. (a) Dahme kahrehda kitail kak kasik kahpwal oh kasongosong kan? (b) Ia duwen omw kak powehdi kahpwal kan?

¹⁸ Sapwellimen Siohwa aramas akan sohte kin pwuriamweikihla ni ar lelohng kasongosong, mworusala, kalokolok oh kasongosong sang iengerail kan. Sampah kin kailongkin kitail. (Sohn 15:17-19) Ahpw sapwellimen Koht manaman kak sewese kitail en powehdi kahpwal kan me kitail kin lelohng ni atail kin papah ih. Siohwa sohte pahn ketin mweidohng kitail en ale kasongosong me kitail sohte kak powehdi. (1 Kor. 10:13) E sohte pahn ketin keseikitailla. (Ipru 13:5) Atail peikiong sapwellime Mahsen kin pere oh kakehlaka kitail. Oh pil sapwellimen Koht manaman kak kamwakid iengetail me pwoson kan en sewese kitail ni ahnsou me kitail uhdahn anahne sawas.

¹⁹ Kitail koaros en pousehlahte ale sapwellimen Koht manaman sang ni atail kapakap oh onop iren Paipel kan. Kitail en pousehlahte ‘kehlailkihda soangen kehlail koaros me kin pwilisang ni sapwellime roson lingan, pwe kitail en kak nannanti nan apwal akan koaros ni kanengamah.’​—Kol. 1:11.

[Nting tikitik me mi pah]

Ia Duwen Omw Pahn Sapeng?

• Ia duwen omw kak kaunopada en dadaur kalokolok?

• Dahme ke anahne wia ma emen peki rehmw en dehr ndahda eh sapwung kan?

• Dahme ke kak kamehlele ni omw kin lelohng soangsoangen kahpwal kan?

[Peidek en Onop]

[Kilel nan pali 30]

Dahme kitail kak sukuhlki sang Sosua oh Kalep?

[Kilel nan pali 31]

Ia duwen omw kak sewese kompoakepahmw men me wiahda sapwung?