Manaman en Koht Kin Kakehlaka Kitail en Powehdi Kasongosong oh Pepehm en Mworusala

“Kumwail pahn audaudkihda manaman ni ahnsou me [“sapwellimen Koht manaman,” NW] pahn ketidohng kumwail.”—WIEWIA 1:8.

1, 2. Soangen sawas dahieu me Sises ketin inoukihong sapwellime tohnpadahk ko, oh dahme kahrehda re anahne met?

SISES mwahngih me sapwellime tohnpadahk ko sohte kak peikiong soahng koaros me e ketin kehkehlingkihong irail ni pein arail kehl. Ni eh ketin medewehla uwen laud arail doadoahk en kalohk, uwen kehlail en pelierail kan, oh uwen luwet en aramas, e sansal me re anahne soangen kehl tohrohr ehu. Eri, mwohnte eh ketidahla nanleng, Sises ketin kamehlelehiong sapwellime tohnpadahk ko: “Kumwail pahn audaudkihda manaman ni ahnsou me [“sapwellimen Koht manaman,” NW] pahn ketidohng kumwail, oh kumwail ahpw pahn kadehde ie nan Serusalem, nan Sudia pwon, oh Sameria, oh lelohng ni irepen sampah.”—Wiewia 1:8.

² Inowo tepida pweida ni Pendekos nan pahr 33, ni ahnsou me sapwellimen Koht manaman kakehlailih sapwellimen Sises tohnpadahk kan pwe ren kalohkiseli arail padahk kan nan Serusalem. Uhwong kan sohte kak kauhdi irail. (Wiewia 4:20) Sapwellimen Sises tohnpadahk lelepek kan me pil iangahki kitail uhdahn pahn anahne soangen kehl wet me Koht kin ketikihda “ahnsou koaros lel ni imwin kawa.”—Mad. 28:20.

3. Dahme sapwellimen Siohwa manaman kak sewese kitail en wia?

³ Sises ketin inoukihong sapwellime tohnpadahk ko me ‘irail pahn audaudkihda manaman ni ahnsou me sapwellimen Koht manaman pahn ketidohng irail.’ Manamano me Siohwa Koht, Wasa Lapalahpie, ketikihong sapwellime ladu kan kin kakehlaka emenemen kitail oh kihong kitail koahiek en kapwaiada atail inou ong Koht oh ma anahn, pelianda soahng kan me kin kasonge kitail en wia mehkot me uhwong kupwuren Koht.—Wadek Maika 3:8; 2 Korint 4:7.

4. Dahme kitail pahn tehkpene nan iren onop wet? Dahme kahrehda?

⁴ Ia duwen sapwellimen Koht manaman eh kin kakehlailih kitail? Ia duwen manamano eh kin kamwakid atail wiewia kan nan soangsoangen irair kan? Ni atail kin nantihong papah Koht ni lelepek, kitail kin lelohng kahpwal tohto me Sehdan oh eh koasoandi wet kin kahrehda, de pein atail soh unsek. E kesempwal kitail en powehdi soangen kahpwal pwukat pwe kitail en dadaur nin duwen Kristian kan, ahnsou koaros iang kalohk oh kolokol atail nanpwungmwahu rehn Siohwa. Kitail pahn tehkpene ia duwen sapwellimen Koht manaman eh kin sewese kitail en pelianda kasongosong kan oh nantihong powehdi pepehm en pwang oh mworusala.

Pelianda Kasongosong kan

5. Ia duwen kapakap eh kak kakehlaka kitail?

⁵ Sises ketin padahkihong sapwellime kan en kapakap: “Komw dehr ketin mweidohng kiht se en kin lelohng nan songosong laud, a komw ketin nekid kiht sang ni me suwed en Sehdan.” (Mad. 6:13) Siohwa sohte pahn likidmeliehla sapwellime ladu lelepek kan me kin kapakap duwe met. Ehu ahnsou, Sises mahsanih: “Samamwail me ketiket nanleng soh pahn ketikihong [“sapwellime manaman,” NW] irail kan me kin peki reh?” (Luk 11:13) Ia uwen kansenamwahu  me Siohwa ketin inoukihda me e pahn ketikihong kitail manaman wet pwe kitail en wia dahme pwung! Met sohte kin wehwehki me Siohwa pahn ketin irehdihsang kitail kasongosong kan. (1 Kor. 10:13) Ahpw ni atail kin lelohng kasongosong kan, ih ahnsou me kitail kin ngidingid kapakapki sawas.—Mad. 26:42.

6. Sapwellimen Sises pasapeng ong en Sehdan kasongosong kan kin poahsoankihda dahieu?

⁶ Ni eh ketin sapeng en Sehdan kasongosong kan, Sises ketin doadoahngki iren Paipel kan. E kin ketin tamataman Mahsen en Koht ni eh ketin sapeng, mahsanih: “E ntingdier . . . E pil ntingdier . . . Sehdan, kohkohweisang ie! Pwe e ntingdier, ‘Ke pahn pwongih Kaun-o, omw Koht, oh ihete me ke pahn papah.’” Limpoak ong Siohwa oh sapwellime Mahsen kin kamwakid Sises en ketin soikala kasongosong kan me Sehdan kasongehki ih. (Mad. 4:1-10) Mwurin Sises eh pwurepwurehng ketin pelianda kasongosong kan, Sehdan kohkohlahsang reh.

7. Ia duwen Paipel eh kin sewese kitail en pelianda kasongosong kan?

⁷ Sises kin ketin likih Mahsen en Koht pwe en ketin pelianda en Tepil kasongosong kan, eri, ia uwen atail anahne wia met! Mehlel, pwe kitail en pelianda Tepil oh eh kasongosong kan, kitail anahne mahs koasoanehdi teng en ese sapwellimen Koht koasoandi kan oh uhdahn peikiong mepwukat. Aramas tohto kin mwekidki peikiong koasoandi kan en Paipel ni arail kin sukuhlki iren Paipel kan oh tapiada wehwehki oh kesempwalki sapwellimen Koht erpit oh pwung. Mehlel, “Mahsen en Koht” ahneki manaman en wehwehki “ineng oh lamalam en nan kapehd en aramas.” (Ipru 4:12) Ma emen kin wadek oh doudouloale iren Paipel kan pak tohto, e kak wehwehki laud ‘sapwellimen Siohwa mehlel.’ (Dan. 9:13) Pwehki met me mehlel, kitail anahne doudouloale iren Paipel kan me kin pid atail luwet kan.

8. Ia duwen atail kak ale sapwellimen Koht manaman?

⁸ Patehng Sises eh mwahngih iren Paipel kan, e kak ketin pelianda kasongosong kan pwehki eh kin ketin dirkihla sapwellimen Koht manaman. (Luk 4:1) Pwe kitail en kehlail oh ahneki koahiek duwehte ih, kitail anahne karanihala Siohwa. Eri kitail kin wia met sang ni atail kin uhdahn isaneki ahl koaros me e ketin doadoahngki pwe en ketikihong kitail sapwellime manaman. Ekei ahl pwukat iei onop Paipel, kapakap, oh werekiong riatail kan. (Seims 4:7, 8) Me tohto pil kin wehwehki me kitail anahne uhdahn kedirepwki wiewia pwukat oh doadoahk teikan en Kristian, pwe met kin sewese kitail en medemedewehte mehkan me pid Koht oh kaudok.

9, 10. (a) Ia ekei kasongosong kan me kalapw wiawihong Kristian kan? (b) Ia duwen doudouloale oh kapakap ar kin kakehlaka iuk en pelianda kasongosong kan mehnda ma ke pwangada?

⁹ Kasongosong dah kan me ke anahne pelianda? Mie pak ke ale kasongosong en pwangih emen me kaidehn omw pwoud? Ma kowe kiripw, mie pak ke men iangada emen me sohte mi nan padahk mehlel? Ni arail kin kilang TV de doadoahngki Internet, Kristian kan ele mwadang lelohng kasongosong en kilang mehkot suwed. Ma met wiawihong uhk, ia pahn omw mwekid? E pahn ele loalokong en doudouloale ia duwen ehu mwekid sapwung eh kak kahluwalahng pil ehu mwekid sapwung lao lel dihp laud. (Seims 1:14, 15) Nna medewehla ia duwen omw pahn kamedekihala Siohwa, mwomwohdiso, oh pil omw peneinei, ma ke wiahda dihp laud. Ahpw ahneki nsenmwakelekel kin kohsang ni omw kin kolokol omw lelepek ong sapwellimen Koht kaweid kan. (Wadek Melkahka 119:37; Lepin Padahk 22:3.) Sohte lipilipil ahnsou dah me ke kin lelohng kasongosong kan, koasoanehdi teng en kapakapki kehl en pelianda mepwukat.

¹⁰ Mie mehkot tohrohr me kitail en tamataman duwen kasongosong en Tepil. Sehdan pwarowohng rehn Sises mwurin eh ketin wia kaisihsol erein rahn 40 nan sapwtehn. E sansal me Sehdan medewe me met iei ahnsou mwahu en kasonge en Sises eh lelepek. Sehdan pil kin rapahki ahnsou mwahu en kasonge atail lelepek. Kahrehda, e kesempwal kitail en kin kolokol nanpwungmwahu rehn Koht. Sehdan  kin kalapw kasonge kitail ni eh kin diar ahnsou me kitail kin uhdahn luwet. Eri, ahnsou sohte lipilipil me kitail pwangada de mworusala, kitail anahne koasoanehdi teng laud sang mahs en peki rehn Siohwa sapwellime sawas oh manaman.—2 Kor. 12:8-10.

Pwangada oh Mworusala

11, 12. (a) Dahme kahrehda me tohto kin mworusala rahnpwukat? (b) Dahme kak kakehlaka kitail en pelianda atail pepehm en mworusala?

¹¹ Nin duwen aramas soh unsek kei, kitail kin ekei pak mworusala. Met ele kin mehlel rahnpwukat pwehki atail ahnsou me inenen kapwunod. Kitail kin momour ni ahnsou me ele keieu apwal sang mahs leledo met nin sampah pwon. (2 Tim. 3:1-5) Ni Armakedon eh kohkohdo, kapwunod kan me pid mwohni, pepehm kan oh kahpwal teikan pahn wie lalaudla. Eri, kitail en dehr pwuriamweiki me ekei kin apwalkihda en kapwaiada arail pwukoa kan en peneinei. Re kin pwangada, oh ele kin ekis ekis solahr kak apwalihala arail pwukoa kan. Ma met kin mehlel rehmw, ia duwen omw kak powehdi met?

¹² Tamataman me Sises ketin kamehlelehiong sapwellime tohnpadahk kan me e pahn ketikihong irail sawasparail me iei sapwellimen Koht manaman. (Wadek Sohn 14:16, 17.) Manaman wet me keieu kehlail nanleng oh sampah. Siohwa kin ketin doadoahngki manaman wet pwe en kak ketikihong kitail kehl me “siksang” me kitail anahne pwe en dadaur nan apwal. (Ep. 3:20) Wahnpoaron Pohl nda me ni atail kin koapworopworki manaman wet, kitail pahn ale “manaman lapalap” mehnda ma ‘soangen apwal koaros kin lel kitail.’ (2 Kor. 4:7, 8) Siohwa sohte ketin inoukihda me e pahn ketikihsang atail kahpwal, ahpw e kin ketin kamehlelehiong kitail me e pahn ketin doadoahngki sapwellime manaman en kin kakehlaka kitail en powehdi kahpwal.—Mel. 46:1.

13. (a) Ia duwen emen me pwulopwul eh kin ale kehl en powehdi eh kahpwal? (b) Ke ese mehn kahlemeng kan me duwehte met?

¹³ Medewehla mehn kahlemeng en Stephanie, pioneer men me sounpar 19. Ni ahnsou me e sounpar 12, e mwoatorala oh toahkte kan nda me mie weren kanser nan eh mwahliel. Sang ahnsowo, e pwal pak riau, ale ehu wiepen wini en kanser oh e pil pwurehng mwoatorala pak riau me kahrehda palimeingih solahr kak mwekid mwahu oh pil solahr kak kilang mwahu wasa. Stephanie anahne kanahieng pwe en kak wia soahng kesempwal kan me duwehte towehda mihting kan oh kalohk. Ahpw e kin pehm me Siohwa kin ketin sewesehki ih sapwellime manaman ni ahl tohto pwe en dadaurete. Sawasepen Paipel kan me kin koasoia dahme kin lelohng riatail Kristian teikan kin kangoange ih ni eh kin  nan kapehd tikitikla. Brother oh sister kan kin kangoange ih ni arail kin kadarowohng ih kisinlikou kan de koasoiong ih mwohn de mwurin mihting kan. Irail kan me kin nsenohki padahk mehlel kin kalahnganki dahme Stephanie kin padahkihong irail ni arail kin kohla ni imweo pwe ren onop Paipel. Stephanie kin uhdahn kalahngankihong Siohwa mepwukat koaros. Iren Paipel me e keieu perenki iei Melkahka 41:3. E kin kamehlele me ireo kin pweida reh.

14. Dahme kitail en dehr wia ni atail kin pwangada de pwunodada? Dahme kahrehda?

¹⁴ Ni atail kin pwangada de pwunodada, kitail en dehr medewe me atail pahn powehdi mepwukat iei atail pahn katikala atail ahnsou me pid atail kaudokiong Siohwa. Met me keieu sapwung en wia. Dahme kahrehda? Pwehki soangen wiewia kan me duwehte pein atail onop Paipel de onop en peneinei, kalohk, iang mihting kan iei ahl kan me sapwellimen Koht manaman pahn kakehlakahda kitail. Wiewia pwukat kin ahnsou koaros kansenamwahu. (Wadek Madiu 11:28, 29.) Riatail Kristian akan kin kalapw leledo ni mihting kan pwang, ahpw ni ahnsou me re pahn pwurala ni imwarail ko, e kin mwomwen me re onehda sapahl arail kehl!   

15. (a) Siohwa ketin inoukihda me e pahn ketin kamengeila mour en Kristian? Menlau kawehwehda sang iren Paipel kan. (b) Dahme Koht ketin inoukihong kitail? Peidek dahieu me kohda?

¹⁵ Met sohte wehwehki me pwukoa kan en tohnpadahk en Krais kin marahra. Kitail anahne nantihong en wia Kristian lelepek men. (Mad. 16:24-26; Luk 13:24) Ahpw sang sapwellime manaman, Siohwa kak ketin kakehlakahda me pwangadahr men. Soukohp Aiseia ntingihdi: “Irail kan me kin koapworopworki KAUN-O, pahn onehda sapahl ar kehl. Re pahn kin kehlail, rasehng ikel kan; ni ar pahn kin tang, re sohte pahn pwangada; ni ar pahn kin alu, re sohte pahn luwetala.” (Ais. 40:29-31) Ihme kahrehda kitail en idek rehtail, ia kahrepen ei kin pehm me ei pwukoahn Kristian kan kin kapwang?

16. Dahme kitail kak wia pwe en kihsang soahng kan me kin kahrehda kitail en pwangada de mworusala?

¹⁶ Mahsen en Siohwa kin kangoange kitail en pilada dahme keieu kesempwal. (Pil. 1:10) Ni wahnpoaron Pohl eh karasahiong mour en Kristian duwehte weiren tang reirei ehu, e kaweidki: “Kitail kesehsang kitail mehkoaros me kerempwa kitail, . . . oh kitail en nantihong nan atail mour me kitail tapihadahr, rasehng atail kin tang kehlail ni atail kin weirentang.” (Ipru 12:1) E kasalehda me kitail en dehr rapahki soahng kan me sohte kesempwal me pahn kahrehda kitail en pwangada. Ele ekei kitail kin songosong wia soahng tohto nan atail mour. Eri ma ke kin kalapw pwangada oh pwunodada, ele e pahn mwahu en tehk ia duwen omw kin doadoahngki omw ahnsou ong doadoahk en mwohni, ia uwen omw kin kalapw seiloakla mwemweit, oh ia uwen omw kin mouren mwadong de soangen kamweit teikan. Kitail anahne toupahrek pwe en pohnese me kitail sohte kak wia soahng koaros oh anahne kamalaulauiala atail wiewia kan me sohte kesempwal.

17. Dahme kahrehda ekei ele kin mworusala? Dahme Siohwa ketin kamehlelehiong kitail?

¹⁷ Ele ekei kitail pil kin mworusala pwehki imwilahn koasoandi wet eh saikinte leledo nin duwen atail kin kasikasik. Ahpw emen me kin pehm duwe met kak ale kangoang sang Apakuk 2:3 me mahsanih: “E saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.” Siohwa ketin kamehlelehiong kitail me imwilahn koasoandi wet pahn leledo ni ahnsou me e ketin koasoanehdier!

18. (a) Inou dah kan kin kakehlaka iuk? (b) Ia duwen atail pahn paiekihda iren onop en mwuhr?

 ¹⁸ Mehlel, sapwellimen Siohwa ladu lelepek koaros kin inengieng ahnsou me solahr emen pahn pwangada oh mworusala oh koaros me momour pahn “pwulopwulla oh kehlailda.” (Sohp 33:25) Pil ahnsou wet kitail kak kakehlaka loalatail sang sapwellimen Koht manaman ni atail kin iang wia wiewia kan me pid atail kaudokiong Siohwa. (2 Kor. 4:16; Ep. 3:16) Dehr mweidohng pwang en kahrehda omw katihasang kapai kan me poatopoat. Kahpwal koaros, sohte lipilipil ma e kohsang kasongosong kan, de ke pwangada, de mworusala, re pahn sohrala. Ma e sohte pahn mwadang sohrala, a e pahn sohrala nan sapwellimen Koht sampah kapw. Nan iren onop en mwuhr, kitail pahn tehkpene ia duwen sapwellimen Koht manaman eh kin kakehlaka Kristian kan en powehdi kalokolok, pelianda kasongosong sang iengerail kan oh dadaur nan soangsoangen kahpwal teikan.

Ia Duwen Omw Pahn Sapeng?

• Ia duwen wadek Paipel eh kin kakehlaka kitail?

• Ia duwen kapakap oh doudouloale ara kin kakehlaka kitail?

• Ia duwen omw kak kihsang soahng kan me pahn kahrehda ken mworusala?

[Peidek en Onop]

[Kilel kan nan pali 26]

Mihting kan kin kakehlaka kitail