Mie Ngehn me Kin Momour Ekis Wasa Tohrohr—Ihs Irail?

Lihalaud en Iurop men pedolong nan ihmw sarawi ehu, kelepwikihdi mwohn sansal en Mery oh rosario mi nan peho. Peneinei en Aperika ehu kin wudekihdi sakau en wai limwahn sousou en emen kisehrail me re kin wauneki. Mwahnakapw men nan Amerika kin kaisihsol, doudouloale oh kasikasik me e kak koasoiong ngehn emen me e kin kamehlele me kin pere ih. Pahdere men nan Eisia kin isikada doaropwe kan nin duwen meirong ehu ong ngenen eh peneinei me melahr akan.

DAHME duwepenehte rehn aramas pwukat? Irail koaros kin kamehlele me mie ngehn akan me kin mi wasa kis oh re kak tuhwong ngehn pwukat. Re pil kamehlele me ngehn pwukat ahneki koahiek en kamwakid laud mouren aramas akan. Met kaidehn madamadau kapw ieu me kapwuriamwei. Dahme kapwuriamwei iei eh mie madamadau tohto me uhpene me pid ihs me kin mi nan wasa me ngehn akan kin mihmi ie.

Irail me iang pelien lamalam en Muslim kin kaudokiong Koht tehmen iei Allah. * Irail akan me dene irail Kristian kin nda me Koht meh silimen, Koht Sahm, Koht Nah oh Koht Ngehn Sarawi. Irail akan me iang pelien lamalam en Hindu kin kamehlele me mie soangen koht ohl oh lih kid kei. Ekei aramas kin nda me ngehn akan kin mi nan mahn, tuhke, takai oh pil pihl akan. A ekei kin kamehlele dahme pwuhk kan oh kasdo kan kin koasoiahki duwen tohnleng kan, ngehn saut kan, eni kan oh pil koht lih oh ohl akan.

Duwehte madamadau wekpeseng tohto kan duwen koht oh soahng kan me aramas kin pwongih, pil mie soangen madamadau tohto me sohte duwepenehte me pid ia duwen atail pahn koasoiong ngehn akan. Kitail kak nda me kaidehn wiepen koasoiong ngehn pwukat koaros me pwung. Medewe duwen met: Mwohn atail kin delepwon, kitail anahne ese ihs me kitail pahn koasoiong oh kitail pil anahne ese me aramaso uhdahn mie oh e pahn sapeng kitail. En song koasoiong aramas emen me sohte mie, pahn sohte katepe. Suwed sang met, e uhdahn keper en koasoiong emen me mwersuwed.

Eri, ihs me uhdahn kin mi nan wasa me ngehn akan kin mi ie? Paipel sohte kin sapenglahte peidek wet ahpw e pil kin kawehwehda ihs me kitail en kin koasoiong oh dahme kitail en kasik. Pousehlahte omw wadawad. Ke pahn pwuriamweikihla dahme Paipel pahn kasalehda.

[Nting tikitik me mi pah]