Pitsang Kemehla Pein Ih

EKEI Sounkadehdehn Siohwa kereniongehr kanekehla arail doadoahk en kalohk nan kisin kousapw ehu ni en ohl laud men daulih irail oh e kolokol Paipel ehu. Re nantihong en ehukihong ohlo “rongamwahwo” ahpw e pwurepwurehng ndaiong irail, ‘I men kelehpwla.’ Ahpw mwuhr e pwungkihda en iang emen Sounkadehde ko mwengehn soutik. Rahn mwurio, pil emen Sounkadehde pwurala reh pwehn ehukihong ih iren Paipel kan. E kin mi nan imwen me mah kan.

Ni ara koasoakoasoipene, ohl maho nda: “Ke kapitala ei mour. Aio, I kohkohlahng en ei pwoudo sousowo . . . oh I kereniong kemeiehla. Mwohn ei tuhwong kumwail aio, I alialuhseli mwahl erein awa pahieu nanwelo. I song en kansenamwahwihiela sang nan nei pwuhken koulo ahpw sohte kak. Kumwail kohdo ni ahnsou me keieu mwahu oh I kalahngankihong Koht ni mehlel.”

Mwurin ahnsoukis, e dierekda me ngehn suwed akan me kin kahrehiong ohl mah menet en song en kemehla pein ih. Ahpw ni eh loalokongkihla padahk kan nan Paipel, met sewese ih en pitsang manaman en ngehn suwed kan. (Ep. 6:11-18) E pil nsenamwahula ni eh sukuhlki me “e pahn mie kaiasada ong me pwung kan oh me sapwung kan.” (Wiewia 24:15, NW) E sohte werei, a e inoukihda eh mour ong Siohwa Koht oh papidaisla nan pihl ni eh sounpar 81. Lokaia oh wiewia kadek iangahki “kakehlepen loalatail me Pwuhk Sarawi kin ketikihong kitail,” doarehla ohl mah menet sang kemehla pein ih oh kihong ih koapworopwor en mour soutuk.—Rom 6:23; 15:4.