Poakohng me Pwung ni Mohngiongomw Unsek

“Komw kin ketin poakohng dahme pwung.”​—MEL. 45:7.

1. Dahme pahn sewese kitail en idawehn “ahl me pwung”?

SANG ni sapwellime Mahsen oh manaman, Siohwa kin ketin kahluwa sapwellime aramas akan nan “ahl me pwung.” (Mel. 23:3) Ahpw pwehki atail soh unsek, kitail kin kalapw wetsang nan ahlo. Pwe kitail en pwurehng wia dahme pwung, kitail anahne koasoanehdi teng en nannanti. Dahme pahn sewese kitail en pweida? Duwehte Sises, kitail anahne poakohng dahme pwung.​—Wadek Melkahka 45:7.

2. Ia wehwehn “ahl me pwung”?

² Ia wehwehn “ahl me pwung”? “Ahl” wet wehwehki elen mour me poahsoankihda sapwellimen Siohwa koasoandi pwung. Ni lokaiahn Ipru oh Krihk, lepin lokaia “pwung” kin dokedoke en tengediong kaweid me pid wiewia kan. Pwehki Siohwa iei “Koht pwung men,” sapwellime tohnkaudok kan kin perenki kilangwohng ih pwe en ketin koasoanehdi ahl en wiewia pwung me re anahne idawehn.—Mel. 31:1.

3. Ia duwen atail kak kalaudehla atail esehla sapwellimen Koht koasoandi pwung kan?

³ Ihte ahl me kitail pahn uhdahn kaparanda Koht iei sang ni atail kin nantihong peikiong sapwellime koasoandi kan ni mohngiong unsek. (Deud. 32:4) Met tepikihda atail pahn sukuhlki duwen Siohwa Koht ni uwen atail kak sang sapwellime Mahsen, Paipel. Ma kitail pahn kalaudehla atail esehla ih oh karanihala ih rahn koaros, kitail pahn kalaudehla atail limpoak ong sapwellime irair pwung. (Seims 4:8) Kitail pil anahne peikiong kaweid en Mahsen en Koht ni ahnsou me kitail anahne wia pilipil kesempwal kan nan mour.

Rapahki Sapwellimen Koht Irair Pwung

4. Dahme kin pidada rapahki sapwellimen Koht irair pwung?

⁴ Wadek Sepanaia 2:3. En rapahki sapwellimen Koht irair pwung kin pidada laud sang atail kin doadoahngki ahnsou ong kalohki rongamwahu en Wehio. Pwe Siohwa en kupwurki atail kin papah ih, atail wiewia kan rahn koaros kin anahne pahrekiong sapwellime koasoandi kan. Dahme irail kan me kin rapahki sapwellimen Siohwa irair pwung anahne wia? Re anahne ‘onehda sapahl pein irail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.’—Ep. 4:24.

5. Dahme pahn sewese kitail en powehdi mehkan me kin kaluwetala kitail?

⁵ Ni atail kin nantihong peikiong sapwellimen Koht koasoandi kan, kitail kin ekei pak mworusala pwehki atail sapwung kan. Dahme kak sewese kitail en powehdi mehkan me kin kaluwetala kitail oh sukuhlki limpoak oh wia dahme pwung? (Lep. Pad. 24:10) Kitail kin ahnsou koaros anahne kapakapohng Siohwa “ni kapehd mehlel diren pwoson.” (Ipru 10:19-22) Sohte lipilipil ma kitail Kristian keidi kan de kitail ahneki koapworopwor en mour nin sampah, kitail kin pwoson meirong en tomw en Sises Krais oh sapwellime pwukoa nin duwen atail Samworo Lapalap. (Rom 5:8; Ipru 4:14-16) Wahnpoaron Sohn ntingihedi: “Ntahn Sapwellime Iehros Sises kin kamwakeleikitailsang nan dipatail akan koaros.” (1 Sohn 1:6, 7) Koht mahsanih: “Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh.” Ia uwen kaselel sapwellimen Siohwa  koasoandi ong kitail sang ni meirong en tomw en sapwellime Ohl kompoake!—Ais. 1:18.

Tehk Omw Tehtehn Mahwen me Kohsang Rehn Koht

6. Dahme kahrehda e kesempwal kitail en tehk atail tehtehn mahwen me kohsang rehn Koht?

⁶ Ahnsou koaros kitail kin anahne perehki ‘mwaremwaratail kan perehpen pwung,’ pwe met iei kisehn tehtehn mahwen kesempwal me kohsang rehn Koht. (Ep. 6:11, 14) Sohte lipilipil ma kitail ahpwtehn inoukihong Siohwa atail mour de kitail kin papah ih sounpar tohto, e kesempwal kitail en tehk atail tehtehn mahwen wet rahn koaros. Dahme kahrehda? Pwehki Tepil oh nah ngehn saut akan ar pisikendiongehr sampah. (Kaud. 12:7-12) Sehdan kin lingeringer, oh e ese me eh ahnsou mwotomwotalahr. Kahrehda, e kin kalaudehla eh uhwong kan ong sapwellimen Koht aramas akan. E kesempwal ong kitail en perehki ‘mwaremwaratail kan perehpen pwung.’

7. Dahme kitail pahn wia ma kitail kin wehwehki me kitail anahne perehki ‘mwaremwaratail kan perehpen pwung’?

⁷ Perehpen mwaremware ehu kin perehla mohngiong. Pwehki atail soh unsek, mohngiongitail kin keper oh kalapw pitihkitaildi. (Ser. 17:9) E kesempwal kitail en kaiahne mohngiongitail pwehki eh kin kalapw wia dahme sapwung. (Sen. 8:21) Ma kitail kin wehwehki me kitail anahne perehki ‘mwaremwaratail kan perehpen pwung,’ kitail sohte pahn kihsang met mehnda ma ahnsou kiste. Ihme kahrehda kitail sohte pahn pilada mehn kamweit kan me pidada mehkan me Koht kin ketin kalahdeki, oh sohte men medemedewe en wia me sapwung. Kitail sohte pahn kin kesehla ahnsou laud ong kilikilang TV. Ahpw, kitail pahn nantihongete wia mehkan me kin kaparanda Siohwa. Mehnda ma kitail pwupwudi pwehki atail medemedewe ineng me sohte konehng ahnsou kis, kitail pahn pwurehng pwourda pwehki sapwellimen Siohwa sawas.—Wadek Lepin Padahk 24:16. *

8. Dahme kahrehda kitail anahne “mehn sansar” en pwoson?

⁸ Ehu kisehn tehtehn mahwen me kohsang rehn Koht iei “mehn sansar” en pwoson. Met kak sewese kitail en “kakunkihla ketieu kisiniei kan sang rehn Me Suwedo.” (Ep. 6:16) Eri, pwoson oh limpoak ong Siohwa kin sewese kitail en wia me pwung oh mihmihte nan ahl en mour soutuk. Ma kitail kin kalaudehla atail sukuhlki poakohng Siohwa, kitail pil pahn kalaudehla atail kesempwalki sapwellime irair pwung. Ahpw ia duwen kadeikpen loalatail? Ia duwen eh kin sewese kitail en nantihong poakohng dahme pwung?

Kolokol Nsenmwakelekel

9. Ia duwen atail kin paiekihda atail kolokol nsenmwakelekel?

⁹ 1 Piter 3:21 (NW) mahsanih: “Me kin pahrekiong met me pil ahnsouwet kin komourkumwailla, iei papidais, (kaidehn kamwakelehsang en aramas samin, ahpw pekipek ehu ong Koht en ahneki nsenmwakelekel,) sang ni iasadahn Sises Krais.” Kahrehda, ahnsou me kitail kin papidais, kitail kin peki rehn Siohwa me kitail en ahneki “nsenmwakelekel.” Pwehki kitail kin pwoson tomwo, ntahn Sises kin  pwaindi dipatail kan oh kahrehda kitail en mwakelekel mwohn silangin Koht. Ahpw pwe kitail en kin mwakelekel mwohn silangin Koht, kitail anahne kolokol atail nsenmwakelekel. Ma ekei pak kadeikpen loalatail kin kadeik oh panawih kitail, kitail anahne kalahnganki me e kin wie doadoahkte ni pwung. Mehn kataman pwukat kin kasalehda me kadeikpen loalatail kin pehmitik ong mehkan me pid sapwellimen Siohwa ahl pwung kan. (1 Tim. 4:2) Ahpw mie ehu soangen sawas me kadeikpen loalen emen pil kak wiahiong irail kan me kin men poakohng dahme pwung.

10, 11. (a) Koasoiahda dahme wiawi me kasalehda kahrepen atail anahne rong kadeikpen loalatail me Paipel kin kaiahnehda. (b) Dahme kahrehda poakohng dahme pwung kak wahdo nsenamwahu?

¹⁰ Ahnsou me kitail kin wia me sapwung, kadeikpen loalatail ele kin kadeikada de kaloke kitail. Emen pwutak pwulopwul sohla weweid ni “ahl me pwung.” E wiahla emen me kin ahnla kilang kilel suwed kan oh tapiada doadoahngki marijuana. E kin ahneki pepehm suwed ni eh kin kohla iang mihting kan, oh leme me e mwalaun ni ahnsou me e kin iang kalohk. Kahrehda e sohla iang kalohk oh mihting kan. E koasoia: “I sehse me kadeikpen loalei me kin wie kadekadeik ie. I mi nan soangen mour wet mpen sounpar pahieu.” Ih eri tepida medemedewe en pwuralahng padahk mehlel. Mendahki e medewe me Siohwa sohte pahn ketin karonge eh kapakap, e kapakap oh peki mahk. Sohte lel minit eisek mwurin eh kapakapo, eh nohno mwemweitdo reh oh kangoange ih en pwurala iang mihting kan. E kohla ni Wasahn Kaudok oh peki rehn elder men en onop reh. Kedekedeo, e papidaisla, oh e kin kalahngankihong Siohwa eh ketin doarehla ih.

¹¹ Kitail sou kin diarada me nsenamwahu mehlel kin kohsang atail wiewia dahme pwung? Ni atail sukuhlki en poakohng dahme pwung oh uhdahn wia met, atail peren kin laudla ni atail wiewia dahme kin kaparanda Samatail nanleng. Oh pil medewehla! Rahno kerendohr me kadeikpen loalen aramas akan koaros pahn wahdohng irail ihte pepehm en nsenamwahu. Re pahn kasalehda ni unsek me re wiawihda rasehng Koht. Kahrehda, met kitail en uhdahn kihong poakepen dahme pwung nan mohngiongitail oh kaparanda Siohwa.—Lep. Pad. 23:15, 16.

12, 13. Ia duwen atail kak kaiahnehda kadeikpen loalatail?

¹² Dahme kitail kak wia pwe en kaiahne kadeikpen loalatail? Ahnsou me kitail kin onop Paipel oh sawaspen Paipel kan, e kesempwal en tamataman me “aramas mwahu [“pwung,” NW] kin medemedewe mwohn ar pahn kin wia ar pasapeng.” (Lep. Pad. 15:28) Medewehla ia duwen met eh wia kamwahu ehu ni ahnsou me kitail kin alehdi peidek kan me pid doadoahk en mwohni. Ma mie soangen doadoahk ehu me kin uhwong koasoandi en Paipel, pali laud en kitail kin mwadangete doadoahngki kaweid kan me pwihn en ladu lelepek oh loalokong kin kihda. Ahpw ni ahnsou me e sohte sansal ma soangen doadoahko konehng kitail en ale de soh, kitail anahne diarada kaweid kan en Paipel me kadoadoahk ong irairo oh medemedewe oh kapakapki ia duwen atail en doadoahngki kaweid ko. Met kin dokedoke soangen kaweid kan me pid atail en dehr kadipekelekele kadeikpen loalen meteikan. (1 Kor. 10:31-33) Ahpw me keieu kitail en nsenohki iei kaweid kan  me kin pidada atail nanpwungmwahu rehn Koht. Ma kitail uhdahn karanih Siohwa, kitail pahn idek rehtail, ‘E pahn kansensuwedihada oh katoutouwihala kupwuren Siohwa ma I wia doadoahk wet?’—Mel. 78:40, 41.

¹³ Ni ahnsou me kitail kin kaunopada ong atail Onop en Kahn Iroir de Onop en Paipel en Mwomwohdiso, kitail anahne tamataman anahnepen atail en kin doudouloale ire kan me kohda. Ia duwe, kitail kin mwadangete lainih pasapeng kan ong peidek en onopo oh doulahng nan parakrap teio? Soangen wiepen onop wet sohte pahn kaloalehla atail poakohng dahme pwung de kakairada kadeikpen loalatail me kin pehmitik ong mehkan. Pwe kitail en kak poakohngala dahme pwung, kitail anahne pwerisek ong onop oh doudouloale dahme kitail wadek nan Mahsen en Koht. Kitail anahne doadoahk laud pwe kitail en sukuhlki en poakohngala dahme pwung.

Inengieng Dahme Pwung

14. Ia duwen Siohwa Koht oh Sises Krais ara kupwurki kitail en perenki atail kin papah Koht?

¹⁴ Siohwa Koht oh Sises Krais kupwurki kitail en peren ni atail kin papah Koht. Dahme pahn sewese kitail en ahneki peren? Atail kin poakohng dahme pwung iei me pahn sawas! Nan sapwellime Kapahrek en Pohn Dohlo, Sises mahsanih: “Meid kaperen irail kan me kin duhpekla oh men nimpilda ong me pwung, pwe re pahn medla.” (Mad. 5:6, NW) Ia ire kesempwal me sansal nan mahsen pwukat ong irail akan me men poakohng dahme pwung?

15, 16. Dahme kak kaitarala en emen eh ineng en esehla Koht?

¹⁵ Me suwedo kin kakaun sampah wet me kitail kin mi loale. (1 Sohn 5:19) Sohte lipilipil mehnia wehi nan sampah, ma kitail pwekada doaropwehn rohng, kitail pahn wadek duwen tiahk lemei me kin inenen suwed sang mahs. Aramas pwung men kin nsensuwedkihla eh kin medemedewe tiahk lemei. (Ekl. 8:9) Nin duwen aramas akan me kin poakohng Siohwa, kitail kin ese me Koht kelehpw kak ketin kaitarala ineng en emen en sukuhlki dahme pwung. Aramas suwed kan kereniong pahn sohrala, oh irail me kin poakohng dahme pwung pahn solahr kilang oh lelohng kahpwal kan me aramas suwed kan oh arail wiewia kan kin kahrehda. (2 Pit. 2:7, 8) Ia uwen kansenamwahu ni met eh pahn pweida!

¹⁶ Nin duwen sapwellimen Siohwa ladu kan me kin idawehn Sises Krais, kitail kin pohnese me irail akan me kin duhpekla oh men nimpilda ong dahme pwung “pahn medla.” Re pahn uhdahn nsenamwahukihla sapwellimen Koht koasoandi en lahng kapw oh sampah kapw, “wasa me pwungen kalahngan en Koht pahn poadada ie.” (2 Pit. 3:13) Eri, kitail en dehr nan kapehd tikitikla de pwuriamweikihla me kahpwal oh tiahk lemei kin kihsang dahme pwung nan sampah suwed wet. (Ekl. 5:8) Siohwa, Koht Wasa Lapalahpie, mwahngih dahme kin wiewiawi oh e pahn kereniong ketin doarehla me kin poakohng dahme pwung.

Paiekihda Omw Poakohng Dahme Pwung

17. Kapai dah kan mie me kohsang poakohng dahme pwung?

¹⁷ Melkahka 146:8 kasalehda pai kaselel ehu en weid nan elen pwung. Sounmelkahkao koulki me Siohwa “kin ketin poakohng sapwellime aramas pwung kan.” Nna song medewehla! Kaun me keieu lapalap nan lahng oh sampah ketin poakohng kitail pwe kitail kin poakohng dahme pwung! Pwehki sapwellimen Siohwa limpoak, kitail kin kamehlele me e pahn ketin apwalih atail anahn en paliwar ni atail mwohneki mahs Wehio. (Wadek Lepin Padahk 13:21; 10:3.) Kedekedeo, aramas akan me poakohng me pwung pahn sapwenikihla  sampah pwon. (Lep. Pad. 13:22) Pali laud en sapwellimen Koht aramas akan, ketingparail ong wia dahme pwung iei peren me inenen laud oh mour soutuk nan paradais nin sampah. Pil ahnsou wet, irail akan me kin poakohng sapwellimen Koht irair pwung kin paiekihda ar ahneki popohl me kin sewese ehupene en arail peneinei oh pil nan mwomwohdiso.—Pil. 4:6, 7.

18. Soahng mwahu dah kan kitail anahne pousehlahte wia ni atail awiawih sapwellimen Siohwa rahn?

¹⁸ Ni atail kin awiawih sapwellimen Siohwa rahn lapalap, kitail anahne doulahte rapahki sapwellime irair pwung. (Sep. 2:2, 3) Kahrehda, kitail anahne kasalehda me kitail uhdahn poakohng sapwellimen Siohwa ahl pwung kan. Met kin iangahki atail kin pousehlahte perehki ‘mwaremwaratail kan perehpen pwung’ pwe en pere mohngiongitail. Kitail pil anahne kolokol nsenmwakelekel me pahn kansenamwahwih kitail oh kaperenda kupwuren Koht.—Lep. Pad. 27:11.

19. Dahme kitail anahne koasoanehdi teng en wia? Dahme iren onop en mwuhr pahn padahkihong kitail?

¹⁹ Siohwa kin ketin “mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kron. 16:9) Ia uwen mahsen wet eh kin kakehlaka kitail ni atail kin wia dahme pwung nan sampah suwed wet me diren kahpwal, tiahk lemei oh soangen suwed teikan! Mehlel, atail tiahk pwung ele kin kapwuriamwei ong aramas tohto me kin dohsang Koht. Ahpw kitail kin uhdahn ale kamwahu sang atail kin tengediong sapwellimen Siohwa irair pwung. (Ais. 48:17; 1 Pit. 4:4) Eri, kitail en ni mohngiong unsek koasoanehdi teng en doulahte pereperenki atail kin poakohng oh wia dahme pwung. Ahpw atail ahneki mohngiong unsek pil kin wehwehki me kitail anahne tatki me suwed. Iren onop en mwuhr pahn padahkihong kitail ia duwen atail kak wia met.

[Nting tikitik me mi pah]

Ia Duwen Omw Pahn Sapeng?

• Dahme kahrehda atail pohnese kesempwalpen tomwo kin anahn pwe kitail en poakohng dahme pwung?

• Dahme kahrehda e kesempwal atail en ‘perehki mwaremwaratail kan perehpen pwung’?

• Ia duwen atail kak kaiahnehda kadeikpen loalatail?

[Peidek en Onop]

[Kilel nan pali 26]

Kadeikpen loalatail me Paipel kaiahnehda kin sewese kitail en wiahda pilipil ong doadoahk