Karanih Koht

E Kameleileidi Kupwuren Siohwa

O HL emen me ese Siohwa sangete ni eh tikitik sohpeiweisang Siohwa ekis ahnsowo. E koasoia: “I kin pehm me I solahr warohng ale mahk.” Ni eh tepida wekidala eh mour, e kin pwunodki me Koht sohte pahn ketin mahkohng ih. Ahpw ohl menet diarada koapworopwor sang dahme Paipel mahsanih duwen Manase me kileldi nan 2 Kronikel 33:1-17. Ma mie pak me ke ahneki pepehm en sohwar pwehki dipomw kan me ke wiahda mahs, ele ke pil kak diar kamweit sang dahme wiawihong Manase.

Manase tikida nan peneinei ehu me kin kapwaiada kupwuren Koht. Seme Esekaia, iei emen nanmwarkien Suda me inenen mwahu. Manase ipwidi mpen sounpar siluh mwurin Koht, ni manaman, eh ketin kareireila mouren eh papaho. (2 Nanmwarki 20:1-11) Esekaia kin kilangwohng nah pwutak menet nin duwen kisakis ehu pwehki sapwellimen Koht kalahngan, oh kin nantihong padahkihong ih en poakohng kaudok min. Ahpw seri kan sohte kin ahnsou koaros kahlemengih arail pahpa oh nohno kan me kin kaudokiong Koht. Ih met me wiawihong Manase.

Manase sounpar 12 ni eh papaho eh mehla. Manase “wiahda dihp ong KAUN-O.” (Iretikitik 1, 2) Ia duwe, sounkaweid kan me sohte kesempwalki kaudok mehlel kin kamwakid mouren nanmwarki pwulopwul menet? Paipel sohte mahsanih duwen met. Dahme e mahsanihong kitail iei me Manase kin iang kaudok samin en dikedik en eni kan oh tiahk lemei. E wiahda pei sarawi kan ong koht likamw akan, meirongkihla nah pwutak kan, iang wunahni, oh kihdiong sansal takai ehu nan tehnpas en Siohwa nan Serusalem. Manase keptakaila oh sohte kin kapwaiada peneu kan me Siohwa kin pwurepwurehng ketikihong ih, mendahki Koht me ketin kareireila mouren eh pahpao pwe en kak ipwidi.​—Iretikitik 3-10.

Met imwikihla Siohwa eh ketin mweidohng Manase en selidi oh wisiklahng Papilon. Ni eh kalipilipala mwo, Manase ahneki ahnsou en medemedewe eh mour. Ia duwe, e wehwehkier me nah dikedik en eni kan sohte ahneki manaman en doarehla ih? E kin tamanda soahng kan me eh pahpao kin padahkihong ih ni eh seri? Sohte lipilipil dahme wiawi, Manase wekidala eh madamadau. Paipel mahsanih: “E ahpw aktikitikla, sohpeiong KAUN-O, eh Koht, oh peki sapwellime sawas.” (Iretikitik 12) Ni lokaiahn Ipru, lepin lokaia wet “sohpeiong” kin wehwehki kameleileidi kupwur. Ia duwe, Koht uhdahn kak mahkohng ohl menet me kin wiahda soangen dihp laud pwukat?

Siohwa kupwurperenkihda Manase eh koluhla mehlel. Koht karonge eh pekmahk oh “ketin mweidohng en pwuralahng Serusalem oh pwurehng kaunda wehio.” (Iretikitik 13) Pwe en kadehdehda me e koluhla mehlel, Manase wia dahme e kak pwehn kapwungala eh sapwung kan ni eh kamwakelehsang dikedik en eni kan nan eh wehi oh kangoange nah aramas akan en “kaudokiong KAUN-O.”​—Iretikitik 15-17.

Ma ke pehm me ke sohte warohng ale sapwellimen Koht mahk pwehki dipomw kan mahs, eri ale mehn kangoang sang dahme wiawihong Manase. Koasoiepen Manase wia kisehn Mahsen en Koht. (Rom 15:4) E sansal me Siohwa kupwurki kitail en ese me e kin ketin “diren mahk.” (Melkahka 86:5) E kin ketin tetehk irair en mohngiong en aramaso a kaidehn dipeo. Ni me dipan emen eh kin kapakap sang ni mohngiong mehlel, kesehla eh elen mour sapwung oh koasoanehdi teng en wia me pwung, ele e kak kameleileidi kupwuren Siohwa, duwehte me Manase wia.​—Aiseia 1:18; 55:6, 7.