Likih Siohwa ni Imwio Eh Kerendohr

“Kumwail likih KAUN-O kohkohlahte.”—AIS. 26:4.

1. Ia wekpeseng en sapwellimen Koht aramas akan oh aramas en sampah wet?

KITAIL mi nan sampah ehu me aramas rar kei solahr ese ihs de dahme ren likih, ele pwehki aramas me re likih kamedekihala de kansensuwedihala irail pak tohto. Irail uhdahn weksang sapwellimen Siohwa aramas akan! Pwehki Koht eh kin ketin kaweid sapwellime aramas akan, re ese me re sohte pahn likih sampah wet de “me lapalap en sampah kan.” (Mel. 146:3) Ahpw re kin koapworopworki Siohwa ong arail mour ahnsouwet oh pil ahnsou kohkohdo pwe re ese me e ketin poakohng irail oh ahnsou koaros e kin ketin kapwaiada sapwellime Mahsen.—Rom 3:4; 8:38, 39.

2. Dahme Sosua koasoia duwen atail kak likih Koht? 

² Sosua kasalehda me kitail kak uhdahn likih Koht. Mwohn eh mehla, e ndaiong ienge mehn Israel kan: “Emenemen kumwail patohwan ese nan mohngiongimwail oh [“mouramwail,” NW] me KAUN-O amwail Koht ketikihong kumwail soahng mwahu koaros me e ketin inoukidahr. E ketin kapwaiadahr  inou koaros me e ketin wiahda, sohte ehu me sapwungala.”—Sos. 23:14.

3. Dahme mwaren Koht kin kasalehda duwen ih?

³ 1 Samuel 12:22 (NW) mahsanih: “Siohwa sohte pahn likidmeliehla sapwellime aramas akan pwehki mware lapalap.” Eri, e pahn ketin kapwaiada sapwellime inou koaros kaidehn ihte pwehki eh poakohng sapwellime aramas akan ahpw pwehki mwareo. Me pid duwen mwaren Koht, tepin koasoi kan nan ehu kawehwehn Paipel sang J. B. Rotherham koasoia: “Mwaren Koht kin wiahla inou me keieu mwahu; e kin kasalehda me Koht kak ketin wekiong soangen irair koaros, kahpwal koaros de anahn koaros me ele kak pwarada . . . Mwar wet iei inou ehu, e kin padahkihong kitail duwen Koht, oh e kin sewese kitail en tamataman ih. Ong Mwar wet, Koht pahn ketin lelepek ahnsou koaros; oh E sohte pahn ketin namenekla.”—The Emphasized Bible.

4. (a) Dahme Aiseia 26:4 kin kangoangehki kitail en wia? (b) Dahme kitail pahn koasoiapene nan iren onop wet?

⁴ Nna idek rehmw met: ‘I eselahr Siohwa pwe ien kak uhdahn likih ih? Ei ese me Koht sapwellimanki manaman koaros kin kihong ie koapworopwor ong ahnsou kohkohdo?’ Aiseia 26:4 mahsanih: “Kumwail likih KAUN-O kohkohlahte; e pahn ketin sinsilei kitail ahnsou koaros.” Ni mehlel, rahnpwukat Koht sohte kin ketin wiahda manaman pwe en ketin apwalihala aramas akan me duwehte e kin ketin wia ekei pak nan Paipel. Ahpw, kitail kak likih ih pwehki “e pahn ketin sinsilei kitail ahnsou koaros.” Ia duwen atail Koht me likilik kin sewese sapwellime sounkaudok lelepek kan rahnpwukat? Kitail pahn koasoiapene ahl siluh me e kin ketin wia met: E kin ketin kakehlaka kitail ni atail kin peki sapwellime sawas pwe kitail en pelianda kasongosong, e kin ketin utungada kitail ni atail kin lelohng uhwong oh aramas sohte men rong atail padahk, oh e kin ketin kakehlaka kitail ni ahnsou me mie atail kapwunod kan. Ni atail pahn tehkpene ire pwukat, medemedewe mwahu ia duwen omw kak kakehlaka omw kin likih Siohwa.

Likih Koht ni Omw Lelohng Kasongosong en Wia me Suwed

5. Iahd me e kakete apwal en likih Koht?

⁵ E kin mengei en likih Siohwa ni atail kin medewe duwen sapwellime inou en Paradais de kaiasada, soahng kan me kitail kin kasikasik. Ahpw e kakete apwal en likih ih ahnsou me kitail kin wia pilipil ma kitail pahn idawehn sapwellime koasoandi me pid atail tiahk oh uhdahn kamehlele me atail kin wia met me pwung oh pahn wahdo peren laud. Nanmwarki Solomon ntingihedi kaweid wet: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese. Tamanda KAUN-O ni omw wiewia kan koaros, oh e pahn ketin kasalehiong uhk ahl me pwung.” (Lep. Pad. 3:5, 6) Tehk me e koasoia duwen atail “wiewia kan” oh “ahl.” Ei, elen atail mour unsek anahne kasalehda atail kin likih Koht, a kaidehn ihte atail koapworopwor nin duwen emen Kristian. Ia duwen atail kak kasalehda likilik wet ni ahnsou me kasongosong pwarada?

6. Ia duwen atail kak kakehlaka atail pahn soikala madamadau suwed?

 ⁶ En sohpeisang me suwed kin tepisang nan atail madamadau. (Wadek Episos 2:3.) Ia duwen omw kak kakehlaka omw pahn soikala madamadau suwed? Tehk ahl limau pwukat: 1. Kapakapki sapwellimen Koht sawas. (Mad. 6:9, 13) 2. Doudouloale mehn kahlemeng en irail kan nan Paipel me sohte kin peikiong Siohwa oh irail kan me kin peik. Tehk ia imwilahn arail wiewia kan. (1 Kor. 10:8-11) 3. Medewe ia duwen dihp eh kak kauwehla omw madamadau oh pepehm oh pil en irail kan me ke poakohng. 4. Medewehla sapwellimen Koht pepehm ni ahnsou me emen sapwellime ladu kin wiahda dihp laud. (Wadek Melkahka 78:40, 41.) 5. Medewehla ia uwen Siohwa eh kin kupwurperenki ni ahnsou me emen sapwellime tohnkaudok kin soikala me suwed oh wia me pwung mehnda ma nan pokon de ni eh kelehpwla. (Mel. 15:1, 2; Lep. Pad. 27:11) Ke kak pil kasalehda me ke kin likih Siohwa sang ni omw wiewia me pwung.

Likih Koht ni Aramas Ar Sohte Men Rong oh Kin Uhwong Kitail

7. Kahpwal dah kan me Seremaia kin lelohng? Ia eh pepehm ekei pak?

⁷ Riatail tohto kin doadoahk nan wasahn kalohk apwal kan. Soukohp Seremaia pil kin doadoahk nan soangen irairohte erein kaimwiseklahn wehin Suda me diren kahpwal. Rahn koaros, eh likih Koht kin lelohng kasongosong pwehki eh kin pakairki sapwellimen Koht kadeik. Ehu ahnsou, nah sekteri Paruk pil kin kaulimki eh pwangahki eh doadoahk. (Ser. 45:2, 3) Ia duwe, Seremaia kin mweidohng pepehm en mworusala en kauhdi eh doadoahk? Mehlel, e kin nsensuwedla ekei pak. E koasoia: “En riahla rahn me I ipwidi! . . . Dahme I ipwikihdi? Ihte pwe I en kin mihmi nan apwal oh pahtou, oh kaimwisakala ei mour ni namenek?”—Ser. 20:14, 15, 18.

8, 9. Nin duwen Seremaia 17:7, 8 oh Melkahka 1:1-3 mahsanih, dahme kitail anahne wia pwe kitail en pousehlahte kapwarehda wah mwahu?

⁸ Ahpw Seremaia sohte uhdi. E pousehlahte likih Siohwa. Imwilahn met, soukohp lelepek menet kilang pweidahn sapwellimen Siohwa mahsen me kileldi nan Seremaia 17:7, 8: “I pahn kupwuramwahwih aramas me kin koapworopworkin ie. E rasehng tuhke pwoat me kin kekeirda limwahn piletik oh kalewe kan kin kohdi nan pihl. Tuhkeo sohte kin masak karakar en ketipin, pwehki teh kan sohte pahn mengila; e sohte kin pwunod ni ahnsou me sohte keteu; pwe wah kan sohte kak neksang.”

⁹ Duwehte tuhke pwoat me “kekeirda limwahn piletik,” en Seremaia ‘wah kan sohte neksang’ ni karasaras. E sohte kin mweidohng aramas me kin kauwe ih en kauhdi ih. Ahpw e kin lelepek ong Utupen “piletik” en mour oh kesempwalki soahng koaros me Siohwa mahsanihong ih. (Wadek Melkahka 1:1-3; Ser. 20:9) Seremaia kihda mehn kahlemeng mwahu ong kitail, ahpw mehlel irail kan me kin papah Koht nan wasahn kalohk apwal kan! Ma ke kin mi nan soangen irair wet, pousehlahte koapworopworki Siohwa me pahn ketin sewese iuk ken dadaur ni omw kalohki mwareo.—Ipru 13:15.

10. Kapai dah kan kitail ahneki? Dahme kitail en idek rehtail?

¹⁰ Siohwa kin ketikihong kitail soahng tohto pwe en ketin sewese kitail pwe kitail en powehdi atail kahpwal kan erein imwin rahn pwukat. Ehu me e ketikihda iei Paipel me kawehwehdi ni pwung oh pil ni soangsoangen lokaia kan. E ketin doadoahngki pwihn en ladu lelepek oh loalokong pwe en ketikihda padahk kan en Paipel me rasehng tungoal. E pil ketikihong kitail sawas en iengetail me pwoson kan ni mihting kan oh mihting tohrohr kan. Ke kin isaneki sawas pwukat? Koaros me kin wia met “pahn kokoulki ar peren.” Ahpw irail kan me sohte kin peikiong Koht “pahn sarohdi” oh “pahn sengiseng kowahlap.”—Ais. 65:13, 14.

Likih Koht ni Omw Ahneki Kapwunod kan

11, 12. Ni atail kin kilang kahpwal en sampah, ia ahl me keieu mwahu me kitail en idawehn?

¹¹ Nin duwen me kokohpdahr, kahpwal kan  me kin lelohng aramas kin wie tohtohla. (Mad. 24:6-8; Kaud. 12:12) Ahnsou me lapake kin wiawi, aramas kin kalapw tangala wasakis me ileile de douda pohn kadoken ihmw kan. Pil duwehte, ni kahpwal en sampah eh kin laudla, me tohto kin rapahki wasahn ruk rehn soangen pwihn kan me mwomwen kehlail me duwehte pwihn en palien pesines, politik, de pelien lamalam, oh pil palien sains. Ahpw mepwukat sohte kin kihda epwel mwahu mehlel. (Ser. 17:5, 6) Ni pali teio, sapwellimen Siohwa ladu kan kin ahneki wasahn ruk mehlel ehu rehn me kin ketin ‘sinsilei irail ahnsou koaros.’ (Ais. 26:4) Sounmelkahkao koasoia: “[Siohwa] me silepei oh sounkomourpei; ih me soundoarepei.” (Wadek Melkahka 62:6-9.) Ia duwen atail pahn wiahkihla Siohwa atail wasahn ruk?

¹² Kitail kin tengediong Siohwa ni atail kin kapwaiada sapwellime Mahsen me kin kalapw weksang madamadau en aramas. (Mel. 73:23, 24) Karasepe ehu, irail kan me kin mwekidki loalokong en sampah ele kin nda: ‘Ihte omw mour en met, isaneki.’ ‘Rapahki doadoahk pweimwahu.’ ‘Wiahda kiden mwohni.’ ‘Pwainda koaros.’ ‘Seiloakseli oh kohla wasa koaros.’ Ahpw sapwellimen Koht erpit kin sansalda nan kaweid wet: “Me kin doadoahngki dipwisoun sampah kan, duwehte ma re sohte kin paieki dipwisou pwukat; pwe mwomwen sampah wet pahn mwadang rosala.” (1 Kor. 7:31) Sises pil kin ketin kangoange kitail pwe kitail en mwohneki mahs atail kaudok ong Siohwa ahnsou koaros oh “kepwehpwehkihla paien nanleng,” pwe ih wasa me sohte me kak kihsang pai wet.—Mad. 6:19, 20.

13. Ni atail kin medemedewe 1 Sohn 2:15-17, dahme kitail en pein idek rehtail?

¹³ Ia duwe, omw madamadau ong “sampah” oh “dipwisou me mihmi nin sampah” kin kasalehda omw uhdahn likih Koht? (1 Sohn 2:15-17) Kapai kan sang rehn Siohwa oh atail kak kalaudehla atail papah ih kin kesempwal ong uhk laudsang dahme sampah kin kihda? (Pil. 3:8) Ke kin nantihong kolokol ‘pwoaren mas mwakelekel’? (Mad. 6:22) Koht sohte kupwurki ken soukautih, ahpw mehlel ma mie omw peneinei me ke kin apwalih. (1 Tim. 5:8) Ahpw e kupwurki sapwellime ladu kan en uhdahn likih ih, a kaidehn ahn Sehdan sampah me pahn ohla.—Ipru 13:5.

14-16. Ia duwen ekei ar kin ale kapai kan ni arail kin kolokol ‘poaren mas mwakelekel’ oh mwohneki mahs arail kaudok ong Siohwa?

¹⁴ Medewehla duwen Richard oh Ruth me naineki seri silimen. Richard koasoia: “I kin pehm me I kak wia laud sang dahme I kin wia ong Siohwa. I kin mour nsenamwahu ahpw I pehm me I sohte kin kihong Siohwa uwen ei kak koaros. Mwurin at kapakapki ire wet oh medemedewe ma se kak mourki tikitiklahn pweinen ei doadoahk, ngehi oh Ruth pwungkipene me I pahn peki rehn ei kaunen doadoahko ma I kak doadoahk rahn pahieute nan wihk ehu, mendahki sahpw me se kin mi ie ahneki kahpwal en mwohni. Ei pekipek pweida oh mwurin wihk kei I tepida wia koasoandi wet.” Ia en Richard pepehm met?

¹⁵ E koasoia: “Pweinen ei doadoahk tikitikla ni uwen limekis ehu en dahme I kin ale mahs. Ahpw met mie rahn 50 tohto sang mahs nan sounpar ehu me I kak mi rehn ei peneinei oh kaiahne nei seri kan. Ei ahnsoun kalohk laudla pak riau sang mahs, irail me I kin onop rehrail pil tohtohla pak siluh sang mahs, oh I  kak iang sawas laud nan mwomwohdiso. Oh pwehki ei ahnsou ong seri kan laudla, Ruth kakehr iang wia sawaspen pioneer ekei pak. I koasoanehdi teng en kolokol koasoandi wet erein ei kak.”

¹⁶ Roy oh Petina, me emen neira serepein mihmihte rehra, kak katikala ara doadoahk en mwohni pwe ira en kak kalaudehla ara ahnsou ong kalohk. Roy koasoia: “I kin doadoahk rahn siluh nan wihk ehu ahpw Petina rahn riau. Se pil kasau sang ihmw laud ehu ong nan ihmw tikitik ehu me mengei en apwalih. Se kin wia doadoahk en pioneer mahs mwohn at naineki seri kan oh se ahnekihte ineng en wia pioneer. Kahrehda ahnsou me nait seri kan laudlahr, se pwurehng tepida doadoahk en pioneer. Sohte uwen mwohni ehu kak pahrekiong kapai kan me se kin ahneki.”

“Sapwellimen Koht Popohl” en Pere Omw Mohngiong

17. Ia duwen iren Paipel kan ar kin sewese iuk ni omw kilangwohng kapwunod kan nan mour?

¹⁷ Sohte emen kak ese dahme pahn wiawi lakapw pwe “paisuwed kin lelohng aramas koaruhsie.” (Ekl. 9:11) Met kin kihsang popohl en madamadau rehn irail kan me sohte ahneki nanpwungmwahu rehn Koht, ahpw met sohte anahne wiahiong kitail. (Mad. 6:34) Wahnpoaron Pohl ntingihedi: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam.”—Pil. 4:6, 7.

18, 19. Ia duwen Koht eh kin ketin sewese kitail? Menlau kihda karasaras kan.

¹⁸ Riatail tohto me mi nan kahpwal kan kin ahneki popohl nan loalarail sang Siohwa. Emen sister koasoia: “Emen toahkte kin pwurepwurehng kasonge ie I en ale doken nta. ‘Ke sohte pahn ale nta? Ke sahliel?’ iei tepin koasoi kan me e kin ndaiong ie. Ahnsowo oh ahnsou teikan, I kapakap ong Siohwa, oh e ketikihong ie popohl. I kin kehlail rasehng paip ehu. Mendahki paliwereiet luwetala pwehki ei nta tikitiklahr, I kak kawehwe ni sansal sang nan Paipel kahrepen ei sohte pahn ale nta.”

¹⁹ Ele ekei pak Koht kin ketikihda sawas sang iengetail me pwoson kan de padahk kan en Paipel ni ahnsou me konehng. Mwein ke kin rong riatail men nda: “Ih iren onop me I uhdahn anahne. Likamwete e wiawihda ong ie!” Ei, sohte lipilipil soangen irair de anahn dah me kitail ahneki, Siohwa pahn ketin kadehdehiong kitail sapwellime limpoak ma kitail likih ih. Kitail sapwellime “sihpw” oh e ketin wiahkihla kitail kitail en wa mware.—Mel. 100:3; Sohn 10:16; Wiewia 15:14, 17.

20. Dahme kahrehda sapwellimen Siohwa aramas akan pahn poadoandoarla ni ahnsou me en Sehdan sampah pahn imwisekla?

²⁰ Erein rahnen sapwellimen Siohwa engieng me kerendohr, soahng koaros me aramas akan kin likih nan en Sehdan sampah pahn ohla. Kohl, silper, oh dipwisou kesempwal teikan sohte pahn kak sawas. (Sep. 1:18; Lep. Pad. 11:4) Wasahn ruk ehute iei rehn Siohwa me “pahn ketin sinsilei kitail ahnsou koaros.” (Ais. 26:4) Eri, kitail pahn kasalehda me kitail uhdahn likih Siohwa ahnsou wet sang ni atail kin peikiong sapwellime ahl pwung, kalohki rongamwahu en Wehio mendahki mie me sohte kin perenki rong oh kin uhwong kitail, oh mweidohng ih atail pwunod kan koaros. Ni atail kin wia mepwukat, kitail pahn uhdahn ‘poadoandoarla, oh sohte kahrepen atail pahn masak mehkot.’—Lep. Pad. 1:33.

Ke Kak Kawehwehda?

Ia duwen atail kak likih Koht

• ni atail lelohng kasongosong en wia me suwed?

• ni aramas ar sohte men rong oh kin uhwong kitail?

• ni atail ahneki kapwunod kan?

[Peidek en Onop]

[Kilel nan pali 15]

Kolokol sapwellimen Siohwa koasoandi kan pahn imwikihla nsenamwahu

[Kilel nan pali 17]

‘Siohwa pahn ketin sinsilei kitail ahnsou koaros’