Ihs nan Peneinei me Kitail Pwukoahki Apwalih?

NAN Micronesia oh wasa teikan nin sampah, sewese kisehn atail peneinei iei elen atail mour. Ahpw ni atail kin nda “peneinei,” met kin kalapw wehwehki rien atail pahpa oh nohno kan, nein rien atail pahpa oh nohno kan oh nein riatail kan.

Paipel mahsanih: “Eri, ma emen sohte kin apwalih kiseh kan, ahpw mehlel uhdahn kisehn pein eh peneinei, e kahmahmkilahr eh pwoson, oh e suwedsang irail kan me sohte arail pwoson.” (1 Timoty 5:8) Ihs me Kristian men pwukoahki apwalih nan peneinei? Ia duwe, Kristian men kin ahnsou koaros pwukoahki apwalih kiseh kan likin eh peneinei tikitik?

Pahpa Nohno oh Seri kan

Paipel kin koasoia duwen kisehn peneinei tikitik kan. Ahpw ni Paipel eh mahsanih me Kristian men en “apwalih kiseh kan,” met sohte wehwehki me e dokedoke kiseh kan koaros likin eh peneinei tikitik.

Paipel kin kasalehda pwukoahn pahpa oh nohno ong neira seri kan. Me pid mwomwohdiso eh kin sewese Pohl, e ntingihdi: “Pwe kaidehk seri kan me pahn nahkohng ar pahpa kan, pwe pahpa kan ong nair seri kan.” (2 Korint 12:14) Emen semen en palien kosonned me adaneki H. B. Clark koasoia: “Pwukoahn apwalih seri men kin kohwong pahpa men.” Nin duwen emen me Koht ketin idihada pwehn wia tapwin ehu peneinei, pahpao me keieu pwukoahki apwalih anahn en peneinei. Lih pwopwoud kin sawas ni eh kin apwalih ihmw, mwohni, de pil doadoahk en mwohni ma mie anahnepe.—Pil kilang Lepin Padahk 31:10-31.

Ahpw tehk me kaidehn koadoahkehdahte mwohni me pahpa nohno anahne wia. Ira anahne ‘nahkpene’ ekei mwohni ong neira seri kan. Pahpa oh nohno me kin idawehn kaweid mwahu wet kin kak sewese neira seri kan ni arail laudla oh kohkohlahsang ira. Met uhdahn konehng ma seri kan kin nantihong doadoahngki arail ahnsou laud ong doadoahk en kalohk oh ekei pak kin anahne sawas en mwohni pwe ren kak pousehlahte arail doadoahk. Paipel sohte kin mahsanih me pahpa oh nohno anahne ‘nahkpene’ ong kisehrail kan likin arail peneinei tikitik.

“Dupukohng Arail Pahpa oh Nohno kan”

Pahpa oh nohno me kin wia soangen epwel wet pahn ale dupukpe. Wahnpoaron Pohl koasoia nan 1 Timoty 5:4: “Ahpw ma liohdi men mie nah seri, de nein nah seri kan, irail uhdahn pahn kapwaiada mahs arail pwukoa doadoahk ong arail peneinei, pwe iei duwen arail pahn dupukohng arail pahpa oh nohno kan, de arail pahpa oh nohno kahlap akan; oh iei me Koht kin ketin kupwurperenki.” Soangen sawas wet ong pahpa oh nohno likeilapalahr de pahpa oh nohno kahlap kan kin pahrekiong kaweid en Paipel duwen wauneki atail pahpa oh nohno.—Episos 6:2; Eksodus 20:12.

Tehk me Pohl kasalehda me kaidehn irail akan likin peneinei tikitik me pwukoahki apwalih liohdi pwukat. Ni ahnsowo, ma sohte en Kristian liohdi men eh peneinei keren oh e kin papah Siohwa ahnsou reirei, mwomwohdiso me pahn pwukoahki apwalih ih.—1 Timoty 5:3, 9, 10.

 En Kristian men pwukoahn apwalih “pein eh peneinei” kin wehwehki eh pwoud oh nah seri kan, eh pahpa nohno oh eh pahpa nohno kahlap akan. Pwukoa wet pahn pil kowohng irail pwukat mehnda ma re sohte iang padahk mehlel de re ahneki kahpwal en paliwar kan. Pwukoa wet pahn wiawi erein arail wie momour. Oh ma emen pwopwoudida, e pahn pil sewese eh pwoud en wauneki eh pahpa nohno. Kahpwal laud nan pwopwoud kin wiawi ma re sohte kin kapwaiada kaweid wet.

Dahme Kitail Pahn Sawaski oh Iahd?

Ahpw pahpa oh nohno kan sohte pahn medewe me re kak doadoahngkihla neirail mwohni kan oh kasik me ahnsou koaros re kak ale sawas sang neirail seri kan. Irail en dehr kasik me neirail seri kan pahn mihmi rehrail ahnsou koaros. Neirail seri kan pil mie arail peneinei me re keieu pwukoahki. Met kin pahrekiong dahme Pohl koasoia: “Kaidehk seri kan me pahn nahkohng ar pahpa kan, pwe pahpa kan ong nair seri kan.”—2 Korint 12:14.

Pali laud en ahnsou, pahpa oh nohno kan kak alehdi pein imwarail, arail wasa, oh sawas en mwohni sang arail wasahn doadoahk pwehn sewese irail ni arail mahla. Mwohni kak wia sawas ehu, oh ni ara pahn nekidala mwahu neira mwohni kan, pali laud en ahnsou, ni ara pahn mahla, ira sohte pahn kahrehda kahpwal en mwohni de ohlahn pepehm ong neira seri kan.—Eklesiasdes 7:12.

Ahpw dahme Solomon koasoia nan Eklesiasdes 9:11 katamanki kitail me koasoandi me keieu mwahu pil kak ohla pwehki “paisuwed kin lelohng aramas koaruhsie.” Ahpw dahme pahn wiawi ma ara koasoandi mwahu sohte pweida? Neira seri kan me kin lemmwiki Koht pahn uhdahn sewesekin ira dahme irail kakohng. Ele re pahn kihda sawas en mwohni, wairahdo en kousoan rehrail de limwahrail. Ei, pahpa oh nohno me likeilapalahr kan de pahpa oh nohno kahlap kan anahne toupahrek oh dehr kasik neirail seri kan en kihong irail daulihla me konehng pwehki Paipel kihda kaweid wet:  “Kitail tungoalenki kisin tungoal akan oh likou, met e itarohng kitail.”—1 Timoty 6:8.

Pali laud en ahnsou, sawas ong me mah kan sang koperment oh pil mwohni me irail pein nekidala kin itar en apwalih arail pahpa nohno de arail pahpa oh nohno kahlap kan. E konehng en rapahkihda soangen sawas dah kan me mie ong irail me mah kan me warohng ale.—Rom 13:6.

Dehr Doadoahngki Madamadau en Parisi kan

Sises ketin lipwoarehda sounkawehwehn Kosonnedo oh Parisi ko pwehki irail ndaiong pahpa oh nohno me paisuwed kan: “Ma mehmen me ahneki mehkot me e kak sewesehki seme de ine, e ahpw nda, ‘Met sapwellimen Koht.” (Madiu 15:5) Ni mwehin Sises, irail mehn Suhs poadidi kan kin katohrehla mwohni de dipwisou me irail pahn meirongkihong tehnpas sarawio. Parisi ko kakairada madamadau me dene ma ke koasoanehdier en meirongkihla soangen dipwisou pwukat, eri ke solahr kak doadoahngki ong mehkot tohrohr pil ong omw pahpa oh nohno likeilapalahr kan.

Krais ketin uhwongada madamadau en Parisi ko pwehki eh sohte pahrekiong Kosonned en Koht. Eri ong Sises, wauneki pahpa oh nohno kin kesempwalsang kosonned en aramas. Duwehte rahnwet, ekei Kristian kan kin kihong arail mour ong doadoahk en kalohk de pahpa nin duwen misineri kan, pioneer kan, de sounapwalih me kin seiloak. Ni arail kin esehda me arail pahpa oh nohno anahne sawas, irail kin nantihong rapahkihda sawas ong irail oh pil pousehlahte arail doadoahk en kalohk. Ahpw ahnsou me irail sohte kak diar soangen sawas pwukat, irail sohte kin ahneki madamadau me arail pwais nan kalohk kesempwalsang arail wauneki arail pahpa oh nohno kan. Kaping anahne kohwong irail pwukat pwehki arail wiahda tounmetei laud oh wekidekla kan nan arail mour pwehn apwalihala anahn en peneinei.

Wia Dahme Mwahu ong Koaros

Mendahki Paipel kihong Kristian kan pwukoa en apwalih arail peneinei tikitik me anahne sawas, met sohte wehwehki me re sohte pahn kasalehda limpoak ong tohnpeneinei teikan. Kitail kin wiahki ekei me likin atail peneinei tikitik duwehte uhdahn emen tohn atail peneinei tikitik. Paipel kin kangoange kitail en “wia mwahu ong aramas koaros.” (Kalesia 6:10) Ma Kristian men ahneki mehkan me e kak sewesehki emen, e sohte pahn “ritingedihsang rie eh mohngiong.” E pahn pehm me e uhdahn pahn pwukoahki kihda sawas.—1 Sohn 3:17.

Ahpw, en Kristian men eh pwukoa me keieu kesempwal iei eh kisin peneinei tikitik iei eh pwoud, nah seri, eh pahpa nohno oh eh pahpa nohno kahlap. Ihme kahrehda e uhdahn pahn medewe mwahu mwohn eh pahn alehda ehu pwukoa me kakete kauwehla anahn en mwohni, pepehm en eh peneinei oh en eh peneinei nanpwungmwahu rehn Siohwa.

Ihme kahrehda kaweid en Paipel ong epwelpen peneinei kin mwahu oh konehng. Atail pahn doadoahngki kaweid pwukat pahn kasaledekitailsang kapwunod kan me soh katepe oh e pil kak sewese Kristian men en koasoanehdi dahme keieu kesempwal. Mepwukat koaros iei kaping ong Siohwa, “Samatail, me iei tapwin peneinei koaros me mi nanleng oh sampah.”—Episos 3:14, 15.

[Kilel nan pali 31]

Pahpa nohno Kristian kan ahneki pwukoa kesempwal ehu ong neirail seri kan