Peneinei Kristian kan, Kumwail “Onohnop”

“Kumwail pil onohnop, pwe Nein-Aramas pahn pwarodo ahnsou me kumwail sasairki.”—LUK 12:40.

1, 2. Dahme kahrehda kitail anahne kapwaiada sapwellimen Sises kaweid en “onohnop”?

NI AHNSOU me “Nein-Aramas lao pahn ketido duwen nanmwarki men” oh ketin katohrepeseng “tohn sampah” ni pwihn riau, ia pahn duwen kowe oh omw peneinei? (Mad. 25:31, 32) Pwehki met eh pahn wiawi ni ahnsou me kitail sohte kin medewe, ia uwen kesempwal atail en kapwaiada sapwellimen Sises kaweid kitail en “onohnop”!—Luk 12:40.

² Nan iren onop en mwowe, kitail koasoiapene ia duwen emenemen tohn peneinei eh kak sewese peneinei pwon ren pepehd sang ni eh kapwaiada eh pwukoa. Kitail pahn tehkpene ahl teikan me kitail kak sewese atail peneinei kan ren kakehlaka arail nanpwungmwahu rehn Koht.

Mesomwen en Kin “Mwakelekel”

3, 4. (a) Dahme peneinei Kristian kan anahne pere irail sang? (b) Ia wehwehn ahneki mas “mwakelekel”?

³ Peneinei kan anahne onopada ong ketidohn Krais. Ahpw mie soahng kan me kak kerompwa irail sang arail papah Siohwa oh kahrehiong irail ren sohte onopada. Re anahne pereirailsang mepwukat. Pwehki madamadau en men kepwehpwehla eh kin wia lidip ong peneinei tohto, kitail en medewehla dahme Sises mahsanih duwen ahneki mas “mwakelekel.” (Wadek Luk 11:34.) Duwehte lamp eh kak kamarainih ahl pwe kitail en sohte pwupwudi, dahme kitail kin audehkihda ‘kapehdatail’ kak kamarainih kitail de sewese kitail pwe kitail en dehr lohdi nan dihp.—Ep. 1:18.

 ⁴ Pwe kitail en kilang mwahu, pwoaren masatail anahne doadoahk ni pwung oh kak kilangwohngete dahme kitail kilikilang. Pil duwehte, ahneki mas mwakelekel kin wehwehki me kitail kin medemedewehte soahng ehu. Kitail kin keieu kesempwalki atail nanpwungmwahu rehn Koht a kaidehn kitail en mweidohng atail mour en kedirepwki kepwe kan oh pwunodkihte anahn akan en atail peneinei. (Mad. 6:33) Met wehwehki me kitail en itarki dahme Koht ketikihong kitail me pid atail anahn akan oh mwohneki mahs papah Koht nan atail mour.—Ipru 13:5.

5. Ia duwen emen serepein eh kasalehda me e koasoanedier en papah Koht?

⁵ E pahn imwihla mwahu ni ahnsou me seri kan kin kaiahnda en ahneki mas mwakelekel. Medewehla serepein men nan wehin Idiopia. E uhdahn pweida nan eh sukuhl oh ni eh kesepwil, e ale kisakis ehu ong pweinen sukuhl laud. Ahpw e soikala kisakis wet pwehki eh nsenohkihte papah Siohwa. Mwurinte mwo, mie doadoahk ehu me pweine $4,200 nan sounpwong ehu kohwong ih. Met uhdahn pweilaud sang dahme pali laud en aramas en wehio kin ale. Ahpw e koasoanedier en wia doadoahk en pioneer. E sohte anahne ale kaweid sang rehn eh pahpa oh nohno pwe en soikala doadoahko. Ia pepehm en eh pahpa oh nohno ni ara esehda dahme neira serepeino wia? Ira uhdahn perenkihda oh ndaiong ih met!

6, 7. Keper dahieu me kitail anahne ‘kalekeikitailsang’?

⁶ Sapwellimen Sises mahsen kan me kileldi nan Luke 11:34 iei peneu ehu duwen noahrok, pwe lepin lokaia “suwed” ni lokaiahn Krihk pil kak wehwehki peirin de noahrok. Ia sapwellimen Siohwa pepehm duwen noahrok? Paipel mahsanih: “E sohte konehng mahsenpen mehkot me pidada nenek de soangen samin teikan de noahrok, en kin wiawi nanpwungamwail.”—Ep. 5:3.

⁷ Kitail kin mengeiki kilang meteikan arail noahrok ahpw e apwal en dehdehki pein atail noahrok. Kahrehda kitail anahne doadoahngki sapwellimen Sises kaweid wet: “Kumwail kalekeikumwailsang noahrok suwed koaros.” (Luk 12:15) Pwe kitail en wia met, kitail anahne kasawih pein kitail pwe kitail en kilang dahme kitail koasoanedier nan kapehdatail. Peneinei Kristian kan anahne medewe mwahu duwen ahnsou oh mwohni me re pahn doadoahngki ong mehn kamweit kan oh pwainda kepwe kan.

8. Ni atail pahn pwain dipwisou kan, ia duwen atail kak ‘kalekeikitailsang noahrok suwed’?

⁸ Mwohn omw pahn pwainda dipwisou ehu, mie soahng kan me ke anahne medewe mahs, kaidehn ihte ma mie noumw mwohni me itar en pwainda dipwisowo. Medewe ire pwukat: ‘E pahn mie ei ahnsou en doadoahngki dipwisou wet oh pil apwalih mwahu? Ia uwen werei ei pahn esehla doadoahngki dipwisou wet?’ Me pwulopwul kan, dehr kamehlele pesines kan ar kin kangoange iuk me ke anahne ahneki likou de dipwisou kapw kan. Soahng pwukat kin kalapw pweilaud oh mehnte ken kalahki ahpw ke sohte kin anahne ahnsou koaros. Ireiukasang met. Ken pil medewe ma omw alehda dipwisowo me ke mwahuki pahn sewese omw peneinei ren onohnop ong ketidohn Nein-Aramas. Pwoson sapwellimen Siohwa inou: “I sohte pahn mweisang uhk; I sohte pahn keseiukala.”—Ipru 13:5.

Nantihong Lel Omw Mehn Akadei kan

9. Ia duwen peneinei ehu ar nantihong wiahda mehn akadei kan eh kin sewese irail?

⁹ Pil ehu ahl me tohn peneinei pwon kak kakehlaka arail pwoson oh sewese arail nanpwungmwahu rehn Koht iei en wiahda mehn akadei kan oh nantihong kapwaiada. Met pahn sewese peneineio ren ese ia uwen arail kin pweida nan arail papah Siohwa oh pil pilada soangen wiewia kan me keieu kesempwal nan arail mour.—Wadek Pilipai 1:10.

10, 11. Nin duwen peneinei ehu, mehn akadei dah kan me kumwail kin nantihong kapwaiada? Mehn akadei dah kan me ke men wia ong ahnsou kohkohdo?

¹⁰ En koasoanehdi mehn akadei tikitik kan me pali laud en peneineio kak kapwaiada kin wahdo kamwahu tohto. Karasepe, wiahda mehn akadei kumwail en rahn koaros  koasoiapene iren rahn. Dahme tohn peneineio kin koasoia kak sewese tapwin peneineio en ese ia uwen arail poakohng Siohwa oh padahk mehlel. Mehn akadei en kaukaule wadekpene Paipel nin duwen peneinei ehu kin wia ahnsou mwahu ong seri kan ren kamwahwihala arail koahiek en wadawad oh pil wehwehkihla iren Paipel kan. (Mel. 1:1, 2) Oh kitail sou pahn men wiahda mehn akadei en kamwahwihala audepen atail kapakap kan? En kakairada rehtail irair kan me wia kisehn sapwellimen Koht manaman pil kak wia mehn akadei mwahu ehu. (Kal. 5:22, 23) De pil ehu, rapahki ia duwen atail pahn poakehla irail akan me kitail tuhwong nan wasahn kalohk. Atail nantihong wia met nin duwen peneinei ehu kak sewese seri kan ren poakepoakehla aramas akan oh re pahn kakete kakairada ineng en wiahla emen pioneer de misineri.

¹¹ Dahme ke sou medewehda ekei mehn akadei kan me kowe oh omw peneinei kak wia? Kumwail kak koasoanehdi mehn akadei en doadoahngki ahnsou laud ong kalohk? Kumwail kak nantihong pwe kumwail en powehdi amwail saloh ni amwail kalohk nan telephone, nanial, de wasahn pesines kan? Ia duwen kalohk wasa kan me anahnepen sounkalohki Rongamwahu kin laud? Ia duwe, emen sang nan peneineio kak sukuhlki ehu lokaia tohrohr pwe en ehukihong rongamwahwo irail kan me kin doadoahngki soangen lokaiao?

12. Dahme tapwin peneinei kan kak wia pwe en sewese ar peneinei ren kekeirda?

¹² Nin duwen tapwin peneinei men, ken tehkada wasa me omw peneineio kak kekeirda. Koasoanehdi mehn akadei kan me kak sewese kumwail en wia met. Mehn akadei kan me ke koasoanehdi ong omw peneineio anahne konehng arail irair oh koahiek pwe ren kak kapwaiada. (Lep. Pad. 13:12) Mehlel, kitail kin anahne ahnsou laud pwe kitail en lel mehn akadei ehu me katapan. Eri, ken katikala ahnsoun kilikilang TV oh uhd doadoahngki ahnsowo ong soahng kan me pidada omw papah Siohwa. (Ep. 5:15, 16) Doadoahk laud pwe ken lel mehn akadei me ke koasoanehdiong omw peneinei. (Kal. 6:9) “Aramas koaros en kak kilang” en peneinei ehu arail kekeirda sang ni arail kin nantihong lel mehn akadei kan en papah Siohwa.—1 Tim. 4:15.

Kolokol Koasoandi en Kaudok en Peneinei

13. Wekidekla dahieu me wiawihong koasoandi en atail mihting en mwomwohdiso? Peidek dah kan me kitail anahne medemedewe?

¹³ Ehu sawas mwahu me kin sewese peneinei kan ren “onohnop” ong ketidohn Nein-Aramas iei wekideklahn koasoandi en mihting kan me tepida wiawi nan January 1, 2009. Kitail solahr kin tuhpene ehu rahn nan wihko pwe kitail en wia Pwuhk Study en Mwomwohdiso. Mihting wet iangalahr kisehn atail mihting en Sukuhl Ong Sapwellimen Koht Doadoahk oh pil Mihting en Kalohk. Wekidekla wet kin kihong peneinei Kristian kan ahnsou mwahu ren kalaudehla arail nanpwungmwahu rehn Siohwa sang ni arail koasoanehdi ehu ni soutik pwe ren wia arail kaudok en peneinei. Ahnsou douwehr powe oh kitail kak idek rehtail: ‘I kin doadoahngki ahnsou me koasoandier ien wia Kaudok en Peneinei ni soutik de wia pein ei onop? Ia duwe, I kin pweida ni ei nantihong kapwaiada kahrepen koasoandi wet?’

14. (a) Ia kahrepe keieu kesempwal kitail en kin wia Kaudok en Peneinei de pein onopki Paipel? (b) Dahme kahrehda en koasoanehdi ahnsoun onop ni soutik kin kesempwal?

¹⁴ Kahrepe keieu kesempwal kitail en kin wia Kaudok en Peneinei ni soutik de pein onopki Paipel iei en karanihala Koht. (Seims 4:8) Ni atail kin kihong ahnsou en kaukaule onopki Paipel oh loalokongkihla Sounkapikadao, atail nanpwungmwahu reh pahn kehlailla. Atail karanihala Siohwa kin kamwakid kitail laud en poakohng ih sang ‘kapehdatail unsek, [“mouratail,” NW] unsek, atail lamalam koaros unsek, oh atail kehl unsek.’ (Mark 12:30) Kitail pahn kin uhdahn perenki peikiong Koht oh kahlemengih ih. (Ep. 5:1) Kahrehda, atail kolokol koasoandi en Kaudok en Peneinei ni soutik kin kesempwal pwe en sewese atail peneinei pwon ren kin “onohnop” nin doken arail awiawih  “kahn kamakam kowahlap” me kokohpdahr. (Mad. 24:21, NW) E kin kesempwal ong atail pahn komourala.

15. Ia duwen Kaudok en Peneinei ni soutuk eh kak kamwakid pepehm en emenemen tohnpeneinei?

¹⁵ Pil mie ehu kahrepe ong koasoandien Kaudok en Peneinei. E kin sewese tohnpeneinei ren karanihala emenemen. Arail ahneki ahnsou nan ehuehu wihk ren koasoiapene kaweid kan sang Paipel kin kamwakid arail pepehm ong emenemen. Pwopwoud ehu kin kalaudehla ara ehupene ni ara kin perenkihda ara onop Paipel. (Wadek Eklesiasdes 4:12.) Pahpa oh nohno kan oh pil seri kan me kin kaudokpene kin kak miniminpene ni limpoak, “me kin kapatapene oh oarepene mehkoaros pwe en wiahla ehu ni mehlel.”—Kol. 3:14.

16. Ia duwen sister silimen arail paiekihda arail koasoanehdi ehu ni soutik ren onopkihpene Paipel?

¹⁶ Nna medewehla duwen riatail Kristian lih silimen me paiekihda koasoandi wet ni arail koasoanehdi ehu ni soutik ren onop Paipel. Mendahki re sohte wia peneinei ehu, liohdi mah silimen pwukat kin kousoan nan kahnimw ehute oh kin kompoakepahnki emenemen. Pwehki arail kin men patpene mwemweit oh pil wiahki ahnsowo ren kakehlaka arail nanpwungmwahu rehn Siohwa, re koasoanehdi ehu ni soutik ren tuhpene oh onopkihpene Paipel. Re tapiada wia met oh doadoahngki pwuhk me adaneki “Kadehdehda Douluhl” Duwen Wehin Koht (ni lokaiahn wai). Emen irail nda: “Se perenki mehlel at ahnsou en onop kahrehda e kin kalapw daulihla awa ehu. Se kin song en medewehla irair en ahnsowo me tepin riatail Kristian akan kin momour oh kin koasoiapene dahme se pahn wia ma se mi nan soangen irairohte. Se uhd kin song en doadoahngki ire kan me se onopki ong at doadoahk en kalohk. Met kin wiahiong at doadoahk en kalohk oh katohnpadahk en kin kaperen oh pweida laudsang mahs.” Patehng arail kin kaloalehla arail esehla padahk mehlel, koasoandio kin kahrehiong pirien silimen pwukat en kalaudehla arail kin kerenpene. Re nda: “Se uhdahn kalahnganki koasoandi wet.”

17. Ire mehlel dah kan me kin sewese Kaudok en Peneinei ni soutik en pweida?

¹⁷ A ia duwen kowe? Ia duwen omw kin paiekihda ni soutik me ke koasoanehdi ong kaudok en peneinei de pein onop? Ma koasoandi wet kin wiawihte ekei pak, koasoandio sohte pahn katepe. Emenemen tohnpeneinei anahne onopadahr pwe ren onop ni kuloak me re koasoanedier ong arail Kaudok en Peneinei. Ren dehr mweidohng mehkot en kauwehla arail koasoandien ni soutiko. Patehng met, ire kan me re pahn onopki anahne kaunopada ni ahl ehu me konehng tohnpeneineio arail kak doadoahngki nan arail mour ehuehu rahn. Eri, dahme ke kak wia pwe ahnsoun onop pwukat en kak kaperen? Doadoahngki wiepen padahk me kak kamwakid koaros oh pil kahrehiong ahnsowo en soanamwahu oh wahu.—Seims 3:18. *

“Pepehd” oh “Onohnop”

18, 19. Ia duwen omw ese ketidohn Nein-Aramas eh kerendohr eh kin kamwakid uhk oh omw peneinei?

¹⁸ Sampah wet eh suwedlahr, me wia kilelepen atail ahnsou sang pahr 1914, kin kasalehda ni mehlel me en Sehdan sampah pahn imwiseklahr. Armakedon kerendohr. Kereniongehr ahnsoun Nein-Aramas eh pahn ketido pwe en ketin kapwaiada sapwellimen Siohwa kadeik ong irail akan me kin uhwong Koht. (Mel.  37:10; Lep. Pad. 2:21, 22) Met sou kin kamwakid uhk oh omw peneinei kumwail en kin mwasamwasahn?

¹⁹ Ia duwe, ke kin kapwaiada sapwellimen Sises kaweid en ahneki pwoaren mas “mwakelekel”? Omw peneinei kin nantihong lel mehn akadei kan me kin kakehlaka amwail nanpwungmwahu rehn Siohwa, mendahki aramas en sampah ar kin nantihong kepwehpwehla, oh ndandla? Koasoandi en Kaudok en Peneinei ni soutik de pein onop kin seweseiuk? E kin sewese omw peneinei en miniminpene oh karanihala Siohwa? Sang ni atail tehkpeneier nan iren onop en mwoweo, ke kin kapwaiada omw pwukoa kan me kileldi nan Paipel nin duwen ohl pwopwoud men, lih pwopwoud men, de seri men, pwe ken sewese tohnpeneinei pwon pwe kumwail en kin “pepehd”? (1 Des. 5:6) Ma ei, eri ke kin “onohnop” ong ketidohn Nein-Aramas.

[Nting tikitik me mi pah]

Dahme Ke Sukuhlki?

• Ia duwen peneinei Kristian kan ar kak “onohnop” sang ni arail . . .

ahneki pwoaren mas “mwakelekel”?

koasoanehdi oh nantihong lel arail mehn akadei kan?

kolokol koasoandien Kaudok en Peneinei ni soutik?

[Peidek en Onop]