Sapwellimen Koht Kisakis me Limpoak

“Duwen sapwellimen Koht kalahngan eh kin kakaun pwehki pwung, ni eh kin kahluweikitaillahng nan mour soutuk.”​—ROM 5:21.

1, 2. Kisakis dahieu aramas akan kin medewe me kesempwal? Ahpw kisakis dahieu me kesempwal sang met?

EMEN sounpadahk ntingihdi me kosonned en wehin Rom kan iei kisakis ehu me kin wia kamwahu ong aramas akan. (Dr. David J. Williams, the University of Melbourne, Australia) Ahpw, Paipel kin padahngki me Koht ketikihong kitail kisakis ehu me uhdahn kesempwal sang met. Kisakis wet iei sapwellimen Koht koasoandi ong kitail en ahneki nanpwungmwahu reh oh pwungla reh, oh ahneki koapworopwor en komourala oh pil mour soutuk.

² Mwomwen Koht eh ketikihda kisakis wet kin pidada sapwellime koasoandi pwung kan. Nan pwuhken Rom irelaud 5, wahnpoaron Pohl sohte kasalehda ire pwukat sang ni eh oaritikiada diren kosonned kan. Ahpw, e tepikihda inou kaselel wet: “Ni atail pwunglahr rehn Koht pwehki atail pwoson, kitail ahnekier popohl rehn Koht sang rehn atail Kaun Sises Krais.” Irail akan me alehdi sapwellimen Koht kisakis kin mwekidki en poakohng Koht. Pohl wia emen irail pwukat. E ntingihedi me Koht ketin kapwiledohngehr nan mohngiongitail “sapwellime limpoak” sang sapwellime manaman.​—Rom 5:1, 5.

3. Peidek dah kan me kitail pahn koasoiapene?

³ Dahme kahrehda kisakis limpoak wet kin  anahn? Ia duwen Koht eh ketikihda kisakis wet ni ahl ehu me pwung oh aramas koaros pahn paiekihda? Dahme emenemen aramas anahne wia pwe ren kak paiekihda? Kitail pahn koasoiapene pasapengpen peidek pwukat oh kilang ia duwen pasapeng pwukat ar kasalehda sapwellimen Koht limpoak.

Dihp me Aramas Sohsohki oh Sapwellimen Koht Limpoak

4, 5. (a) Ia duwen Siohwa eh ketin kasalehda sapwellime limpoak? (b) Dahme kitail anahne ese pwe kitail en wehwehki Rom 5:12?

⁴ Siohwa ketin kasalehda sapwellime limpoak laud ni eh ketin poaronehdo sapwellime Ohl pwehn sewese aramas akan. Pohl kasalehda ni ahl wet: “Koht ketin kasalehiong kitail ia uwen laud en sapwellime limpoak ong kitail: pwe ni ahnsou me kitail mihmi nan dihp, Krais ketin pwoukinkitailla!” (Rom 5:8) Song medewehla ire mehlel wet: “Ni ahnsou me kitail mihmi nan dihp.” Kitail koaros anahne ese ia duwen atail wiahla aramas dipan ekei.

⁵ Pohl oaralapihada met ni eh tepikihda ire mehlel wet: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Kitail kak wehwehki met pwehki Koht eh ketin kilelehdi nan Paipel duwen mouren aramas eh tepida. Siohwa ketin kapikada aramas riemen, Adam oh Ihp. Sounkapikadao me unsek, eri tepin aramas ko me wia tepin atail pahpa oh nohno pil unsek. Koht ketikihong ira kosonned ehu oh padahkihong ira ma ira sohte pahn peikiong, ira pahn mehla. (Sen. 2:17) Ahpw, ira pilada ira en sapeik oh kauwehla sapwellimen Koht kosonned me pwung, ira eri soikala ih nin duwen Sounketikihda kosonned oh Kaun Wasa Lapalahpie.​—Deud. 32:4, 5.

6. (a) Dahme kahrehda kadaudoken Adam kan kin mehla mwohn oh mwurin Koht eh ketikihong mehn Israel kan Kosonned en Moses? (b) Dahme kak rasehng soumwahu ehu me aramas sohsohki?

⁶ Adam nainekihda seri kan mwurin eh dipada oh kadaur ong nah seri kan koaros dihp oh kasuwedpe kan. Mehlel me re sohte kauwehla sapwellimen Koht kosonned duwehte Adam, eri re sohte ale kadeikpen dihp me Adam wiahda, oh kosonned kan pil saikinte kowohng irail. (Sen. 2:17) Ahpw kadaudoken Adam kan sohsohki dihp. Eri, dihp oh mehla kin kakaun irail lao lel ni ahnsou me Koht ketikihong mehn Israel kan kosonned kan me kasalehda ni sansal me irail aramas dipan kei. (Wadek Rom 5:13, 14.) Imwilahn dihp ele kak rasehng soangen soumwahu me kitail kakete sohsohki sang atail pahpa oh nohno. Mendahki ekei seri nan ehu peneinei ele kin sohsohki soumwahu ehu sang arail pahpa oh nohno, kaidehn seri ko koaros kak sohsohki soumwahwo. Ahpw met weksang dihp. Kitail koaros sohsohki dihp sang Adam oh pwehki met, kitail koaros pahn mehla. Ia duwe, kitail kak pitsang kahpwal wet?

Dahme Koht Ketikihda ni Eh Ketin Doadoahngki Sises Krais?

7, 8. Ia duwen mouren aramas unsek riemen pwukat ara imwikihla soahng riau me wekpeseng?

⁷ Ni limpoak, Siohwa ketikihda koasoandi ehu ong aramas akan ren pitsang dihp me irail sohsohki. Pohl kawehwehda me met kak wiawi sang ni Koht eh ketin doadoahngki emen tohrohr me unsek me iei Adam keriemen. (1 Kor. 15:45) Ahpw mouren aramas riemen unsek pwukat wekpeseng. Ia duwen ara wekpeseng?​—Wadek Rom 5:15, 16.

⁸ Pohl ntingihedi: “Sapwellimen Koht kalahngan sohte duwehte dipen Adam.” Adam dipada oh ale kalokepen dipeo me iei mehla. Ahpw kaidehn ih kelehpw me mehla. Paipel mahsanih: “Aramas tohto mehla pwehki dipen mehmeno.” Kadaudoken Adam kan koaros me soh unsek iangahki kitail anahne ale soangen kalokolok pwung me Adam alehdi. Ahpw kitail kak perenki ese me aramas unseko me iei Sises kak ketikihda mehkot me weksang met. Ia imwilahn met? Kitail kilang pasapengpen met sang ni Pohl eh koasoia, “kasaledekihala aramas koaros oh kihong irail mour.”​—Rom 5:17, 18.

9. Nin duwen Rom 5:16, 17 kasalehda, dahme Koht kin ketin wia?

⁹ Ia wehwehn mahsen pwukat “pwunglahr” oh “pwungla rehn Koht” ni lokaiahn Krihk? Emen sounkawehwehn Paipel ntingihedi: “E kin  kasalehda ni karasaras dahme wiawi nan mwoalen kopwung. E kin koasoia wekideklahn emen eh ehuong Koht, kaidehn wekideklahn loalen aramaso . . . E karasahiong Koht nin duwen sounkopwung men me ketin piladahr en pwungki aramas sapwungo me wisikdohng nan sapwellime mwoalen kopwung pwehki irair sapwung me e ahneki. Ahpw Koht ketin mahsanih me e pwunglahr.”

10. Dahme Sises ketin wia pwe en ketikihda poahsoanpen aramas akan ar kak pwungla rehn Koht?

¹⁰ Ia poahsoanpen “Sounkopwung en sampah pwon” eh kak mahsanih me aramas sapwung men pwunglahr reh? (Sen. 18:25) Keieun kahk kesempwal me Siohwa ketin wiahda pwe aramas akan en kak pwungla reh iei me e ketin poaronedohng sampah sapwellime Iehros. Sises ketin wia kupwuren Semeo ni unsek mendahki kasongosong kan oh aramas akan ar kin uhdahn kapailoke oh kauwe. E kin ketin kolokol eh lelepek lao lel eh ketin pwoula pohn tuhkehn kalokoloko. (Ipru 2:10) Sang ni eh ketin tounmeteikihla sapwellime mour nin duwen aramas unsek men, Sises ketikihda meirong me pahn kamaiauda de kasaledekala kadaudoken Adam kan sang dihp oh mehla.​—Mad. 20:28; Rom 5:6-8.

11. Tomwo kin poahsoankihda pweipwei dahieu?

¹¹ Pil ehu ire tohrohr me Pohl koasoiahki duwen Sises: “[E] ketikihda eh mour nin duwen tomw ehu me duwehte dahme salongala, pwe en pwainda aramas koaros.” (1 Tim. 2:6, NW) Ia wehwehn eh nda “pweipwei ehu me duwehte dahme salongala”? Neitail sawaspen Paipel en mahs kan kin kawehwehda me Adam kahrehiong kadaudoke kan koaros soh unsek oh mehla. Oh Sises, nin duwen aramas unsek men, kak ketin wiahda kadaudok en aramas unsek tohto. * Eri, kitail wehwehki me sapwellime mour patehng irail kan me kakete wiahla sapwellime kadaudok unsek kei wiahda meirong ehu me pahrekiong ahn Adam oh kadaudoke soh unsek kan. Ahpw Paipel sohte kin mahsanih me irail kan me kakete wiahla sapwellimen Sises kadaudok kan wia kisehn tomw wet. Rom 5:15-19 kasalehda me mehlahn “aramas tehmen” kasaledekihala aramas koaros. Ei, sapwellimen Sises mour unsek kin pahrekiong mour en Adam. E kin dokedokehte Sises Krais kelehpw. Met kahrehiong aramas koaros ren ale kisakis en pwungla rehn Koht oh kisakis en mour pwehki sapwellimen Sises “wiewia pwungo,” sang ni eh ketin peik oh lelepek lao lel eh pwoula. (2 Kor. 5:14, 15; 1 Pit. 3:18) Ia duwen tomwo eh kin kadoadoahk?

Kamaiaupen Aramas akan me Poahsoankihda Tomwo

12, 13. Dahme kahrehda irail kan me pwunglahr rehn Koht anahne sapwellime kalahngan oh limpoak?

¹² Siohwa Koht ketin kupwurki meirong en tomw wet me sapwellime Ohlo patohwanohng ih. (Ipru 9:24; 10:10, 12) Ahpw sapwellimen Sises tohnpadahk kan nin sampah, iangahki sapwellime wahnpoaron lelepek kan, saikinte unsekla. Mendahki re kin nantihong ren dehr wia me sapwung, re sohte kin pweida ahnsou  koaros. Dahme kahrehda? Pwehki ar sohsohki dihp. (Rom 7:18-20) Ahpw Koht kak oh e ketin apwalihalahr ireo. E ketin kupwurki “tomw ehu me duwehte dahme salongala” oh e ketin doadoahngki met ong sapwellime aramas akan.

¹³ Koht sohte ketin doadoahngki tomw wet ong wahnpoaron kan oh meteikan pwehki arail wiahda wiewia mwahu kei. Ahpw Koht ketin doadoahngki tomw wet ong irail pwehki sapwellime kalahngan oh limpoak laud. E ketin pilada oh mahsanih me wahnpoaron kan oh meteikan sohte pahn ale kadeik me kowohng irail, oh ketin kilangwohng irail nin duwen aramas kei me maiauda sang dihp me re sohsohki. Pohl kasalehda ni sansal: “Pwe kalahngan en Koht me komourkumwailla ni pwoson, kaidehn mehkot me sang rehmwail, duwehte amwail wiewia kan, pwe pein sapwellime kupwurkalahngan ong kumwail.”​—Ep. 2:8.

14, 15. Keting dahieu me mi mwohn irail kan me pwunglahr rehn Koht? Ahpw dahme irail anahne wia?

¹⁴ Medewehla ia uwen laud en kisakis wet me Wasa Lapalapo kin ketin mahkohng dihp me aramas emen sohsohki oh pil sapwung kan me aramaso wiahda! Ke sohte kak ese ia uwen tohtohn dihp me emen kin wiahda mwohn eh wiahla Kristian emen. Ahpw pwehki tomwo, Koht kak ketin mahkohng dihp pwukat koaros. Pohl ntingihedi: “Kalahngano, [“kisakiso,” NW] me aramas sohte warohng ahneki, pil pwarada, me mahsanih duwen atail pwungla rehn Koht.” (Rom 5:16) Wahnpoaron kan oh pil meteikan ar ale kisakis wet (ar pwungla rehn Koht) pahn anahne pousehlahte kaudokiong Koht mehlelo ni pwoson. Ia pahn ketingparail? “Aramas koaros me aleier kalahngan lapalap wet oh pwunglahr ni kalahngan wet, re pahn iang kakaun erein arail mour rehn Krais.” Mehlel, kisakis wet en pwunglahr rehn Koht kin kahrehsang aramas akan mehla. Imwilahn kisakis wet iei mour.​—Rom 5:17; wadek Luk 22:28-30.

¹⁵ Irail kan me ale kisakis en pwunglahr rehn Koht, kin wiahla sapwellime seri kan me keikihdi sapwellime manaman. Nin duwen seri sohso kei me pahn iang Krais, irail ahneki koapworopwor en iasadahng nanleng nin duwen ngehn kei pwe ren “iang kakaun” rehn Sises Krais nin duwen nanmwarki kei.​—Wadek Rom 8:15-17, 23.

Sapwellimen Koht Limpoak me Sansalda ong Meteikan

16. Kisakis dahieu me irail kan me ahneki koapworopwor en mour nin sampah kak ale ahnsou wet?

¹⁶ Kaidehn koaros me kin pwoson Koht oh papah ih nin duwen Kristian lelepek kei kin kasik ren iang Krais kaunda nanleng nin duwen nanmwarki kei. Me tohto ahneki koapworopwor me duwehte sapwellimen Koht ladu kan me momour mwohn mwehin Kristian kan. Re kin koapworopworki mour soutuk nan paradais nin sampah. Ia duwe, re kak iang ale kisakiso ahnsou wet sang Koht oh re kak pwunglahr reh met oh iang mour nin sampah ahnsou kohkohdo? Nin duwen dahme Pohl ntinglahng Kristian kan nan Rom, pasapengo iei ei!

17, 18. (a) Ia duwen Koht eh ketin kilangwohng Eipraam pwehki eh pwoson? (b) Ia duwen Siohwa eh kak ketin kilangwohng Eipraam nin duwen aramas pwung men?

¹⁷ Pohl koasoia duwen mehn kahlemeng me keieu mwahu, Eipraam, ohl pwoson men me momour mwohn Siohwa eh ketikihong Israel Kosonnedo oh mwohn Krais eh ketin ritingada ahl en ahneki mour nanleng. (Ipru 10:19, 20) Paipel mahsanih: “Koht ketin inoukihong Eipraam oh kadaudoke kan me re pahn sohsohki sampah. Eri, inou wet wiawiher, kaidehn pwehki en Eipraam eh kapwaiada Kosonnedo, a pwehki eh pwosonla Koht oh Koht eh ketin kupwurehla pwe en pwungla reh.” (Rom 4:13; Seims 2:23, 24) Eri, Koht kin ketin kilangwohng Eipraam nin duwen aramas pwung men.​—Wadek Rom 4:20-22.

¹⁸ Met sohte kak wehwehki me Eipraam sohte dipe erein ahnsou reirei me e papah Siohwa. E sohte wia aramas pwung men ni ahl wet. (Rom 3:10, 23) Ahpw pwehki Siohwa eh ketin sapwellimanki erpit laud, E ketin kilangwohng Eipraam nin duwen aramas pwung men pwehki eh pwoson laud oh eh wiewia kan sang eh pwoson. Eipraam kin pwoson ‘kadaudok’ me inoupe mie me pahn kohsang reh. Kadaudoko kadehdehda me ih Mesaia de Krais. (Kal. 3:6; Wiewia  3:25) Kahrehda, poahsoankihda tomw me Krais Sises ketin pwainla, sounkopwung Siohwa kak ketin mahkohng dihp kan me wiawi mahs. Eri, Eipraam oh aramas pwoson teikan me momour mwohn ahnsoun Kristian kan pahn kak iasada.​—Wadek Rom 3:24, 25; Mel. 32:1, 2.

Pwunglahr Rehn Koht Met

19. Dahme kahrehda Koht eh kin ketin kilangwohng Eipraam kin uhdahn kangoange me tohto rahnwet?

¹⁹ Ire mehlel me Koht limpoak kin ketin kilangwohng Eipraam aramas pwung men kin uhdahn kangoange Kristian mehlel kan rahnwet. Ahpw Siohwa sohte kin ketin mahsanih me Eipraam wia aramas pwung men ni ahl me e kin ketin wiahiong irail kan me keikihdi sapwellime manaman pwehn iang Krais. Pwihn malaulau wet wiahla me sarawi kan oh wia “sapwellimen Koht.” (Rom 1:7; 8:14, 17, 33) Weksang met, Eipraam wiahla kompoakepahn Siohwa oh met wiawi mwohn meirong en tomwo eh pweida. (Seims 2:23; Ais. 41:8) Ahpw ia duwen Kristian mehlel kan me kin koapworopworki mour nan Paradais sampah?

20. Dahme Koht kin ketin kupwurki irail kan me e kin ketin wiahki me pwung kan rahnwet ren wia, me duwehte Eipraam?

²⁰ Irail pwukat sohte “pwunglahr ni kalahngan wet” ong mour nanleng sang “Krais Sises me kin ketin kamaiauwihirailda.” (Rom 3:24; 5:15, 17) Ahpw re kin uhdahn pwoson Koht oh sapwellime koasoandi kan oh re kin kasalehda ar pwoson sang arail doadoahk mwahu kan. Ehu doadoahk iei en “padapadahkihong aramas akan duwen Wehin Koht; oh . . . kin kapahrengki duwen Kaun Sises Krais.” (Wiewia 28:31) Eri, Siohwa kak ketin kilangwohng irail pwukat nin duwen me pwung kei duwehte Eipraam. Kisakis en kompoakepahnki Koht me re ale weksang “kalahngan wet” me me keidi kan kin ale. Ahpw met kisakis ehu me re kin uhdahn kalahnganki.

21. Ia duwen atail kin paiekihda sapwellimen Siohwa limpoak oh pwung?

²¹ Ma ke ahneki koapworopwor en mour soutuk nin sampah, ke anahne pohnese me met sohte kin poahsoankihda soangsoangen inou kan me kaun akan kin wiahda. Ahpw met kin kasalehda kupwuren Wasa Lapalahpie me erpit. Siohwa ketin wia ehuehu kahk kan pwe en ketin kapwaiada kupwure. Kahk pwukat pwung mehlel. Patehng met, mepwukat kin kasalehda sapwellimen Koht limpoak laud. Eri, Pohl kak nda: “Koht ketin kasalehiong kitail ia uwen laud en sapwellime limpoak ong kitail: pwe ni ahnsou me kitail mihmi nan dihp, Krais ketin pwoukinkitailla!”​—Rom 5:8.

[Nting tikitik me mi pah]

Ke Tamataman?

• Dahme kadaudoken Adam kan sohsohki? Oh ia imwilahn met?

• Ia duwen tomw ehu me duwehte dahme salongala eh wiawihda? Oh ni ahl dahieu ire riau pwukat kin pahrekpene?

• Kapai dahieu me kisakis en pwungla rehn Koht pahn wahdohng uhk?

[Peidek en Onop]

[Kilel nan pali 17]

Ohl unsek Adam dipada. Ohl unsek Sises ketikihda “tomw ehu me duwehte dahme salongala”

[Kilel nan pali 19]

Uhdahn rongamwahu ehu me kitail kak pwungla rehn Koht!