“Wia Doadoahk en Silepen Sihpw me Koht Ketikihong Kumwail”

“Wia doadoahk en silepen sihpw me Koht ketikihong kumwail, oh apwalih irail, kaidehk ni mehnseiren ahpw ni kupwur mwahu.”​—1 PIT. 5:2.

1. Dahme kahrehda Piter men kakehlaka ienge me pwoson akan ni ahnsou me e ntingihedi keieun nah kisinlikou?

EHU ahnsou mwohn Sihsar Nero eh tepida kaloke Kristian kan nan Rom, wahnpoaron Piter ntingihedi nah keieun kisinlikou. Piter men kakehlaka ienge me pwoson kan. Tepilo kin “kohkohseli,” raparapahki Kristian kan pwe en kadallehla. Pwe ren kesihnenda teng oh pelianda ih, re anahne “onohnop” oh “pein karakarahkala pahn nin limen Koht.” (1 Pit. 5:6, 8) Irail pil anahne miniminpene. Ren dehr kin peipene pwe met kak kauwehla arail nanpwungmwahu rehn Koht.—Kal. 5:15.

2, 3. Ihs me kitail kin anahne mahweniong? Dahme kitail pahn tehkpene nan iren onop riau pwukat?

² Rahnwet, kitail pil kin lelohng irairohte. Tepil kin raparapahki ahnsou mwahu pwehn kadalleikitailla. (Kaud. 12:12) Oh ni ahnsou keren, “e pahn mie kahn kamakam kowahlap me sohte kin wiawi sang mahs kohdo lel met.” (Mad. 24:21, NW) Duwehte Kristian kan ni mwehin wahnpoaron ko me anahne kalekeirailsang akamai kan nanpwungarail, kitail pil anahne wia met. Pwe kitail en kapwaiada met, ekei pak kitail kin anahne sawas sang elder kan.

³ Kitail tehk ia duwen elder kan ar kak kalaudehla arail kesempwalki arail pwais en apwalih ‘sihpw me Koht ketikihong irail.’ (1 Pit. 5:2) Mwurin mwo, kitail pahn medewe ia ahl pwung en kapwaiada pwais wet. Nan iren onop en mwuhr, kitail pahn tehkpene ia duwen tohn mwomwohdiso ar kak ‘wauneki mehlel irail kan me wie doadoahk rehrail.’ (1 Des. 5:12) Atail tehkpene mepwukat pahn sewese kitail pwe kitail en pelianda atail Imwintihti me keieu suwed, oh pohnese me ih me kitail kin mahweniong.​—Ep. 6:12.

Apwalih Sapwellimen Koht Pelin Sihpw

4, 5. Ia duwen elder kan ar kin kilangwohng pelin sihpwo? Menlau karasahda.

⁴ Piter kangoange ohl mah Kristian kan nan ahnsowo ren ahneki sapwellimen Koht madamadau ong pelin sihpw me kohwong irail. (Wadek 1 Piter 5:1, 2.) Mendahki aramas akan kin wiahki Piter aramas kesempwal men nan mwomwohdiso, e sohte kin koasoin mwamwahliki elder kan duwehte me e lapalap sang irail. Ahpw e kin kaweid irail nin duwen ienge elder kei. (Kal. 2:9) Duwehte Piter, Pwihn me Kin Apwalih Mwomwohdiso nan Sampah Pwon rahnwet kin kangoange elder kan ren nantihong kapwaiada pwais laud wet en apwalih sapwellimen Koht pelin sihpw.

⁵ Wahnpoarono ntingihedi me elder kan en ‘kin wia doadoahk en silepen sihpw me Koht ketikihong irail.’ E keieu kesempwal ong irail ren pohnese me Siohwa oh Sises Krais me sapwellimanki pelin sihpwo. Elder kan anahne wehkada duwen arail kin apwalih sapwellimen Koht sihpw. Ia duwen ma kompoakpahmw keren men peki rehmw ken apwalih nah seri kan ni ahnsou me e sohte mie? Ke sou pahn apwalih mwahu oh kamwenge irail? Ma emen soumwahuda, ke sou pahn tehk ma e alehdi wini me e anahne? Duwehte met, elder kan anahne “wia silepen mwomwohdisohn Koht, me e ketin sapwellimankilahr pwehki ntahn sapwellime Iehros.” (Wiewia 20:28) Re kin tamataman me Koht ketin pwainkihda emenemen sihpw ntahn Sises me pweilaud. Elder kan kin pwukoahki kamwenge, pere oh apwalih pelin sihpwo.

6. Dahme silepen sihpw kan mahs kin pwukoahki wia?

 ⁶ Nna medewehla pwukoa kan me uhdahn silepen sihpw kan ahneki mahs. Re anahne mi pahn karakar nin rahn oh nan kopou nipwong pwe ren apwalih pelin sihpwo. (Sen. 31:40) Arail mour kin pil lelohng keper ni ar kin apwahpwalih sihpw kan. Ni Depit eh wia mwahnakapw, silepen sihpw menet kin doarehsang nah pelin sihpw mahn lawalo kan iangahki laion oh pehr. Dahme e kin wia ong emenemen mahn lawalo pwukat, Depit nda me e kin “daperete, padikpene tepinwere, suk oh kemehla.” (1 Sam. 17:34, 35) Ia uwen kommwad! Mahn lawalo kereniong ngalispene ih! Ahpw e wia soahng koaros me e kak pwehn doarehla sihpw ko.

7. Ia duwen elder kan ar kin ekei pak parokasang sihpw ni ewen Sehdan ni karasaras?

⁷ Rahnwet, elder kan kin anahne perehsang mwomwohdiso uhwong kan me kohsang Tepil me duwehte laion men. Ekei pak re anahne kasalehda kommwad oh ni karasaras adihasang sihpwo ni ewen Tepil. Sang ni ar daperete oh padikpene tepinweren mahn lawalo ni karasaras, elder kan kak doarehla sihpwo. Re pahn sewese irail kan me sohte kin kanahieng oh tepida lohdi nan lidip en Sehdan pwe ren medewe ni ahl pwung duwen arail pilipil kan. (Wadek Sud 22, 23.) Ni mehlel, elder kan sohte kak kapwaiada met ma sohte sapwellimen Siohwa sawas. Ni karasaras, re kin apwalih mwahu sihpw ohla men, kidimada eh ohla oh winiehki Mahsen en Koht pwe en kamwahwihala.

8. Ia wasa me elder kan kin kahluwalahng pelin sihpwo, oh ia duwen?

⁸ Uhdahn silepen sihpw men pil kin kahluwalahng nah pelin sihpw nan mohs mwahu oh wasa me mie pihl. Duwehte met, elder kan kin kahluwalahng pelin sihpw nan mwomwohdiso, kangoange irail ren ahnsou koaros iang towehda mihting kan pwe ren kak ale “kanarail kisin mwenge ahnsou me konehng.” (Mad. 24:45) Elder kan ele anahne doadoahngki ahnsou laud pwe ren sewese irail kan me arail nanpwungmwahu rehn Siohwa luwetala pwe ren men ale ketihnain sang Mahsen en Koht. Sihpw men me salongala ele kin song en pwurala nan pelin sihpwo. Elder kan sohte kin kamasak riarail Kristiano ahpw re kin ni limpoak kawehwehiong ih kaweid en Paipel kan oh kasalehiong ih ia duwen  eh kak doadoahngki kaweid pwukat nan eh mour.

9, 10. Ia duwen elder kan ar anahne sewese irail kan me luwetalahr?

⁹ Ni omw kin soumwahuda, soangen toahkte dahmen me ke men en seweseiuk? Emen me kin doadoahngki ahnsou mwotomwot en rong uhk oh eri mwadang ntingihedi soangen wini dah me ke anahne pwe en doula sewese pil emen soumwahu? De ke pahn men kohla rehn toahkte men me kin uhdahn rong uhk, kawehwehda duwen omw soumwahu oh kasalehda soangen wini kan me pahn kak seweseiuk?

¹⁰ Duwehte met, elder kan kin kak rongorong emen me eh nanpwungmwahu rehn Siohwa luwetala oh sewese kamwahwihala eh ohla. Met kin rasehng ar kin “keiehki leh ni mwaren Kaun-o.” (Wadek Seims 5:14, 15.) Duwehte wini sang Kilead, Mahsen en Koht kak kansenamwahwihala me soumwahu men. Elder kan kin doadoahngki Mahsen en Koht pwe ren “kapwurehdo me kin kohkohseli mwahl akan, kidimpene ohlahn me lipwalipwada kan, kamwahwihala me soumwahu kan.” (Ser. 8:22; Esek. 34:16) Ni eh pahn doadoahngki kaweid en Paipel kan, met kak sewese ih en kak pwurehng wiahda pilipil kan pwe en kak uhdahn papah Siohwa. Ei, elder kan kak sawas laud ni ar kin rong en sihpw me luwetkilahr men eh pwunod kan oh iang ih kapakap.

Kaidehn ni Mehnseiren Ahpw ni Peren

11. Dahme kin kamwakid elder kan ren perenki apwalih sapwellimen Koht pelin sihpw?

¹¹ Piter pil doula katamankihong elder kan ia mwomwen arail anahne wia doadoahk en silepen sihpw. Elder kan anahne apwalih sapwellimen Koht pelin sihpw, “kaidehk ni mehnseiren ahpw ni kupwur mwahu.” Dahme kin kamwakid elder kan ren perenki sewese riarail Kristian kan? Dahme kin kamwakid Piter en apwalih oh kamwenge sapwellimen Sises sihpw kan? Iei eh limpoak ong Kauno. (Sohn 21:15-17) Pwehki limpoak, elder kan en “dehr kin mourki pein ihr, ahpw re en kin mourkihte ih me pwoukinirailla.” (2 Kor. 5:14, 15) Limpoak wet, patehng arail limpoak ong Koht oh pil riarail Kristian kan, kin kamwakid elder kan ren kin apwalih pelin sihpw oh doadoahngki arail kehl, dipwisou kan oh arail ahnsou ni arail kin wia met. (Mad. 22:37-39) Re kin toukihda pein irail, kaidehk ni mehnseiren ahpw ni peren.

12. Ia uwen laud Pohl eh kin toukihda pein ih?

¹² Ia uwen laud elder kan ar anahne toukihda pein irail? Ni arail kin apwalih sihpw kan, re kin kahlemengih wahnpoaron Pohl pwe e pil kin kahlemengih Sises. (1 Kor. 11:1) Pwehki arail uhdahn poakepoake riarail kan nan Deselonika, Pohl oh ienge kan kin perenki kihong irail, ‘kaidehn Rongamwahuohte me sang rehn Koht, ahpw pil pein arail mour.’ Ni arail wia met, re kin kadek “duwehte nohno men ni eh kin apwahpwalih nah seri kan.” (1 Des. 2:7, 8) Pohl kin wehwehki duwen pepehm en nohno men ong nah seri kan. E pahn wia soahng koaros ong nah serio, iangahki pirida ni lukepen pwong pwehn kadihdi.

13. Soangen toupahrek dahieu me elder kan anahne ahneki?

¹³ Elder kan anahne kanahieng pwe ren kin toupahrek nan pwukoahn sounapwalih oh pil arail pwukoahn peneinei. (1 Tim. 5:8) Ahnsou kan me elder kan kin doadoahngki ong mwomwohdiso kin wia ahnsou kesempwal me re kak doadoahngki ong arail peneinei. Ehu ahl ren toupahrek nan pwukoa riau pwukat iei en ekei pak luke meteikan pwe ren iang arail Kaudok en Peneinei. Erein sounpar tohto, elder men me ede Masanao nan Sapan kin luke me kiripw kan oh peneinei kan me arail pahpa sohte iang padahk mehlel pwe ren iang eh onop en peneinei. Kedekedeo, ekei irail pwukat wialahr elder kan oh pil kin alasang en Masanao eh mehn kahlemeng mwahu.

Apwalih Pelin Sihpw ni Ngoang, Kaidehk en Ale Pweipwei

14, 15. Dahme kahrehda elder kan anahne kaleke ar men “ale pweipweiki” arail doadoahk? Ia duwen arail kak kahlemengih Pohl?

¹⁴ Piter pil kin kangoange elder kan ren apwalih pelin sihpw, ‘kaidehk pwehki arail pahn ale pweipweiki, a pwehki arail kin uhdahn ngoangki papah.’ Doadoahk en elder kan kin anahne ahnsou laud, ahpw re sohte kin kasik en ale pweipwei.  Piter ese me e anahne kaweidki ienge elder kan duwen keperpen ar men “ale pweipweiki” arail doadoahk en apwalih sihpw. Soangen keper wet kin sansal nan mouren kaun en pelien lamalam kan en Papilon Lapalapo me kin kepwehpwe mendahki aramas tohto semwehmwe. (Kaud. 18:2, 3) Eri, elder kan rahnwet ahneki kahrepe mwahu ren kaleke soangen madamadau wet.

¹⁵ Pohl kin wia mehn kahlemeng mwahu ong Kristian elder kan. Mendahki ih emen wahnpoaron oh kak “kedirapwa” de katoutouwehla Kristian kan nan Deselonika me pid mwohni, e sohte kin ‘ale mehkot sang rehn emen ni eh sohte kin pwain.’ Ahpw e kin “doadoahk laud ni rahn oh nipwong.” (2 Des. 3:8) Elder tohto rahnwet, iangahki irail me wia sounapwalih me kin seiloak, kin wia mehn kahlemeng mwahu me pid ire wet. Re kin perenki iang iengerail me pwoson kan ni ar kin luke irail ahpw re sohte kin “kedirapwahkin” irail mwohni.​—1 Des. 2:9.

16. Ia wehwehn en “ngoangki” apwalih pelin sihpw?

¹⁶ Elder kan kin “ngoangki” apwalih pelin sihpw. Arail ngoang kin sansalda ni arail kin tounmetei pwe ren sewese pelin sihpw. Ahpw met sohte wehwehki me re kin idingkihong pelin sihpw ren papah Siohwa oh pil sohte kin kangoange meteikan ren papah Koht sang ni madamadau en aksiai. (Kal. 5:26) Elder kan kin wehwehki me emenemen sihpw kan wekpeseng. Re kin ngoangki sewese riarail Kristian kan ren perenki papah Siohwa.

Wia Mehn Kahlemeng ong Pelin Sihpw Ahpw Dehr Aksoupeidi

17, 18. (a) Dahme kahrehda ekei pak wahnpoaron ko kin apwalki wehwehki sapwellimen Sises padahk duwen aktikitik? (b) Soangen kahpwal dahieu me kitail pil kak ahneki?

¹⁷ Nin duwen atail koasoiapenehr, elder kan anahne tamataman me pelin sihpw iei sapwellimen Koht, a kaidehn neirail. Re kin kanahieng en dehr “kin aksoupeidi ong irail kan” me iei sapwellimen Koht. (Wadek 1 Piter 5:3.) Ekei pak, sapwellimen Sises wahnpoaron ko kin nantihong ale pwais pwehki ar madamadau sapwung. Re men ahneki manaman duwehte irail kan me kolokol manaman en kaunda nan wehi kan.​—Wadek Mark 10:42-45.

¹⁸ Rahnwet, brother kan me “men wiahla sounapwalih en mwomwohdiso” en kasawih pein irail ia kahrepen ar men wia sounapwalih. (1 Tim. 3:1, NW) Irail kan me wia elder kan met ele men pein idek rehrail ni inen ma re inengieng ahneki manaman de ndandla duwehte ekei wahnpoaron ko kin wia. Ma wahnpoaron ko kin apwalki ire wet, eri elder kan kak wehwehki me re anahne doadoahk laud pwe ren liksang madamadau en sampah me kin men ahneki manaman pohn meteikan.

19. Dahme elder kan anahne tamataman ni ar kin pere pelin sihpw?

¹⁹ Mehlel, mie ahnsou kan me elder kan anahne doadoahngki arail manaman pwe ren kihda kaweid kehlail, duwehte ni ar kin perehsang pelin sihpw kan “kidien wel kan.” (Wiewia 20:28-30) Pohl koasoiong Taitus en kolokol ‘eh manaman unsek ni eh pahn kin kakehlaka oh lipwoare irail kan me kin rong ih.’ (Taitus 2:15) Ahpw nan soangen ahnsou pwuko, elder kan pil anahne song en wauneki irail kan me pidada. Re wehwehki me arail koasoi ni kamantik kin kalapw sair mohngiong en emen oh kamwakid ih en idawehn ahl pwung, met mwahusang arail en kauwe ih ni lemei.

20. Ia duwen elder kan ar kin alasang Sises ni ar kin wia mehn kahlemeng mwahu?

²⁰ Sapwellimen Krais mehn kahlemeng mwahu kin kamwakid elder kan ren poakohng pelin sihpw. (Sohn 13:12-15) Kitail kin mwekidki ni atail kin wadek ia duwen eh kin ketin  padahkih sapwellime tohnpadahk ko nan doadoahk en kalohk oh katohnpadahk. Sapwellime mehn kahlemeng en aktikitik kin kamwakid sapwellime tohnpadahk ko ren men alasang ih ni ar kin kasalehda ‘mpahipene nanpwungarail, oh dehr wiahki me irail mwahusang aramas teikan.’ (Pil. 2:3) Duwehte met, elder kan rahnwet kin men kahlemengih Sises oh re men uhd wia mehn “kahlemengihpen pwihn sihpw.”

21. Ia keting me elder kan kak kasik?

²¹ Piter kaimwisekala eh koasoi ong elder kan sang ni eh kasalehda inou ehu ong ahnsou kohkohdo. (Wadek 1 Piter 5:4.) Sounapwalih kan me keidi pahn “ale mwar lingan ehu me sohte kin sohrala” oh iang Krais nanleng. Sounapwalih me wia kisehn “sihpw teikan” pahn ale pwais kaselel en apwalih sapwellimen Koht pelin sihpw nin sampah pahnangin kaweidpen “Silepe Lapalapo.” (Sohn 10:16, NW) Nan iren onop en mwuhr, kitail pahn koasoiapene ia duwen tohnmwomwohdiso kan ar kak utungada irail kan me idihdida pwe ren apwalih mwomwohdiso.

Kousapahl

• Dahme kahrehda e konehng Piter en kaweidki ienge elder kan ren apwalih pelin sihpw me Koht ketikihong irail?

• Ia duwen elder kan ar anahne apwalih irail kan me ar nanpwungmwahu rehn Koht luwetala?

• Dahme kin kamwakid elder kan ren apwalih pelin sihpw me Koht ketikihong irail?

[Peidek en Onop]

[Kilel nan pali 21]

Duwehte silepen sihpw kan mahs, elder kan rahnwet anahne pere “sihpw” me re kin apwalih