Dahme Seri kan Anahne Sukuhlki?

“Pwe audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.”—2 TIMOTY 3:16.

SERI kan anahne sukuhlki dahme mehlel duwen Koht. Ia wasa irail kak sukuhlki mehlel wet? Sang Paipel, pwuhk me keieu wahun nan pelien lamalam kan nan sampah.

Paipel kin duwehte kisinlikou ehu sang rehn Koht. Nan kisinlikou wet, Koht ketin kasalehda duwen pein ih oh ketikihda kaweid mwahu kan ong sapwellime seri kan koaros, me mah oh pwulopwul. Tehk ekei padahk kan me mi nan Paipel oh iren mehn kasukuhl me kisin seri kan pil kak sukuhlkihdi.

Dahme Koht kupwurki kitail en ese duwen ih?

◼ Dahme Paipel kin padahngki: “Pwe aramas akan en esehla me komwi, me mwarenki Siohwa, komwi kelehpw me Keieu Lapalap pohn sampah koaros.”—Melkahka 83:18, NW.

Iren Mehn Kasukuhl: Koht uhdahn mie oh mie pein mware.

◼ Dahme Paipel kin padahngki: “[Siohwa] ketin mwahngih audepen atail lamalam oh ineng koaros. Ma ke pahn sohpeiong, e pahn ketin kupwurperenkinuhkala.”—1 Kronikel 28:9.

Iren Mehn Kasukuhl: Siohwa Koht kin ketin nsenohki kitail koaros iangahki kisin seri kan. (Melkahka 10:14; 146:9) E kupwurki kitail en sukuhlki duwen ih.

◼ Dahme Paipel kin padahngki: “Kumwail dehr wiakauwe . . . me sepwoupwou men. Ma kumwail pahn wia met, ngehi, KAUN-O, I pahn rong irail ni ar pahn likweriong ie pwe I en sewese irail.”—Eksodus 22:22-24.

Iren Mehn Kasukuhl: Siohwa pil kin ketin karonge kapakap en seri kan. Kitail kak pato ong Koht ahnsou koaros oh kasalehda audepen mohngiongitail oh atail pepehm kan ong ih.

◼ Dahme Paipel kin padahngki: “Re pwurupwurehngete kasongosonge Koht oh katoutouwihala nan kupwuren Koht Sarawien Israel.”—Melkahka 78:41.

Iren Mehn Kasukuhl: Atail koasoi oh wiewia kan kin kamwakid kupwuren Siohwa, ihme kahrehda kitail anahne medewe mahs dahme kitail pahn koasoia oh wia.

 Ia pahn atail wiewia ong irail kan me weksang kitail?

◼ Dahme Paipel kin padahngki: “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”—Wiewia 10:34, 35.

Iren Mehn Kasukuhl: Ma Koht kin ketin pwungki aramas koaros, eri kitail en dehr kin liaktohrohr ong meteikan pwehki pohn kilirail de meserail weksang kitail.

◼ Dahme Paipel kin padahngki: “Onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mi rehmwail. Ahpw kumwail wia ni tiahk en kadek oh wahu.”—1 Piter 3:15, 16.

Iren Mehn Kasukuhl: Ni atail kin koasoia pelien lamalam, kitail pahn uhdahn kasalehda dahme kitail kamehlele ni kadek. Kitail pil anahne wauneki dahme re kamehlele mehnda ma e weksang dahme kitail kamehlele.

Ia pahn atail wiewia ong tohn atail peneinei?

◼ Dahme Paipel kin padahngki: “Kumwail seri kan . . . pahn kin peikiong amwail pahpa oh nohno kan, pwe iei me Koht kin ketin kupwurperenki.”—Kolose 3:20.

Iren Mehn Kasukuhl: Ni ahnsou me seri kan kin peik, re kin kasalehda me re kin poakohng samarail oh inarail kan oh kin men kaperenda Koht.

◼ Dahme Paipel kin padahngki: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr.”—Kolose 3:13.

Iren Mehn Kasukuhl: Aramas teikan iangahki tohn atail peneinei pahn kin kansensuwedih kitail ekei pak. Ahpw ma kitail men Koht en ketin mahkohng kitail, kitail anahne ese mahkohng meteikan.—Madiu 6:14, 15.

 Dahme kahrehda kitail en kin mehlel oh kadek?

◼ Dahme Paipel kin padahngki: “Kumwail kesehla amwail likamw akan, oh emenemen kumwail en kin lokaia mehlel.”—Episos 4:25.

Iren Mehn Kasukuhl: Ni atail kin koasoi mehlel, kitail kin alasang Koht oh kin kaperenda kupwure. Ma kitail kin ahnla koasoi likamw, kitail kin duwehla imwintihti en Koht, Tepilo, me iei “semen soangen likamw koaros.”—Sohn 8:44; Taitus 1:2.

◼ Dahme Paipel kin padahngki: “Kumwail wiahiong meteikan me kumwail kin anahne aramas akan en kin wiahiong kumwail.”—Madiu 7:12.

Iren Mehn Kasukuhl: Kitail en kin nsenohki pepehm, madamadau, oh anahn en atail peneinei oh meteikan nan atail wasahn kousoan. Ma kitail kin wia met, meteikan pahn pil kin kadek ong kitail.—1 Piter 3:8; Luk 6:38.

Duwen me sansalehr mwowe, iren mehn kasukuhl kan me mi nan Paipel kak sewese seri kan en kin kalahnganki, wauneki oh ese poakehla aramas laud kan. Ahpw ihs me pahn padahkihong seri kan mehn kasukuhl pwukat?