Likih Siohwa “Koht me Pwarer en Kansenamwahu Koaros”

“Kitail kapinga kalahngan en Koht, Semen atail Kaun Sises Krais, ih Samatail me kalahngan oh Koht me pwarer en kansenamwahu koaros.”​—2 KOR. 1:3.

1. Dahme kitail koaros anahne?

SANG ni atail ipwidi, kitail anahne sawas pwe kitail en nsenamwahu. Seri pwelel men kin sengiseng pwehn kehsehkin kitail ahnsou me kitail anahne kansenamwahwih. Mwein e men emen en koledi de e men mwengehda. Ni atail pil lalaudla, kitail kalapw anahne emen en kansenamwahwih kitail. Met mehlel ni ahnsou me kitail kin mi nan apwal.

2. Dahme Siohwa ketin inoukihong irail kan me kin likih?

² Atail peneinei oh kompoakepatail kan kak kansenamwahwih kitail. Ahpw re sohte kak sewese kitail ni soahng koaros me kin kahrehiong kitail nan lokolok. Mie ahnsou kan me Koht kelehpw me kak kansenamwahwih kitail. Sapwellime mahsen kan inoukihong kitail: “E kin ketiket limwahn irail kan me kin likweriong, . . . e kin ketin karonge ar likwer.” (Mel. 145:18, 19) Paipel pil mahsanih me “KAUN-O kin ketin sinsile me pwung kan oh kin ketin karonge ar likwer kan.” (Mel. 34:15) Ahpw ma kitail men Koht en ketin kansenamwahwih kitail, kitail anahne likih. Depit koasoia: “Rehn KAUN-O iei wasahn ruk ong me toutoulahr akan, iei wasahn rukula ni ahnsou apwal. Maing KAUN, irail kan me patohwan esei komwi pahn kin likih komwi; komw sohte kin ketin likidmeliehla mehmen me kin patohdo rehmwi.”​—Mel. 9:9, 10.

3. Dahme Sises mahsanih pwehn sewese kitail en wehwehki ia uwen Siohwa eh ketin poakohng kitail?

³ Siohwa ketin kesempwalki sapwellime tohnkaudok kan. Sises mahsanih: “Kisin menpihr limmen soh kin netila sens riau? Ahpw sohte emen rehrail me Koht kin ketin meliehla. Pil pitenmoangamwail kan koaros wadawadier. Eri, kumwail dehr perki mehkot; pwe kumwail inenen kesempwalsang menpihr tohto!” (Luk 12:6, 7) Siohwa ketin mahsanihong mehn Israel kan: “I poakohng kumwail ahnsou koaros, ihme I pahn kadakadaurkihte ei limpoak poatopoat ong kumwail.”​—Ser. 31:3.

4. Dahme kahrehda kitail kak likih sapwellimen Siohwa inou kan?

⁴ Ma kitail kin koapworopworki Siohwa oh sapwellime inou kan, kitail kak ahneki nsenamwahu nan ahnsou apwal akan. Kitail anahne likih Koht duwehte Sosua. E koasoia: “KAUN-O amwail Koht ketikihong kumwail soahng mwahu koaros me e ketin inoukidahr. E ketin kapwaiadahr inou koaros me e ketin wiahda, sohte ehu me sapwungala.” (Sos. 23:14) Eri, kitail kak kamehlele me mehnda ma kitail kin lokolok pwehki kahpwal kan, Koht me lelepek oh e sohte pahn ketin likidmeliehla sapwellime ladu lelepek kan.​—Wadek 1 Korint 10:13.

5. Dahme kahrehda kitail kak kansenamwahwih meteikan?

⁵ Wahnpoaron Pohl kahdaneki Siohwa “Koht me pwarer en kansenamwahu koaros.” Met wehwehki me Siohwa pahn kansenamwahwihala irail kan me kin mihla nan lokolok oh pahtou. (Wadek 2 Korint 1:3, 4.) Sohte mehkot de emen kak irehdi Samatail nanleng. Eri e kak ketin wia soahng koaros me anahn pwehn kansenamwahwih koaros me kin poakohng. Pwehki Koht eh kin ketin kansenamwahwih kitail, kitail pil kak kansenamwahwih riatail kan “nan soangen apwal koaros.”  Sohte emen kak kansenamwahwih kitail mwahusang Siohwa.

Kahrepen Kahpwal kan

6. Ia ekei soahng kan me kin kahrehiong kitail lokolok?

⁶ Kitail anahne emen en kansenamwahwih kitail nan soangsoangen irair kan nan atail mour. Ehu kahpwal me inenen kansensuwed iei mehlahn emen me kitail kin poakohng ahpw mehlel atail pwoud de neitail seri. A ekei ele anahne sawas pwehki re kin lelohng kahpwal en lipilipilki aramas. Soumwahu, mahla, paisuwed, oh pil soahng suwed koaros me kin wiewiawi nan sampah wet kak pil kahrehiong kitail lokolok.

7. (a) Dahme kitail kin anahne nan ahnsou apwal akan? (b) Dahme Siohwa kak ketin wia pwehn kansenamwahwihala me “nan kapehd tikitiklahr”?

⁷ Nan ahnsou apwal akan kitail kin lokolok ni soahng tohto. Kitail anahne emen en kansenamwahwih kitail pwehki atail mohngiong, madamadau, pepehm, atail roson mwahu oh pil atail pwoson ele kin luwetala. Karasepe, medewehla atail mohngiong. Mahsen en Koht mahsanih me ‘nan kapehdatail tikitiklahr.’ (Mel. 34:18) Siohwa kak ketin uhdahn sewese kitail nan irair wet. E “ketin kamwahwihalahr me nan kapehd ohlahr akan oh ketin kidimpenehr ar ohla kan.” (Mel. 147:3) Mehnda ma kitail mi nan irair kan me inenen apwal, Koht kak ketin kansenamwahwihala atail mohngiong ma kitail kin kapakapohng oh ahneki pwoson oh peikiong sapwellime kosonned akan.​—Wadek 1 Sohn 3:19-22; 5:14, 15.

8. Ia duwen Siohwa eh kin ketin sewese kitail kansenamwahwih atail madamadau?

⁸ Pwehki atail kin lelohng soangen kahpwal kan, kitail anahne sawas pwehn kansenamwahwih atail madamadau. Kitail kin anahne sawas ma kitail kin lelohng soangen kahpwal pwukat. Sounmelkahkao koulki: “Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.” (Mel. 94:19) Pohl pil koasoia: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pil. 4:6, 7) Kitail anahne wadek Paipel oh medemedewe laud dahme e mahsanih ni atail kin anahne kameleileidi atail madamadau. Met pahn uhdahn kansenamwahwihkitailla.​—2 Tim. 3:15-17.

9. Dahme kak sewese kitail ni atail kin ahneki pepehm suwed kan?

⁹ Ekei pak kitail kin mworusala kahrehda kitail kin ahneki pepehm suwed kan. Mwein kitail kin medewe me kitail sohte kak wia dahme Siohwa ketin kasik sang kitail de kitail sohte kak kapwaiada atail pwukoa nan mwomwohdiso. Nan pil soangen kahpwal wet, Siohwa kak ketin kansenamwahwih kitail. Karasepe: Ni ahnsou me Siohwa ketin mahsanihong Sosua en kahre mehn Israel ko ren peiong wehi kan me wia arail imwintihti, Moses padahkihong aramas ako: “Kumwail nan kapehd kehlail oh kommwad, oh dehr masak irail de perki mehkot; pwe KAUN-O, amwail Koht, pahn ketin ieiang kumwail, e sohte pahn ketin keseikumwailla de likidmelieikumwailla.” (Deud. 31:6) Pwehki sapwellimen Siohwa sawas, Sosua kakehr kahluwalahng sapwellimen Koht aramas ako nan Sapwen Inowo oh kalowehdi arail imwintihti ko. Moses pil ale soangen sawas wet sang Siohwa ni Sehd Weitahtaho.​—Eks. 14:13, 14, 29-31.

10. Dahme kak sewese kitail ma kahpwal kan kin kaluwetehla atail roson mwahu?

¹⁰ Kahpwal kan kak kaluwetehla atail roson mwahu. Ni mehlel e kin sawas ni atail mwenge mwahu, kommoal mwahu, kalapw eksersais oh imwatail oh paliwaratail en kin mwakelekel. Oh pil ma kitail kin medewe dahme Paipel mahsanih duwen ahnsou kohkohdo, met pahn sewese atail roson mwahu. Eri ma kitail kin lokolongki kahpwal de kasongosong, e  pahn mwahu kitail en taman me Pohl pil iang lokolok oh medemedewe eh koasoi en kangoang kan: “Soangen apwal koaros kin lel kiht, ahpw se sohte kin ohkihla; se kin mihla nan peikasal ekei ahnsou, ahpw e sohte kin kauwehla at koapworopwor; mie at imwintihti tohto, ahpw se sohte mwahn kin kelehpwla; oh ekei ahnsou paliwarat lellel, se ahpw sohte ohla douluhl.”—2 Kor. 4:8, 9.

11. Dahme kitail kak wia ma kitail pehm me atail pwoson luwetalahr?

¹¹ Ekei kahpwal kan kakete kaluwetehla atail pwoson. Siohwa pil kak ketin sewesehkin kitail met. Sapwellime mahsen inoukihong kitail: “E kin ketin sewese irail kan me kin mihla nan apwal; e kin ketin pwekada irail kan me kin pwupwudi.” (Mel. 145:14) Ma kitail pehm me atail pwoson luwetalahr, kitail anahne peki sawas rehn elder kan. (Seims 5:14, 15) Oh atail kin kalapw medemedewe atail koapworopwor en mour soutuk pahn kakehlei kitail ni atail pwoson kin lelohng kasongosong kan.​—Sohn 17:2, 3.

Irail me Koht Ketin Kansenamwahwihala

12. Ia duwen Siohwa eh ketin kansenamwahwihala Eipraam?

¹² Sounmelkahkao patohwanohng Siohwa: “Komw ketin tamanda inowo me komw ketin wiahiong ie, sapwellimomwi ladu menet; e kahrehiong ie koapworopwor laud. Mehnda ma I mi nan lokolok ahpw I nsenamwahu pwehki sapwellimomwi inowo kakehleiedahr.” (Mel. 119:49, 50) Rahnwet, kitail naineki sapwellimen Siohwa mahsen iei Paipel, me audaudkihda karasepe tohto duwen Koht eh kin ketin kansenamwahwihala sapwellime ladu kan. Karasepe: Eipraam pwunodada ni eh rongada me Siohwa pahn ketin kamwomwala Sodom. E patohwanohng Koht: “Ia duwe, komw uhdahn pahn ketin kamwomwala me dipan akan, iangahki me sohte dipe kan?” Siohwa ketin kansenamwahwihala Eipraam ni eh ketin inoukihong me e sohte pahn ketin kasohrehla kahnimw ko ma mie aramas pwung limehk loale. Ahpw Eipraam patohwan idek rehn Siohwa pil pak limau: Ia duwen ma me pwung mehte pehk limen? 40? 30? 20? 10? Siohwa ketin kanengamah oh inoukihong Eipraam me e sohte pahn ketin kasohrehla Sodom ma mie aramas pwung mehte ehk. Mendahki aramas pwung sohte lel ehk, Siohwa ketin doarehla Lohd oh nah serepein ko.—Sen. 18:22-32; 19:15, 16, 26.

13. Ia duwen Ana eh kasalehda me e likih Siohwa?

¹³ En Elkana pwoud Ana uhdahn men naineki seri. Ahpw e sohte kak naineki seri oh met kansensuwedihala. E kapakapkiong Siohwa met, oh Samworo Lapalap Ilai ndaiong:  “Koht en Israel en ketin kapwaiada omw pekipeken.” Met kansenamwahwihala Ana oh e sohla mesen pwunod. (1 Sam. 1:8, 17, 18) Ana likih me Siohwa pahn ketin apwalihala eh kahpwalo. Mendahki e sehse dahme pahn wiawi, e kin ahneki popohl. Siohwa eri ketin sapengala eh kapakapo. E liseianda oh naitikihada pwutak emen. E kihong ede Samuel.​—1 Sam. 1:20.

14. Dahme kahrehda Depit anahne sawas pwehn nsenamwahula? Ihs me e peki sawas reh?

¹⁴ Emen me Koht pil ketin kansenamwahwihala iei Nanmwarki Depit. Siohwa kin ketin “kasawih nan mohngiong en aramas akan.” Kahrehda ni eh ketin pilada Depit en wia nanmwarkien Israel, e ketin mwahngih me Depit kin men wia me pwung oh poakohng kaudok mehlel. (1 Sam. 16:7; 2 Sam. 5:10) Ahpw mwuhr, Depit wiahiong dipen kamwahl Padsipa oh song en ekihsang meteikan dipeo. Ni ahnsou me e wehwehkihda uwen suwed en dipeo, e kapakapohng Siohwa: “Komw ketin lapwahda dipei kan nin duwen sapwellimomwi kalahngan lapalap! Komw ketin widensang ei suwed koaros oh ketin kamwakeleiehda sang nan dipei kan! I ese duwen ei sapwung kan; dipei kan kin sansal ong ie ahnsou koaros.” (Mel. 51:1-3) Depit uhdahn koluhkihla dipeo oh Siohwa ketin mahkohng. Ahpw, e sohte pitsang lokolongki kasuwedpen dipeo. (2 Sam. 12:9-12) Mendahki met, sapwellimen Siohwa kupwurkalahngan kin kansenamwahwihala Depit.

15. Sawas dah me Siohwa ketikihong Sises mwohn eh pwoula?

¹⁵ Ni eh ketiket nin sampah, Sises ketin lelohng kahpwal tohto. Koht ketin mweidohng en lelohng kahpwal pwukat, ahpw e kin lelepek ahnsou koaros. Ih aramas unsek men oh ahnsou koaros e kin likih Siohwa oh peikiong nin duwen eh Kaun. Mwohnte eh ketin pengpengla oh kamakamla, Sises patohwan kapakapohng Siohwa: “Kaidehkin nsenei, pwe kupwuromwihte en pweida.” Tohnleng men eri pwarohng Sises oh karosonda. (Luk 22:42, 43) Koht ketin kansenamwahwihala Sises oh ketikihong kehl oh sawas me e anahne ni ahnsowo.

16. Ma atail mour mihla nan keper pwehki atail pwoson, ia duwen Siohwa eh kak ketin sewese kitail?

¹⁶ Siohwa kak oh pahn ketin sewese kitail en loalopwoatohng mehnda ma atail mour mihla nan keper pwehki atail pwoson. Kitail pil kin nsenamwahu pwehki koapworopwor en kaiasada. Oh ia uwen atail kin kasikasik rahn me atail imwintihtio, mehla, “pahn lohdi”! (1 Kor. 15:26) Siohwa ketin tamatamante sapwellime ladu lelepek ko me melahr oh meteikan me pil melahr. E sohte kak ketin likidmelieirailla. E pahn ketin kaiasada irail. (Sohn 5:28, 29; Wiewia 24:15) Atail pwoson sapwellime inou en kaiasada kin kansenamwahwih kitail oh kihong kitail koapworopwor laud ni atail kin lelohng kalokolok kan.

17. Ia duwen Siohwa eh kak ketin kansenamwahwih kitail ma emen me kitail poakohng mehla?

¹⁷ E kin kansenamwahu en ese me me melahr akan me kitail poakohng pahn kaiasada nan sampah kapw. Soahng kan me kin kahrehda lokolok solahr pahn mie. Oh e wia pwais kaselel ehu ong sapwellimen Siohwa ladu kan me wia “pokon kalaimwun” me pahn pitsang koasoandi suwed en sampah, ren kasamwo oh padahki irail akan me pahn iasada.​—Kaud. 7:9, 10, NW.

Pahn nin Limmen Koht me Poatopoat

18, 19. Ia duwen Koht eh ketin sewese sapwellime ladu kan ni ar kin lelohng kalokolok?

¹⁸ Soukohp Moses wiahda koul en kangoang oh kansenamwahu ong mehn Israel kan. Nan koul wet, e koulki: “Koht iei doarepamwail ahnsou koaros, nin lime poatopoat kan, iei utupomw.” (Deud. 33:27) Mwuhr, soukohp  Samuel padahkihong mehn Israel kan: “Kumwail dehpa sohpeisang KAUN-O, kumwail uhpahiong ni mohngiong unsek. . . . A Koht ketin kahukihla me e sohte pahn ketin keseikumwailla.” (1 Sam. 12:20-22) Ni atail pahn papah Siohwa ni lelepek, e sohte pahn ketin keseikitailla. Ahpw, e pahn ketikihong kitail sawas ahnsou koaros me kitail anahne.

¹⁹ Koht kin ketin sewese oh kansenamwahwih sapwellime aramas akan ni imwin ahnsou apwal pwukat. Nan atail ahnsou, riatail Kristian tohto nan sampah pwon kin lelohng kalokolok oh selidi pwehki arail papah Siohwa. Dahme wiawihong irail kin kadehdehda me Siohwa uhdahn kin ketin kansenamwahwihala sapwellime ladu kan ni ahnsou apwal. Karasepe, emen riatail ko nan Soviet Union senselki sounpar 23 nan imweteng pwehki eh pwoson. Mehnda e mihmi nan imweteng, e kin alehdi sawasepen Paipel kan me kin kakehlaka oh kansenamwahwihala. E nda: “Erein sounpar ko, I esehla likih Siohwa oh alehdi kehl sang reh.”​—Wadek 1 Piter 5:6, 7.

20. Dahme kahrehda kitail kak kamehlele me Siohwa sohte pahn ketin keseikitailla?

²⁰ Sohte lipilipil dahme kakete wiawihong kitail ni ahnsou kohkohdo, e pahn mwahu ong kitail en tamataman mahsen kansenamwahu pwukat: “KAUN-O sohte pahn ketin kesehla sapwellime kan.” (Mel. 94:14) Mehnda ma kitail kin anahne emen en kansenamwahwih kitail, kitail pil kak kansenamwahwihala meteikan. Nan iren onop en mwuhr, kitail pahn sukuhliki ia duwen atail pahn kak kansenamwahwihala irail akan me mihla nan lokolok nan sampah suwed wet.

Ia Duwen Omw Pahn Sapeng?

• Ia ekei soahng kan me kin kahrehiong kitail nan lokolok?

• Ia duwen Siohwa eh kin ketin kansenamwahwihala sapwellime ladu kan?

• Ma atail mour mihla nan keper, dahme kak kansenamwahwihkitailla?

[Peidek en Onop]

[Koakon/Kilel kan nan pali 26]

DAHME KITAIL KAK WIAHIONG SOAHNG KAN ME KIN KALUWETEHLA ATAIL . . .

▪ mohngiong Mel. 147:3; 1 Sohn 3:19-22; 5:14, 15

▪ madamadau Mel. 94:19; Pil. 4:6, 7

▪ pepehm kan Eks. 14:13, 14; Deud. 31:6

▪ roson mwahu 2 Kor. 4:8, 9

▪ nanpwungmwahu rehn Koht Mel. 145:14; Seims 5:14, 15