Mie Emen me Kin Kahrehda me Suwed Koaros?

“I ITIPEHIONGEHR tepilo.” Ihme emen kaunen sounpei en United Nations nan Rwanda ndahki arail sohte kak kauhdi kamalahn keinek kan nan sahpwo erein pahr 1994. Emen me pil kilang tiahk suwed oh lemei me kin wiawi ni ahnsowo pil koasoia: “Ma mie me kin kahmahmki me sohte Sehdan, a en kohdo tuhwong ie ni lapalahn sousou ehu nan Rwanda me diren aramas seridi loale.” Ia duwe, soangen tiahk lemei oh kapwuriamwei duwehte met iei doadoahk en Tepilo?

Pali laud en aramas sohte kin medewe me tiahk suwed oh lemei me kin wiawi ni soh kahrepe iei doadoahk en ngehn soh sansal suwed emen. Me tohto kin medewe me soangen wiewia pwukat kohsang suwed me aramas akan kin sohsohki oh re kin nda me kahrepen soahng suwed pwukat kohsang pein atail roporop. Meteikan kin medewe me met iei wiewiahn pwihn en aramas kepwehpwe oh manaman ehu me soh sansal nin sampah pwon me kin kamwakamwakid aramas ahnsou reirei pwe ren kak kaunda sampah. Eri pil mie irail kan me kin kapwukoahki koperment oh kaun kan kopwung sapahrek oh lokolok me re kin kilang.

Dahme ke kamehlele? Dahme kahrehda suwed, lemei, tiahk suwed oh kapwuriamwei oh pil lokolok kin lalaudla nan sampah rahnwet mendahki arail kin songosong en kauhdi mepwukat? Dahme kahrehda likamwetearamas kin inenlahngete ahl ehu me pahn pein kauweirailla oh sohte kin tehk kaweid me kin katakataman ong irail dahme wiawiher? Ihs me uhdahn kakaun sampah? Mwein ke pahn pwuriamweiki pasapengo.