3 Koht Kin Ketin Ikih—Mehlel Ieu Met?
3 Koht Kin Ketin Ikih—Mehlel Ieu Met?
Mwehin ihme ke kin rongen: “Koht kin ketin tehk dihp koaros me kitail wiahda pwehn ketin ikih kitail ong lokolok poatopoat nan ehl.”
“Koht kin ketin kahrehda melimel, rerrer en sahpw, lapake, de pil iloak laud ape pwehn kaloke aramas akan.”
Dahme Paipel padahngki: Keriau en Piter 3:9 mahsanih me Siohwa “sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” Koht sohte kin ketin tetehk atail sapwung kan ahpw e kin ketin tetehk atail irair mwahu kan. Koht kin ketin “mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.”—2 Kronikel 16:9.
Padahk en ehl sohte kin kohsang nan Paipel. Koht kin ketin kalahdeki madamadau en lokolok poatopoat. Sapwellime kalokolok me keieu laud ong aramas suwed iei en ketikihsang arail mour. (Seremaia 7:31; Rom 6:7) Oh soangen kahpwal kan me duwehte melimel, rerrer en sahpw, lapake, de pil iloak laud, me kin wiawi ni soh kasikpe, kaidehn doadoahk en Koht kei met, ahpw paisuwed kin lelohng aramas koaros.—Eklesiasdes 9:11.
Esehla padahk mehlel kin sewese kitail: Kitail kin karanihala Koht ahnsou me kitail esehla me e kin ketin “diren mahk” oh sohte kin ketin mwadang en kadeik. (Melkahka 86:5) Kitail sohte anahne papah Koht pwehki kitail masak kalokolok kan sang reh. Ahpw atail limpoak ong Siohwa me pahn keieu kamwakid kitail en kakehlaka atail pwoson. Ih met me pahn kahrehiong kitail en wia uwen atail kak pwehn kaperenda ih.—Madiu 22:36-38; 1 Sohn 5:3.
Koht kupwurki kitail koaros en wia me mwahu, ahpw e pil ketin mwahngih me me tohto sohte pahn. Ma Koht sohte ketin uhwong irail kan me pilada ren wia me suwed, eri e sohte pahn weksang kaun kan me kin wiahda kosonned ahpw sohte kin doadoahngki kahrehda kopwung sapahrek oh lokolok kin wie lalaudla. (Eklesiasdes 8:11) Atail kin ese me Koht sohte pahn ketin mweidohng me suwed en mihmi kohkohlahte kin kihong kitail koapworopwor mwahu ong ahnsou kohkohdo. Koht ketin inoukidahr en ketikihsang irail kan me kin wiewiahte me suwed, pwe “me aktikitik kan” en kak perenki mour soutuk nin sampah duwehte me e ketin kupwurki nin tapio.—Melkahka 37:10, 11, 29. *
[Nting tikitik me mi pah]
^ par. 7 Pwehn kalaudehla atail ese ia duwen Koht eh pahn ketin kaparadaisihala sampah, kilang irelaud 3 oh 8 en pwuhken Dahme Paipel Uhdahn Padahngki?
[Blurb nan pali 6]
Ia duwe, Koht kupwurki kitail en kaudokiong ih pwehki kitail masak kalokolok kan?
[Kilel Credit Line nan pali 6]
Mesen nting kan sang Doré
