5 Koht Kupwurki Kaudok Koaros Ma Towe kan Mohngiong Mehlel​—Mehlel Ieu Met?

Mwein ihme ke kin rongen: “Duwehte ahl tohto me kin kohla wasatehkis, pil mie ahl tohto me kin kolahng rehn Koht. Emenemen anahne pein rapahkihda ahl me pahn kolahng rehn Koht.”

Dahme Paipel padahngki: Kitail en mehleliong atail kaudok ahpw dehr mwomwehdahte de pil mwalaun. Sises ketin mahsanihong kaunen pelien lamalam ko en ahnsowo kahrepen Koht eh ketin keseirailla. “Mehlelete me Aiseia me pwung ni eh kohpadahr duwen amwail mwalaunen, duwen me ntingdiero: ‘Koht mahsanih, aramas pwukat kin kahkahkin ie ni arail lokaia, a kapehdirail kan inenen dohsang ie.’” (Mark 7:6) Pwe Koht en ketin kupwurki atail kaudok, kitail anahne wia laudsang en mehlelete.

Sises ketin kasalehda ni sansal dahme sapwung nan soangen kaudok me kaunen pelien lamalam ko oh towe kan kin wia. E kasalehda dahme Koht mahsanihki duwen irail: “Sohte katepen ar kin kaudokiong ie, pwe re kin padahkihweite kosonned en aramas.” (Mark 7:7) “Sohte katepen” arail kaudok pwehki re medewe me e kesempwal en idawehn tiahk kan laudsang en tehk ma Koht kin kupwurki arail wiewia kan.

Paipel sohte kin utung madamadau me dene mie ahl tohto kolahng rehn Koht, ahpw e padahngki me ahl tehpwoat me kolahng reh. Madiu 7:13, 14 mahsanih: “Kumwail keid nan ewen kehl wetikitik, pwe elen kolahng nan ehl [“kasohrala,” NW] me tehlap oh mengei, oh aramas ngeder kin keid ie. A wenihmw me kolahng mour me wetikitik oh elen kolahng ie me apwal, eri, me malaulau me kin diar.”

Esehla padahk mehlel kin sewese kitail: Medewehla ma ke kin iang kasoku pwe ken kak iang marasong ehu. Kowe eri iang tang oh kana, ahpw irail ndaiong uhk me ke sohte pahn ale kisakis pwehki ke kauwehla ehu kosonned ko ni omw sohte ese. Ia pahn omw pepehm? Ele ke pehm me omw nannanti koaros sohte katepe. Ia duwen, met kak wiawihong atail kaudok ong Koht?

Ni eh karasahiong atail kaudok ong siai en mwadong ehu, wahnpoaron Pohl koasoia: “Sounmwadong men me kin tang nan weirentang sohte kak koledi ehu kisakis ma e sohte pahn peikiong kosonned akan.” (2 Timoty 2:5) Koht pahn kupwurki atail kaudok ma kitail kin “peikiong kosonned akan” ni ahl me e ketin kupwurki. Sounweiren tang men sohte kak kana ma e kauwehla kosonned en weirentango. Pil duwehte, Koht sohte pahn ketin pwungkin kitail ma kitail song en pilada pein atail elen kaudok ong ih.

Pwehn kaperenda Koht, kitail anahne kihsang padahk likamw kan duwen ih nan atail kaudok. Sises mahsanih: “Tohn kaudok mehlel kan pahn kaudokiong Sahmo ni . . . mehlel.” (Sohn 4:23) Kitail kin sukuhlki ahl me mehlel me kolahng rehn Koht sang sapwellime mahsen, Paipel.​—Sohn 17:17. *

[Nting tikitik me mi pah]

[Blurb nan pali 8]

Ia duwe, pelien lamalam koaros kin padahkihong aramas akan ren kaudokiong Koht ni ahl me e ketin kupwurki?