Mie Pak me Emen Pitihiukedi?

MIE soahng kei me kin kamedek sang omw esehda me emen pitihiukedi. Ni emen eh kin pitihiukedi, ke kin sarohdi, lingeringerda de ke pehm me e panguhkala. Lokaia likamw kin kauwehla nanpwungen pirien oh pil pwopwoud kan; e pil kin pitihasang nein aramas mwohni tohto.

Ia pahn omw pepehm ma ke diarada me emen kin pitihkin uhk duwen Koht? Imwilahn met pahn inenen suwed ong uhk ma kowe emen me kin poadidi. Iet me aramas poadidi pwukat koasoia:

● “I pehm me ei pelien lamalam pitihedi.”—DEANNE.

● “I lingeringerda. I pehm me re keteweiehdi —ei koapworopwor oh mehn akadei kan sohla katepe.”—LUIS.

Mwehin ke sohte kin lemehiong me mie me kak pitihkin uhk likamw kan duwen Koht. Padahk kan me ke ese mwehin kohsang emen me ke kin uhdahn likih, duwehte omw pahpa nohno, padre, wahnpoaron, de pil emen kompoakepahmw keren. Mwehin nan omw mour pwon ke kin kamehlele padahk ehu. Ahpw, ke sou pahn pwungki me lamalam ehu kak likamw mehnda ma pali laud en aramas kin kamehlele? Emen President en Amerika mahso, Franklin D. Roosevelt kin pwungki met pwehki e koasoia: “Omw pwurepwurehng koasoia likamw ehu sohte pahn kahrehiong likamwo en pwungla.”

Ia duwen omw kak ese ma emen pitihukedi? Ehu pak Sises ketin kapakap ong Koht mahsanih: “Sapwellimomwi mahsen, iei me mehlel.” (Sohn 17:17) Ei, Paipel kin audaudki dahme kitail anahne pwe kitail en kak esehda dahme mehlel de likamw.

Paipel pahn kapwungala soangen padahk likamw limau me pid duwen Koht. Ke pahn kilang duwen me mehlelo eh pahn kamwahwihala omw mour.