Pwehn Ahneki Mour oh Popohl, Weweid nin Duwen Sapwellimen Koht Manaman

“Momour nin duwen [“sapwellimen Koht manaman,” NW], kaidehn nin duwen ahnepen aramas.”​—ROM 8:4.

1, 2. (a) Ia keperpen kedirepwki soahng teikan ni omw tangtangahki sidohsa? (b) Ia keperpen mweidohng mehkot en kerempwa atail kaudokiong Siohwa?

EMEN tohndoadoahk en koperment en Amerika koasoia me sounpar koaros, kahpwal en aramas ar kin kedirepwki soahng teikan ni arail kin tangahki sidohsa susuwedla. Karasepe, re sohte kak tehk mwahu arail tangahki sidohsa ma re wie doadoahngki neirail cell-phone. Me tohto kasalehda me re kereniong loiong de loiongehr ehu sidohsa pwehki sountangahki sidohsa teio wie doadoahngki cell-phone. Ele aramas kin medewe me re kin doadoahngki mwahu arail ahnsou ma re kin doadoahngki neirail cell-phone oh pil tangahki sidohsa ni ahnsowohte, ahpw met kak kahrehda aksident.

² Aramas me kin kedirepwki mehkot tohrohr ni eh tangahki sidohsa ele sohte kin tehk mwahu keper kan pohn ahlo. Met rasehng dahme kakete wiawihong atail nanpwungmwahu rehn Siohwa. E pahn keper, ma kitail mweidohng mehkot en kerempwa kitail. Pohl koasoia me kitail kakete kesehla atail pwoson. (1 Tim. 1:18, 19) Wahnpoaron Pohl kaweidki  rie Kristian kan nan Rom keper wet ni eh ntingihedi: “Imwilahn arail nsenohki kapwaiada ahnepen aramas, iei mehla; ahpw imwilahn atail nsenohki kapwaiada [“sapwellimen Koht manaman,” NW], iei mour oh popohl.” (Rom 8:6) Ia wehwehn ahn Pohl kaweid? Ia duwen atail kak soikala “nsenohki kapwaiada ahnepen aramas” oh nantihong “nsenohki kapwaiada sapwellimen Koht manaman”?

“Sohte Riahpen Irail”

3, 4. (a) Soangen uhpene dahieu me Pohl ntingihedi? (b) Dahme kahrehda kitail anahne tehk ahn Pohl irairo?

³ Nan nah kisinlikou ong Kristian kan nan Rom, Pohl koasoia duwen irair ieu reh me e kin apwalki nan eh mour. E koasoia me e mwomwen me eh madamadau oh paliwere kin uhpene. (Wadek Rom 7:21-23.) Pohl sohte koasoia met pwehn kihda kahrepen eh wiewia kan de pwehki eh poakehla pein ih. Dahme e koasoia sohte wehwehki me e sohte kak wia dahme pwung. E wia Kristian keidi oh koahiek men, oh e pilipilda nin duwen “wahnpoaron en mehn liki kan.” (Rom 1:1; 11:13) Eri, dahme kahrehda Pohl ntingihedihki duwen eh kahpwal wet?

⁴ Pohl koasoia me e sohte kak wia kupwuren Koht ni ahl me e uhdahn men wia? Dahme kahrehda? E koasoia: “Aramas koaros wiadahr dihp, oh irail koaros dohsangehr sapwellimen Koht lingan.” (Rom 3:23) Duwehte kadaudok en Adam koaros, Pohl sohte unsek oh ahneki ineng suwed kan. Kitail kak wehwehki eh pepehm. Rahn koaros kitail pil kin nannanti pwehki atail soh unsek oh atail ineng suwed kan. Oh mie soahng tohto me kak kerempwa atail kaudokiong Koht oh kawetkitailsang ahl wetikitik me kolahng mour. (Mad. 7:14) Ahpw mie koapworopwor ong Pohl, oh pil kitail.

5. Ia wasa me Pohl ale ie sawas oh kamaiau?

⁵ Pohl peidengki ihs me kak kapitasang ih pei wet, oh nda: “Kalahngan ong Koht, me kin ketin kapwaiada met rehn atail Kaun Sises Krais!” (Rom 7:24, 25) Pohl kin koasoakoasoiong Kristian keidi kan, irail kan me kin “miniminiong Krais Sises.” (Wadek Rom 8:1, 2.) Siohwa ketin pwekirailkihda sapwellime manaman nin duwen sapwellime seri kei. E ketin wiahla ren “iang Krais paieki dahme Koht ketin nekinekidohng.” (Rom 8:14-17) Sapwellimen Koht manaman oh arail pwoson sapwellimen Sises meirong kin sewese irail en kana nan pei me Pohl koasoakoasoia. Eri Koht solahr ketin keria irail pwehki arail soh unsek. Irail maiaudahsangehr “manaman en kosonned en dihp oh mehla.”

6. Dahme kahrehda sapwellimen Koht ladu koaros anahne wehwehki ahn Pohl koasoi?

⁶ Mendahki Pohl koasoakoasoiong Kristian keidi kan, dahme e koasoiahki sapwellimen Koht manaman oh sapwellimen Sises meirong, kak wia kamwahu ong sapwellimen Siohwa ladu koaros, sohte lipilipil ma re ahneki koapworopwor en mour nanleng de nin sampah. Kaweid me Pohl kihda pwilisang rehn Koht, eri e kesempwal sapwellimen Koht ladu koaros en wehwehki oh peikiong dahme e ntingihedi.

Ia Duwen Koht Eh Ketin “Kasohrehla Dihp”

7, 8. (a) Dahme Kosonnedo sohte kak wia? (b) Dahme Koht ketin wia ni eh ketin doadoahngki sapwellime manaman oh meirong en Sises?

⁷ Nan pwuhken Rom irelaud 7, Pohl kawehwehda me aramas soh unsek kan mi pahn manaman en dihp. Nan irelaud 8, e koasoia duwen dahme sapwellimen Koht manaman kak wia. E kawehwehda me sapwellimen Koht manaman kak sewese Kristian kan ni arail kin nantihong pelianda manaman en dihp. E kak sewese irail en wia dahme Siohwa ketin kupwurki oh e pahn ketin kupwurperenki irail. Pohl kin kasalehda me Koht kin ketin doadoahngki sapwellime manaman oh sapwellimen Sises meirong pwehn wia mehkot me Kosonned en Moseso sohte kak wia.

⁸ Kosonnedo keriahla me dipan akan pwehki aramas akan ar sohte kak peikiong kosonned ko koaros. Kosonnedo sohte kak kihsang dihp oh  katokehdi aramas akan en dehr wiahda dihp. Koht ketin poaronehdo sapwellime Ohl nin duwen aramas men “ni mwomwen aramas dipan,” oh sapwellime meirong “kasohrehla dihp.” Sapwellimen Sises meirong kak doarehsang aramas dihp. Pwehki Kristian keidi kan ar pwoson sapwellimen Sises meirong, Siohwa kak ketin kilangwohng irail nin duwen me pwung kei. Ahn Pohl kaweid kin kangoange Kristian keidi kan en “momour nin duwen [“sapwellimen Koht manaman,” NW], kaidehn nin duwen ahnepen aramas.” (Wadek Rom 8:3, 4.) Re anahne wia met lao lel imwin arail mour nin sampah. Ma re lelepek, re pahn ale “nihnen mour soutuk.”​—Kaud. 2:10.

9. Ia wehwehn lepin lokaia “kosonned” me kadoadoahk nan Rom 8:2?

⁹ Pohl pil koasoia duwen “kosonned en [“sapwellimen Koht manaman,” NW]” oh “kosonned en dihp oh mehla.” (Rom 8:2) Dahkei kosonned pwukat? Lepin lokaia me e doadoahngki nan iretikitik wet sohte kin dokedoke kosonned kan, me duwehte Kosonned en Moses. Ehu pwuhk koasoia me lepin lokaiahn Krihk ong “kosonned” nan iretikitik wet wehwehki tiahk mwahu de suwed me aramas akan kin wia oh me kaunirailda duwehte kosonned ehu. E pil kak wehwehki koasoandi kan me re pilada pwe ren momourki.

10. Ia duwen kosonned en dihp oh mehla eh kin kaunkitailda?

¹⁰ Wahnpoaron Pohl ntingihedi: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Pwehki kitail koaros kadaudoken Adam, kosonned en dihp oh mehla kin kaunkitailda. Atail ineng suwed kahrehiong kitail en wia soahng kan me sohte kin kaperenda Koht. Ahpw mepwukat kahluweikitaillahng mehla. Nan nah kisinlikou ong Kristian kan nan Kalesia, Pohl koasoia me wiewia oh tiahk en dihp pwukat “wiewia kan nin duwen ahnepen aramas.” Oh e koasoia: “Irail kan me kin wia soahng pwukat sohte pahn iang sohsohki Wehin Koht.” (Kal. 5:19-21) Aramas akan me kin wia mepwukat kin weweid “nin duwen ahnepen aramas.” Re kin idawehn arail ineng suwed kan. (Rom 8:4) Re kin weweidki dahme arail ineng suwed ndaiong irail en wia. Ahpw aramas kante me kin wiahda dihp me duwehte nenek, pwongih dikedik kan, oh wunahni me kin idawehn arail ineng suwed? Soh. “Wiewia kan nin duwen ahnepen aramas” me kileldi nan Kalesia pil kin kasalehda mehkan me aramas tohto kak medewe me ihte arail luwet akan mwo. Met akan iangahki luwak, akatat, akamai, oh peirin. Kitail en dehr medewe me kitail sohte anahne pelianda atail soh unsek.

11, 12. Dahme Siohwa ketin wia pwehn kamaiau kitail sang kosonned en dihp oh mehla? Dahme kitail anahne wia pwe Koht en ketin kupwurperenki kitail?

 ¹¹ Kitail kin uhdahn peren pwe Siohwa ketin wiahda koasoandi ehu pwe kitail en maiauda sang kosonned en dihp oh mehla! Sises mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” Ma atail mour kin kasalehda me kitail poakohng Koht oh kitail pwoson sapwellimen Sises meirong, kitail kak pitsang kadeikpen dihp. (Sohn 3:16-18) Kitail pahn ahneki soangen ahn Pohl pepehm ni eh koasoia: “Kalahngan ong Koht, me kin ketin kapwaiada met rehn atail Kaun Sises Krais!”

¹² Atail irair kin rasehng aramas me mwahula sang eh soumwahu laud. Kitail kak mwahula douluhl ihte ma kitail wia dahme toahkte padahkihong kitail en wia. Atail pwoson sapwellimen Sises meirong kak kamaiau kitail sang kosonned en dihp oh mehla, ahpw kitail wiahte aramas soh unsek oh dipan. Mie mehkot me kitail anahne wia pwe kitail en pousehlahte ahneki nanpwungmwahu rehn Siohwa oh en ketin kupwurperenki kitail. Ma kitail men mwahula sang soumwahu en soh unsek, Pohl padahkihong kitail en weweid nin duwen sapwellimen Koht manaman.

Ia Duwen Atail Kak Weweid nin Duwen Sapwellimen Koht Manaman?

13. Ia wehwehn weweid nin duwen sapwellimen Koht manaman?

¹³ Ni atail kin alu, kitail kin kohla wasa me kitail men kohla ie. Pwe kitail en weweid nin duwen sapwellimen Koht manaman, kitail anahne kekeirda nan padahk mehlel. (1 Tim. 4:15) Mendahki kitail sohte kak wia met ni unsek, rahn koaros kitail en wia uwen atail kak en idawehn kaweid en sapwellimen Koht manaman. Ma kitail “weweidki sapwellimen Koht manaman,” kitail pahn kaperenda Koht.​—Kal. 5:16, NW.

14. Ia mwomwen madamadau oh wiewia en aramas akan me kin “momour nin duwen ahnepen aramas”?

¹⁴ Nan nah kisinlikou ong Kristian kan nan Rom, Pohl doula koasoia duwen aramas akan me arail madamadau kan kin uhpene. (Wadek Rom 8:5.) Nan Paipel, lepin lokaia me kawehwehdi “ahnepen aramas” kak ekei pak pid soh unsek en aramas. Atail soh unsek kin kahrehda pei me Pohl kin koasoia duwe. Pohl kin peiong ahnepen aramas de eh soh unsek. Ahpw rahnwet, aramas tohto sohte kin pil song en peiong arail ineng suwed kan, eri re kin “momour nin duwen ahnepen aramas.” Re sohte kin medewe duwen dahme Koht kupwurki ren wia, oh pil sohte peki reh en ketin sewese  irail ren kana nan peio. Re kin kalapw “nsenohki duwen arail pahn kapwaiada ahnepen aramas,” oh mweidohng arail ineng kan en kaunda irail. Eri, aramas akan me “kin momour nin duwen [“sapwellimen Koht manaman,” NW]” kin mweidohng Siohwa en ketin kaweid irail.

15, 16. (a) Ia duwen atail nsenohki wia mehkot eh kak kamwakid atail madamadau? (b) Dahme pali laud en aramas akan rahnwet kin nsenohki wia?

¹⁵ Wadek Rom 8:6. Mwohn aramas akan ar pahn kin wia dahme mwahu de suwed, re pahn medewe mahs dahme re men wia. Ma re kin medewe soahng kan me pid ahnepen aramas, met pahn imwikihla ar pahn kapwaiada ahnepen aramas. Eri, arail madamadau kan, pepehm kan, oh dahme re kin nsenohki kin pidada ahnepen aramas.

¹⁶ Dahme pali laud en aramas kin nsenohki rahnpwukat? Wahnpoaron Sohn ntingihedi: “Pwe mepwukat koaros kisehn sampah: dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda—mepwukat koaros sohte kohsang rehn Sahm, re kohsang nin sampah.” (1 Sohn 2:16) Ineng kan me Sohn ntingihedi iei soahng kan me duwehte tiahk samin, men ndandla, oh pil men kepwehpwehla. Pwuhk kan, kasdo kan, TV oh Internet kin kangoange soangen ineng pwukat ahnsou koaros. Pali laud en aramas kin nsenohki ar pahn kapwaiada soangen ineng pwukat pwehki ih soahng kan me re uhdahn men wia. Pohl koasoia me “imwilahn arail nsenohki kapwaiada ahnepen aramas, iei mehla.” Met kakete kauwehla atail nanpwungmwahu rehn Koht ahnsouwet oh pahn imwikihla atail mehla mwuhr. Dahme kahrehda? Pwehki “aramas akan me kin nsenohki kapwaiada ahnepen aramas, re kin wiahla imwintihti en Koht, pwe re sohte kin kapwaiada kosonned en Koht, oh ni mehlel re sohte kak. Irail akan me kin kapwaiada ahnepen aramas pil sohte kak kaparanda Koht.”​—Rom 8:7, 8.

17, 18. Ia duwen atail kak mweidohng sapwellimen Koht manaman en kaweid kitail? Ia pahn imwilahn atail pahn wia met?

¹⁷ “Imwilahn atail nsenohki kapwaiada [“sapwellimen Koht manaman, NW], iei mour oh popohl.” Met kin wehwehki ahneki mour soutuk ahnsou kohkohdo, popohl nan atail mohngiong oh madamadau oh pil ahneki popohl rehn Koht ahnsouwet. Ia duwen atail kak kasalehda me kitail kin nsenohki kapwaiada sapwellimen Koht manaman? Ma ahnsou koaros kitail kin idawehn kaweid en Koht oh sapwellime manaman, kitail pahn kakairada elen madamadau me pahn pwungiong elen sapwellime madamadau. Kitail men “kosonned en Koht” en kaunda atail madamadau. Eri, ni ahnsou me kitail mi nan irair ehu me kitail anahne pelianda kasongosong, kitail pahn ese dahme kitail anahne wia. Kitail pahn inengieng wiahda pilipil pwung. Kitail pahn wiahda pilipil me sapwellimen Koht manaman kaweidki.

¹⁸ Kitail anahne inengieng nsenohki soahng kan me pid Koht. Kitail men wiahkihla wiewiahn Kristian kan en kin keieu kesempwal nan atail mour. Wiewia pwukat kin pidada kapakap ahnsou koaros, wadek oh onopki Paipel, iang mihting kan oh kalohk. (1 Pit. 1:13) Kitail en dehr mweidohng atail ineng suwed en kaunda kitail, ahpw kitail anahne idawehn sapwellimen Koht madamadau oh mweidohng sapwellime manaman en kaweid kitail. Ma kitail wia met, kitail pahn ahneki kapai tohto, oh pil pahn ahneki mour soutuk oh popohl.​—Kal. 6:7, 8.

Ke Kak Kawehwehda?

• Dahme Kosonned en Moseso sohte kak wia? Ia duwen Koht eh ketin apwalihala met?

• Dahkot “kosonned en dihp oh mehla”? Ia duwen atail kak pitsang met?

• Dahme kitail anahne wia pwehn kakairada nsenohki kapwaiada sapwellimen Koht manaman?

[Peidek en Onop]

[Kilel nan pali 16]

Ke kin weweid nin duwen ahnepen aramas de sapwellimen Koht manaman?