Sewese Ohl akan Ren Kekeirda nan Padahk Mehlel

“Sang met kohla ke pahn kin laidih aramas.”​—LUK 5:10.

1, 2. (a) Dahme ohl tohto wia ni arail rong sapwellimen Sises padahk? (b) Dahme kitail pahn sukuhlki nan iren onop wet?

SISES oh sapwellime tohnpadahk kan kin kedirepwki kalohk nan Kalili. Ehu rahno re dakehda pwoht ehu oh kohla wasa meleilei ehu pwehn kommoal. Ahpw aramas tohto pwakipwakih irail kohla ni oaroahro. “Tohtohn ohl me iang . . . me limekid, lih oh seri kan sohte wadawadohng.” (Mad. 14:21) Pil ehu ahnsou, pokon ehu kohla rehn Sises pwehki re men en ketin kamwahwihirailla oh re men rong sapwellime padahk. Nan pokono, “tohtohn ohl me iang . . . me pahkid, lih oh seri kan sohte iang wadawadohng.” (Mad. 15:38) Ohl tohto kohla rehn Sises oh men kalaudehla arail sukuhlki dahme e kin ketin padahngki. Ahpw Sises ketin mwahngih me pil miehte ohl tohto teikan me pil men esehla padahk mehlel. Kitail ese met pwehki mwurin manaman me e ketin kadirehkihla mwahmw ahn sapwellime tohnpadahk ko uhko, e mahsaniong Saimon: “Sang met kohla ke pahn kin laidih aramas.” (Luk 5:10) Dahme Sises ketin mahsanih wehwehki me arail kalohk rasehng laid. E kak ketin sewese irail en diar aramas tohto me men esehla padahk mehlel oh aramas pwukat pahn iangahki ohl tohto.

² Mie ohl akan rahnwet me kin perenki rong dahme kitail kin padahkihong irail. Re mwahuki kitail en kin onop Paipel rehrail. (Mad. 5:6) Ekei ohl kin tepida sukuhlki duwen Koht ahpw re sohte kin kekeirda nan padahk mehlel. Ia duwen atail kak sewese irail? Nan sapwellime doadoahk en kalohk, e sohte ketin padahk ong ohl akan ni ahl tohrohr. Ahpw e kupwurki sewese irail pwehki mie irair kan me kin kapwunode ohl akan. Nan iren onop wet, kitail pahn sukuhlki ia duwen Sises eh ketin sewese ohl akan oh ia duwen atail kak alasang. Kitail pahn koasoiapene irair siluh: (1) ma ohl men kin pwunodki mwohni, (2) ma ohl men kin perki dahme meteikan kak medewehki, oh (3) ma ohl men kin medewe me e sohte mwahu oh koahiek duwehte meteikan.

Ma Ohl Men Kin Pwunodki Mwohni

3, 4. (a) Dahme ohl tohto kin medewe me kesempwal? (b) Dahme kahrehda ekei ohl kin medewe me mwohni oh doadoahk kesempwal sang esehla padahk mehlel?

³ Ohl men me samanih Kosonned en Moseso patohwanohng Sises: “Maing sounpadahk, iet ngehi, me pahn idawehnkomwihwei wasa koaros me komw pahn ketila ie.” A Sises ketin mahsanihong me “Nein-Aramas sohte wasa e kak kaulewei ie tapwi.” Paipel sohte mahsanih ma e idawehnla Sises. Eri, mwein ohlo kin pwunodki duwen wasa me e pahn kousoan ie oh dahme e pahn kin kang.​—Mad. 8:19, 20.

⁴ Ohl tohto kin medewe me naineki mwohni oh doadoahk kesempwal sang onopki Paipel oh kapwaiada. Ong irail en iang sukuhl laud oh ahneki doadoahk pweimwahu kin keieu kesempwal. Re ese me re anahne mwohni pwehn apwalih irail ehuehu rahn. Kahrehda re kin medewe me mwohni oh doadoahk kak wia kamwahu laudsang onopki Paipel oh wiahla kompoakepahn Koht. Ele re pahn perenki dahme Paipel padahngki, ahpw “pwunod en mouren sampah kan” oh “noahrok en dipwisou kan” pahn kin kauhiraildihsang arail pahn kalaudehla arail esehla Koht oh peikiong sapwellime mahsen. (Mark 4:18, 19) Ahpw Sises ketin sewese sapwellime tohnpadahk ko ren pilada dahme keieu kesempwal, oh kitail kak kahlemengih.

5, 6. Dahme sewese Andru, Piter, Seims oh Sohn en pilada mehnia doadoahk me keieu kesempwal ong irail?

⁵ Andru oh rie Saimon Piter sounlaid kei. Ira kin iangih Sohn, rieo Seims oh ara pahpa Sepedi. Arail  pesines en netin mwahmw pweida oh re naineki tohndoadoahk teikan. (Mark 1:16-20) Ni Andru oh Sohn ara tepin sukuhlki duwen Sises sang Sohn Sounpapidais, ira kamehlele me Sises iei Mesaiao. Andru eri padahkihong rie Saimon Piter duwen Sises, oh ele Sohn padahkihong rie Seims. (Sohn 1:29, 35-41) Erein sounpwong kei mwurin mwo, Sises ketin kalohk nan Kalili, Sudia oh Sameria, oh tohnpadahk pahmen pwukat iangala. Mwuri, irail pwuralahng arail pesineso. Re perenki sukuhlki dahme Sises ketin padahngki, ahpw ahnsowo re sohte medewe me doadoahk en kalohk me keieu kesempwal ong irail.

⁶ Mwuri, Sises ketin luke Piter oh Andru en idawehnla oh uhd “laidih aramas akan.” Dahme Piter oh Andru wia? “Ni ahnsowohte ira pwilikihdi ara uhk ko oh iangala Sises.” Seims oh Sohn pil wia duwehte. “Ni ahnsowohte ira mehndahkihla samarao oh wararail pwohto, ira ahpw iangala Sises.” (Mad. 4:18-22) Dahme sewese ohl pwukat ren pilada en doadoahngki pali laud en arail ahnsou ong kalohk? Re medemedewe mwahu duwen arail pilipilo. Re kin iang Sises seiloak erein sounpwong kei oh kin rongorong sapwellime padahk kan. Re pil kin kilang eh ketin wiahda manaman kan oh eh kin ketin ngoangki wia dahme pwung. Re kin kilang me aramas akan uhdahn perenki dahme e kin ketin padahngki. Pwehki soahng kan me re sukuhlki, arail pwoson Siohwa oh likih kin kehlailla.

7. Ia duwen atail kak sewese tohnsukuhl en Paipel kan ren esehla likih Siohwa?

⁷ Ia duwen atail kak alasang Sises oh sewese neitail tohnsukuhl en Paipel kan ren esehla likih Siohwa? (Lep. Pad. 3:5, 6) Kitail kak sewese irail sang ni mwomwen atail kin padahk. Ni atail kin onop rehrail, kitail kak padahkihong irail me Siohwa ketin inoukihda en kapaiakitailda ma kitail kin mwohneki mahs Wehio. (Wadek Malakai 3:10; Madiu 6:33.) Kitail kak doadoahngki Paipel pwehn kasalehiong irail me Siohwa kin ketin ahnsou koaros nsenohki sapwellime aramas akan. Ahpw kitail en dehr manokehla me kitail pil kak padahkih neitail tohnsukuhl kan sang atail mehn kahlemeng kan. Ni atail padahkihong neitail tohnsukuhl en Paipel kan ia duwen Siohwa eh ketin sewese kitail, met kak sewese irail en pil esehla likih Siohwa. Kitail pil kak kasalehiong irail duwen dahme wiawihong riatail Kristian kan me mi nan neitail sawaspen Paipel kan. *

8. (a) Dahme kahrehda e kesempwal ong tohnsukuhl en Paipel men en kilang me Siohwa uhdahn mwahu? (b) Ia duwen atail kak sewese tohnsukuhlo en wia met?

⁸ Pwehn ahneki pwoson kehlail, e sohte itar ong tohnsukuhl en Paipel men en wadekete oh rongete duwen Siohwa eh ketin kapaiada meteikan. E anahne kilang nan pein eh mour me Siohwa me uhdahn kadek oh mwahu. Melkahka 34:8 mahsanih: “Kumwail pein rapahki [“kilang,” NW] ia uwen kalahngan en KAUN-O. Meid pai irail kan me kin diar sileparail pahn kupwure.” Ia duwen atail kak sewese emen tohnsukuhl en kilang me Siohwa uhdahn kadek oh mwahu? Ia duwen ma tohnsukuhlo ahneki kahpwal en mwohni? Ele e pil kin song en powehdi tiahk suwed me e ahnla wia me duwehte simoak, pilein mwohni de sakau daulihala. (Lep. Pad. 23:20, 21; 2 Kor. 7:1; 1 Tim. 6:10) Kitail kak padahkihong en kapakapkiong Koht en ketin sewese uhdihsang wia tiahk suwedo. Ni ahnsou me eh mour pahn mwahula, e pahn kilang me Siohwa uhdahn mwahu. Eri kitail kak  kangoange en mwohneki kaudokiong Siohwa nan eh mour. Kitail kak padahkihong me e anahne onopki Paipel wihk koaros oh kaunopadahng mihting kan oh iang towehda. Ni tohnsukuhlo eh kilang me Siohwa kin ketin kapaiada eh nannanti, eh pwoson pahn kehlailla, oh e pahn katikala eh pwunodki soahng teikan duwehte mwohni

Ma Ohl Men Kin Perki Dahme Meteikan Kak Medewehki

9, 10. (a) Dahme kahrehda Nikodihmus oh Sosep mehn Arimadea sohte padahkihong meteikan me ira sapwellimen Sises tohnpadahk kei? (b) Dahme kahrehda ekei ohl kan rahnwet kin perki idawehnla Sises?

⁹ Ekei ohl kin pwunodki dahme ekei aramas kin medewehkin irail, eri re kakete sohte idawehnla Sises. Karasepe, Nikodihmus oh Sosep mehn Arimadea sohte padahkihong aramas teikan me ira sapwellimen Sises tohnpadahk kei pwehki ara perki dahme mehn Suhs teikan kakete nda de wia. (Sohn 3:1, 2; 19:38) Mie kahrepen ara kin perki met. Kaunen pelien lamalam kan kin uhdahn kailongki Sises kahrehda ma emen kin kamehlele Sises, e solahr mweimweiong en kohla nan sinakokeo.​—Sohn 9:22.

¹⁰ Rahnwet nan ekei wasa, ele e kin apwal ong ohl emen en kasalehda me e kin nsenohki duwen Koht, Paipel de pelien lamalam. Ienge tohndoadoahk kan, kompoakepah kan oh kiseh kan ele kin kauwe oh song en kahrehiong ih kahpwal. A nan ekei wasa, ele e kin keper ong aramas emen en padahkihong meteikan me e men wekidala eh pelien lamalam. Oh meteikan kin kalapw kauwe ohl emen me kin iang sounpei de palien politik, de wia aramas lapalap men nan eh wasa ma e kin koasoia pelien lamalam. Karasepe, ohlen Sehmen men koasoia: “Dahme kumwail Sounkadehdehn Siohwa kan kin kalohki duwen Paipel mehlel. Ahpw ma I pahn iangala kumwail rahnwet, lakapwte koaros pahn esehier. Dahme iengei tohndoadoahk kan, mehn mpei kan oh meteikan me ese ie oh ei peneinei pahn medewe? I sohte kakohng met.”

11. Ia duwen Sises eh ketin sewese sapwellime tohnpadahk ko ren dehr perki dahme meteikan kin medewehkin irail?

¹¹ Sapwellimen Sises wahnpoaron ko kasalehda eimah. Ahpw ekei pak re kin perki dahme meteikan ele kin medewehkin irail. (Mark 14:50, 66-72) Ia duwen Sises eh ketin sewese sapwellime tohnpadahk ko ren kekeirda nan padahk mehlel mendahki aramas akan kin uhwong irail? Sises ketin kaunopki irail uhwong kan me pahn wiawihong irail. E mahsanih: “Meid pai kumwail ni aramas akan ar pahn kailongkin kumwail, kasohwei kumwail, kasaroweikumwaildi, oh kauwehla adamwail kan pwehki Nein-Aramas.” (Luk 6:22) E ketin padahkihong sapwellime ko me re anahne kasik uhwong kan. Ahpw e ketin mahsanih me uhwong pwukat pahn wiawi “pwehki Nein-Aramas.” Oh e ketin katamankin irail me Koht pahn ketin apwalih irail ahnsou koaros ma re pahn peki reh sawas oh kehl. (Luk 12:4-12) Sises pil ketin luke irail ko me tepida idawehn ih en iang sapwellime tohnpadahk ko oh wiahla kompoakparail kan.​—Mark 10:29, 30.

12. Ia duwen atail kak sewese tohnsukuhl en Paipel men en dehr perki dahme meteikan kak medewehki?

¹² Kitail pil anahne sewese tohnsukuhl en Paipel kan ren dehr perki dahme meteikan kan kin medewehkin irail. Ehu ahl me kitail kak wia met iei en sewese tohnsukuhlo en ese dahme e pahn wia ni aramas akan ar pahn uhwong. (Sohn 15:19) Karasepe,  ienge tohndoadoahk kan oh meteikan ele sohte pahn pwungki eh pelien lamalam kapwo, de ele re pahn idek duwen dahme e kamehlele. Kitail kak sewese en kaunopada eh pasapeng mengei kan sang nan Paipel. Kitail kak wia kompoakepah oh kak kapehsehiong meteikan nan mwomwohdiso. Mwein ih oh ekei brother kan ahneki irair kan me duwepenehte de re kin perenki soahng tehieu, oh re kak kompoakepahkihla emenemen. E uhdahn kesempwal en padahkihong en kin kapakap sang nan eh mohngiong ahnsou koaros. Met pahn sewese en kompoakepahnkihla Siohwa. Siohwa pahn ketin wiahla eh wasahn ruk duwehte paipalap ehu, eri e sohte anahne perki dahme aramas akan kak medewehkin ih.​—Wadek Melkahka 94:21-23; Seims 4:8.

Ma Ohl Men Kin Medewe me E Sohte Koahiek Duwehte Meteikan

13. Dahme kahrehda ekei ohl kin pilada ren dehr iangala padahk mehlel?

¹³ Ekei ohl kak medewe me re sohte kak wia dahme meteikan nan mwomwohdiso kak wia. Mwein re sohte kak wadawad mwahu, de re pehm me re sohte kak kawehwehda mwahu arail madamadau. Mwein re kin namenek, de sohte mwahuki koasoia duwen dahme re kamehlele mwohn meteikan. Eri e kin apwal ong irail en onop, iang pasapeng nan mihting kan de kalohk ong meteikan. Emen brother kawehwehda me e kin apwalki kalohk ni eh pwulopwulo. E koasoia me ni eh kin aluhla ni wenihmw en ihmw kan e kin mwadangete pwur oh koapworopworki me sohte me rong de kilang ih. E koasoia: “Ei kin medewe kalohk en ihmw lel ihmw kin kasoumwahuwihiehda.”

14. Dahme kahrehda sapwellimen Sises tohnpadahk ko sohte kak kamwahwihala pwutak me ngehn sauto tiada powe?

¹⁴ Medewehla pepehm en sapwellimen Sises tohnpadahk ko ni ahnsou me re sohte kak kamwahwihala pwutak men me ngehn saut men tiadahr powe. Re kakete medewe me re sohte pahn kak wia dahme Sises kupwurki ren wia. Ahn pwutako pahpao kohla rehn Sises oh patohwanohng: “Maing, komw ketin kupwure nei pwutak emen, pwe e kin soumwahu rerrer oh kin wie lokolok laudki! Pwe soumwahwo kin lelete kesepwekediong nan kisiniei oh nan pihl pak tohto. I patohwandohngehr sapwellimomwi tohnpadahk kan, re ahpw sohte kak kamwahwihala.” Ni Sises eh ketin kausasang ngehn sauto nan pwutako, pwutako mwahula. Mwuhr tohnpadahk ko kohdo rehn Sises oh idek reh: “Maing, dahme kahrehda kiht se sohte kak kauskihsang ngehn suwedo rehn pwutako?” Sises ketin sapeng irail mahsanih: “Pwehki amwail pwoson sohte itar. Kumwail en ese pwe ma mie pwoson rehmwail, mehnda ma e pahn uwehte kisin weren kadiring kis, kumwail pahn kak ndahng nahna wet, ‘Tohrekweisang met, tohrekla mwo,’ a e pahn wiawi. Kumwail pahn kakohng mehkoaros.” (Mad. 17:14-20) Aramas men me kin pwoson Siohwa pahn kak wia soahng kan me mwomwen sohte kak wiawi. Ahpw ma e kin koapworopworkihte pein eh koahiek, e sohte pahn pweida, oh e pahn kak pehm me e sohte warohng papah Siohwa.

15, 16. Ia duwen atail kak sewese tohnsukuhl en Paipel men me kin pehm me e sohte kak papah Siohwa duwehte meteikan?

¹⁵ Ma tohnsukuhl en Paipel men pehm me e sohte kak papah Siohwa duwehte meteikan, kitail kak kangoange ih en dehr medewehte pein eh koahiek ahpw en pwoson me Siohwa pahn ketin sewese. Piter ntingihedi: “Kumwail pein karakarahkala pahn nin limen Koht manaman, pwe en ketin kasapwilkumwailda ni ahnsou me konehng. Kumwail mweidohng ih amwail pwunod koaros.” (1 Pit. 5:6, 7) Kitail anahne sewese tohnsukuhlo en poakohng Siohwa oh men Siohwa en ketin kahluwa. Met wehwehki me e anahne poakohng dahme e kin sukuhlki sang nan Paipel oh kasalehda wahn sapwellimen Koht manaman nan eh mour. (Kal. 5:22, 23) E anahne uhdahn kesempwalki kapakap.  (Pil. 4:6, 7) Oh e pil wehwehki me Koht me pahn ketikihong eimah oh kehl pwehn wia dahme e ketin kupwurki.​—Wadek 2 Korint 4:7.

¹⁶ Ekei tohnsukuhl kan mwein anahne sawas ren kamwahwihala arail wadawad oh koahiek en koasoakoasoi. Ekei ele pahn pehm me re sohte warohng papah Koht pwehki soahng suwed kan me re kin wia mwohn arail esehla Siohwa. Nan soangen irair pwukat koaros, kitail kak sewese tohnsukuhlo sang ni atail pahn kasalehiong limpoak oh kanengamahiong. Sises mahsanih: “Kaidehkin me kehlail ni paliwar me kin anahne sounwini, pwe me soumwahu kan.”​—Mad. 9:12.

Sewese Ohl Tohto en Sukuhlki Siohwa

17, 18. (a) Ia duwen atail kak koasoiong ohl tohto nan atail doadoahk en kalohk? (b) Dahme kitail pahn sukuhlki nan iren onop en mwuhr?

¹⁷ Paipel kelehpw me kak kihda padahk me kak kahrehda aramas en peren mehlel, oh kitail men wia uwen atail kak koaros en sewese ohl tohto en iangala padahk mehlel. (2 Tim. 3:16, 17) Ia duwen atail kak diarada ohl tohto nan atail doadoahk en kalohk? Kitail kak song en kalohk nin soutik kan, mwurin souwas en imwin wihk kan, de rahnen kommoal en doadoahk kan pwehki mwein ohl tohto pahn mihmi ni imwarail kan. Oh ma kak, kitail kak idek ma kitail kak tuhwong kaun en peneineio. Ma e konehng, kitail kak kalohk ong iangatail tohndoadoahk ohl kan. Ekei sister kan nan mwomwohdiso pwoudiki ohl akan me kaidehn Sounkadehdehn Siohwa kan, oh kitail kak sewese ohl pwukat ren men iangala padahk mehlel.

¹⁸ Kitail men wia uwen atail kak koaros en sewese aramas tohto ren esehla padahk mehlel. Irail kan me kin raparapahki padahk mehlel pahn men rong dahme kitail kin kalohki. Kitail anahne kanengamah oh pousehlahte sewese koaros me men esehla padahk mehlel. Ahpw dahme kak sewese ohl me papidaislahr kan ren men ale pwukoa kan nan mwomwohdiso? Iren onop en mwuhr pahn sapengala peidek wet.

[Nting tikitik me mi pah]

Ia Duwen Omw Pahn Sapeng?

• Ia duwen atail kak sewese ohl akan ren pilada dahme keieu kesempwal nan arail mour?

• Ia duwen atail kak sewese tohnsukuhl en Paipel kan ren dehr perki dahme aramas akan kin medewehkin irail?

• Ia duwen atail kak sewese emen me kin pehm me e sohte kak papah Siohwa duwehte meteikan?

[Peidek en Onop]

[Kilel nan pali 25]

Ke kin isanki ahnsou mwahu en kalohk ong ohl akan?

[Kilel nan pali 26]

Ia duwen omw kak kaunopki noumw tohnsukuhl en Paipel men uhwong kan?