1, 2. (a) Soangen irair dah kan me pahn sewese kitail en dadaur oh pweida pahn kahpwal kan? (b) Dahkot pwoson? Menlau kihda ehu karasaras.

 ATAIL doadoahk ong Siohwa kin wadohng kitail peren. Ahpw kitail kin ahneki kahpwal kan duwehte meteikan. Ele kitail pil lelohng lokolok pwehki atail kin wia dahme pwung. (1 Pit. 3:14; 5:8, 9; 1 Kor. 10:13) Pwehn dadaurete oh pweida pahn kahpwal pwukat, kitail anahne pwoson oh eimah.

² Dahkot pwoson? Wahnpoaron Pohl ntingihedi: “Pwoson, iei kamehlele mehkan me kitail kin koapworopworki de kasikasik, kamehlele mehkan me kitail sohte kak kilangki masatail.” (Ipru 11:1) Ehu kawehwehn Paipel koasoia: “Pwoson duwehte kisinlikou en kadehde dahme kitail kin kasikasik. Pwoson iei en kamehlele dahme kitail sohte kak kilang.” (The Simple English Bible) “Kisinlikou en kadehde” iei doaropwe ieu me kadehdehda me kitail sapweniki sahpw ehu. Pwehki kitail ahneki pwoson me Koht kin ketin ahnsou koaros kapwaiada dahme e ketin inoukihda, e duwehte atail alehdi “kisinlikou en kadehde” kesempwal ehu. Kitail uhdahn kamehlele me dahme Koht ketin inoukihda pahn wiawi oh me soahng koaros me e mahsanihong kitail nan sapwellime Mahsen kin mehlel, pil “mehkan me kitail sohte kak kilangki masatail.”

3, 4. (a) Dahkot eimah? (b) Ia ehu ahl en kakehlaka atail pwoson oh eimah?

³ Eimah kin kakehlaka kitail en lokaia oh mwekid ni soh masak nan irair apwal oh keper kan. En ahneki eimah iei en kehlail oh kommwad, oh mendahkihla atail mi nan lokolok pwehki dahme kitail kamehlele.​—Mark 6:49, 50; 2 Tim. 1:7.

⁴ Kitail koaros men ahneki pwoson oh eimah. Ahpw ele kitail kin pehm me kitail anahne pwoson oh eimah laud.  Paipel kin koasoia duwen sapwellimen Koht ladu tohto me wia mehn kahlemeng mwahu en pwoson oh eimah. Eri, ehu ahl en kakehlaka irair pwukat rehtail iei en medemedewe kanahieng duwen ekei mehn kahlemeng ko.

5. Pwehn wia sounkaweid mwahu men, dahme Sosua anahne?

⁵ Kitail kak medewehla dahme wiawi mpen sounpar 3,500 samwalahro. Ahnsowo sounpar 40 mwurin Siohwa ketin doarehla mehn Israel rar kei sang Isip. Soukohp Moses me wia arail sounkaweid. E sounpar 120 ahnsou me e kohdahla pohn Nahna Nepo oh kilang Sapwen Inowo. Ih eri mehla pohn nahnao. Sosua uhd wiahla arail sounkaweid, ohl emen me “diren kupwurokong.” (Deud. 34:1-9) Sounpei kan en Israel onopadahr en kalowehdi sapwen Kenan. Pwehn wia sounkaweid mwahu men, Sosua anahne erpit sang Koht, pwoson, eimah oh kehlail.​—Deud. 31:22, 23.

6. (a) Nin duwen Sosua 23:6, kitail anahne eimah pwehn wia dah? (b) Dahme kitail sukuhlki sang Wiewia 4:18-20 oh Wiewia 5:29?

⁶ Erpit, eimah, oh pwoson me Sosua kasalehda ele kakehlaka mehn Israel ko erein sounpar tohto me re mahwenki pwehn kalowehdi sapwen Kenan. Kaidehn ihte re anahne eimah pwehn mahwen ahpw pwe ren pil peikiong Koht. Mwohnte Sosua mehla, e ndaiong irail: “Kumwail kanahieng [“eimah,” NW] peikiong oh kapwaiada mehkoaros me ntingdier nan pwuhken Kosonned en Moses. Kumwail dehpa kesehla ehu pwuloi en kosonned pwukat.” (Sos. 23:6) Kitail pil anahne eimah pwehn peikiong Siohwa ahnsou koaros, ahpw mehlel ni en aramas akan pahn ndaiong kitail en wia mehkot me uhwong kupwuren Koht. (Wadek Wiewia 4:18-20; 5:29.) Ma kitail kapakapki sapwellimen Siohwa kaweid oh likih ih, e pahn ketin sewese kitail en ahneki eimah me kitail anahne.

7. Pwehn mwekid ni eimah oh pweida, dahme Sosua anahne wia?

⁷ Pwehn ahneki eimah pwehn wia kupwuren Koht, kitail anahne onopki sapwellime Mahsen oh kapwaiada. Ih met me Siohwa ketin mahsanihong Sosua en wia ni ahnsou me Sosua wiliandi Moses. E mahsanih: “Ke en kehlail oh kommwad. Oh kanahieng kapwaiada kosonnedo pwon me ei ladu Moses kihonguhkehr.” E pil ketin mahsanih: “Pwuhken Kosonnedo pahn kin wadawad ni ahnsoun kaudok koaros. Ke pahn kin sukusukuhlki nin rahn oh nipwong, oh kanahieng soahng koaros me ntingdier loale. Eri, ke ahpw pahn kepwehpwehla oh pweida.” (Sos. 1:7, 8) Sosua pweida pwehki e idawehn kaweido. Ma kitail pahn wia soahngohte, kitail pahn ahneki eimah laud oh kitail pahn pweida nan sapwellimen Koht doadoahk.

8. Iren pahr en 2013 kohsang nan mehnia iren Paipel? Ia duwen ire wet eh pahn seweseiuk?

⁸ Siohwa pil ketin mahsanihong Sosua: “Ke en kehlail oh kommwad! Ke dehr masak de lamalam tikitik, pwehki Ngehi, KAUN-O, omw Koht, me kin ieiang uhk wasa koaros me ke pahn kin kohla ie.” (Sos. 1:9) Siohwa pil kin ketin ieiang kitail. Kahrehda sohte lipilipil kahpwal dah me kitail ele lelohng, kitail sohte anahne masak. Kitail en kesempwalki mahsen pwukat: ‘Ke en kehlail oh kommwad. . . . Siohwa  omw Koht me kin ieiang uhk.’ Mahsen pwukat en Sosua 1:9 pilipildahr pwehn wia iren pahr en 2013. Mahsen pwukat ong Sosua oh mehn kahlemeng en meteikan me kasalehda pwoson oh eimah pahn uhdahn kakehlailih kitail nan ahnsou kan me pahn kohdo.

9. Ni ahl dah kan me Reap kasalehda pwoson oh eimah?

⁹ Ni ahnsou me Sosua kadarala lipoahrok riemeno Kenan, Reap, lih me kin netiki paliwereo, ekihirahla oh kadarala imwintihti ko ni ehu ahl tohrohr. Pwehki eh pwoson oh eimah, Reap oh eh peneinei pitila ni ahnsou me mehn Israel ko kasohrehla kahnimw en Seriko. (Ipru 11:30, 31; Seims 2:25) Ei, Reap kesehla eh mour en tiahk samin pwe en kak kaperenda Siohwa. Ekei me wialahr Kristian kei ahneki pwoson oh eimah oh wekidalahr arail mour pwe ren kak kaperenda Koht.

10. Nan irair dah me Rud pilada en kaudokiong Siohwa? Ia duwen Siohwa eh ketin kapaiada?

¹⁰ Emen me momour mwurin Sosua iei Rud, mehn Mohap. Mwein e ekis ese duwen Siohwa pwehki e pwoudiki mehn Israel men. E ahneki eimah en kaudokiong Siohwa. En eh pwoudo eh nohno, Naomi, kin kousoan Mohap oh ahnsou me en Naomi pwoudo oh nah pwutak ko mehla, e lemehda en pwurala Pedleem nan Israel. Pohn ahlo, Naomi ndahng Rud en pwurala rehn tohn eh wasao, ahpw Rud nda me e sohte pahn pwurala Mohap. Rud nda: “Kisehmw kan iei kisehi; oh omw Koht iei ei Koht.” (Rud 1:16) Mwurin ahnsou ehu, Rud pwoudikihda Pohas, ohl emen sang ahn Naomi peneinei. Ira nainekihda pwutak emen me wiahda kadaudok me Depit oh Sises kohsang ie. E sansal me Siohwa ketin kapaiada irail kan me kin kasalehda pwoson oh eimah.​—Rud 2:12; 4:17-22; Mad. 1:1-6.

11. Ia duwen Sehoiada oh Sehosihpa ara kasalehda eimah? Pwehki ara kasalehda eimah, ia imwilahn met?

¹¹ Atail pwoson oh eimah kin kehlailla ni atail kilang me Koht kin ketin ieiang irail kan me pilada ren mihla nan keper pwehn wia kupwure oh doarehla riarail Kristian kan. Karasepe, medewehla Samworo Lapalap Sehoiada oh eh pwoud Sehosihpa. Mwurin Nanmwarki Ahasaia eh mehla, eh nohno Adalaia kemehla nah seri ko oh wiahla lih nanmwarki. Ahpw Sehoiada oh Sehosihpa ekihla nein Ahasaia pwutak Sehoas erein sounpar weneu, mendahki met inenen keper. Ni keisuh en sounpar, Sehoiada kahrehda Sehoas en wiahla nanmwarki oh koasoanehdi Adalaia en kamakamala. (2 Nan. 11:1-16) Mwuhr, Sehoiada sewese Nanmwarki Sehoas en onehda tehnpas sarawio. Sehoiada mehla ni eh sounpar 130 oh seridi rehn nanmwarki ko pwehn wia “kasalepen ar wauneki doadoahk en papah me e wiadahr ong mehn Israel, ong Koht, oh ong Tehnpas Sarawio.” (2 Kron. 24:15, 16) Pwehki Sehoiada oh eh pwoudo kasalehda eimah, peneinei me Mesaia ketisang ie mwuhr poadoandoarla.

12. Ia duwen Epedmelek eh kasalehda eimah?

¹² Epedmelek, emen ladu nan tehnpas en Nanmwarki Sedekaia, pilada eh mour en mihla nan keper pwehki Seremaia. Lapalap ako en Suda ndaiong nanmwarkio me Seremaia kin kaluwetehkihla sounpei oh aramas ko koaros eh koasoi kan. Nanmwarkio eri mweidada ren wiahiong Seremaia sohte lipilipil dahme re men wiahiong. Irail eri kesepwekediong nan pwoahr loal ehu me diren pwelmatak pwehn mehla. (Ser. 38:4-6) Epedmelek peki rehn Nanmwarki Sedekaia en sewese Seremaia. Dahme Epedmelek wiao keper pwehki aramas tohto kailongki Seremaia. Sedekaia pwungki en sewese Seremaia oh padahkihong Epedmelek en kahrehda ohl 30 ren kohla oh kihsang Seremaia nan pwoahro. Koht ketin doadoahngki Seremaia pwehn inoukihong Epedmelek me e sohte pahn mehla ahnsou me mehn Papilon kan mahweniong Serusalem. (Ser. 39:15-18) Koht ketin katingih irail kan me kin kasalehda eimah pwehn wia kupwure.

13. Ia duwen mehn Ipru silimeno arail kasalehda eimah? Dahme kitail kak sukuhlki sang irail?

 ¹³ Mpen sounpar 600 mwohn Krais, mehn Ipru silimen me wia sapwellimen Koht ladu kei ale ketingparail pwehki arail kasalehda pwoson oh eimah. Nanmwarki Nepukadnesar koasoanehdi aramas lapalap koaros nan Papilon ren pokonpene oh kaudokiong sansal kohl lapalao. Emen me sapeikiong met pahn mehla nan kisiniei mwehlo. Ni wahu mehn Ipru silimeno padahkihong Nepukadnesar: “Ma at Koht me se kin papah pahn kak kapitkitala sang nan kisiniei mwehlo, oh sang omwi manaman, a ih me pahn ketin wia. Ahpw ma e pil sohte ketin wia, a komwi en ketin mwahngih me se sohte pahn pwongih omwi koht, oh se sohte pahn pil poaridihsang sansal kohl me komw ketin kauwadahro.” (Dan. 3:16-18) Nan Daniel 3:19-30, kitail kak wadek duwen Siohwa eh ketin doarehla mehn Ipru silimeno ni ahl kapwuriamwei. Mwein sohte me pahn kamasaki kitail en mehla nan kisiniei mwehl, ahpw ekei ahnsou kitail anahne peikiong Koht nan irair inenen apwal akan. Kitail kak kamehlele me Koht pahn ketin kapaiada kitail ma kitail kasalehda pwoson oh eimah.

14. Nan Daniel irelaud 6, ia duwen Daniel eh kasalehda eimah? Ia imwilahn met?

¹⁴ Ahn Daniel imwintihti kan kahrehiong Nanmwarki Darius en wiahda kosonned ehu me pahn keper ong Daniel. Re ndaiong nanmwarkio en “keinepwihsang aramas koaros en peki mehkot sang rehn arail koht de aramas emen sohte lipilipil erein rahn 30, ahpw ihte, sang rehn Wasa Lapalap. Eri, mehmen me pahn kauwehla kosonned wet en lekdekiong nan pesen laion kan.” Daniel kasalehda pwoson oh eimah nan irair wet. Mwurinte eh esehda duwen kosonned wet, e “kohkohla ni imweo. E ahpw kohdahla powe nan pere ehu me wenihmwtok kei mie me sallahng Serusalem. Ih eri kelehpwikihdi wasao duwen eh kin epwehnki wia, oh kapakapohng Koht pak siluh rahn ehu. Eri wenihmwtok ko langalangete.” (Dan. 6:6-10) Daniel lekdekiong nan pesen laiono. Ahpw Siohwa ketin doarehla.—Dan. 6:16-23.

15. (a) Ia duwen Akwila oh Persila ara kasalehda pwoson oh eimah? (b) Ia wehwehn sapwellimen Sises mahsen nan Sohn 13:34? Ia duwen Kristian tohto arail kasalehda soangen limpoak wet?

¹⁵ Paipel koasoia me Akwila oh Persila pilada ara mour en mihla nan keper pwehki Pohl. (Wiewia 18:2; Rom 16:3, 4) Ira kasalehda eimah oh kapwaiada dahme sapwellimen Sises kosonnedo mahsanih: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene.” (Sohn 13:34) Kosonned en Moseso kasalehda me emen  anahne poakohng meteikan duwehte eh poakohng pein ih. (Lip. 19:18) Eri dahme kahrehda sapwellimen Sises kosonnedo “kapw”? Pwehki kosonnedo kasalehda me kitail anahne kasalehda limpoak sang ni atail kin men tounmeteikihla atail mour ong meteikan, duwehte me e ketin wia. Kristian tohto kin kasalehda limpoak ni arail pilada arail mour en mihla nan keper pwehn doarehsang riarail Kristian kan apwal de kamakamala sang imwintihti kan.​—Wadek 1 Sohn 3:16.

16, 17. Ia duwen pwoson en ekei tepin Kristian ko lelohng songosong? Ia duwen pwoson en ekei Kristian nan atail ahnsou pil lelohng songosong?

¹⁶ Duwehte Sises, tepin Kristian ko kin kaudokiong Siohwa kelehpw. (Mad. 4:8-10) Re sohte kin iang isik warpwohmwahu pwehn kawauwih kaunen Rom. (Kilang kilel nan pali 10.) Daniel P. Mannix koasoia nan nah pwuhko me kisiniei kin wie lullul pohn pei ehu nan wasahn kamwadong. E nda me ihte me me selidi ko anahne wia iei ren kamwerehdi warpwohmwahu nan kisinieio oh re pahn ale doaropwehn saledekla. Irail me salihedi aramas pwukat kin kawehwehda mwahu ong me selidi ko me met sohte wehwehki me re kaudokiong kaunen Rom. Ahpw re ndahng irail me ihte me re pahn wia iei pwungki me kaunen Rom wia koht emen. Mendahki met, Kristian malaulaute me pwungki met pwehn pitila.​—Those About to Die.

¹⁷ Kristian kan me selidi nan imweteng en Nazi ko kin pwurepwurehng alehdi pilipil kan pwe ren kak pitla de sohte mehla. Ihte me re anahne wia iei sainihala doaropwe ehu me kasalehda me re solahr kaudokiong Siohwa. Ahpw me malaulaute me sain. Oh pil erein mahwen me wiawi nan Rwanda, mehn Tutsi oh Hutu me wia Sounkadehde kan kin pilada ren mihla nan keper pwehn doarehla emenemen. Sapwellimen Koht aramas akan kin anahne eimah oh pwoson nan soangen irair pwukat.

18, 19. Mehn kahlemeng en pwoson oh eimah dah kan me kak sewese kitail en wia doadoahk en kalohk?

¹⁸ Met kitail ahneki ahnsou mwahu en kalohki duwen Wehio oh pil katohnpadahk. Ih doadoahk me keieu laud me Koht ketikihong sapwellime ladu kan nin sampah. (Mad. 24:14; 28:19, 20) Kitail kin uhdahn kalahnganki sapwellimen Sises mehn kahlemeng unsek. E “ketin kakahnseli nan kahnimw oh nan kousapw akan, ketin kapakapahrengki Rongamwahu duwen Wehin Koht.” (Luk 8:1) Duwehte Sises, kitail anahne pwoson oh eimah pwehn kalohki duwen Wehio. Sapwellimen Koht sawas kin sewese kitail pwe kitail en kak eimah duwehte Noha. Noha kin “lohkiseli duwen mour pwung” ong “tohnsampah suwed ko” me pahn kasohrala ni Nohliko.​—2 Pit. 2:4, 5. 

¹⁹ Kapakap kin sewese kitail en wia doadoahk en kalohk. Ekei sapwellimen Sises tohnpadahk ko me lelohng kalokolok kapakapki me ren pousehlahte kalohki mahsen en Koht ni eimah, oh arail kapakap kan pasapengla. (Wadek Wiewia 4:29-31.) Ma ke kin masak kalohk ihmw lel ihmw, kapakapkiong Siohwa en ketikihong uhk pwoson oh eimah laud. E pahn ketin sewese iuk.​—Wadek Melkahka 66:19, 20. *

20. Nin duwen sapwellimen Siohwa ladu kan, soangen sawas dah me kitail ahneki?

²⁰ E sohte mengei en wia kupwuren Koht nan sampah suwed wet. Ahpw kitail sohte kelekelehpw. Koht kin ketin ieiang kitail. Sapwellime Ohlo, me wia Tapwin mwomwohdiso, pil kin ketin sewese kitail. Pil mie Sounkadehdehn Siohwa kan me tohtohsang 7,000,000 nan sampah pwon. Kitail koaros en pousehlahte kasalehda pwoson oh kalohki rongamwahwo. Iren pahr en 2013 pahn sewese kitail en wia met, me koasoia: ‘Ke en kehlail oh kommwad. . . . Siohwa omw Koht me kin ieiang uhk.’​—Sos. 1:9.