1-3. (a) Ia pepehm en ekei aramas duwen soahng kan me re wiahda de sohte wiahda? Ia duwen sapwung kan me kitail wiahda mahs kak kamwakid kitail? (b) Dahme kitail kak sukuhlki sang ahn Pohl mehn kahlemeng?

 SOUNNTING men me adaneki J. G. Whittier ntingihedi me lepin lokaia keieu kansensuwed me emen kin ntingihedi de nda iei “e pahn kakete.” Aramas akan kin nda met ahnsou me irail kin medewe ia pahn duwen arail mour ma arail pilipil kan weksang dahme re piladahr. Kitail koaros kak medewe soahng kan me kitail wiadahr oh kitail kin mentehno ren weksang dahme kitail wiadahr. Ahpw ekei aramas kin ahnsou koaros medemedewe laud oh koluhkihla de nsensuwedkihla soahng kan me irail wiahda de sohte wiahda. Mie mehkot me ke wiahda me kahrehda ken ahneki pepehm wet?

² Ekei aramas kin wiahda sapwung laud kan de wiahda soahng kan me uhdahn suwed. Ekei sohte kin nohn kamehlele me pilipil kan me re wiahda nan arail mour iei me keieu mwahu. Ekei aramas kin kak uhdihsang medemedewe dahme wiawi nan arail mour mahs. Ahpw ekei kin ahnsou koaros nsensuwedkihla pilipil kan me re wiahda oh kin medewe, ‘ma I wiahte mwo!’ (Mel. 51:3) Ia omw pepehm? Ke men wia uwen omw kak nan sapwellimen Koht doadoahk oh sohte kin ahnsou koaros medemedewe sapwung kan me ke wiahda? Mie mehn kahlemeng en emen nan Paipel me kak wia met? Ei, wahnpoaron Pohl.

³ Pohl wiahda sapwung laud kan oh pil wiahda pilipil mwahu kan. E uhdahn koluhkihla sapwung kan me e wiahda, ahpw e pil sukuhlki en kilangwohngete eh pahn wia uwen eh kak nan sapwellimen Koht doadoahk. Kitail kilang dahme kitail kak sukuhlki sang eh mehn kahlemeng.

4. Dahme wahnpoaron Pohl mentehno sohte wiahda?

⁴ Ahnsou me Pohl wia Parisi pwulopwul men me aramas  akan kin ekerki Sohl, e wia soahng kan me mwuhr e koluhkihla. Karasepe, e kaloke laud sapwellimen Krais tohnpadahk kan. Paipel mahsanih me mwurinte Stipen eh kamakamala, Sohl kin “songosong en kauwehla mwomwohdiso, ni eh papahngseli ehuehu ihmw kan oh wurahdekiei me pwosonlahr akan, ohl oh lih, oh keseirailong nan imweteng.” (Wiewia 8:3) Emen me samanih Paipel, Albert Barnes, koasoia me en “kauwehla” kin wehwehki me Sohl kaloke laud mwomwohdisohn Kristian kan “duwehte mahn lawalo men.” Sohl wia mehn Suhs ngoang men me uhdahn kamehlele me Koht ketin kupwurki ih en kauwehla mwomwohdisohn Kristian ko. Kahrehda e kin kaloke laud Kristian kan oh nda me e pahn kemehla “ohl akan oh pil lih akan.”​—Wiewia 9:1, 2; 22:4. *

5. Dahme kauhdi Sohl en sohla kaloke sapwellimen Sises tohnpadahk kan oh tepida kalohki duwen Krais?

⁵ Mwuhr, Sohl men kohla Damaskus, kihieisang Kristian ko nan imwarail ko oh wurahdekihraila Serusalem pwe mwoalen kopwung lapalap en mehn Suhs ko en kaloke irail. Ahpw Sises, me wia Tapwin mwomwohdisohn Kristian, ketin kauhdi ih. (Ep. 5:23) Ni Sohl eh kohkohlahng Damaskus, Sises ketin pwarohng ih oh marain ehu sang nanleng kahrehda Sohl en maskunla. Sises eri ketin kadarala ih Damaskus pwehn awih oh ale pil ekei kaweid. Kitail ese dahme wiawi mwurin mwo.​—Wiewia 9:3-22.

6, 7. Dahme kasalehda me Pohl pohnese me e wiahda sapwung laud kei?

⁶ Ahnsowohte me Pohl esehda me e sapwung, e uhdihsang kaloke sapwellimen Krais tohnpadahk kan oh e tepida kalohki ni ngoang duwen Krais. Ahpw mendahki met, Pohl sohte pohnsehsehla dahme e wiahda ko. Mwuhr e ntingihedi duwen pein ih: “Pein kumwail rongehr koasoiepen ei mour ni ahnsou me I poadidiong lamalam en mehn Suhs ako, duwen ei kin inenen kaloke mwomwohdisohn Koht, oh wia uwen ei kak en kamwomwala.” (Kal. 1:13) E pil pwurehng koasoia dahme e wia mahs ni eh ntinglahng mehn Korint ko, mehn Pilipai ko oh Timoty. (Wadek 1 Korint 15:9; Pil. 3:6; 1 Tim. 1:13) Pohl kin namenengki soahng kan me e wiadahr, ahpw e sohte mwomwehda me dahme e wiahda ko sohte wiawi. E pohnese me e wiahda sapwung laud kei.​—Wiewia 26:9-11.

⁷ Emen me samanih Paipel me adaneki Frederic W. Farrar ntingihedi me ni atail kin medewe uwen laud en Pohl eh kin kaloke Kristian ko, kitail kak wehwehki uwen laud en nsensuwed me e ahneki oh ele uwen laud en aramas akan arail kin kauwe. Ni ahnsou me Pohl mwemweitla ni ekei mwomwohdiso ko, mwehin brother kan me ahpwtehn tuhwong ih nda: ‘Ih kowe Pohl. Kowe me kin kalokei kihto!’​—Wiewia 9:21.

8. Ia ahn Pohl pepehm duwen mahk oh limpoak me Siohwa oh Sises ketin kasalehiong ih? Dahme kitail sukuhlki sang mehn kahlemeng en Pohl?

⁸ Pohl pohnese me e kak papah nin duwen wahnpoaron men ihte pwehki Koht ketin kasalehiong ih mahk kalahngan. E koasoia duwen irair en mahk kalahngan me Koht sapwellimanki mpen pak 90 nan nah kisinlikou 14 ko, tohtohsang sounnting en Paipel teikan. (Wadek 1 Korint 15:10.) Pohl uhdahn kalahnganki me Koht ketin kasalehiong ih mahk oh e men kasalehda eh kalahnganki met. Eri e kin nantihong doadoahk nan sapwellimen Koht doadoahk laudsang wahnpoaron teikan. Dahme kitail sukuhlki sang eh mehn kahlemeng? Ma kitail pwoson sapwellimen Sises meirong, wehkada dipatail kan, oh uhdihsang wia dahme sapwung, Siohwa pil pahn kupwurki mahkohng dihp kan me uhdahn laud. Eri  ma ke kin medewe me dipomw kan nohn laud oh sapwellimen Sises meirong sohte kak pwainla, tamanda mehn kahlemeng en Pohl. (Wadek 1 Timoty 1:15, 16.) Mendahki Pohl kaloke Sises, e ntingihedi me Sises ketin loalloale ih oh pwoula pwehki ih. (Wiewia 9:5; Kal. 2:20) Pohl sukuhlki me e anahne wia uwen eh kak nan sapwellimen Koht doadoahk mendahki eh mouren mahs, eri e solahr pahn koluhkihla mehkot. Ih met me ke sukuhlki ken wia?

9, 10. (a) Dahme kahrehda kitail kakete koluhkihla dahme kitail wiahdahr? (b) Dahme kahrehda e sohte mwahu en pwunupwunodki duwen sapwung kan me kitail wiahda mahs?

⁹ Mie mehkot me ke wiahda me met ke koluhkihla? Ni ahnsowo, ke sou men doadoahngki omw ahnsou oh kehl ong mehkan me kesempwal? Mie mehkot me ke wia me kamedekihala meteikan? De mwehin mie mehkot tohrohr me ke men wia me weksang dahme ke wiadahro. Dahme ke kak wia ma ke ahneki soangen pepehm wet?

¹⁰ Ekei aramas kin pwunod ahnsou koaros. Re kin kahrehda ren nsensuwed oh pwunod sang ni arail kin pwurepwurehng medewe sapwung kan me re wiadahr. Pwunod pahn kamwahwihala kahpwal kan? Soh! Medewehla emen me kin pap nan ahd kehlail ehu. Mendahki e song uwen eh kak en pap nan ahdo, e pahn mihmi wasatehkis. Kitail en dehr pwunod, ahpw kitail anahne wia uwen atail kak pwehn kamwahwihala kahpwalo. Peki mahk rehn aramaso me ke kansensuwedihala oh song en ahneki popohl reh. Medewe dahme kahrehda ke wia dahme ke wiao pwe ken dehr pwurehng wiahda sapwungohte. Ahpw ekei pak, ele ke anahne dadaurete imwila suwed kan en omw sapwungo. En pwunodki sapwung kan me ke wiahda mahs sohte pahn seweseiuk. Ni mehlel, e kak kahpwalihala omw pahn wia uwen omw kak nan sapwellimen Koht doadoahk.

11. (a) Dahme kitail anahne wia ma kitail men Siohwa en ketin kasalehiong kitail mahk oh limpoak? (b) Nin duwen me Paipel mahsanih, dahme kitail anahne wia pwehn uhdihsang nsensuwedkihla atail sapwung kan en mahs?

 ¹¹ Ekei kin medewe me sapwung kan me re wiahda uhdahn suwed kahrehda re sohte warohng sapwellimen Koht mahk. Re pehm me arail sapwung ko nohn suwed de nohn tohto. Ahpw ire mehlelo iei sohte lipilipil dahme re wiahdahr mahso, re kak wehkada arail sapwung kan, wiahda wekidekla kan oh peki rehn Koht en ketin mahkohng irail. (Wiewia 3:19) Siohwa kak ketin kasalehiong irail mahk oh limpoak, duwehte eh ketin kasalehiong me tohto teikan. Siohwa pahn ni kadek ketin mahkohng koaros me kin aktikitik, mehlel oh koluhkihla diparail kan. Karasepe, Koht ketin mahkohng Sohp, me uhdahn koluhkihla sapwung kan me e wiahda. (Sohp 42:6) Paipel padahkihong kitail dahme kitail uhdahn anahne wia pwehn uhdihsang atail nsensuwedkihla atail sapwung kan oh ahneki meleilei loalatail. E mahsanih: “Omw mour sohte pahn pweida ma ke song en ekihla dipomw kan. Sakarkihda oh wiliakapwala; eri, Koht ahpw pahn ketin mahkikihong uhk.” (Lep. Pad. 28:13; Seims 5:14-16) Kitail anahne wehkada dipatail kan ong Koht, kapakapki sapwellime mahk oh wia uwen atail kak koaros en kasalehda atail koluhkihla dahme kitail wiadahr. (2 Kor. 7:10, 11) Eri Siohwa, me kin ketin mwadang en mahk, pahn ketin mahkikihong kitail dipatail kan.​—Ais. 55:7.

12. (a) Ia duwen atail kak alasang ahn Depit mehn kahlemeng mwahu ahnsou me kadeikpen loalatail kin nsensuwedla? (b) Dahme kahrehda Paipel mahsanih me Siohwa ketin “koluhla”? Ia duwen pasapengo eh kangoange kitail? (Menlau kilang kakon me mi powe.)

¹² Kapakap iei ehu ahl mwahu me Koht kak ketin sewese kitail. Nan melkahka kaselel ehu, Depit kasalehda eh pwoson me Siohwa ketin sapengala eh kapakap kan. (Wadek Melkahka 32:1-5.) Mwohn Depit eh wehkada dipe ko ong Koht, kadeikpen loale kahrehiong ih en nsensuwed laud. E pwunod, soumwahu oh pahtoula. Depit ale mahkpen dipe kan oh nsenamwahula ihte mwurin eh wehkadahng Koht dipe ko. Siohwa ketin sapengala ahn Depit kapakap ko. E ketin sewese Depit en nsenamwahula oh pousehlahte wia dahme pwung. Ni soangen ahlohte, ma ke kin pwunodki sapwung kan me ke wiahda, kapakapkiong Siohwa ni mehlel en ketin mahkohng uhk oh wia uwen omw kak pwehn wiahda wekidala kan me anahn. Eri ken kamehlele me Siohwa ketin karonge omw kapakap oh ketin mahkohng uhk.​—Mel. 86:5.

13, 14. (a) Dahme kitail en kilikilangwohngete? (b) Peidek dah kan me pahn sewese kitail en medemedewe dahme kitail kin wiewia met?

¹³ E mehlel me kitail kak sukuhl sang  dahme wiawi mahs, ahpw kitail en dehr pwunupwunodki. Kilangwohngete ahnsou wet oh ni ahnsou kohkohdo. Idek rehmw peidek pwukat: ‘I pahn koluhkihla mwuhr pilipil kan me I wiewia? I pahn men soahng kan en weksang dahme I wiadahr ko? I kin papah Koht ni lelepek pwe I en dehr koluhkihla mehkot ni ahnsou kohkohdo?’

¹⁴ Kahn kamakam kowahlap inenen kerendohr. E wia elen loalokong en idek rehmw peidek pwukat: ‘I kak wia laudsang dahme I wiewia nan sapwellimen Koht doadoahk? I kak pioneer? Dahme kerempwa ei pahn wiahla sounsawas men? I kin wia uwen ei kak koaros en kamwahwihala pein ngehi? I kin wia soangen aramas me Siohwa ketin kupwurki en mi nan sapwellime sampah kapwo?’ Dehr pwunodki dahme ke sohte wiahda, ahpw medemedewe dahme ke kin wia met oh tehk mwahu me ke kin wiewia uwen omw kak koaros nan omw papah Siohwa. Wiahda soangen pilipil kan met me ke sohte pahn koluhkihla ni ahnsou kohkohdo.​—2 Tim. 2:15.

15, 16. (a) Soangen tounmetei dah kan me me tohto wiadahr pwehn papah Siohwa uwen arail kak? (b) Dahme kahrehda kitail en dehr koluhkihla tounmetei koaros me kitail wiahda ong Koht?

¹⁵ Ke wiadahr tounmetei kan pwehn doadoahngki pali laud en omw ahnsou ong papah Siohwa? Mwehin ke pwilikihdi doadoahk en mwohni mwahu ehu de pesines ehu pwe ken doadoahk laud ong Siohwa. De mwehin ke pilada ken dehr pwopwoudida de naineki seri pwe ken kak doadoahk nan Pedel, wia doadoahk en kauwada wasahn kaudok kan, de wia sounapwalih me kin seiloak de misineri. Ke pahn koluhkihla pilipil pwuko pwehki met ke mahlahr? Ke pahn pehm me sohte anahnepen tounmetei kan me ke wiahda de ke wiahda pilipil pwukat ni ahnsou sapwung? Uhdahn soh!

¹⁶ Ke wiahda pilipil pwuko pwehki ke uhdahn poakohng Siohwa oh ke men sewese meteikan ren papah ih. Dehr medewe me omw mour pahn kakete mwahu ma ke wia soahng kan weksang dahme ke wiahdahr. Ke kak uhdahn perenki soangen pilipil kan me ke wiahdahr! Ke pilada ahl keieu mwahu nan omw irair kan en papah Siohwa. Siohwa sohte pahn ketin manokehla tounmetei koaros me ke wiahda ong ih. Ahnsou me ke pahn ahneki “mouro me uhdahn mour mehlel,” mour soutuk oh unsek, e pahn ketin katingihkin iuk kapai kan me mwahusang dahme ke kak medewe!—1 Tim. 6:19; Mel. 145:16.

17, 18. (a) Dahme Pohl wia pwehn soikala pepehm en koluhla? (b) Ia duwen omw pahn alasang ahn Pohl mehn kahlemeng?

¹⁷ Dahme Pohl wia pwehn soikala pepehm en koluhla mwuhr nan eh mour? Pohl nda me e uhdihsang pwunodki eh mouren mahs oh doadoahk laud pwehn alehdi eh kisakiso. (Wadek Pilipai 3:13, 14.) Pohl sohte kin wie medemedewehte duwen sapwung kan me e wiahda ahnsou me e iang pelien lamalam en mehn Suhs ko. Ahpw e doadoahngki eh kehl koaros en kolokol eh lelepek pwehn kak alehdi kisakis en mour soutuk.

¹⁸ Dahme kitail kak sukuhlki sang dahme Pohl nda? Kitail en dehr pwunodki mehkan me kitail wiadahr mahs me kitail sohte kak wekidala, ahpw kitail en kilangwohngete dahme kitail kak wia met pwehn alehdi kapai kan ni ahnsou kohkohdo. Mwein kitail sohte kak manokehla douluhl atail sapwung kan, ahpw kitail en dehr wie nsensuwedkihte sapwung pwukat. Kitail kak uhdihsang atail pwunodki dahme wiawi mahs, papah Koht ni uwen atail kak ni ahnsouwet oh medewe duwen ahnsou kaselel me kitail pahn ahneki ahnsou kohkohdo!