1, 2. (a) Dahme lokaiahn Ipru ong “lingan” kin dokedoke? (b) Peidek dah kan me kitail pahn sapengala nan iren onop wet?

 NI OMW kin rong lepin lokaia wet “lingan,” dahme ke kin medewe? Ke kin medewe uwen lingan en sapwellimen Koht kapikipik kan? (Mel. 19:1) Ke kin medewe duwen kaping oh wahu me kowohng irail kan me kepwehpwe, loalokong, de pweida? Nan Paipel, lokaiahn Ipru me kawehwehda lepin lokaia wet “lingan” kak wehwehki mehkot me toutou. Mahsie, sent kan kin wiawihkihda mete duwehte kohl de silper. Uwen toutou en sento, ih pil uwen eh kesempwal. Ih kahrepe wet me lepin lokaia “lingan” kak dokedoke uwen kesempwal de uwen kaselel en mehkot.

² Aramas akan kin kalapw wauneki irail kan me ahneki manaman de ndand. Ahpw pwe Koht en ketikihong lingan de kaping ong aramas emen, dahme e kin ketin kilang rehn aramaso? Lepin Padahk 22:4 mahsanih: “Lemmwiki KAUN-O oh mpahi, eri, ke ahpw pahn kepwehpwehla, waunla [“lingan,” NW], oh pil mour werei.” Wahnpoaron Seims pil ntingihedi: “Kumwail aktikitikla mwohn silangin Koht, e ahpw pahn ketin kasapwilkumwailda.” (Seims 4:10) Soangen lingan de kaping dah me Siohwa ketikihong kitail? Dahme kak kauhkitaildihsang atail en alehdi lingan wet? Oh ia duwen atail kak sewese meteikan ren alehdi lingan wet?

3-5. Ia duwen Siohwa ketin kalinganahla kitail?

³ Sounmelkahkao kamehlele me Siohwa pahn ketikihong ih lingan. (Wadek Melkahka 73:23, 24.) Ia duwen Siohwa eh ketikihong lingan sapwellime aramas peik kan? E ketin wia met sang ni eh ketin kupwurkin irail oh kapairailda ni ahl tohto. Karasepe, e ketin sewese irail ren wehwehki kupwure oh ketin mweidohng ren ahneki nanpwungmwahu keren reh.​—1 Kor. 2:7; Seims 4:8.

⁴ Siohwa pil ketikihong kitail lingan ni eh ketin  mweidohng kitail en kalohki rongamwahwo. (2 Kor. 4:1, 7) Ni atail kapinga Siohwa sang ni atail iang doadoahk en kalohk, kitail kin alehdi lingan sang ih oh kitail kin wia kamwahu ong meteikan. Siohwa ketin inoukihong kitail: “I pahn kin wauneki irail kan me kin waunekin ie.” (1 Sam. 2:30) Siohwa kin ketin kawauwih irail kan me kin wia doadoahk en kalohk sang ni eh ketikihong irail adamwahu, me iei e ketin kupwurkin irail. Oh meteikan nan mwomwohdiso pahn kapinga irail.​—Lep. Pad. 11:16; 22:1.

⁵ Ia pahn duwen ahnsou kohkohdo ong irail kan me kin peikiong Siohwa? Paipel inoukihda: “E ahpw pahn ketin kawauwihiukala ni eh pahn ketikihong uhk sahpwo, oh ke pahn kilang me suwed akan ar pahn koakoahksang.” (Mel. 37:34) Sapwellimen Koht ladu kan ahneki koapworopwor inenen kaselel en mour kohkohlahte.​—Mel. 37:29.

6, 7. Dahme kahrehda me tohto sohte kamehlele me Sises iei Mesaiao?

⁶ Mie mehkot kak kauhdi kitail sang atail en ale lingan sang Siohwa? Ei. Karasepe, mwein kitail kin nohn kesempwalki madamadau en irail kan me sohte ahneki nanpwungmwahu rehn Siohwa. Ihme ekei kaun akan ni mwehin Sises kin wia. Wahnpoaron Sohn ntingihedi me re kin pwoson Sises, “a pwehki Parisi ko me kahrehda re sohte kin koasoia ni sansal, pwe re dehr lekdeksang nan sinakoke kan. Pwehki arail kesempwalki ale kaping sang rehn aramas laudsang ale kaping sang rehn Koht.” (Sohn 12:42, 43) Kaun pwukat sohte anahne nohn kesempwalki dahme Parisi ko medemedewe.

⁷ Sises ketin kawehwehda ni sansal dahme kahrehda me tohto sohte kamehlele me ih iei Mesaiao. (Wadek Sohn 5:39-44.) Wehin Israel kin awiawih ketidohn Mesaia erein sounpar epwiki kei. Ni ahnsou me Sises ketin tapiada kalohk, ekei ele wehwehki sang kokohp en Daniel me Mesaiao ketidohr. Sounpwong kei mwowe, me tohto medewe me Sohn Sounpapidais iei Mesaiao. (Luk 3:15) Ahpw ahnsou me Mesaiao ketido, irail sounpadahk ko en Pwuhk Sarawi sohte kamehlele ih. Dahme kahrehda? Sises ketin kasalehda kahrepeo sang ni eh ketin keinemwe rehrail: “Kumwail kin anahne kaping sang pein nanpwungamwail; ahpw kumwail sohte song en rapahki kaping sang rehn Koht. Eri, ia duwen amwail kak pwoson ie?”

8, 9. Ia duwen lingan sang aramas eh kak wiahla mehkot kesempwal rehtail laudsang lingan me Siohwa ketikihda? Menlau doadoahngki karasaras me pid marain.

⁸ Kitail kak wehwehki ia duwen emen eh alehdi lingan sang aramas eh kak wiahla mehkot kesempwal ong ih laudsang en alehdi wahu sang Siohwa ni atail pahn kapahrekihpene lingan oh marain. Mie soangen marain tohto me kin pwarada pahnlahng. Mwein ke kak tamanda ahnsou ehu me ke kilengdalahng pahnlahng nipwong oh kak kilangada usu kid kei. Ele ke uhdahn pwuriamweikihla uwen lingan en usu pwukat. (1 Kor. 15:40, 41) Ahpw nan ekei kahnimw kan, mie soangen marain tohto me kahrehda e apwal en kilangada usu kan. Dahme kahrehda? Pwehki marain en dengki kan sang ahl kan, wasahn mwadong laud kan, de ihmw kan nohn marain de lingan sang usu kan? Soh. Ahpw met pwehki marain sang dengki kan nan kahnimw kan kin karanih kitail, kahrehda e apwal kitail en kilangada usu kan. Eri, pwe kitail en kilang lingan en usu kan, kitail anahne kohla likin kahnimw kan.

⁹ Ni ahlohte, en alehdi lingan sang aramas kak kahrehda lingan me kohsang rehn Siohwa en sohla kesempwal ong kitail. Aramas tohto sohte kin rong rongamwahwo pwehki re masak dahme kompoakparail kan de arail peneinei kan kin medewehiong irail. Sapwellimen Siohwa ladu kan pil kak pwunodki dahme meteikan kin medewehiong  irail. Karasepe, mwahnakapw men anahne kalohk wasa kis me e ese tohn wasao pwon. Ahpw pali laud en aramas ko wasao sehse me ih emen Sounkadehdehn Siohwa. Ia duwe, e pahn masak en kalohk wasao? Pil ehu karasepe, emen kin men wia soahng tohto nan sapwellimen Siohwa doadoahk, ahpw meteikan kin kouruhrki eh mehn akadei kan. Ia duwe, e pahn rong irail pwukat me sohte kin nohn kesempwalki arail papah Siohwa ni uwen me re anahne wia? De pil ehu, emen wiahda dihp laud ehu. E pahn ekihla dipeo pwehki e pwunodki eh pahn luhs sang eh pwukoa kan nan mwomwohdiso de pwehki e sohte men kansensuwedihala eh peneinei de kompoakepah kan? Ma eh nanpwungmwahu rehn Siohwa iei me keieu kesempwal reh, e pahn peki sawas sang rehn elder kan.—Wadek Seims 5:14-16.

10. (a) Dahme kak wiawi ma kitail nohn pwunodki dahme meteikan kin medewehiong kitail? (b) Ma kitail kin aktikitik, dahme kitail en uhdahn kamehlele?

¹⁰ Mwein ke pehm me ke kin doadoahk laud pwe ken wiahla Kristian mwahu men, ahpw emen brother kin kalapw kihong uhk kaweid. Ke kak ale kaweido oh paiekihda. De ke kak pohnsehsehla kaweido pwehki ke aklapalap, de ke nohn pwunodki pwe ke de adsuwedla, de ke kin men kihda kahrepen omw wiewia ko. De medewehla me ke iang brother oh sister kan wia doadoahk ehu. Ke pahn pwunodki ihs me pahn alehdi kaping pwehki omw koahiek oh omw doadoahk laud? Ma ke mi nan ehu soangen irair pwukat, tamataman me “me kin aktikitik pahn alehdi lingan.”—Lep. Pad. 29:23.

11. Ia atail pepehm ni en meteikan kapinga kitail? Dahme kahrehda?

¹¹ Elder kan oh brother kan me kin doadoahk laud pwehn ale pwukoa kan nan mwomwohdiso anahne kanahieng ren dehr kin men ‘rapahki kapingpahr sang rehn aramas.’ (1 Tim. 3:1; 1 Des. 2:6) Ia duwen brother men eh pahn mwekidki ni en meteikan kapinga ih pwehki e wiahda mehkot mwahu? Mehlel, e sohte pahn wiahda sansal ehu duwen ih duwehte me Nanmwarki Sohl wia. (1 Sam. 15:12) Ahpw ia duwe, e pahn nda me dahme e wiadahro kak pweida ihte pwehki Siohwa ketin sewese ih, oh e pahn pweida ahnsou kohkohdo ihte ma Siohwa ketin pousehlahte kapaiada oh sewese ih? (1 Pit. 4:11) Dahme kitail pehm loalatail ni en meteikan kapinga kitail kin kasalehda soangen lingan dah me kitail uhdahn men alehdi.—Lep. Pad. 27:21.

12. Dahme kahrehda ekei mehn Suhs ko soikala sapwellimen Sises padahk kan?

¹² Pil ehu me kak kauhkitaildisang ale wahu rehn Siohwa iei atail ineng sapwung kan. Pwehki atail ineng sapwung kan, ele kitail sohte douluhl men rong dahme mehlel. (Wadek Sohn 8:43-47.) Karasepe, Sises ketin mahsanihong ekei mehn Suhs ko me re soikala sapwellime padahk kan pwehki re men wia dahme samarailo Tepil kin inengieng.

13, 14. (a) Dahme soun roporop kan nda duwen atail mwahliel oh ngilen aramas? (b) Ia duwen atail kin pilada ihs me kitail pahn rong?

¹³ Ekei pak kitail kin rongete dahme kitail men rong. (2 Pit. 3:5) Siohwa ketin wiahda atail mwahliel me koahiek en pohnsehsehla ekei ngihl kan. Nna uhdi ahnsou kis oh medewe uwen tohtohn ngilen soahng kan me ke kak rongada met. Ele ke sohte rong ngihl pwukat mwoweo. Dahme kahrehda? Mendahki omw mwahliel ahneki koahiek en rong soangen ngihl pwukat koaros, e kin sewesewese omw madamadau en uhlahng soahng teieu. Ahpw e apwal ong omw mwahliel en wia met ni omw kin rong meteikan lokaia. Soun roporop kan diarada me kitail kak rong emente ni ahnsou me e lokaia. Met wehwehki me ni en aramas riemen pahn wiahkinteieu lokaiahiong uhk, ke  anahne pilada ihs rehra me ke pahn rong. Ke pahn pilada ihs me ke men rong. Mehn Suhs ko ni mwein Sises kin men wia dahme samarailo Tepil kin inengieng oh ihme kahrehda re pilada ren dehr rong Sises.

¹⁴ Paipel mahsanih me ni ahl ehu, “kupwurokong” oh “soaloalokong” kin songosong ahnsou koaros en kahrehiong kitail en rong ira. (Lep. Pad. 9:1-5, 13-17) Mie atail pilipil. Ihs me kitail pahn rong? Met kin poahsoankihda ihs me kitail men kaperenda. Ma kitail wia sapwellimen Sises sihpw kan, kitail pahn rong oh idawehn ih. (Sohn 10:16, 27) Sises ketin mahsanih me sapwellime tohnpadahk kan kin wia “kisehn mehlel.” (Sohn 18:37) Re sohte kin rong emen tohrohr pwehki re “sahn” ngileo. (Sohn 10:5) Irail kan me ni aktikitik kin idawehn Sises pahn alehdi lingan sang rehn Koht.​—Lep. Pad. 3:13, 16; 8:1, 18.

15. Dahme kahrehda Pohl nda me eh kahpwal kan kin wia kalinganpen mehn Episos ko?

¹⁵ Ia duwen atail kak sewese meteikan ren alehdi lingan sang rehn Koht? Ehu ahl iei sang atail mehn kahlemeng en dadaurete. Wahnpoaron Pohl ntinglahng mwomwohdisohn Episos koasoia: “I peki rehmwail, kumwail dehr kin nan kapehd tikitingkihla ei kin lokolongkin kumwail; pwe mehkoaros kin wiawi ong ni kamwahupamwail [“kalinganpamwail,” NW].” (Ep. 3:13) Dahme kahrehda Pohl nda me eh kahpwal kan kin wia kalinganpen mehn Episos ko? Sang ni eh papah rie Kristian ko mendahki kahpwal kan, Pohl kasalehiong irail me en papah Koht anahne keieu kesempwal ong Kristian men. Ma Pohl uhdihsang eh papah ni ahnsou me e lelohng apwal kan, ele rie Kristian ko pahn medewe me arail nanpwungmwahu rehn Siohwa, arail doadoahk en kalohk, oh arail koapworopwor sohte kesempwal. Sang eh mehn kahlemeng en dadaurete, Pohl kasalehiong rie ko me en wia sapwellimen Krais tohnpadahk kin kesempwal sang tounmetei koaros.

16. Dahme wiawihong Pohl nan Listra?

¹⁶ Medewehla uwen Pohl eh ngoang oh dadaurete eh kin sewese brother ko. Wiewia 14:19, 20 padahkihong kitail dahme wiawihong Pohl nan Listra. E mahsanih: “Mie ekei mehn Suhs me kohdo sang Andiok en Pisidia oh pil sang Aikoniomw. Irail pwukat eri kalowehdi pokono ong arail pali; re kate Pohl oh wurahdekieisang nan kahnimwo wurahdekieilahng liki. Irail ahpw kihkihong me e melahr. Eri, nindokon irail ko me pwosonlahr ar kapikapil, Pohl ahpw pwourda oh pwuralahng nan kahnimwo. Pweidi songada, Pohl oh Parnapas ahpw douluhllahng Derpe.” Medewehla uwen eh apwal ong Pohl en sapalki mwail 60 mwurinte  rahno me e kereniong mehkihla aramas ako ar kate ih!

17, 18. (a) Ia duwen Timoty eh ese duwen en Pohl eh lokolok nan Listra? (b) Ia duwen ahn Pohl mehn kahlemeng en dadaurete eh sewese Timoty?

¹⁷ Ia duwe, Timoty mihmi ahnsou me aramas ako kate Pohl? Mwein. Pwuhken Wiewia sohte kasalehda met. Ahpw Timoty ese dahme wiawi. Pohl ntingihedi keriaun nah kisinlikou ong Timoty koasoia: “Ke idawehnehr ei padahk, ei wiewia, oh pil kahrepen ei mour nan mour wet.” Timoty sohte ihte ese me aramas ako kate Pohl, ahpw e pil ese me mehn Suhs ko wurahdekieisang Pohl nan Andiok oh me ekei nan Aikoniomw song en kate.​—2 Tim. 3:10, 11; Wiewia 13:50; 14:5, 19.

¹⁸ Timoty ese me Pohl dadaurete pahn kahpwal pwukat koaros. Timoty sukuhlki soahng tohto sang ahn Pohl mehn kahlemeng. Ahnsou me Pohl pwurala Listra, e esehda me Timoty wia mehn kahlemeng kaselel ong mwomwohdiso, oh “pil keniken rehn me pwoson akan koaros en nan Listra oh Aikoniomw.” (Wiewia 16:1, 2) Mwurin ahnsou kei, Timoty kakehr ale pwukoa laud kan.​—Pil. 2:19, 20; 1 Tim. 1:3.

19. Ia duwen atail kin dadaurete eh kak sewese meteikan?

¹⁹ Ma kitail pousehlahte wia kupwuren Koht, atail mehn kahlemeng kak sewese me pwulopwul kan ren wiahla sapwellimen Koht ladu kesempwal kei. Me pwulopwul kan kin kilang kitail oh sukuhlki sang mwomwen atail koasoiong aramas akan nan kalohk ahpw mehlel mwomwen atail kin mwekidki irair apwal akan nan mour. Pohl koasoia me e kin dadaurete pahn soahng tohto pwe en kak sewese meteikan ren alehdi mour soutuk.​—2 Tim. 2:10.

20. Dahme kahrehda kitail anahne pousehlahte rapahki lingan sang rehn Koht?

²⁰ Kitail ahneki kahrepe kan me inenen mwahu pwehn pousehlahte “rapahki kaping sang rehn Koht.” (Sohn 5:44; 7:18) Siohwa ketikihong irail kan me kin rapahki lingan “mour soutuk.” (Wadek Rom 2:6, 7.) Pil ehu, atail kin dadaurete kak sewese meteikan ren kolokolte arail lelepek oh ahneki mour soutuk. Eri, dehr mweidohng mehkot de emen en kauhdi omw pahn alehdi lingan me Koht kin ketikihda.