Aktikitik iei irair ehu me sohte kin aklapalap oh pohnmwahso. Aramas aktikitik men sohte kin medewe me e mwahusang meteikan. Aramas soh unsek men me aktikitik pil kin tamataman me e dipan oh pohnese me mie soahng kan me e sohte kak wia.

Moses sohte aklapalapala ni ahnsou me e ahnekihdi manaman. Dahme kin kalapw wiawi iei ni en emen alehdi manaman, e kin mwadang kasalehda ma e aktikitik de aklapalap. Nan pahr 1885, emen sounnting Robert G. Ingersoll koasoia me ahl keieu mwahu aramas emen en kasalehda me e aktikitik iei sang ni eh doadoahngki manaman me e ahneki. Ni mwomwen madamadauohte, Moses wia mehn kahlemeng uhdahn kaselel. Ia duwen?

Moses alehdi manaman laud pwehki Siohwa ketin koasoanehdi me ih me pahn kahluwa mehn Israel ko. Ahpw met sohte kahrehiong Moses en aklapalapala. Karasepe, medewehla aktikitik me e kasalehda ni eh apwalihala peidek apwal ehu me pid pwungen sohso. (Nempe 27:1-11) Pilipil wet uhdahn kesempwal pwehki e sohte pidadahte lih ako ahpw e pil pidada ahnsou kohkohdo ma soangen irairo pwarada.

Ia duwen Moses eh mwekidki met? E pahn medewe me pwehki eh wia sounkaweid en mehn Israel ko, e uhdahn ese mehnia pilipil me e pahn wiahda? E pahn koapworopworki pein eh koahiek pwehki eh kahluwa mehn Israel kan ahnsou werei, de e pahn koapworopworki dahme e wehwehki duwen sapwellimen Siohwa madamadau?

Ohl aklapalap men ele pahn wia met. Ahpw kaidehn Moses. Paipel mahsanihong kitail: “Moses eri patohwanohng KAUN-O ar pekipek.” (Nempe 27:5) Nna medewehla! Mendahki eh kahluwa wehin Israel erein sounpar 40 de daulih, Moses koapworopworkihte Siohwa, a kaidehn pein ih. E sansal ong kitail me Moses uhdahn aktikitik.

Moses sohte medewe me ih kelehpw me pahn ahneki manaman. E perenkihda ni en Siohwa ketin mweidohng mehn Israel teikan ren iang ih wia soukohp kei. (Nempe 11:24-29) Ni ahnsou me ahn eh pwoudo pahpao padahkihong ih en pilada ohl kan me kak sewese wia ekei doadoahk ko, Moses doadoahngki iren sawas wet ni aktikitik. (Eksodus 18:13-24) Oh ni ahnsou me e kereniong pahn mehla, mendahki e kehkehlailte, Moses peki rehn Siohwa en ketin pilada emen me pahn wiliandi ih. Ni ahnsou me Siohwa ketin pilada Sosua, Moses utungada ohl pwulopwul menet ni mohngiong unsek. E pil kangoange aramas ako ren idawehn Sosua ni eh kahluwairaillahng nan Sapwen Inowo. (Nempe 27:15-18; Deuderonomi 31:3-6; 34:7) Moses kin wiahki pwais kaselel ehu en kahluwa mehn Israel ko nan arail kaudok. Ahpw e sohte mweidohng eh manaman en kesempwal sang dahme pahn mwahu ong meteikan.

Kitail sohte men aklapalapala pwehki kitail alehdi manaman de ahneki koahiek. Tamataman: Pwehn wia sapwellimen Siohwa doadoahk ni ahl me keieu mwahu, atail aktikitik kesempwalsang atail koahiek. (1 Samuel 15:17) Ma kitail uhdahn aktikitik, kitail pahn nantihong doadoahngki kaweid loalokong en Paipel wet: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese.”—Lepin Padahk 3:5, 6.

Ahn Moses mehn kahlemeng pil padahkihong kitail en dehr nohn kesempwalki pein kitail de manaman me kitail ahneki.

Ia duwe, kitail paiekihda atail alasang ahn Moses mehn kahlemeng en aktikitik? Ei, uhdahn! Ni atail kin kakairada irair en aktikitik mehlel, met kahrehiong meteikan ren perenki kitail oh sohte ahneki kahpwal rehtail. Kesempwal sang met, Siohwa Koht, me pil ketin kasalehda irair kaselel wet, pahn ketin kupwurperenki kitail. (Melkahka 18:35) Paipel mahsanih: “Koht kin ketin pelianda me aklapalap akan, a e ketikihong sapwellime kalahngan me karakarahk kan.” (1 Piter 5:5) Ia uwen met eh wia kahrepe mwahu kitail en alasang ahn Moses mehn kahlemeng en aktikitik!