Limpoak pidada atail pepehm ong meteikan. Aramas limpoak men kin kasalehda sang eh lokaia oh wiewia kan duwen eh pepehm ong irail kan me e kesempwalki, mehnda ma e anahne wiahda tounmetei kan.

Moses kasalehda limpoak ong Koht. Ni ahl dah? Tamanda dahme kileldi nan 1 Sohn 5:3 me mahsanih: “Pwe iet duwen wehwehn poakohng Koht: kitail en peikiong sapwellime kosonned akan.” Pwehki Moses poakohng Koht, e kapwaiada sapwellime kosonned akan. Moses peikiong soahng koaros me Koht ketin mahsanihong ih en wia, sangete pwukoa apwal en kohla rehn Parao lapalap lel pwukoa mengei en kapahla nah sokono pohn Sehd Weitahtaho. Mendahki e mengei de apwal en kapwaiada kehkehlik ko, Moses peikiong. “Moses eri kapwaiada soahng koaros.”​—Eksodus 40:16.

Moses kasalehda limpoak ong ienge mehn Israel ko. Re ese me Siohwa ketin doadoahngki Moses pwehn kahluwa sapwellime aramas ako, kahrehda re kin kohla reh oh padahkihong arail kahpwal kan. Paipel mahsanih: “Moses ahpw soupisengkihla wiepen kopwung nanpwungen aramas ako me reperepen pwung reh sang nimenseng lel nin soutik.” (Eksodus 18:13-16) Medewehla uwen Moses eh kin pwangada mwurin eh rongorong mehn Israel ko arail kin koasokoasoiahiong ih arail kahpwal kan rahn pwon. Ahpw Moses poakohng aramas ako kahrehda e perenki sewese irail.

Moses sohte ihte rong irail, ahpw e pil kapakapki irail kan me e poakohng. E pil kapakapki irail kan me wiahiong ih me suwed. Karasepe, ni ahnsou me rie liho, Miriam, lipahnede ih , Siohwa ketikihong Miriam soumwahu en tokutok. Moses sohte perenkihda kalokolok wet, ahpw e mwadangete pekimahngki Miriam oh kapakap nda: “Maing Koht, komw kupwure oh ketin kamwahwihala liho!” (Nempe 12:13) Limpoakte me pahn kahrehiong Moses en wia soangen kapakap soh roporop duwehte met.

Kitail kak alasang Moses sang ni atail kakairada limpoak laud ong Koht. Soangen limpoak wet kin kamwakid kitail en peikiong sapwellime kosonned akan sang mohngiongitail. (Rom 6:17) Ni atail kin peikiong Siohwa sang mohngiongitail, kitail kin kaperenda ih. (Lepin Padahk 27:11) Kitail pil kin paiekihda met, pwehki ni atail papahki Koht limpoak mehlel, kitail sohte pahn ihte wia dahme pwung ahpw kitail pahn perenki wia me pwung!—Melkahka 100:2.

Pil ehu ahl me kitail kak alasang Moses iei en kakairada irair en tounmetei pwehki kitail poakohng meteikan. Ni en kompoakpatail kan de atail peneinei kin padahkihong kitail arail kahpwal kan, limpoak kin kamwakid kitail en (1) rong kanahieng dahme re nda; (2) song en wehwehki ia arail pepehm; oh (3) padahkihong irail me kitail nsenohkin irail.

Duwehte Moses, kitail kak kapakapki irail kan me kitail poakohng. Ni ahnsou me re kin padahkihong kitail arail kahpwal kan, mwein kitail kin nsensuwedkihla atail sohte kak wia mehkot pwehn kamwahwihala arail kahpwal ko. Ele kitail kin nda, “Menlau mahk. Ihte me I kak wia, kapakapkin uhk.” Tamataman: “Kapakap en aramas mwahu men me inenen manaman.” (Seims 5:16) Atail kapakap kan ele kak kamwakid Siohwa en ketin wia mehkot ong aramaso me mwein e sohte pahn ketin wia. Eri, ihte me mwahu kitail kak wia ong irail kan me kitail poakohng iei en kapakapkin irail. *

Ke sou pahn pwungki me kitail kak sukuhlki soahng tohto sang Moses? Mendahki e wia aramas duwehte kitail, e wiahda mehn kahlemeng mwahu en pwoson, aktikitik oh limpoak. Ni atail kin alasang eh mehn kahlemeng ni keneinei, ih uwen laud kitail oh meteikan kin paiekihda.​—Rom 15:4.