1. Dahme kahrehda soun tangahki sompihr men anahne tehk doaropwe me audaudki soahng koaros me e anahne mwohn eh pihrda?

 EHUEHU ahnsou me soun tangahki sompihr men kin kaunopada pwehn pihrda, e kin tehk kanahieng sompihro. E kin kilang doaropwe ehu me audaudki soahng koaros me e anahne ong sompihro. Ma e sohte tehk sompihro, e pahn kakete sohte kasawihada kahpwal ehu me kak kahrehda sompihro en pwupwudi. Pil irail kan me wereilahr arail tangahki sompihr anahne tehk soahng koaros me mi nan doaropweo.

2. Dahme kitail anahne tehk?

² Duwehte doaropweo me soun tangahki sompihr men kin doadoahngki, mie soahng kei me ke kak tehk mwahu pwe omw pwoson pahn kehkehlailte mendahki ahnsou apwal akan. Sohte lipilipil ma kitail ahpwtehn papidaisla de kitail mihmikiher nan padahk mehlel sounpar tohto, kitail anahne kin tetehk atail pwoson. Ma kitail kin lemehte me atail pwoson kehlail, kahpwal ehu nan mour kakete kahrehda kitail en sohla ahneki nanpwungmwahu rehn Siohwa. Paipel katamankin kitail: “Mehmen me pepehm me e kesikesihnen teng, a en kanahieng pwe e de pwupwudi.”—1 Kor. 10:12.

3. Dahme Kristian kan nan Kalesia anahne wia?

³ Sapwellimen Sises meirong kahrehda Kristian kan kak esehla Koht ni ahl kapw ehu. Aramas akan kakehr pilipilda pwehn wiahla sapwellimen Koht. Ahpw Kristian kan nan Kalesia anahne tetehk arail pwoson. (Kal. 4:9) Mie ekei nan mwomwohdiso ndinda me Kristian kan kak pwungla ihte ma re pousehlahte idawehn Kosonned en Moses. Ahpw Koht solahr ketin doadoahngki Kosonnedo, oh mehn liki kan nan mwomwohdiso kan sohte mi pahn Kosonnedo. Koaros mehn Suhs ko oh mehn liki ko nan mwomwohdiso anahne kekeirda nan padahk mehlel. Re anahne wehwehki me Koht  solahr ketin kupwurki me aramas akan anahne idawehn Kosonnedo.

4, 5. Kaweid dah me Pohl kihong mehn Kalesia ko? Ia duwen eh kesempwal ong kitail?

⁴ Kisinlikou me Siohwa ketin doadoahngki wahnpoaron Pohl en ntingihedi ong mehn Kalesia ko katamanki Kristian koaros ren dehr kohkohsang padahk mehlel en Paipel me re sukuhlkiher. Kitail en dehr pwuralahng dahme kitail pwilikidier. Kisinlikou ong mehn Kalesia ko kak sewese kitail koaros en kolokolete atail lelepek.

⁵ Kitail koaros anahne tamataman ahnsou me kitail pilada en papah Siohwa. Medewe duwen peidek riau pwukat: Ke tamataman kahk kan me ke wiadahr me seweseiuk ken kaunopada ong papidais? Ke tamataman ia duwen omw esehla Koht oh ia omw pepehm ahnsou me Koht ketin mwahngihiukalahr nin duwen kompoakepah men?

6. Soahng dah kei me kitail pahn sukuhlki?

⁶ Mie kahk duwau me kitail wiahda ni atail iangala padahk mehlel. (Menlau kilang kakon “ Kahk kan me Kitail Wiahda Pwehn Esehla Koht Kak Sewese Kitail en Wie Kekeirda.”) Kitail kak medewe duwen kahk pwukat nin duwen soahng kei me kitail kak tehk pwehn kolokol atail pwoson en kehlail oh dehr pwuralahng soahng kan en sampah. Duwehte soun tangahki sompihr men eh kin tehk nah doaropweo mwohn eh pahn pihrda, kitail anahne tehk sapahlih duwen kahk ko.

7. Mahsen mehlel dahieu me kitail anahne idawehn? Dahme kahrehda kitail en tehk ia uwen atail kin idawehn?

⁷ Duwehte soun tangahki sompihr men eh kin tehk soahng koaros me e anahne tehk mwohn eh pahn pihrda, kitail pil kak tetehk atail kekeirda nan padahk mehlel. Pohl ntingkihlahng Timoty: “Katengeiukediong ni mahsen mehlel kan me I padahkihonguhkehr, pwe en wiahla mehn kahlemengih ehu ong kowe pwe ke en idawehn. Oh pil katengeiukediong nan pwoson oh limpoak me kitail ahnekipene ni atail miniminiong Krais Sises.” (2 Tim. 1:13) “Mahsen mehlel kan” me e koasoakoasoia duwe dierek nan Mahsen en Koht. (1 Tim. 6:3) Mahlen mengei ehu kak kahrehiong kitail en wehwehki mwomwen mehkot. Pil duwehte, “mahsen mehlel kan” sewese kitail en wehwehki ni mengei dahme Siohwa ketin kupwurki sang kitail. Met kitail pahn koasoiapene kahk kan me kitail wiadahr mwohn atail papidaisla oh tehk ia uwen atail kin idawehn mahsen mehlelo.

8, 9. (a) Dahme kahrehda kitail anahne kekeirda nan padahk mehlel oh nan pwoson? (b) Dahme kahrehda atail kekeirda nin duwen Kristian kei kesempwal? Dahme kahrehda e rasehng kekeirdahn tuhke pwoat?

⁸ Tepin kahk me kitail wiahdahr iei en esehla padahk mehlel, me kahrehiong kitail en ahneki pwoson. Ahpw kitail anahne kalaudehla atail esehla padahk mehlel oh kakehlakahla atail pwoson. (2 Des. 1:3) Mwurin atail papidaisla, atail nanpwungmwahu rehn Koht anahne wie kekeirda oh kekehlaila.

⁹ Met duwehte mwomwen tuhke eh kin kekeirda. E kin kapwuriamwei en kilang uwen reirei tuhke pwoat eh kak keirda, ahpw mehlel ni kalewe ko ar kehlail. Karasepe, ekei tuhke sidar kaselel kan nan Lepanon kak reireila pahrekiong ihmw me poasoake 12. Uwen arail kak laudla, sahl ehu me reireiki piht 40 pahn kapilpene oapwoatte. (Mel. Mel. 5:15) Tuhke pwoat kin tepte mwadang en keirda. Ni kalewe ko ar kin leldihla wasa loal oh doupeseng, tepin tuhkeo kin ahlapeseng oh reireila. Mwuri,  e kin apwal en kilang tuhkeo eh kekeirda. Met duwehte atail kin kekeirda nin duwen Kristian kei. Ele kitail wiahda wekidekla tohto ni ahnsou me kitail tepida onop Paipel. Mwuhr kitail eri papidaisla. Meteikan nan mwomwohdiso kin kilang duwen atail kin kekeirda nan padahk mehlel. Ele kitail tepida pioneer de ale pwukoa teikan nan mwomwohdiso. Ahpw ahnsou dower powe, ele e apwal ong meteikan en kilang atail kin wie kekeirda nan padahk mehlel. Ahpw kitail koaros anahne wie kekeirda nan padahk mehlel oh nan pwoson lao kitail duwehla “aramas dei mehlel kei,” de lao kitail wiahla Kristian koahiek kei. (Ep. 4:13) Eri ni atail kin kekeirda nin duwen Kristian kei, kitail kin duwehte kisin weren tuhke kis me keirda wiahla tuhke kehlail ehu.

10. Dahme kahrehda Kristian koahiek kan anahne wie kekeirdahte nan padahk mehlel?

¹⁰ Ahpw atail kekeirda en dehr uhdi. Atail loalokongkihla Mahsen en Koht oh atail pwoson kin kolokol kitail en kehlail oh tengeteng duwehte kalewen tuhke. Kalewen tuhke pwukat anahne wie kekehlaila. (Lep. Pad. 12:3) Mie riatail tohto me kin pousehlahte wia soangen kekeirda wet. Emen brother me wia elder men tohtohsang sounpar 30 nda me e kin wie kekeirdahte. E nda me met e kin kalahnganki Paipel laudsang mahs. E kin suksukuhlki soahng kapw kan me Paipel kak sewesehki emen en wiahda pilipil kan, oh eh perenki doadoahk en kalohk kin wie lalaudla.

11. Ia duwen atail kak pousehlahte kakehlakahla atail nanpwungmwahu rehn Siohwa?

¹¹ Ma kitail men wie kekeirdahte nin duwen Kristian kei, kitail anahne karakarahnihala Siohwa. E ketin kupwurki kitail en dehr perki mehkot oh ese me mie me poakohng kitail, duwehte pepehm en seri men ni eh kin mi rehn eh pahpa nohno limpoak de duwehte atail pepehm ni atail mi rehn kompoakpatail me keieu keren. Ei, e pahn anahne ahnsou oh nanti pwehn karanihala Siohwa pwehn ahneki soangen pepehm pwukat. Eri, tetehk me ken kihong ahnsou rahn koaros pwehn wadek Paipel. Wadek ehuehu neitail sawasepen Paipel kapw kan me Siohwa kin ketikihong kitail. Met pahn seweseiuk ken esehla mwahu Ih duwehte omw esehla aramas emen oh pahn kakehlakahla omw nanpwungmwahu reh.

12. Dahme kitail anahne wia ma kitail men kolokol atail nanpwungmwahu rehn Koht en kehkehlailte?

¹² Atail kapakap kan oh werek mwahu pil kak sewese kitail en kakehlakahla atail nanpwungmwahu rehn Koht. (Wadek  Malakai 3:16.) Ni kompoakepahn Koht kan ar kin kapakap ong ih, e kin ketin karonge “ar pekipek kan.” (1 Pit. 3:12) Siohwa kin ketin karonge ni atail kin patohong ih ni kapakap, kahrehda kitail anahne kapakap ahnsou koaros. (Rom 12:12) Kitail sohte kak pousehlahte wia kompoakepahn Koht ma sohte sawas sang reh. Ma kitail uhdihsang kapakap ong ih, kitail sohte kak alehdi kehl me kitail anahne. Kitail kak tepida mworuskihla koasoandi suwed wet de lelohng kasongosong en wiahda mehkot sapwung. Ahpw e ketin kupwurki ketikihong kitail sawas koaros me kitail anahne ma kitail pahn peki. Ke kin kapakap ong Siohwa duwehte omw kin koasoiong kompoakepahmw men me ke likih? Mie ahl akan me ke kak kamwahwihala omw kapakap kan?—Ser. 16:19.

13. Dahme kahrehda kitail anahne kaukaule towehda mihting kan ma kitail men kolokol atail nanpwungmwahu rehn Koht en kehlail?

¹³ Kitail anahne mihmihte nan mwomwohdiso pwe kitail en kak mi rehn meteikan me kompoakepahnki Siohwa. E ketin poakohng irail pwehki re kin “sohpeiong” ih. (Nah. 1:7) Pwehki sampah wet inenen suwed, kitail anahne werekiong riatail kan. Kitail kak sewese emenemen en kehkehlailte, oh met pahn kamwakid kitail en kasalehda limpoak ong meteikan oh kasalehda “wiewia mwahu kan.” (Ipru 10:24, 25) Ihte ma kitail kin werekiong mwomwohdiso me kitail kak idawehn ahn Pohl kaweid. Eri, ke en kaukaule iang towehda mihting kan oh iang pasapeng.

14. Dahme kahrehda ahnsou koaros kitail kin anahne onopada en koluhla oh wiahda wekidekla kan nan atail mour?

¹⁴ Ni atail tepin wiahla Kristian kei, kitail kin anahne koluhla oh uhdihsang atail mouren dihp. Ahpw ahnsou koaros kitail anahne kin onopada en koluhla oh wiahda wekidekla kan nan atail mour. Pwehki kitail soh unsek oh ahneki luwet akan, e uhdahn kak mengei kitail en wiahda dihp. Dihp duwehte sineik men me kin onopadahr en ngalis kitail ahnsou me e kak. (Rom 3:9, 10; 6:12-14) Kahrehda kitail sohte kak mwomwehda me sohte atail luwet kan. Siohwa kin ketin kanengamahiong kitail ni atail kin pelianda atail luwet kan. (Pil. 2:12; 2 Pit. 3:9) Doadoahngki omw ahnsou oh kehl ong papah Siohwa a kaidehn ong kahrepe roporop kan. Emen sister me tikida nan padahk mehlel medewe me e anahne uhdahn masak Siohwa oh pehm e sohte pahn kak kaperenda. E sohte karanih Siohwa oh eri wiahda sapwung kan nan eh mour. E nda: “Kaidehn pwehki I sohte poakohng Siohwa, ahpw pwehki I sohte uhdahn ese ih.” Ih eri kapakapki sapwellimen Koht sawas oh wiahda wekidekla kan. E nda: “I esehda me Siohwa kin ketin kahre ie duwehte seri men, sewese ie ehuehu ahnsou en powehdi ei kahpwal kan, oh ni kadek, ketin kasalehiong ie dahme I anahne wia.”

15. Dahme Sises oh Siohwa ketin mwahngih oh kin ketin kalahnganki?

¹⁵ Sapwellimen Koht tohnlengo padahkihong Piter oh wahnpoaron teiko ren “padahkihong” aramas akan rongamwahwo. (Wiewia 5:19-21) Atail doadoahk en kalohk nan ehuehu wihk wia ehu kisehn soahng kan me kitail anahne tehk pwehn kolokol atail pwoson en kehlail. Sises oh Siohwa ketin mwahngih uwen pwoson me kitail ahneki oh kin ketin kalahnganki dahme kitail wia nan doadoahk en kalohk. (Kaud. 2:19) Doadoahk en kalohk anahne wia mehkot kesempwal nan atail mour.

16. Dahme kahrehda kitail en kin kalapw medemedewe duwen atail inowo?

¹⁶ Ke en kalapw medemedewe duwen omw inowo. Atail nanpwungmwahu rehn Siohwa iei me keieu kesempwal me kitail ahneki. E ketin mwahngih koaros me e ketin sapwellimanki. (Wadek Aiseia 44:5.) Kasawih omw nanpwungmwahu rehn Siohwa  oh kapakapki sapwellime sawas pwehn kakehlailih nanpwungmwahu wet. Pil medemedewe duwen omw papidaisla oh dehr manokehla rahn kesempwalo. Omw papidaisla kasalehiong meteikan me ke inoukihong Siohwa omw mour. Pilipil wet iei me keieu kesempwal me ke wiadahr.

17. Dahme kahrehda kitail anahne dadaurete ma kitail men karanih Siohwa?

¹⁷ Pohl padahkihong mehn Kalesia ko ren dehr uhdi. (Kal. 6:9) Kitail pil anahne dadaurete pwehki kitail pahn ahneki kahpwal kan. Ahpw Siohwa pahn ketin sewese kitail. Ke en kin kapakapki sapwellimen Koht manaman, oh e pahn ketin seweseiuk en ahneki peren oh popohl, mehnda ma kahpwal kan sohte kin sohrala. (Mad. 7:7-11) Medewehla met: Siohwa kin ketin apwalih menpihr kan, ahpw e ketin poakohng uhk laudsang eh ketin poakohng menpihr kan. E ketin kupwurki apwalih iuk pwehki ke poakohng oh ke inoukihong omw mour. (Mad. 10:29-31) Mehnda ma ke ahneki kahpwal laud kan, dehr uhdi. Dehr kohkohsang padahk mehlel pwehki soahng kan me ke pwilikidier. Kitail ahneki kapai tohto pwehki Siohwa ketin mwahngihkitaillahr nin duwen kompoakepah kan.

18. Dahme koaros me ese Koht anahne wia met?

¹⁸ Sohte lipilipil ma ke ahpwtehn papidaisla de e wereilahr omw papidaisla, dahme ke anahne wia met? Pousehlahte esehla mwahu Siohwa oh kekeirda nan padahk mehlel. Ke anahne kanahieng en dehr medewe me e itar omw ese Koht oh me ke sohte anahne kamwahwihala omw nanpwungmwahu reh. Pwurepwurehng tehk sapahlih soahng kan me kitail koasoiapenehr nan iren onop wet pwe ken kak uhdahn karanih Siohwa, Samatail limpoak, Kompoakpatail oh atail Koht.​—Wadek 2 Korint 13:5, 6.