NOHA inenda oh kedengideng. Medewehla e wie komkommoal pohn ehu rehu en warihmwo oh kilangla pohn kokoupen warihmwo me inenen lapala. Pwohn tahro inenen laud oh ngilen dipwisoun doadoahk kan wie duduhr. Sang wasa me e mwomwohd ieo, Noha kak kilang nah pwutangko nannanti doadoahk laud nanpwungen uhr de tuhke kan en warihmwo. Nah pwutangko, arail pwoud ko oh pil eh pwoudo kin iang ih doadoahk erein sounpar tohto. Re kanekelahr ekei wasa kan nan warihmwo, ahpw pil mie soahng tohto me re anahne wia pwehn kanekehla.

Aramas ako wasao medewe me irail koaros pweipwei. Ni Noha oh nah pwutangko arail wiewia warihmwo, aramas ako kin kokouruhrkin irail pwehki madamadau me nohlik ehu pahn pwaindi sampah pwon. Apwal laud me Noha kin katakatamankin irail pahn wiawi mwomwen likamw pwoat oh pweipwei. Re sohte kak wehwehki dahme kahrehda ohl emen kak kauwehla mwahl eh mour oh pil mouren ah peneinei wiewia soahng pweipwei wet. Ahpw, Kohto me Noha kin kaudokiong, Siohwa, sohte ketin medewe me Noha pweipwei.

Mahsen en Koht mahsanih: “Eh [Noha] mour poadidiong Koht.” (Senesis 6:9) Ia wehwehn met? E wehwehki me Noha uhdahn peikiong Siohwa oh poakohng ih duwehte kompoakepah keren men. Sounpar kid kei mwuri, Paipel mahsanih me ahn Noha pwoson iei “me sampah pakadeingkihda.” (Ipru 11:7) Ia duwen? Dahme kitail rahnwet kak sukuhlki sang eh pwoson?

Noha tikida nan sampah ehu me mwadang susuwedla. E suwed sangete ni mwehin Enok, en Noha ah pahpa kahlapo eh pahpao. Enok pil wia ohl pwung men me kin poadidi ong Koht. E kohpada me rahnen kadeik ehu kohkohdo ong aramas suwed kan nan sampah. Met, ni mwehin Noha, wiewia suwed kan uhdahn suwedla. Ni mehlel, mwohn silangin Siohwa, sampah ohlahr pwehki eh direkihla tiahk lemei. (Senesis 5:22; 6:11; Sud 14, 15) Dahme wiawi me kahrehda soahng kan uhdahn suwedla?

Wiewia suwed ehu pwarada nanpwungen sapwellimen Koht tohnleng kan. Emen irail uhwongadahr Siohwa, wialahr Sehdan me Tepil sang ni eh karaunlikamwih Koht oh pitihedi Adam oh Ihp ira en wiahda dihp. Ni mwehin Nohao, tohnleng teikan iangala uhwong wet. Ni tohnleng ko arail kesehla arail pwukoa nanleng, re kohdihdo sampah, alehda paliwar uduk oh pwoudikihda lih kaselel kan. Irail tohnleng pwuko me pohnmwahso, roporop, oh uhwongadahr Koht uhdahn keper ong aramas akan duwehte pwoisin.​—Senesis 3:1-5; 6:1, 2; Sud 6, 7.

Tohnleng pwukat oh lih ako eri nainekihda pwutak kei me uhdahn lapala oh kehlail. Pwehki irail inenen lemei, kodon pwukat kahredahr suwed nin sampah en laudla. Pwehki kahrepe pwukat, Sounkapikadao mahsanihada “aramas akan ar suwedlahr nin sampah, oh ar lamalam akan eh kin suwed ahnsou koaros.” Siohwa ketin koasoanehdi me e pahn ketin kasohrehla sampah suwedo nan erein sounpar 120.​—Senesis 6:3-5.

 Medewehla uwen apwal en apwalih peneinei ehu nan soangen sampah duwehte met! Ahpw Noha kin wia met. E diarada eh pwoud lih mwahu men. Mwurin Noha eh sounpar 500, ira nainekihda pwutak silimen, Sehm, Ahm oh Saped. * Ira koaros anahne perehsang neira pwutangko soahng suwed kan me kapilirailpene. Kisin pwutak kan kin perenki “aramas kommwad” oh “ndand,” oh ih mwomwen kodon ko. Noha oh eh pwoudo sohte kak perehsang neira seri ko tiahk lemei koaros me re rong duwen kodon ko, ahpw ira kak padahkihong padahk mehlel kan duwen Siohwa Koht, me ketin kalahdeki soahng suwed koaros. Ira anahne sewese neira pwutangko ren kilang me Siohwa kin ketin kupwur toutoukihla tiahk lemei oh uhwong en sampah.—Senesis 6:6.

Pahpa nohno kan ele kak wehwehki Noha oh eh pwoudo. Sampah me kitail mi loale pil kin direkihla tiahk lemei oh madamadau en uhwong. Mehn kamweit kan ong seri kan ele pil kin audaudki soangen tiahk oh madamadau pwukat. Pahpa nohno me ahneki erpit kin wia uwen arail kak ren pelianda soahng pwukat sang ni arail padahkihong neirail seri kan duwen Koht en popohl, Siohwa, me ih me pahn ehu rahn ketin kauhdi tiahk lemei koaros. (Melkahka 11:5; 37:10, 11) Seri kan kak sukuhlki en wia dahme pwung, mehnda ma re mi nan sampah suwed ehu. Noha oh eh pwoudo pweida. Neira pwutangko keirda wiahla ohl mwahu kei oh pwoudikihda lih akan me pil kin men mwohneki Koht mehlelo, Siohwa, nan arail mour.

Ehu rahn, mouren Noha wekila. Siohwa ketin mahsaniong sapwellime laduwo oh ketin padahkihong me E ketin kupwurki kasohrehla sampah en ahnsowo. Koht ketin mahsanihong Noha: “Wiahda weromw warihmw ehu sang tuhke.”​—Senesis 6:14.

Warihmwo kaidehn sohp ehu, duwen ekei kin medewe. E sohte mwomwen sohp ehu me mie mwowe, mwuri, kihl de mehn illihl. Ahpw e duwehte lapalahn koakon ehu. Siohwa ketin padahkihong Noha ni oaritik ia uwen laud, ia mwomwen warihmwo oh pil kaweidki me en litopwiheki loale oh liki tahr. Ih eri ketin padahkihong Noha dahme kahrehda: “I pahn kadaridiong sampah nohlik ehu . . . Mehkoaros nin sampah pahn mehla.” Ahpw, Siohwa ketin kaweidki Noha: “Ke pahn pedolong nan warihmwo, iangahki omw pwoud, oh noumw pwutak kan oh ar pwoud kan.” Noha pil anahne kahrehlong mahn akan me wia wiliepen soangen mahn oh menpihr koaros. Ihte irail kan me mi nan warihmwo me kak pitsang Nohliko me pahn wiawi.​—Senesis 6:17-20.

Noha alehdi pwukoa inenen laud ehu. Warihmw wet anahne inenen laud—daulih piht 400 reirei, daulih piht 70 tehlap, oh daulih piht 40 ile. E laudsang sohp en nansed kan me wiawihsang tuhke, me wiawihda mahs oh nan atail ahnsou. Ia duwe, Noha soikala pwukoa wet me kohwong ih, kaulimki uwen apwal, de wekidala kaweid oaritik ko pwehn mengei ong ih? Paipel mahsanih: “Noha eri ahpw kapwaiada mehkoaros me Koht ketin mahsanih.”​—Senesis 6:22.

Doadoahko ele reireiki erein sounpar 40 de 50. Tuhke kan anahne paldi oh wisikla ni wasahn  doadoahko. Uhr kan anahne lopla oh kadokdokpene. Re anahne wiahda warihmwo en poasoake siluh, mie pere kan oh ehu wenihmw ni pengepenge. E sansal me mie wenihmwtok kan ni pengepenge powe oh kadoken warihmwo en ekiste ilehda pwe pihl en kak keredi oh kuhsla liki.​—Senesis 6:14-16.

Ni sounpar kan dower powe oh mwomwen warihmwo kereniong nek, Noha ele uhdahn kalahnganki utuht en ah peneineio. Mie pil ehu doadoahk me ele apwal sang doadoahk en kauwada warihmwo. Paipel mahsanih me Noha “iei ih me lohkiseli duwen mour pwung.” (2 Piter 2:5) Eri, Noha kin tiengla mwowe ni eimah oh song en padahkihong aramas akan en sampah suwedo duwen kasohrala me kohkohdo. Dahme aramas ako wia ni arail rong duwen met? Sises Krais ketin katamanda mwuhr duwen ahnsowo oh mahsanih me aramas ako ahpw “sasairki.” E mahsanih me re uhdahn kedirepwkihla mouren ehuehu rahn, mwengemwenge, niminim, wiewia pwopwoud oh sohte rong Noha. (Madiu 24:37-39) Me tohto kapailoke Noha oh eh peneinei; ele ekei kin kahrehiong eh mour nan keper oh uhwong ih ni lemei.

Ahpw, Noha oh eh peneinei sohte pweiek. Ih oh eh peneinei pousehlahte wiewia warihmwo mendahki aramas akan wasao medewe me met sohte kesempwal oh e sapwung de pweipwei. Peneinei Kristian kan kak sukuhlki laud sang pwoson en Noha oh eh peneinei. Met pwehki kitail mi ni ahnsou ehu me Paipel kin kahdaneki “imwin rahn akan” en koasoandi wet. (2 Timoty 3:1) Sises mahsanih me atail mwehi pahn duwehte ni mwehio me Noha kauwada warihmwo. Ma sampah wet sohte kin nsenohki, oh re kauwe de pil kaloke irail kan me kalohki Wehin Koht, Kristian kan anahne tamataman duwen Noha. Re anahne taman me kaidehn irail me tepin lelohng soangen apwal pwukat.

Sounpar tohto douwehr powe oh warihmwo nekier. Ni Noha eh kerenlahng sounpar 600, mie irail kan me e poakepoake me mehla. Emen iei eh pahpao, Lamek. * Sounpar limau mwuri, en eh pahpao eh pahpa Medusala pil mehla ni eh sounpar 969. Iei ih me mour keieu werei nan Paipel. (Senesis 5:27) Medusala oh Lamek mihmi ni ahnsou me tepin ohl, Adam, momourte.

Nan pahrohte, Noha alehdi ehu kaweid kapw sang rehn Siohwa Koht me mahsanih: “Pedolong nan warihmwen, iangahki omw peneinei koaros.” Ni ahnsowohte, Koht ketin padahkihong Noha en kahrehla soangen mahn koaros nan warihmwo—pwopwoud en mahn wad isuh sang soangen mahn mwakelekel koaros, me mwahu ong meirong, oh luhwe ko, soangen pwopwoud en mahn koaros.​—Senesis 7:1-3.

Mwein re sohte kak manokehla dahme re kilang. Sang wasa doh, mahn tohto pwukat alu, pihr, kerep, de eluwentek kohdo, laud oh tikitik, me lawalo oh mand. Kitail sohte anahne medewe me Noha songosong en poarokiraildi oh kihong nan kehl, wering de kadeke mahn lawalo ko pwe ren pedolong nan warihmw tikitik oh koaito. Paipel mahsanih me “re pil iang Noha pedolong nan warihmwo.”​—Senesis 7:9.

Ekei me sohte kamehlele ele kin idek: ‘Ia duwen met eh kak wiawi? Oh ia duwen mahn ako koaros kak mihpene nan wasa ehu me tikitik oh koait?’ Nna medewehla met: Ia duwe, Sounkapikpen lahng oh sampah sohte ketin sapwellimanki manaman en ketin kaunda mahn akan oh kahrehda ren mand oh peik ma anahnepe mie? Tamataman me Siohwa Koht iei Kohto me ketin pwalangpeseng Sehd Weitahtao oh ketin kahrehiong ketipin  en sohla mwekid. E uhdahn kak ketin kapwaiada mehkan koaros me wiawi ni mwehin Noha. Ei, e kak ketin wia mepwukat koaros.

Mehlel, Koht kak ketin pilada en doarehla mahn akan koaros me e ketin kapikada ni ahl tohrohr ehu. Ahpw, ni erpit e ketin pilada en katamankihong kitail likilikohte me e ketikihong aramas nin tapio me ren apwalih soangen mahn koaros nin sampah. (Senesis 1:28) Pahpa nohno tohto rahnwet kin doadoahngki koasoipen Noha pwehn padahkihong neirail seri kan me Siohwa kin ketin kesempwalki aramas oh mahn akan me e ketin kapikada.

Siohwa ketin mahsanihong Noha me mwurin wihk ehu Nohliko pahn wiawi. Ele ahnsowo wia ahnsou kedirepw ehu ong peneineio. Medewehla arail en kahrehlong mahn ako koaros, kihpene kanarail mwenge oh koasoanehdi pwehn soandi mwahu, oh wahlong arail kepwe oh dipwisou kan nan warihmwo. En Noha eh pwoudo oh pil en Sehm, Ahm, Saped arail pwoud ko ele kin nsenohki me warihmwo en wia wasahn kousoan mwahu ehu.

Ahpw dahme aramas teikan wia? Mendahki mehn kadehde koaros kin kasalehda me Siohwa kin ketin kapaiada Noha oh eh nannanti, aramas ako kin sasairkihte Nohliko. Irail kak kilang mahn akan ar pedolong nan warihmwo. Ahpw kitail en dehr pwuriamweikihla arail sohte nsenohki. Rahnwet, aramas akan kin sasairki duwen mehn kadehde tohto me kitail miehier ni kaimwiseklahn rahn akan en koasoandi en sampah wet. Oh nin duwen wahnpoaron Piter kohpada, mie me pahn kepitkin irail kan me kin rong dahme Koht mahsanih. (2 Piter 3:3-6) Pil duwehte, uhdahn mie irail kan me kepitki de kauwe Noha oh eh peneinei.

Iahd me lokaiahn kauwe pwukat uhdi? Paipel mahsanihong kitail me ni ahnsou me Noha oh eh peneinei oh mahn akan pedolong nan warihmwo, “KAUN-O eri ketin ritingedi wenihmwen warihmwo sang liki.” Ma mie soun kepit kan mi limwahn warihmwo ahnsowo, mwekid wet kahrehiong irail ren nennenla. A ma soh, ele re sohla kepit ni ar kilang keteu tepida mwer. Keteuo eri wie mwerimwer lao e pwaindi sampah pwon, nin duwen me Siohwa ketin mahsanih me pahn wiawi.​—Senesis 7:16-21.

Ia duwe, Siohwa ketin kupwurki mehlahn aramas suwed ko? Soh! (Esekiel 33:11) Weksang met, e ketikihong irail ahnsou mwahu ren wekidala arail mour oh wia dahme pwung. Irail kak wia met? Mouren Noha kak sapengala peidek wet. Sang ni eh kin idawehn Siohwa, peikiong Koht ni mehkoaros, Noha kasalehda me aramas ako pil kak pitila. Ni ahl wet, eh pwoson iei me sampah pakadeingkihda. Eh pwoson kasalehda ni sansal duwen suwed en eh mwehio. Pwehki eh pwoson, ih oh eh peneinei mourla. Ma ke alasang pwoson me Noha ahneki, ele ke kak kapitala pein kowe oh irail kan me ke poakepoake. Duwehte Noha, ke kak poadidi ong Siohwa Koht oh wiahkin ih kompoakepahmw men. Oh nanpwungmwahu wet kak mihmi kohkohlahte!