Paipel iei mahsen en Koht. E duwehte kisinlikou ehu sang rehn pahpa limpoak men. (2 Timoty 3:16) Nan Paipel, Koht ketin kawehwehda ia duwen atail kak kaperenda ih, dahme kahrehda e ketin mweidohng me suwed en mie, oh dahme e pahn ketin wia ong tohnsampah ahnsou kohkohdo. Ahpw sounpadahk en pelien lamalam kan kin wekidala padahk en Paipel oh met kahrehda aramas tohto en leme me re sohte pahn kak wehwehkihla Paipel.​—Wiewia 20:29, 30.

Siohwa Koht kupwurki kitail en esehla dahme mehlel duwen ih. Ih kahrepe wet me e ketikihongki kitail pwuhk ehu me kitail kak wehwehki.​—Wadek 1 Timoty 2:3, 4.

Patehng eh ketikihong kitail Paipel, Siohwa ketikihda sawas pwe kitail en wehwehki. E ketin poaronehdo Sises pwehn padahki kitail. (Luk 4:16-21) Sises ketin sewese me kin rong ih ren wehwehkihla Paipel, ni eh ketin doadoahngki ehuehu iretikitik kan.​—Wadek Luk 24:27, 32, 45.

Sises ketin wiahda mwomwohdisohn Kristian pwe doadoahk me e ketin tapiada pahn pousehlahte wiawi. (Madiu 28:19, 20) Rahnwet, sapwellimen Sises tohnpadahk mehlel kan kin sewese aramas akan ren wehwehki dahme Paipel padahngki duwen Koht. Ma ke men wehwehkihla Paipel, Sounkadehdehn Siohwa kan pahn perenki seweseiuk.​—Wadek Wiewia 8:30, 31.