PWEHN sapengala peidek wet, kitail kilang karasaras riau nan Paipel duwen kalokolok kan sang rehn Koht. Met akan iei Nohliko ni mwehin Noha oh pil kamwomwomwlahn mehn Kenan kan.

DAHME EKEI ARAMAS KIN NDA: “Koht ketin lemei ni eh ketin kahrehda nohlik ehu en kasohrehla tohnsampah koaros, ahpw ihte Noha oh eh peneinei me e ketin komourla.”

DAHME PAIPEL MAHSANIH: Koht mahsanih: “I sohte kin kupwurperenki mehlahn aramas dipan. Ahpw en wiliakapwasang eh suwed pwe en mour.” (Esekiel 33:11) Eri Koht sohte kupwurperenki kasohrlahn aramas  suwed ko ni mwehin Nohao. Ahpw dahme kahrehda e ketin wia met?

Paipel sapengki me ni Koht eh ketin kadeikada aramas suwed ko mahs, e ketin wia met pwehn wia “kadehdepen dahme pahn wiawihong me suwed kan.” (2 Piter 2:5, 6) Kitail kak sukuhlki kupwuren Koht oh sapwellime wiewia kan sang ni eh ketin kaloke aramas suwed ako mahs. Koht sohte ketin wekila.

Keieu, Koht ketin koasoanehdi me mendahki kasohrlahn aramas ako kamedekihala, e ketin mwahngih duwen aramas lemei kan me kin kahrehda lokolok oh e ketin kapwukoahki irail arail wiewia kan. Ehu rahn, e pahn ketikihsang wiewia sapahrek oh soangen lokolok koaros.

Keriau, mwomwen sapwellimen Koht wiewia kan mahs kin kasalehda me e kin ni limpoak ketin katamankin aramas suwed ko dahme e pahn ketin wia mwohn eh pahn ketin kadeikada irail. Noha kin lohkiseli dahme pwung, ahpw pali laud en aramas ako pohnsehsehla. Paipel mahsanih: “Re ahpw sasairki nohliko, e lao komwopwirailla koaruhsie.”​—Madiu 24:39.

Ia duwe, Koht ketin wekila? Soh. Karasepe, e ketin katamankihong mehn Israel ko me ma irail wiewiahte me suwed duwehte wehi kan limwahrail, e pahn ketin mweidohng arail imwintihti kan en pedolong nan sapwarail; kauwehla Serusalem oh re pahn kalipilipala ehu wasa tohrohr. Mendahki met, mehn Israel ko wiewiahte me suwed. Re pil kin meirongkihla neirail seri kan nan kisiniei. Ia duwe, mie mehkot me Siohwa ketin wia? Ei, ahpw ihte mwurin eh ketin kadarala soukohp kan ren pwurepwurehng katamanki sapwellime aramas ako ren wekidala arail wiewia kan mwohn eh pahn pwandala. E pil ketin mahsanih: “KAUN-O, Wasa Lapalahpie, sohte kin ketin wia mehkot, ma e sohte kin ketin kasalehiong sapwellime ladu soukohp kan kupwure.”​—Eimwos 3:7.

IA DUWEN OMW PIDADA MET? Atail kilang mwomwen sapwellimen Siohwa koasoandi en kadeik mahs kin kihong kitail koapworopwor. Kitail kak uhdahn kasik sapwellimen Siohwa kadeik ong irail me kin ni elen lemei kahrehda lokolok. Paipel mahsanih: “Aramas suwed kan pahn koakoahksang . . . a me aktikitik kan pahn sapwenikihla sahpwo oh re pahn paiamwahu oh popohl.” (Melkahka 37:9-11) Ia omw madamadau ong kadeik ehu me pahn kamaiauda aramas sang lokolok? Ke leme e lemei de e kadek?

DAHME EKEI ARAMAS KIN NDA: “Kamwomwalahn mehn Kenan kan wia mahwen lemei ehu me duwehte kamakamalahn keinek kan rahnpwukat.”

DAHME PAIPEL MAHSANIH: “Sapwellime [Koht] wiewia kan me unsek oh pwung. [Ih iei] amwail Koht me loalopwoat oh mehlel.” (Deuderonomi 32:4) Wiewiahn kadeik sang Koht sohte duwehte mahwen en aramas akan. Dahme kahrehda? Pwehki Koht sohte ketin duwehte aramas. E kak ketin mwahngih dahme mi nan mohngiong en aramas, de loalen aramas akan.

Karasepe, ahnsou me Koht ketin kadeikada kahnimw en Sodom oh Komora oh ketin koasoanehdi en kasohrehla, ohl lelepek Eipraam men kamehlelehla me sapwellimen Koht pilipil kin pahrek. E sohte leme me eh Koht me kin ketin pahrek pahn “ketin kamwomwala me dipan akan, iangahki me sohte dipe kan.” Ni kanengamah, Koht ketin kamehlelehiong me ma mie aramas pwung meh ehk nan Sodom, E sohte pahn ketin kamwomwala kahnimwo. (Senesis 18:20-33) E sansal me Koht kin ketin rapahki audepen mohngiong en aramas ako oh mahsanih duwen arail suwed.​—1 Kronikel 28:9.

Pil duwehte, Koht ketin kadeikada mehn Kenan ako oh ketin koasoanehdi ni pwung en kasohrehla irail. Mehn Kenan kan kin ndandki arail tiahk lemei, me iangahki meirongkihla seri kan nan kisiniei ni seri ko wie momourte. * (2 Nanmwarki 16:3) Mehn Kenan kan ese me Siohwa ketin kehkehlingkihong mehn Israel ren sapwenikihla sahpw ko koaros. Irail me pilada en mihmihte oh mahwen, kin pelipelian kaidehn mehn Israel kohte ahpw pil Siohwa, me ketikihda mehn kadehde laud me e kin ketin ieiang sapwellime aramas akan.

Patehng met, Koht ketin kasalehda mahk ong mehn Kenan ko me kesehla arail wiewia suwed kan oh alehda sapwellimen Siohwa koasoandi ileile kan me pid tiahk. Karasepe, lihen Kenan, Reap, me kin netiki paliwere, iang komourla pil iangahki eh peneinei. Oh pil ni ahnsou me tohn kahnimw en Kipeon nan Kenan kolahng peki mahk, irail oh pil neirail seri kan koaros pil mourla.​—Sosua 6:25; 9:3, 24-26.

IA DUWEN OMW PIDADA MET? Kitail kak sukuhlki soahng kesempwal ehu sang kadeik me kowohng  mehn Kenan kan. Kitail kerenlahngehr “rahnen kamwomwmwomwlahn me suwed kan” nin duwen me kokohpdahr. (2 Piter 3:7) Ma kitail poakohng Siohwa, kitail pahn paiekihda ni eh pahn ketikihsang douluhl lokolok en aramas ni eh pahn ketin kasohrala sang sampah irail kan me kin soikala sapwellime kaunda pahrek.

Siohwa ni limpoak ketin katamankin kitail me pilipil kan me pahpa nohno kan wiahda kin kamwakid neirail seri kan. Mahsen en Koht mahsanih: “Pilada mour. Poakohng KAUN-O, amwail Koht, kapwaiada sapwellime mahsen oh loalopwoatohng, pwe ih me pahn kahrehiong kumwail oh kadaudokamwail kan mour werei.” (Deuderonomi 30:19, 20) Ia duwe, mahsen pwukat mahsen en Koht lemei men de mahsen en Koht men me kin ketin poakohng aramas akan oh kupwurki ren wiahda pilipil pwung kan?