1, 2. Ia pepehm me pali laud en pahpa nohno kan oh seri kan kin ahnekipene? Ahpw dahme kakete apwal ong irail en wia ekei pak?

 PEIDEK ehu kowohng seri tohto nan Amerika me nda: “Ma ke diarada me omw pahpa nohno pahn mehla lakapw, dahme ke pahn keieu ndahng ira rahnwet?” Kereniong seri ko koaros nda me re sohte pahn men koasoiahda duwen kahpwal kan de duwen arail sohte kin pwungkipene soahng kan. Ahpw re nda me re pahn men ndaiong ira: “Mahkohng ie” oh “I uhdahn poakepoake iuk.”—For Parents Only, sang Shaunti Feldhahn oh Lisa Rice.

² Pali laud en seri kan kin poakohng ar pahpa nohno, oh pali laud en pahpa nohno kan kin poakohng neirail seri kan. Met kin uhdahn mehlel nanpwungen sapwellimen Koht aramas akan. Ahpw mendahki met, koasoakoasoipene nanpwungen pahpa nohno oh seri kan kin ekei pak apwal. Dahme kahrehda met kin wiawi? Dahme kahrehda e kin apwal ong pahpa nohno oh seri kan ren koasoiapene duwen ekei ire? Dahme pahpa nohno oh seri kan kak wia pwehn kamwahwihala arail kin koasoakoasoipene?

3. (a) Dahme kahrehda e kin apwal ong peneinei tohto ren koasoakoasoipene? (b) Dahme kahrehda e mengei ong peneinei kan en Israel ren kin koasoakoasoipene?

³ E kin apwal ong peneinei tohto ren ahneki ahnsou me itar ren kin koasoakoasoipene. Ahpw ni mwehin mehn Israel kan, e weksang met. Ni ahnsou me Moses padahkihong pahpa kan nan Israel me ren padahkihong neirail seri kan sapwellimen Koht kosonned kan, e koasoia: “Padahkihong noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” (Deud. 6:6, 7) Seri kan kin mi ni imwarail rehn nohno kan de re kin iang arail pahpa ko doadoahk. E kin  mie ahnsou laud ong seri kan oh pahpa nohno kan ren mihpene oh koasoakoasoi. Pwehki met, e kin mengei ong pahpa nohno kan ren esehla anahn akan, ineng kan oh pil soangen irair me neirail seri ko ahneki. Seri ko pil kak esehla mwahu arail pahpa nohno kan.

4. Dahme kahrehda e apwal ong peneinei kan rahnpwukat ren koasoakoasoipene?

⁴ Mour ahnsouwet uhdahn weksang. Nan ekei sahpw, seri kan kin tepida sukuhl ahnsou me re inenen tikitik, ekei pak ni ahnsou me re sounparte riau. Pahpa oh nohno tohto kin kohsang imwarail kan oh kohla doadoahk. Oh ni ahnsou me pahpa nohno oh seri kan kin mihpene, re kin doadoahngki arail ahnsou pwehn kilikilang kasdo, doadoahngki computer de delepwohn. Nan peneinei tohto, pahpa nohno kan oh seri kan sohte kin uhdahn ese duwen emenemen. Re mwomwen solahr kin koasoakoasoipene.

5, 6. Soangen wekidekla dah kan me ekei pahpa nohno kan wiahda pwe ren kak kihong ahnsou laud rehn neirail seri ko?

⁵ Ke kak medewehda ahl akan me ke kak kihong ahnsou laud ong omw peneinei? (Wadek Episos 5:15, 16.) Ekei peneinei kan kin pwungkipene me ren katikala arail ahnsou en kilang kasdo de doadoahngki computer. Ekei kin pilada ren mwengepene pak ehu de tohto sang nan rahn ehu. Kaudok en peneinei wia ahnsou mwahu ehu ong pahpa nohno kan oh seri kan ren esehla mwahu emenemen ni arail patpene oh onop Paipel. Ahpw met kaidehn ihte ahnsou me peneinei kan en ehupene. Re anahne rapahkihda ahnsou ren koasoakoasoipene rahn koaros. Mwohn noumw seri kan kohla sukuhl, nda mehkot pwehn kangoange irail, koasoiapene ire ehu sang Paipel, de iang irail kapakap. Met kak sewese irail laud erein rahno pwon.

⁶ Ekei pahpa nohno kan wiahdahr wekidekla kan nan arail mour pwe ren kak kihong ahnsou laud rehn neirail seri ko. Karasepe, Laura, nohno men me naineki seri riemen, pwilikihdi eh doadoahk en awa 40 nan wihk ehu pwehki kahrepe wet. * E koasoia: “Ni menseng kan, kiht koaros kin karuwaru en kohla doadoahk  de sukuhl. Ni ahnsou me I pwurodo nin soutik, nei seri ko meirlahr, soun epwel serio me kameirirailla.” Sang ahnsou me Laura sohla doadoahk, neirail mwohni tikitikla, ahpw e pehm me met e uhdahn esehla madamadau oh kahpwal kan me nah seri ko ahneki. E pil nda: “I kin rong dahme re nda nan arail kapakap kan oh kak kaweid irail, kangoange irail oh padahki irail.”

7. Dahme pahpa nohno kan oh seri kan kin kalapw kaulimki?

⁷ Mwurin arail koasoiong me pwulopwul tohto, sounnting kan en pwuhk ehu koasoia: “Dahme seri kan kin keieu kaulimki duwen arail pahpa nohno kan iei ‘Re sohte kin rong ie.’” (For Parents Only) Pahpa nohno kan pil kin kalapw nda soahngohte duwen neirail seri kan. Eri, ma tohnpeneinei kan men kapehse mwahu, re anahne uhdahn rong kanahieng emenemen.​—Wadek Seims 1:19.

8. Ia duwen pahpa nohno kan ar kak uhdahn rong neirail seri kan?

⁸ Pahpa nohno kan, kumwail kin uhdahn rong noumwail seri kan? Ele met kin apwal ni amwail kin pwang de ni ahnsou me re men koasoia mehkot me sohte mwomwen kesempwal ong kumwail. Ahpw tamataman, dahme sohte mwomwen kesempwal ong uhk ele kin uhdahn kesempwal ong noumw serio. “Mwadang ong rong” kin wehwehki me ken rong kanahieng kaidehn ihte dahme noumw serio nda ahpw pil ia mwomwen eh kin nda. Ngihleo, eh mwekid de mwomwen pohn meseo kak padahkihong uhk soahng tohto duwen eh pepehm. E pil kesempwal ken idek peidek kan. Paipel mahsanih: “Madamadau en aramas kin rasehng pihl me mi nan pwarer loal, ahpw mehmen me ahneki erpit kak idipasang.” (Lep. Pad. 20:5) Ke anahne kasalehda loalokong ni omw kin koasoiong noumw seri kan, de ke anahne esehda ia uhdahn arail pepehm. Met kin kesempwal ahpw mehlel ni amwa pahn koasoiapene mehkot me e suwedki koasoia.

9. Dahme kahrehda seri kan anahne peikiong arail pahpa nohno?

⁹ Seri kan, kumwail kin peikiong amwail pahpa nohno? Mahsen en Koht mahsanih: “Samwa, rong mahsen en omw pahpa, oh rong kanahieng padahk en omw nohno.” (Lep. Pad. 1:8) Tamataman me omw pahpa nohno kin poakohng uhk oh mwahuki dahme keieu mwahu ong uhk. Eri e wia elen loalokong ken rong oh peikiong ira. (Ep. 6:1) Ma koasoakoasoipene nanpwungamwail kin mwahu oh ma ke tamataman me re poakohng uhk, e pahn mengei ong uhk en peikiong ira. Eri padahkihong omw pahpa nohno ia omw madamadau ong soahng kan. Met pahn sewese ira en wehwehkin uhk. Ke pil anahne song en wehwehkihla ira.

10. Dahme kitail sukuhlki sang mehn kahlemeng en Reopoham?

¹⁰ Mie pak me ke idawehn kaweid en me pwulopwul kan me amwail sounpar duwepenehte? Kanahieng. Ele ke mwahuki arail kaweid, ahpw mwein kaweido sohte kin uhdahn sewese iuk. Ni mehlel, e kakete kamedekeiukala. Me pwulopwul kan sohte ahneki erpit de koahiek me me mah kan ahneki. Pali laud en me pwulopwul kan sohte kin medewe ia duwen pilipil kan me re wiahda met kak kamedekeirailla ahnsou kohkohdo. Tamataman mehn kahlemeng en Reopoham, nein Nanmwarki Solomon pwutako. Ni ahnsou me e wiahla nanmwarki en Israel, e anahne rong kaweid kan en ohl mah ko. Ahpw e rong kaweid soaloalokong en ienge me pwulopwul ko. Imwilahn met, pali laud en tohn eh wehio uhwongada. (1 Nan. 12:1-17) Dehr duwehte Reopoham. Koasoiaiong omw pahpa nohno duwen omw madamadau oh pepehm kan. Idawehn ara kaweid oh sukuhl sang ara erpit.—Lep. Pad. 13:20.

11. Dahme kak wiawi ma e apwal ong seri men en koasoiong eh pahpa nohno?

¹¹ Pahpa nohno kan, kumwail men noumwail  seri kan en ale kaweid sang rehmwail sang arail en ale rehn me pwulopwul kan me arail sounpar ko duwepenehte? Ma ei, eri kamengeiong irail pwe ren koasoiong kumwail. Emen sister pwulopwul ntingihedi me eh pahpa nohno kin salohda ahnsou koaros me e kin koasoia duwen pwutak. Met kahrehiong en soansuwedda oh uhdi koasoi. Pil emen sister pwulopwul ntingihedi: “Me pwulopwul tohto men ale kaweid sang arail pahpa nohno kan, ahpw ma arail pahpa nohno sohte kamehlele me e kesempwal, re pahn kohla rehn emen tohrohr me pahn nsenohki, mehnda ma irail pwukat sohte nohn koahiek.” Nsenohki rong noumw seri kan oh wehwehki ia arail pepehm, sohte lipilipil dahme re men ndaiong uhk. Ma ke wia met, re pahn saledek en koasoi ong uhk oh pahn men idawehn omw kaweid.

12. Ia duwen mwekid en pahpa nohno kan eh kak kahrehda e apwal ong seri kan en koasoiong irail?

¹² Mwomwen en pahpa nohno kan ar mwekid ele kin kahrehda e apwal ong neirail seri kan en koasoiong irail. Pahpa nohno kan mwein kin mwadang kasalehda me re nsensuwedkihla dahme neirail seri kan nda. E mehlel me mie soangen keper tohto ni imwin rahn pwukat oh pahpa nohno Kristian kan men pere neirail seri kan. (2 Tim. 3:1-5) Ahpw seri kan ele sohte kin ahneki soangen madamadau wet ahnsou koaros oh mwein re pehm me arail pahpa nohno sohte kin kihong irail saledek.

13. Dahme kahrehda pahpa nohno kan anahne kanahieng duwen arail kin mwadang en nda dahme re medewe?

¹³ Pahpa nohno kan anahne kanahieng ren dehr nohn mwadang en nda dahme re medewe. E mehlel me ni seri kan ar kin nsensuwedla oh nda mehkan me kapwunode iuk, e apwal ken nennenla. Ahpw e kesempwal en rong kanahieng mwohn omw pahn nda mehkot. Nanmwarki Solomon me loalokong ntingihedi: “Rong mwohn omw pahn sapeng. Pwe ma soh, kowe aramas pweipwei oh kanamenek.” (Lep. Pad. 18:13) Ma ke kin meleilei oh rong kanahieng, ele ke kak wehwehki kahrepen “pato mwahl akan” en noumw serio. (Sohp 6:1-3) Ke kak sewese noumw serio ihte ma ke wehwehkihla ireo pwon. Nin duwen pahpa nohno limpoak kan, rong noumwail seri kan oh song wehwehkin irail pwe ken kak nda mehkot me pahn uhdahn sewese irail.

14. Dahme kahrehda seri kan anahne dehr karuwaru en lokaia?

¹⁴ Seri kan, kumwail pil anahne “dehr nan kapehd karuwaru en lokaia.” Tamataman me Koht ketikihong omw pahpa nohno pwukoa en kaiahne iuk, eri dehr mwadang sapwungki dahme ira nda. (Lep. Pad. 22:6) Mwein ira lelohng soangen kahpwalohte me ke ahneki met. Pil ehu, ira sohte men ken wiahda soangen sapwung ko me ira wiahda ahnsou me ira pwulopwul. Omw pahpa nohno iei kompoakepahmw, kaidehn omw imwintihti. Ira men sewese iuk a kaidehn kamedekeiukala. (Wadek Lepin Padahk 15:31.) “Kahkahki semomw oh inomw” oh kasalehiong me ke poakohng ira duwehte ara kin poakohng uhk. Met pahn kahrehda en mengei ong ira en kaiahne iuk ni ahl me Siohwa ketin kupwurki ira en wia.​—Ep. 6:2, 4.

15. Dahme pahn sewese kitail en kasalehda meleilei oh kanengamah ong irail kan me kitail poakohng?

¹⁵ Kitail sohte kin ahnsou koaros kanengamahiong irail kan me kitail poakohng. Wahnpoaron Pohl ntinglahng Kristian kan nan Kolose: “Kumwail ohl akan, kumwail en poakohng amwail pwoud kan, oh dehr lemeiong irail. Kumwail pahpa oh nohno kan, kumwail dehr kamwakara mwahl noumwail seri kan, pwe re dehr mworusala.” (Kol. 1:1, 2; 3:19, 21) Pohl padahkihong mehn Episos kan: “Kumwail kadohwanewei sang kumwail soangen mwakar koaros, soangen ineng suwed koaros, soangen lingeringer koaros, soangen men pei koaros,  soangen lahlahwe koaros.” (Ep. 4:31) Ma kitail song en kasalehda laud wahn sapwellimen Koht manaman duwehte kanengamah, opampap, kaunda pein kitail, e pahn mengei en kasalehda meleilei nan irair apwal akan.​—Kal. 5:22, 23.

16. Ia duwen Sises eh ketin kapwungala sapwellime tohnpadahk ko? Dahme kahrehda met wia mehkot kapwuriamwei?

¹⁶ Kumwail pahpa nohno kan, medewehla sapwellimen Sises mehn kahlemeng. Medewehla pwunod me e sapwellimanki ni kaimwiseklahn sak en soutik rehn sapwellime tohnpadahk ko. Sises mwahngih me kereniong e pahn ketin kamakamla ni ahl ehu me kamedek oh wawai. E mwahngih me e anahne ketin lelepek pwe mwaren Semeo kak sarawihla oh aramas koaros kak komourla. Ahpw ni sak en soutiko, sapwellime tohnpadahk ko tepida akamaiki ihs me keieu lapalap nanpwungarail. Sises sohte ketin wer de mahsen lemei ong irail. Ahpw e ketin kapwungirailla ni meleilei. Sises ketin katamankihong irail duwen arail kin utung ih ni ahnsou apwal akan. E pil ketin kasalehda me e ketin likih me re pahn kolokolte arail lelepek mendahki Sehdan pahn kasonge irail. E pil ketin inoukihda me re pahn iang ih ket nanleng nin duwen nanmwarki kan.​—Luk 22:24-32.

17. Dahme pahn sewese seri kan ren meleilei?

¹⁷ Seri kan pil anahne meleilei. Ma kowe emen me pwulopwul, ele ke sohte mwahuki ni omw pahpa nohno ara kin kihong uhk kaweid. Mwein ke medewe me met wehwehki ira sohte likih iuk. Ahpw tamataman me omw pahpa nohno kin nsenohkin uhk pwehki re poakohng uhk. Ma ke rong ira ni meleilei oh ale ara kaweid, ira pahn wauneki oh likih iuk. Eri, omw pahpa oh nohno ele pahn kalaudehla omw saledek en wia soahng kei. Paipel mahsanih me emen me kasalehda meleilei kin loalokong. E mahsanih: “Aramas pweipwei kin kasalehda ar lingeringer, ahpw me mie eh lamalam kin kanengamah oh kolokol eh lingeringer.”​—Lep. Pad. 29:11.

18. Ia duwen limpoak eh sewese peneinei kan ren kapehse mwahu nanpwungarail?

¹⁸ Eri pahpa nohno kan oh seri kan, dehr mworusala ma koasoakoasoipene nan amwail peneinei sohte mwahu duwehte me kumwail kasik. Nannanti kamwahwihala oh pousehlahte idawehn kaweid nan Mahsen en Koht. (3 Sohn 4) Nan sampah kapw, kitail pahn unsekla oh sohte pahn mie kahpwal en koasoakoasoipene. Ahpw mwohn ahnsowo, kitail pahn kin wiahda sapwung kan. Eri, mwadang en nda “Mahkohng ie.” Mahkpene nanpwungamwail. Kumwail “patpene ni limpoak.” (Kol. 2:2) Limpoak kin manaman. E kin sewese kitail en kanengamah oh kadek. Limpoak kin sewese kitail en meleilei oh kasalehda mahk. E kin “loalenohng apwal akan koaros, e kin sewese atail pwoson ahnsou koaros, e kin sewesei kitail en liki Koht, oh en pil kanengamah ni mehkoaros.” (1 Kor. 13:4-7) Ma ke kin pousehlahte kasalehda limpoak, koasoakoasoipene nan peneinei pahn mwamwahula ahnsou koaros. Met pahn kahrehiong uhk ken peren oh pil pahn kawauwih Siohwa.