1, 2. (a) Dahme kahrehda kitail kin kesempwalki kompoakepah kan me loalopwoat oh mahk? (b) Peidek dahkei kitail pahn sapengala nan iren onop wet?

 IA WEHWEHN kompoakepah mehlel men? Sister men me ede Ashley nda me kompoakepah mehlel men kin ahnsou koaros mwadang sawas oh mahkohng omw sapwung kan. Kitail koaros kin kesempwalki soangen kompoakepah kan me duwehte met. Re kin sewese kitail en dehr per oh pehm me mie me poakohng kitail.​—Lep. Pad. 17:17.

² Siohwa ketin wia Kompoakepah me keieu loalopwoat oh mahk me kitail kak ahneki. Sounmelkahkao kawehwehda ih nin duwen met: “Komwi me kupwur mwahu oh diren mahk ong kiht, diren limpoak poatopoat ong koaros me kin patohwan kapakapohng komwi.” (Mel. 86:5) Ia duwen emen eh kin loalopwoat oh mahk? Ia duwen Siohwa eh kin ketin kasalehda soangen irair kaselel pwukat? Ia duwen atail kak alasang sapwellime mehn kahlemeng? Ni atail sukuhlki pasapeng en peidek pwukat, atail limpoak ong Kompoakepatailo me keieu mwahu Siohwa, pahn kehlailla. Kitail pil pahn kak kalaudehla atail karanihala riatail Kristian kan.​—1 Sohn 4:7, 8.

3. Ia wehwehn en kin loalopwoat?

³ Aramas loalopwoat men kin lelepek ong emen me e poakohng. E kin kasalehda eh limpoak sang ni eh kin pousehlahte sewese oh utung meteio. E sohte kin wiahte met ahnsou me mengei ahpw pil ni irair apwal kan. Paipel mahsanihki Siohwa nin duwen “Koht me loalopwoat.” Sohte emen me loalopwoat duwehte Ih.​—Deud. 32:4.

4, 5. (a) Ia duwen Siohwa eh ketin kasalehda me e ketin loalopwoat? (b) Dahme kahrehda e wia mehn kangoang atail medewe ia uwen Siohwa eh ketin loalopwoat?

⁴ Ia duwen Siohwa eh ketin kasalehda me e ketin loalopwoat?  E kin ketin apwalih sapwellime ladu lelepek kan ahnsou koaros. Emen ladu pwukat, Nanmwarki Depit, kin kapingahki Siohwa eh ketin loalopwoatohng ih. (Wadek 2 Samuel 22:26.) Erein Depit eh mi nan apwal, Siohwa kin ketin ni loalopwoat kaweid, pere oh doarehla ih. (2 Sam. 22:1) Depit kin kilang nan eh mour me Siohwa ketin kasalehda loalopwoat kaidehn ni lokaiahte ahpw pil sang ni eh ketin sewese sapwellime ladu kan. Dahme kahrehda Siohwa ketin loalopwoatohng Depit? Pwehki Depit kin loalopwoatohng ih. Siohwa kin ketin poakohng sapwellime ladu kan me kin loalopwoat oh e kin ketin loalopwoatohng irail me kin loalopwoatohng ih.​—Lep. Pad. 2:6-8.

⁵ E wia mehn kangoang atail kin medemedewe ia uwen Siohwa eh ketin loalopwoatohng sapwellime ladu kan. Emen brother lelepek me ede Reed koasoia me e kin perenki wadek duwen Siohwa eh kin ketin sewese Depit nan ahnsou apwal kan. E kawehwehda: “Pil ni ahnsou me Depit kin ruk sang Sohl oh mihmihseli nan pwoahr kan, Siohwa ketin apwahpwalih ih. Met uhdahn kin kangoange ie! E kin katamankin ie me sohte lipilipil irair dah me I mi loale, mehnda ia uwen suwed, Siohwa pahn ketin ieiang ie erein ei pahn loalopwoatohng.” Mwein ke pil ahneki soangen pepehmohte.​—Rom 8:38, 39.

6. Pil ni ahl dahkei me Siohwa ketin kasalehda me e ketin loalopwoat? Ia duwen met eh wia kamwahu ong sapwellime ladu kan?

⁶ Pil ni ahl dahkei me Siohwa ketin kasalehda me e ketin loalopwoat? Ehu ahl iei me Siohwa ketin idawehn sapwellime koasoandi kan ahnsou koaros. (Ais. 46:4) Pilipil kan koaros me e ketin wiahda kin poahsoankihda sapwellime koasoandi kan, oh sapwellime koasoandi kan sohte kin wekila. (Mal. 3:6) Pil ehu ahl me Siohwa ketin kasalehda me e ketin loalopwoat iei me ahnsou koaros e kin ketin wia dahme e ketin inoukihda. (Ais. 55:11) Pwehki Siohwa ketin loalopwoat, met kin wia kamwahu ong sapwellime ladu lelepek kan koaros. Ia duwen? Ni atail kin wia uwen atail kak koaros en peikiong sapwellime kosonned kan, kitail kak kamehlele me e pahn ketin kapwaiada sapwellime inou en kapaiahda kitail.​—Ais. 48:17, 18.

7. Ia ehu ahl me kitail kin loalopwoat duwehte Siohwa?

 ⁷ Ia duwen atail kak loalopwoat duwehte Siohwa? Ehu ahl iei atail kin wia mehkot mwahu ong irail me mi nan irair apwal ehu. (Lep. Pad. 3:27) Karasepe, ke ese emen riatail Kristian me mworusala mwein pwehki eh soumwahu, eh peneinei uhwong, de pwehki pein eh luwet kan? Ke kak kangoangehki ih “mahsen en kaloalamwahu” kan. (Sek. 1:13) * Ni omw kin wia met, ke kin kasalehda me ke wia aramas loalopwoat oh kompoakepah mehlel men, emen me kin ‘loalopwoat laudsang pirien kan.’​—Lep. Pad. 18:24.

8. Ia duwen atail kak loalopwoat, karasepe, ma nan mouren pwopwoud?

⁸ Pil mie ahl teikan kitail kak loalopwoatohng irail me kitail kin poakohng. Karasepe, ma kitail pwopwoud, kitail ese me kitail anahne loalopwoatohng atail pwoud. (Lep. Pad. 5:15-18) Eri kitail anahne dehr wia mehkot me kakete kahrehiong kitail en kamwahl. (Mad. 5:28) Kitail pil kin kasalehda loalopwoat ong riatail Kristian kan sang atail sohte kin koasoia soahng suwed kan duwen irail, oh likamwkihda mehkot duwen irail. Oh kitail pil sohte men rong soangen koasoi pwukat.​—Lep. Pad. 12:18.

9, 10. (a) Ihs me kitail keieu men loalopwoatohng? (b) E pahn kin mengei en peikiong Siohwa ahnsou koaros? Menlau kihda ehu karasaras.

⁹ Keieu, kitail kin men kolokol atail loalopwoatohng Siohwa. Ia duwen atail pahn wia met? Iei sang atail kin poakohng dahme Siohwa  ketin poakohng oh kailongki dahme e ketin kalahdeki. Eri kitail en mour ni ahl ehu me kin kaperenda kupwuren Siohwa. (Wadek Eimwos 5:15.) Ni atail kin kalaudehla atail kin ahneki sapwellimen Siohwa madamadau, e kin mengeila atail pahn peikiong ih.​—Mel. 119:104.

¹⁰ Ni mehlel, e sohte pahn mengei en peikiong Siohwa ahnsou koaros. Kitail anahne nantihong laud en kin loalopwoatohngete ih. Karasepe, sister kiripw men ele men pwopwoudida, ahpw e saikinte diarada brother men me pahn wia ohl pwopwoud mwahu ong ih. (1 Kor. 7:39) Ienge tohndoadoahk kan me sohte iang padahk mehlel mwein song en rapahkihong ih emen pwe ira en kin ehu. Sistero, ele pil ni ahnsowohte kin uhdahn sangat. Ahpw e koasoanedier teng me e sohte pahn pwoudiki emen me sohte kin papah Koht pwehki e men loalopwoatohng Siohwa. Kristian akan me duwehte sister menet kin wia mehn kahlemeng en loalopwoat me uhdahn mwahu. Siohwa pahn ketin kapaiada koaros me kin papah ih ni lelepek mehnda ma re mi nan irail apwal kan.​—Ipru 11:6.

11. Ia duwen emen eh kin mahkohng meteikan?

¹¹ Ia duwen emen eh kin mahkohng meteikan? Soangen aramas menet kin pilada en sohte kolokol eh lingeringer rehn meteikan me wiahiong ih sapwung ehu. Met sohte wehwehki me e pwungki dahme re wiahiong, de e pohnsehsehla me sapwungo wiawi. Ahpw e lemehda en dehr nsensuwedkihla. Ehu sapwellimen Siohwa irair keieu kaselel iei eh kin ketin kasalehda mahk. Paipel mahsanih me Siohwa kin ketin “diren mahk” ong irail kan me koluhla mehlel.​—Mel. 86:5.

12. (a) Ia uwen laud Siohwa eh kin ketin kasalehda mahk? (b) Ia wehwehn ahn Piter koasoia me Koht kin ketin “kamwakeleweisang” dipen emen?

¹² Ia uwen laud Siohwa eh kin ketin kasalehda mahk? Paipel mahsanih me Siohwa kin ketin “mwadang [“ni ahl laud,” NW]” mahkohng kitail. Met kin wehwehki e ketin mahkohng kitail ni unsek oh ni poatopoat. (Ais. 55:7) Ia duwen atail kak ese me Siohwa ketin mahkohng kitail ni unsek? Medewe duwen inou me kileldi  nan Wiewia 3:19. (Wadek.) Wahnpoaron Piter koasoia me ma me dipan men koluhla mehlel, e kin uhdahn nsensuwedkihla suwed me e wiahda. Ia duwen me dipan men eh kak ale sapwellimen Siohwa mahk? Piter koasoia me aramas dipano anahne “koluhla” oh “wiliakapwala oh wekiong Koht.” Emen me koluhla mehlel kin koasoanehdi me e solahr pahn pwurehng wia dihp me e wiahdao. (Mad. 3:8) Aramas menet eri sohpeisang eh suwedo, me wehwehki e uhdihsang wia me suwed oh kin wia soahng koaros me e kak pwehn kaperenda Koht. Eri Koht pahn kak ketin “kamwakeleweisang” dipe kan. “Kamwakeleweisang” kin wehwehki en limwihasang de irisasang. Eri ni Siohwa eh ketin mahkohng emen, e kin mwomwen me e ketin irisasang dipe kan. Met imwikihla Siohwa eh pahn ketin mahkohng ih ni unsek.​—Ipru 10:22; 1 Sohn 1:7.

13. Dahme mahsen pwukat “I solahr pahn tamanda arail sapwung kan” padahkihong kitail duwen Siohwa?

¹³ Ia duwen atail kak ese me Siohwa kin ni poatopoat ketin mahkohng dipatail kan? Kitail sukuhlki ia uwen laud en sapwellimen Siohwa mahk sang dahme e ketin mahsanihong Seremaia nan kokohp ehu duwen Kristian me keidi kan. (Wadek Seremaia 31:34.) Siohwa ketin mahsanih: “I pahn mahkikihong diparail kan oh I solahr pahn tamanda arail sapwung kan.” Eri ni Siohwa eh ketin mahkohng dipatail kan, e sohte kin ketin medemedewe duwen dipatail ko pwe en kak ketin pwurepwurehng kadeik de kaloke kitail. E kin ni poatopoat ketin mahkohng dipatail.​—Rom 4:7, 8.

14. Dahme kahrehda kitail kak nsenamwahula ni atail doudouloale uwen Siohwa eh kin ketin mahk? Menlau kihda ehu karasaras.

¹⁴ Kitail kak nsenamwahula ni atail kin doudouloale ia duwen Siohwa eh kin ketin mahk. Kitail pahn koasoiapene ehu karasaras duwen sister men me kitail pahn likwerihki Elaine. Sounpar tohto samwalahro, e pisikenla. Sounpar kei mwuri, e pwurehng pwurodo nan mwomwohdiso. Mendahki met, Elaine koasoia me e sohte uhdahn kamehlele me Siohwa ketin mahkohngehr ih. E kin pehm me Siohwa ketin poakohng meteikan laudsang eh ketin poakohng ih. Ahpw ni Elaine eh kin doudouloale ia duwen Paipel eh kawehwehda sapwellimen Siohwa mahk, e kin nsenamwahula. Karasepe, e wadek me ni Siohwa eh kin ketin kasalehda mahk, e kin mwomwen me e ketin kamwakeleweisang dipatail kan. Kitail sohte anahne nsensuwedki dipatailo erein atail mour. * Elaine doula nda: “I esehda me I sohte kin kamehlele me Siohwa uhdahn mahkohng ie, oh I kin medewe me dihp wet pahn katoutouwih ie erein ei mour. I ese me met pahn anahne ahnsou, ahpw I tepidahr pehm me I kak karanihala Siohwa, oh me mehkot sohla katoutouwih ie.” Siohwa iei Koht emen me uhdahn ketin limpoak oh mahk!​—Mel. 103:9

15. Ia duwen atail kak kahlemengih sapwellimen Siohwa mahk?

¹⁵ Kitail kak kahlemengih Siohwa sang ni atail pilada en mahkohng meteikan. (Wadek Luk 17:3, 4.) Tamataman me ni Siohwa eh ketin mahkohng emen, e solahr kin ketin medemedewe duwen dahme e wiahdao. Ni atail kin mahkohng meteikan, kitail pil kak uhdihsang medemedewe duwen dahme re wiahiong kitail oh sohla pwurehng koasoia arail sapwung kan.

16. (a) Ia wehwehn en mahkohng meteikan arail sapwung kan? Dahme met sohte wehwehki? (b) Dahme kitail anahne wia ma kitail men Siohwa en ketin mahkohng kitail?

 ¹⁶ Atail kin mahkohng meteikan sohte wehwehki me kitail kin pwungki dahme re wia, de kitail men aramas en wiahiong kitail sapwung. Ahpw e kin wehwehki me kitail pilada en solahr nsensuwed pahrail. Oh e kesempwal en tamataman me ma kitail men Siohwa en ketin mahkohng kitail, kitail anahne mahkohng meteikan. (Mad. 6:14, 15) Siohwa kin ketin  tamataman “me kitail uhdahn pwehl.” E ketin mwahngih me kitail sohte unsek. (Mel. 103:14) Eri ni meteikan ar kin nda de wiahda mehkot me kansensuwedihala kitail, kitail anahne tamataman me irail pil soh unsek, oh kitail anahne mahkohng irail ni mehlel.​—Ep. 4:32; Kol. 3:13.

17. Dahme kak seweseiuk en mahkohng emen me kamedekeiukala?

 ¹⁷ Ni mehlel, ekei pak e kin apwal en mahkohng meteikan. Pil ekei me keidi kan ni mwehin Pohl kin anahne sawas pwehn kapwungala kahpwal kan nanpwungarail. (Pil. 4:2) Ma riomw Kristian men wiahda mehkot me kamedekeiukala, dahme kak seweseiuk pwehn mahkohng ih? Medewehla dahme wiawihong Sohp. Elipas, Pildad, oh Sopahr wia kompoakepahn Sohp. Ahpw re kasarowe oh karaune me e wiahda soahng suwed kan. Sohp uhdahn nsensuwedkihla. (Sohp 10:1; 19:2) Met kahrehda Siohwa ketin padahkihong ohl silimen pwukat me re wiahda sapwung oh re anahne kohla rehn Sohp pwehn wiahda meirong ehu ong diparail. (Sohp 42:7-9) Ahpw Siohwa pil ketin padahkihong Sohp en wia mehkot. Dahieu met? E ketin padahkihong Sohp en kapakapki ohl pwukat. Sohp wia met oh Siohwa ketin kapaiada pwehki e kasalehda mahk. (Sohp 42:10, 12, 16, 17.) Dahme ke kak sukuhlki sang met? Ni omw kin ni mehlel kapakapki emen me kamedekeiukala, met kak seweseiuk en sohla nsensuwed pah.

18, 19. Dahme kitail men doulahte wia?

¹⁸ Kitail paiekihda atail kalaudehla atail sukuhlki sapwellimen Siohwa irair kaselel kan. Kitail sukuhlki me e mengei en keiong mpe, me e ketin sohte lipilipilki aramas, e ketin sapan, toupahrek, loalopwoat, oh mahk. Mehlel me pil mie soahng tohto me kitail kak esehla duwen Siohwa. Kitail pahn perenki kalaudehla atail sukuhlki duwen ih kohkohlahte. (Ekl. 3:11) Kitail kin pwungki wahnpoaron Pohl me ntingihedi: “Ia uwen laud en sapwellimen Koht kapai kan! Ia uwen loalen sapwellime erpit oh kupwurokong!” Kitail pil kak koasoiahki soahngohte duwen sapwellimen Koht limpoak oh sapwellime irair kaselel weneu ko me kitail koasoiapene nan iren onop pwukat.​—Rom 11:33.

¹⁹ Eri kitail en pousehlahte kalaudehla atail sukuhlki sapwellimen Siohwa irair kaselel kan, doudouloale oh alasang irair pwukat nan atail mour. (Ep. 5:1) Imwilahn met, atail limpoak ong Siohwa pahn kehlailla, oh kitail pahn karanihala ih. Kitail pahn kalaudehla atail pwungki sounmelkahkao me koulki: “A duwen ngehi, ia uwen kesempwal en ei karanih Koht.”​—Mel. 73:28.